#🌺🙏Sri Guru Dakshinamurthy🙏🌺 #🥰💝dakshinamurthy 🙏🙏❤️ శ్రీ మేధా దక్షిణామూర్తి: ఉన్నత విద్య, జ్ఞాపకశక్తి & పరీక్షా విజయం కోసం.............!! శివ జ్ఞాన స్వరూపుడు మేధా దక్షిణామూర్తి, విష్ణు జ్ఞాన స్వరూపుడు హయగ్రీవుడు. వీరిద్దరూ జ్ఞాన ప్రదాతలు, సకల విద్యలకు అధిష్టాన దేవతలు. విద్యార్థులకు చదువు పట్ల ఆసక్తి, జ్ఞాపకశక్తి పెరిగి పరీక్షలలో విజయం చేకూర్చడానికి శ్రీ మేధా దక్షిణామూర్తి ఆరాధన అత్యంత విశేషమైనది. దక్షిణామూర్తి: గురు స్వరూపం & జ్ఞాన ప్రదాత........ శివుని గురు స్వరూపాన్ని దక్షిణామూర్తిగా ఉపాసించడం భారతీయ సంప్రదాయంలో విశిష్ట స్థానాన్ని కలిగి ఉంది. "దక్షిణ" అంటే సమర్థత అని అర్థం. దుఃఖాలకు మూల కారణం అజ్ఞానం. అలాంటి అజ్ఞానం నాశనమైతే దుఃఖాలన్నీ తొలగిపోతాయి. దుఃఖాలకు శాశ్వత నాశనాన్ని కలిగించేది దయాదాక్షిణ్యం. ఈ దాక్షిణ్యం ఒక మూర్తిగా సాక్షాత్కరిస్తే, ఆ రూపమే దక్షిణామూర్తి. దక్షిణామూర్తి స్తోత్రం గురు గ్రహ అనుగ్రహాన్ని కూడా కలిగిస్తుందని పెద్దలు చెబుతారు. గురవే సర్వలోకానాం భిషజే భవ రోగిణాం నిధయే సర్వ విద్యానాం శ్రీ దక్షిణామూర్తయే నమ: అర్థం: అన్ని లోకాలకూ గురువు, సంసారమనే రోగంతో బాధపడుతున్న వారికి వైద్యుడు, మరియు అన్ని విద్యలకూ నిధి అయిన శ్రీ దక్షిణామూర్తికి నమస్కారం. దక్షిణామూర్తి ఆవిర్భావం & ప్రాముఖ్యత......... మహర్షులు దర్శించిన దక్షిణామూర్తులు అనేక రకాలు. మొట్టమొదట బ్రహ్మకు, ఆ తర్వాత వశిష్టునకు, సనకసనందనాదులకు కూడా దక్షిణామూర్తి సాక్షాత్కరించారు. దక్షిణామూర్తిని ఉపాసించేవారికి బుద్ధి వికసిస్తుంది, జ్ఞానం వృద్ధి చెందుతుంది. అందుకే విద్యార్థులకు ప్రత్యేకంగా దక్షిణామూర్తిని పూజించమని చెబుతారు. విష్ణు, బ్రహ్మ, సూర్య, స్కంద, ఇంద్ర తదితరులు కూడా దక్షిణామూర్తిని ఉపాసించి గురుత్వాన్ని పొందారు. దక్షిణామూర్తి రూపాలు.......... మంత్రశాస్త్రం అనేక దక్షిణామూర్తులను ప్రస్తావించింది. ఆ రూపాలు వరుసగా: * శుద్ధ దక్షిణామూర్తి * మేధా దక్షిణామూర్తి * విద్యా దక్షిణామూర్తి * లక్ష్మీ దక్షిణామూర్తి * వాగీశ్వర దక్షిణామూర్తి * వటమూల నివాస దక్షిణామూర్తి * సాంబ దక్షిణామూర్తి * హంస దక్షిణామూర్తి * లకుట దక్షిణామూర్తి * చిదంబర దక్షిణామూర్తి * వీర దక్షిణామూర్తి * వీరభద్ర దక్షిణామూర్తి * కీర్తి దక్షిణామూర్తి * బ్రహ్మ దక్షిణామూర్తి * శక్తి దక్షిణామూర్తి * సిద్ధ దక్షిణామూర్తి మేధా దక్షిణామూర్తి విశిష్టత......... దక్షిణామూర్తి రూపాలలో, మేధా దక్షిణామూర్తి విద్యార్థులకు చదువును, జ్ఞాపకశక్తిని, విద్యా సంబంధిత విజయాలను ప్రసాదించగలడు. సరస్వతీదేవి తర్వాత విద్యాబుద్ధుల కోసం హిందువులు కొలిచే ప్రధాన దైవాలు శ్రీ మేధా దక్షిణామూర్తి స్వామివారు మరియు శ్రీ హయగ్రీవ స్వామివారు. ఈ దేవతలను పూజించడం వల్ల విద్యార్థులు తమ లక్ష్యాలను సాధించడంలో విజయం పొందుతారని ప్రగాఢ విశ్వాసం.