#PSSM World ನಾನು ಅದೃಷ್ಟವಂತ/ತೆ ಎನ್ನಿಸುವಂತೆ ನಿಮಗೆ ಮಾಡುವ ಸಂಗತಿಗಳು ಯಾವುವು? ೧. ನನಗೆ ಎರಡು ಕಣ್ಣು, ಕಿವಿ, ಕೈಕಾಲು ಮುಂತಾದ ದೈಹಿಕ/ಮಾನಸಿಕ ಅಂಗಗಳು ಸಹಜವಾಗಿವೆ. ಕಣ್ಣಿನ ದೋಷವಿದ್ದರೂ ಕನ್ನಡಕ ಅದನ್ನು ನಿವಾರಿಸಿದೆ. ೨. ತಂದೆ, ತಾಯಿ, ಅಜ್ಜಿ, ತಾತ, ಸಂಬಂಧಿಗಳ ಪ್ರೀತಿ, ಅನೇಕ ಸ್ನೇಹಿತರ ಸ್ನೇಹ ಬಾಲ್ಯದಿಂದ ಇಲ್ಲಿಯವರೆಗೂ ಸಿಕ್ಕಿದೆ. ೩. ಹುಟ್ಟಿ ಬೆಳೆದು ಸ್ವಂತವಾಗಿ ದುಡಿಯುವವರೆಗೂ ಊಟ,ಬಟ್ಟೆ, ವಸತಿಗೆ ಎಂದೂ ತಡೆಯಾಗಿಲ್ಲ. ೪. ನನ್ನನ್ನು ಬಿಟ್ಟರೆ ಬೇರೆ ಯಾರೂ ನನಗೆ ಓದಲು, ಬರೆಯಲು , ಕಲಿಯಲು ಬೇಡವೆಂದೋ , ಸಾಕೆಂದೋ ಎಂದೂ ತಡೆಯುತ್ತಿರಲಿಲ್ಲ. ೫. ಸ್ವತಂತ್ರವಾಗಿ ಆಲೋಚಿಸುವ , ಇಷ್ಟವಿದ್ದದ್ದನ್ನು ಮಾಡುವ ಅವಕಾಶ ನನಗಿದೆ. ಆಕಾಶವೇ ಮಿತಿ ಎನ್ನುತ್ತಾರೆ, ಪರೀಕ್ಷಿಸಲು ಹೋಗಿಲ್ಲವಷ್ಟೆ! ೬. ನನಗೆ ಬದುಕುವ ಹಕ್ಕಿದೆ, ಅದನ್ನು ಕಿತ್ತುಕೊಳ್ಳುವ ಅವಕಾಶ ಕಾಡಿಗೆ ಒಬ್ಬನೇ ಹೋದರೆ ಕೆಲವು ಮೃಗಗಳಿಗೆ ಸಿಗಬಹುದಷ್ಟೆ. ೭. ಒಮ್ಮೊಮ್ಮೆ ಅಪರಿಚಿತರು ನಿರೀಕ್ಷೆಯಿಲ್ಲದೆ ಮಾಡಿರುವ ಪುಟ್ಟ ಪುಟ್ಟ ಸಹಾಯಗಳು. ೮. ಅದ್ಭುತ ಕಾಲಮಾನದಲ್ಲಿ ಬದುಕುತ್ತಿರುವೆ, ಉದಯರವಿ ಮುಳುಗಿದರೆ ವಿದ್ಯುಚ್ಛಕ್ತಿ, ಎಡವಿ ಬಿದ್ದರೆ ಆಸ್ಪತ್ರೆ, ಹಾರಲು ವಿಮಾನ, ಅಂಗೈಯಲ್ಲಿ ವಿಶ್ವ (ಮೊಬೈಲ್!) ಇತ್ಯಾದಿ. ೯. ನನ್ನ ಮಗುವಿಗೆ ಆಟದ ಉಡುಗೊರೆ ಕೊಟ್ಟಾಗ ಅವನ ಮುಖದಲ್ಲಿನ ಸಂತೋಷ !