#🧟 പ്രേതകഥകൾ! #📙 നോവൽ #✍ തുടർക്കഥ #✍️ വട്ടെഴുത്തുകൾ #💥💤🌟 ദി ഡിസ്റ്റർബൻസ് ( വെള്ളത്തിലാശാൻ യൂണിവേഴ്സ്) ( കഥയും കഥാപാത്രങ്ങളും സാങ്കല്പികം. മരിച്ചവരോ മരിക്കാൻ പോകുന്നവരോ ആയി സാമ്യം തോന്നിയാൽ യാദൃശ്ചികം മാത്രം) …………………………………………… വിബിൻ എന്ന മനുഷ്യന്റെ ലോകം അവന്റെ ശരീരത്തിന്റെ അതിരുകളിൽ അവസാനിക്കുന്ന ഒന്നായിരുന്നു. ജനിച്ചുവീണപ്പോൾ ചുറ്റുമുള്ളവർ സന്തോഷം കൊണ്ട് കരഞ്ഞപ്പോൾ, വിബിൻ മാത്രം നിശബ്ദനായിരുന്നു. സാധാരണ ശിശുക്കൾ വിശക്കുമ്പോൾ ലോകം കേൾക്കെ കരയാറുണ്ട്; എന്നാൽ വിബിന് കരയാൻ മടി ആയിരുന്നു കരഞ്ഞു ബഹളം വെക്കുന്നതിനേക്കാൾ നല്ലത് വിശപ്പ് സഹിക്കുന്നതാണെന്ന് ആ പിഞ്ചുമനസ്സ് തീരുമാനിച്ചു. സ്വാർത്ഥതയുടെ ആ വിത്ത് അവനിൽ അന്ന് മുളപൊട്ടിയതായിരുന്നു. സ്കൂൾ കാലഘട്ടത്തിൽ അവന്റെ സഹപാഠി വിനു വാനിൽ നിന്ന് വീണ് ചോരയൊലിപ്പിച്ചു കിടന്നപ്പോൾ, വിബിൻ അങ്ങോട്ട് നോക്കിയത് സഹതാപം കൊണ്ടായിരുന്നില്ല. മറിച്ച്, തെറിച്ച രക്തത്തുള്ളികൾ തന്റെ പുതിയ വെള്ള ഷൂസിൽ വീണോ എന്നറിയാനായിരുന്നു. ഒരിക്കൽ വിനു പറമ്പിലെ കിണറ്റിൽ വീണപ്പോൾ, വിബിൻ ആ കിണറിന് സമീപം പോയി എത്തിനോക്കുക പോലും ചെയ്തില്ല. ആരെങ്കിലും കേൾക്കാൻ വേണ്ടി താൻ ഉറക്കെ നിലവിളിച്ചാൽ തന്റെ ശബ്ദം പതറുമെന്നും അത് തന്റെ തൊണ്ടയ്ക്ക് പ്രശ്നം ഉണ്ടാക്കുമെന്നും തൊണ്ട വേദന വരുമെന്നും അവൻ കരുതി. പകരം, വെയിലിൽ നിന്ന് രക്ഷപ്പെടാൻ കൈയിലുണ്ടായിരുന്ന കുട നിവർത്തിപ്പിടിച്ച് അവൻ ശാന്തനായി നടന്നുപോയി. വീട്ടിലെത്തിയ വിബിൻ തന്റെ അമ്മയോട് പറഞ്ഞത് ഇങ്ങനെയായിരുന്നു "അമ്മേ, വിനു കിണറ്റിൽ വീണു. വല്ലാത്ത ക്ഷീണം എനിക്കൊന്ന് ഉറങ്ങണം." അമ്മ ഞെട്ടി പ്പോയി ……. ബാംഗ്ലൂരിലെ ഒരു തിരക്കേറിയ ബസ് യാത്രയിൽ അവന്റെ ഈ സ്വഭാവം അതിന്റെ ഉച്ചസ്ഥായിയിലെത്തി. ജനാലയ്ക്കൽ തട്ടി വരുന്ന തണുത്ത കാറ്റേറ്റ്, ലോകത്തെ മുഴുവൻ അവഗണിച്ചുകൊണ്ട് ഹെഡ്‌ഫോണിൽ പാട്ടും കേട്ടിരിക്കുകയായിരുന്നു വിബിൻ. അപ്പോഴാണ് ഏഴുമാസം ഗർഭിണിയായ ഒരു സ്ത്രീ അവിടെയെത്തിയത്. നിൽക്കാൻ ഇടമില്ലാതെ അവർ വിയർത്തു തളർന്നു. ആ സ്ത്രീ വിബിനോട് സീറ്റ് കൊടുക്കാൻ ആവശ്യപ്പെട്ടപ്പോൾ അവൻ കണ്ണുതുറന്നു. എന്നിട്ട് ശാന്തമായി പറഞ്ഞു "ഈ തണുത്ത കാറ്റ് എന്റെ പുറത്ത് തട്ടുന്നത് എനിക്ക് വല്ലാത്തൊരു സുഖമാണ്. അതിനെയാണ് ഞാൻ റിലാക്സേഷൻ മോഡ്' എന്ന് വിളിക്കുന്നത്. നിങ്ങളുടെ ഗർഭവും ആരോഗ്യവും എന്റെ സൌകര്യത്തേക്കാൾ വലുതല്ല എന്റെ ഉത്തരവാദിത്വവും അല്ല വേണമെങ്കിൽ കാറിൽ പോകു." അവർ തളർന്നു വീണിട്ടും വിബിൻ ആസ്വദിച്ചു പാട്ടുകേട്ടു. അവരെ എടുത്തു മാറ്റാൻ വന്നവരോട് അവൻ പറഞ്ഞത്, "ആ സ്ത്രീയെ മാറ്റുമ്പോൾ എന്റെ കാലിൽ ചവിട്ടരുത് പുതിയ ഷൂ ആണ്" എന്നാണ്. “ എന്തൊരു മനുഷ്യൻ “ ആളുകൾ പിറുപിറുത്തു …… ബാംഗ്ലൂരിലെ ലോട്ടസ് ബയോ-ജനറ്റിക്സ്' എന്ന ലാബിൽ വിബിൻ ജോലിക്ക് ചേർന്നത് അവിടെ മനുഷ്യരുടെ ശല്യം കുറവായതുകൊണ്ടാണ്. അവിടെ നടന്ന "നിത്യാനന്ദ 6" എന്ന പരീക്ഷണം ലോകത്തെ മാറ്റിമറിക്കാൻ ശേഷിയുള്ള ഒന്നായിരുന്നു. അത് മനുഷ്യന്റെ നാഡീവ്യൂഹത്തെ മരവിപ്പിക്കാനും അമിതമായ ആനന്ദം നൽകാനും ഉദ്ദേശിച്ചുള്ള ഒരു സിന്തറ്റിക് ഡ്രഗ് ആയിരുന്നു. എന്നാൽ വിബിൻ അവിടെയും തന്റെ അലസത തുടർന്നു. ഒരു ഉച്ചസമയത്ത് ലാബിലെ മെയിൻ ചേംബറിൽ വലിയൊരു സ്ഫോടനം നടന്നു. ചുവന്ന ലൈറ്റുകൾ മിന്നി, അലാറങ്ങൾ മുഴങ്ങി. കെമിക്കലുകൾ പുറത്തേക്ക് പ്രവഹിച്ചു. എല്ലാവരും ജീവനും കൊണ്ട് ഓടിയപ്പോൾ, വിബിൻ തന്റെ സ്പെഷ്യൽ എർഗണോമിക് കസേരയിൽ ഗാഢനിദ്രയിലായിരുന്നു. സ്ഫോടനത്തിന്റെ ആഘാതത്തിൽ ടാങ്കുകൾ തകർന്ന് "നിത്യാനന്ദ 6" എന്ന നീലനിറത്തിലുള്ള ദ്രാവകം മുഴുവൻ അവന്റെ ദേഹത്തേക്ക് ഒഴുകി. അവന്റെ ചർമ്മത്തിലെ സുഷിരങ്ങളിലൂടെ ആ രാസലായനി അകത്തേക്ക് ആഴ്ന്നിറങ്ങി. കുറച്ചു അവൻ കുടിക്കാൻ വെച്ചിരുന്ന ചായയിലും വീണു കണ്ണുതുറന്ന വിബിൻ വിചാരിച്ചത് ഏതോ അലവലാതി തന്റെ ഉറക്കം കളയാൻ വെള്ളം തളിച്ചതാണെന്നാണ്. മേശപ്പുറത്തിരുന്ന ലായനി കലർന്ന ചായ അവൻ അലസമായി കുടിച്ചു. ശരീരത്തിൽ ഒട്ടിപ്പിടിച്ച പശപോലെയുള്ള ആ ദ്രാവകം അവൻ അലസമായി തുടച്ചുകളഞ്ഞു. “ ഛെ എന്താ ഇതൊക്കെ” അവൻ പിറുപിറുത്തു സാധാരണ ഒരാളാണെങ്കിൽ ആ നിമിഷം മരിച്ചു വീഴുമായിരുന്നു. പക്ഷേ വിബിന്റെ ശരീരം അങ്ങേയറ്റം മടിയുള്ളതായിരുന്നു അവന്റെ കോശങ്ങൾ ആ ലഹരിയെ സ്വീകരിക്കാൻ പോലും മടിച്ചു. പകരം, അവന്റെ രോഗപ്രതിരോധ സംവിധാനം ആ ലഹരിയെ ഒരു ഡിസ്റ്റർബൻസ്ആയി കണക്കാക്കി അതിനെതിരെ പോരാടി. ഫലം വിചിത്രമായിരുന്നു. വിബിന്റെ ശരീരം ലോകത്തിലെ ഏറ്റവും ശക്തമായ 'ആന്റി-യൂഫോറിക്' ഏജന്റായി മാറി. അവന്റെ രക്തത്തിന് ലഹരിയെ നശിപ്പിക്കാനുള്ള കഴിവ് ലഭിച്ചു. പക്ഷേ അതിലൊരു ഡാർക്ക്'വശമുണ്ടായിരുന്നു: വിബിൻ ആവേശഭരിതനായാൽ അവന്റെ ചുറ്റുമുള്ളവർക്ക് ലഹരി കൂടും.എന്നാൽ വിബിൻ അസ്വസ്ഥനായാൽ അവന്റെ ശരീരം 'അബ്സ്റ്റിനൻസ് വേവ്‌സ്' പുറപ്പെടുവിക്കും. ഇത് കേൾക്കുമ്പോൾ രസകരമായി തോന്നാം, പക്ഷേ അനുഭവിക്കുന്നവർക്ക് ഇത് മരണതുല്യമാണ്.ഒരു കുപ്പി മുഴുവൻ കുടിച്ചവന്റെ ഉള്ളിലെ ലഹരി ഒരു സെക്കൻഡ് കൊണ്ട് വിബിൻ വറ്റിക്കുമ്പോൾ, ആ വ്യക്തിയുടെ തലച്ചോർ ആഘാതം താങ്ങാനാവാതെ ഹാങ്ങ് ഓവർ മോഡിലേക്ക് പോകും. വിബിൻ സ്പർശിച്ചാൽ ലഹരി ലഹരിയല്ലാതാകും, അത് വെറുമൊരു വിഷമായി മാറും.ആ രാസപ്രവർത്തനം അവന്റെ കോശങ്ങളെ ഒരു വൈദ്യുത കാന്തിക വലയം പോലെ മാറ്റിമറിച്ചിരുന്നു. അവന്റെ ചുറ്റുമുള്ള വായുവിൽ പോലും ഒരുതരം വികിരണം പടരാൻ തുടങ്ങി …… ആ രാത്രി ബാംഗ്ലൂർ നഗരം വിറങ്ങലിച്ച ഒന്നായിരുന്നു. വിബിൻ തന്റെ കയ്യിലുള്ള ഡബിൾ ചോക്ലേറ്റ് ഫഡ്ജ് ഐസ്ക്രീം ആസ്വദിക്കുകയായിരുന്നു. തൊട്ടടുത്ത് ഒരു ഇരുപതുകാരി പെൺകുട്ടി റോഡ് മുറിച്ചുകടക്കാൻ ശ്രമിക്കുന്നുണ്ടായിരുന്നു. പെട്ടെന്ന് പാഞ്ഞു വന്ന ഒരു കാർ അവളെ ഇടിച്ചുതെറിപ്പിച്ചു. അവൾ തെറിച്ചു വീണത് വിബിന്റെ കാലുകൾക്ക് തൊട്ടുമുന്നിലാണ്. അവളുടെ എല്ലുകൾ തകർന്നു പുറത്തേക്ക് തള്ളിയിരുന്നു. രക്തം ഒരു അരുവിയായി വിബിന്റെ വെളുത്ത സ്‌നീക്കറുകളിലേക്ക് പടർന്നു. അവൾ വിറയ്ക്കുന്ന കൈകൾ കൊണ്ട് അവന്റെ കാലിൽ മുറുകെ പിടിച്ചു. "സഹായിക്കൂ..." എന്ന് അവൾ അപേക്ഷിച്ചു. വിബിൻ തന്റെ ഐസ്ക്രീം സ്പൂൺ വായിൽ വെച്ചുകൊണ്ട് അവളെ നോക്കി. അവന്റെ മുഖത്ത് ദേഷ്യമായിരുന്നു. "എടീ, ഇതിന് 250 രൂപയാ വില. നീ എന്റെ കാലിൽ പിടിച്ചപ്പോൾ ഈ കപ്പ് ഒന്ന് ആടി. അല്പം ചോക്ലേറ്റ് സിറപ്പ് താഴെ പോയി. അതിന്റെ പൈസ നീ തരുമോടി? ഹോ ശല്യം നിന്റെ ബ്ലഡ്‌ കാരണം ഷൂവിൽ കറ വീഴുമല്ലോ" മരണ വേദന യിലും ആ പെൺകുട്ടി അത് കേട്ട് ഞെട്ടി അവൾ മരണവേദനയിൽ പിടയുമ്പോൾ വിബിൻ പതുക്കെ കാൽ വലിച്ചുമാറ്റി. "നിനക്ക് ഹോസ്പിറ്റലിൽ പോകണം, ശരിയാണ്. പക്ഷേ എനിക്ക് ഈ ഐസ്ക്രീം ഉരുകുന്നതിന് മുമ്പ് കഴിച്ചു തീർക്കണം. മനുഷ്യർ മരിക്കുന്നത് പ്രകൃതി നിയമമാണ് അത് ദിവസവും നടക്കുന്ന കാര്യം, പക്ഷേ എന്റെ ഐസ്ക്രീം പാഴാകുന്നത് എനിക്ക് സഹിക്കാനാവില്ല." അവൻ ഓരോ സ്പൂണും വടിച്ചുകുടിക്കുമ്പോൾ അവൾ അവസാന ശ്വാസം വലിച്ചു. ആംബുലൻസ് വന്നപ്പോൾ വിബിൻ അവിടെ നിന്ന് പതുക്കെ നടന്നുനീങ്ങി, തന്റെ ഷൂസിലെ രക്തം ഒരു പുല്ലിൽ ഉരച്ചു മായ്ച്ചുകൊണ്ട്. …….. കുറച്ചു വർഷങ്ങൾക്ക് ശേഷം കൊച്ചി നഗരം സജിത്തിന്റെ ലിക്വിഡ് അപ്പോക്കലിപ്സിൽ പുകയുമ്പോൾ, വിബിൻ ഫോർട്ട് കൊച്ചിയിലെ ഒരു പഴയ ഹോംസ്റ്റേയിലെ ബാൽക്കണിയിൽ തന്റെ ഹെഡ്ഫോണും വെച്ച് പാട്ട് കേട്ടിരിക്കുകയായിരുന്നു. അവന് ചുറ്റും മദ്യമഴ പെയ്യുന്നുണ്ട്, താഴെ ആളുകൾ ലഹരിയിൽ മറിഞ്ഞു വീഴുന്നുണ്ട്. പക്ഷേ വിബിന് അതൊന്നും പ്രശ്നമല്ല. അവന് വേണ്ടത് തന്റെ കംഫർട്ട് ആണ്. തന്റെ റൂമിലെ എയർ കണ്ടീഷണറും, കേൾക്കുന്ന പാട്ടും ഐസ് ക്രീംമും തടസ്സപ്പെടാതിരുന്നാൽ മാത്രം മതി. പക്ഷേ, വിബിൻ പോലും വിചാരിക്കാത്ത ഒന്നുണ്ടായി. മദ്യം കഴിക്കാതെ ഒളിച്ചു താമസിക്കുന്നവരെ കണ്ടെത്താൻ ഇറങ്ങിയ സജിത്തിന്റെ സൈനികർ ആ ഹോംസ്റ്റേയിലേക്ക് ഇരച്ചു കയറി. ബിജു ജോണും കൂട്ടരും വിബിന്റെ മുറിയിലേക്ക് വാതിൽ ചവിട്ടിപ്പൊളിച്ച് അകത്തു കയറി. വിബിൻ കണ്ണടച്ച് സംഗീതം ആസ്വദിക്കുകയായിരുന്നു. "എടാ എഴുന്നേൽക്കടാ! ബിജു അവന്റെ ഹെഡ്ഫോൺ വലിച്ചൂരി നിലത്തെറിഞ്ഞു. വിബിൻ പതുക്കെ കണ്ണുതുറന്നു. അവന്റെ മുഖത്ത് ദേഷ്യമില്ലായിരുന്നു, പകരം ഒരുതരം അസ്വസ്ഥതയായിരുന്നു. "ഞാൻ സമാധാനമായി പാട്ട് ഇരിക്കുകയായിരുന്നു. നിങ്ങൾ എന്റെ ഹെഡ് ഫോൺ കേടുവരുത്തി." "പാട്ടോ? നിന്റെ ജീവൻ എടുക്കാൻ പോവാടാ ഞങ്ങൾ!" ബിജു ഒരു കുപ്പി മദ്യം വിബിന്റെ ബെഡിലേക്ക് ഒഴിച്ചു. വിബിന്റെ പ്രിയപ്പെട്ട സിൽക്ക് ബെഡ്ഷീറ്റിൽ മദ്യം പടർന്നു. വിബിന്റെ മുഖഭാവം മാറി. അവന്റെ കണ്ണുകളിൽ ഒരു തണുത്ത മിന്നൽ തിളങ്ങി. അവൻ തന്റെ കഫോർട് സോണിൽ -ൽ lനിന്ന് പുറത്തുവരാൻ നിർബന്ധിതനായിരിക്കുന്നു. വിബിൻ പതുക്കെ ബെഡിൽ നിന്ന് എഴുന്നേറ്റു.ബിജുവിന്റെ കൈയിൽ പിടിച്ചു “ പ്ലീസ് ഉപദ്രവിക്കരുത് “ സാധാരണ നിലയിൽ വിബിൻ ഒന്നും ചെയ്യില്ല, പക്ഷേ ഇപ്പോൾ അവൻ ഡിസ്റ്റർബ്ഡ്ആണ്. വിബിന്റെ ശരീരത്തിലെ ആന്റി-ബോഡികൾ വെറുമൊരു മരുന്നായല്ല, ഒരു പ്രഹരമായാണ് ബിജുവിന്റെ സിരകളിലേക്ക് പാഞ്ഞത്. ബിജുവിന്റെ ഉള്ളിലെ ലഹരി നിമിഷനേരം കൊണ്ട് വറ്റിപ്പോയി. പക്ഷേ അതോടൊപ്പം ഒരു കഠിനമായ തലവേദനയും അസ്വസ്ഥതയും ബിജുവിനെ പിടികൂടി. വിബിൻ അവനെ തൊടുമ്പോൾ ബിജുവിന് അനുഭവപ്പെട്ടത് തന്റെ ശരീരത്തിലെ സകല ഊർജ്ജവും വറ്റുന്നതായാണ്. “ അലവലാതികൾ എന്റെ ബെഡ് ഷീറ്റും സ്വസ്ഥതയും നശിപ്പിച്ചു “ വിബിൻ ആ മുറിയിൽ നിന്ന് പുറത്തിറങ്ങി. പുറത്ത് സജിത്തിന്റെ നൂറുകണക്കിന് ആളുകൾ. വിബിൻ അവരുടെ ഇടയിലൂടെ നടന്നു. അവൻ നടന്നു പോകുമ്പോൾ അവന്റെ ശരീരത്തിൽ നിന്ന് ഒരു 'ആന്റി-ലഹരി' പ്രഭാവലയം പുറപ്പെട്ടു. അവനെ തൊടാൻ വന്നവർക്കെല്ലാം കഠിനമായ ഹാങ്ങ് ഓവർ അനുഭവപ്പെട്ടു തുടങ്ങി. തല പൊട്ടിപ്പോകുന്ന വേദനയോടെ അവർ നിലവിളിച്ചു. “ എല്ലാത്തിനും വട്ടാണെന്ന് തോന്നുന്നു അല്ലെങ്കിൽ ഇങ്ങനെ ബഹളം വെക്കുമോ പ്ലീസ് ബഹളം ഉണ്ടാക്കരുത് ചെവി പൊട്ടുന്നു “ വിബിൻ അവരോട് റിക്വസ്റ്റ് ചെയ്തു …. സജിത്ത് ഏലിയാസ് വെള്ളത്തിലാശാൻ ആകെ അസ്വസ്ഥനായിരുന്നു. അയാളുടെ സാമ്രാജ്യത്തിൽ വിചിത്രമായ കാര്യങ്ങൾ സംഭവിക്കുന്നു. അയാളുടെ വിശ്വസ്തനായ ബിജു ജോണും കുറെ സൈനികരും ഫോർട്ട് കൊച്ചിയിലെ ഒരു മുറിയിൽ ബോധരഹിതരായി കിടക്കുന്നു. അവരെ പരിശോധിച്ച ഡോക്ടർമാർക്ക് ഒന്നും മനസ്സിലാകുന്നില്ല. "ഇവർക്ക് ഒരേസമയം പത്ത് വർഷത്തെ ഹാംഗ് ഓവർ അനുഭവപ്പെടുന്നു. രക്തത്തിൽ ലഹരിയില്ല, പക്ഷേ ശരീരം അതിന്റെ പരമാവധി വിഷാംശത്തോട് മല്ലിടുകയാണ്," ഡോക്ടർമാർ റിപ്പോർട്ട് നൽകി. സജിത്തിന്റെ ഗുണ്ടകൾ ഒരേ സമയം വിറച്ചും ഛർദ്ദിച്ചും തറയിൽ വീഴുന്നത് ഒരു നിസ്സാരനായ മനുഷ്യൻ കടന്നുപോയതിന് ശേഷമാണെന്ന് സിസിടിവി ദൃശ്യങ്ങൾ സൂചിപ്പിച്ചു. അത് വിബിൻ ആയിരുന്നു "ആരാണവൻ? ഏത് ഗ്യാങ്ങാണ് അവനെ അയച്ചത്?" സജിത്തിന്റെ ചോദ്യങ്ങൾക്ക് ആർക്കും ഉത്തരമില്ലായിരുന്നു. വിബിൻ കൊച്ചിയിലെത്തിയത് സമാധാനമായി കുറച്ചുദിവസം താമസിക്കാനായിരുന്നു. എന്നാൽ സജിത്തിന് അത് തന്റെ പദ്ധതി കൾ തകർക്കാൻ വന്ന പുതിയ ഏതോ ശക്തിയാണെന്നേ തോന്നിയിട്ടുള്ളൂ. …… വിബിൻ ഇപ്പോൾ കൊച്ചിയിലെ ഒരു ലക്ഷ്വറി ഹോംസ്റ്റേയിൽ തന്റെ സമാധാനം ആസ്വദിക്കുകയായിരുന്നു. പുറത്തെ ചൂട് അവനെ അലോസരപ്പെടുത്തുന്നുണ്ട്. എസി 16 ഡിഗ്രിയിൽ വെച്ച് അവൻ കമ്പിളി പുതച്ചു കിടന്നു. പെട്ടെന്നാണ് മുറിയുടെ വാതിൽ തകർക്കപ്പെട്ടത്. സജിത്തും അവന്റെ ആയുധധാരികളായ ഇരുപതോളം ഗുണ്ടകളും അകത്തേക്ക് ഇരച്ചുകയറി. വിബിൻ പതുക്കെ കണ്ണുതുറന്നു. തന്റെ ഉറക്കം തടസ്സപ്പെട്ടതിലുള്ള കടുത്ത ദേഷ്യം അവന്റെ മുഖത്തുണ്ട്. "നീയാണോ എന്റെ ആളുകളെ നശിപ്പിച്ചത്? നീ ഏത് ഡ്രഗ്ഗാണ് ഉപയോഗിക്കുന്നത്?" സജിത്ത് ഗർജ്ജിച്ചു. വിബിൻ എഴുന്നേറ്റു നിന്ന് വിയർപ്പുതുള്ളികൾ തുടച്ചു. "നിങ്ങൾ എന്റെ വാതിൽ നശിപ്പിച്ചു. ഈ മുറിയിലെ തണുപ്പ് മുഴുവൻ പുറത്തുപോയി. എനിക്ക് വിയർക്കുന്നു... എനിക്ക് വല്ലാത്തൊരു അസ്വസ്ഥത തോന്നുന്നുണ്ട്. ദയവായി പുറത്തുപോകൂ." സജിത്ത് പരിഹാസത്തോടെ വിബിന്റെ അടുത്തേക്ക് നീങ്ങി. വിബിൻ ഭയന്നില്ല, മറിച്ച് തന്റെ കംഫർട്ട് നഷ്ടപ്പെട്ടതിലുള്ള അമർഷത്തിലായിരുന്നു അവൻ. സജിത്ത് വിബിന്റെ കോളറിൽ പിടിച്ചു, "നിന്റെ ഈ അഹങ്കാരം ഞാൻ ഇന്ന് തീർക്കും." വിബിൻ സജിത്തിന്റെ കൈകളിലേക്ക് നോക്കി. അവന് തന്റെ ശരീരത്തിനുള്ളിൽ എന്തോ മാറ്റം സംഭവിക്കുന്നതായി തോന്നി. താൻ തൊടുന്നവരൊക്കെ എന്തിന് വീഴുന്നു എന്ന് അവന് അപ്പോഴും അറിയില്ലായിരുന്നു. സജിത്തിന്റെ മുഖം പെട്ടെന്ന് വിളറി വെളുത്തു. അയാൾക്ക് ശ്വാസം കിട്ടാതായി. വിബിന്റെ ശരീരത്തിൽ നിന്ന് പുറപ്പെടുന്ന ആ അദൃശ്യമായ തരംഗങ്ങൾ' സജിത്തിന്റെ നാഡീവ്യൂഹത്തെ തകർക്കാൻ തുടങ്ങുകയായിരുന്നു. ചുറ്റുമുള്ള ഗുണ്ടകൾക്ക് തലകറങ്ങാൻ തുടങ്ങി. അവർക്ക് ചുറ്റുമുള്ള ലോകം ആടാൻ തുടങ്ങി, മാരകമായ ഒരു ലഹരിയിൽ അവർ മുങ്ങിപ്പോയി. …… വിബിൻ ഇപ്പോഴും തന്റെ ശക്തിയെക്കുറിച്ച് അജ്ഞനാണ്. അവൻ കരുതിയത് സജിത്തിന് എന്തോ അസുഖം വന്നതാണെന്നാണ്. എന്നാൽ സജിത്ത് മരണതുല്യമായ വേദനയിലേക്ക് വഴുതിവീഴുമ്പോൾ, വിബിൻ തന്റെ കൈകളിലെ ആ നീലനിറത്തിലുള്ള സിരകൾ പടരുന്നത് ശ്രദ്ധിച്ചു. സജിത്തിന്റെ കണ്ണുകൾ പുറത്തേക്ക് തള്ളി. ചുറ്റുമുള്ള ഗുണ്ടകൾ എന്തുചെയ്യണമെന്നറിയാതെ മരവിച്ചു നിന്നു. വിബിന്റെ മനസ്സിൽ ഒരേയൊരു ചിന്ത മാത്രമേ ഉണ്ടായിരുന്നുള്ളൂ "എന്റെ തണുപ്പ് പോയി... ഇനി ഇവിടെ നിൽക്കാൻ പറ്റില്ല അലവലാതികൾ. എന്ത് കഷ്ടപ്പാടാണീ മനുഷ്യർ കാരണം സ്വസ്ഥത തരില്ല ഒറ്റ എണ്ണം!" “ നിന്നെ പിന്നെ എടുത്തോളാം കുരുത്തം കെട്ടവനെ “ സജിത്ത് വിറച്ചു കൊണ്ട് പറഞ്ഞു “ വേണ്ടാ ഞാൻ നടന്നു പൊക്കോളാം എവിടെ പോയാലും ഓരോ ശല്യങ്ങൾ വന്നോളും ഡിസ്റ്റർബ് ചെയ്യാൻ “ തറയിൽ കിടന്നു പിടയുന്ന സജിത്തിനെ സൈഡിലേക്ക് മാറ്റിക്കൊണ്ട്, വിബിൻ തന്റെ ലാപ്ടോപ്പ് ബാഗുമെടുത്ത് പുതിയൊരു എസി മുറി തേടി ആ രാത്രിയിൽ പുറത്തേക്കിറങ്ങി. പിന്നിൽ ഒരു വലിയ സാമ്രാജ്യം തകർന്നു വീഴുമ്പോഴും അവൻ ആലോചിച്ചത് കഴിക്കാൻ ഡബിൾ ചോക്ലേറ്റ് ഐസ്ക്രീം എവിടെ നിന്ന് കിട്ടും എന്നതിനെക്കുറിച്ച് മാത്രമായിരുന്നു ഇത്രയൊക്കെ സംഭവിച്ചിട്ടും സ്വന്തം ശക്തിയെ കുറിച്ചു അവനൊരു തിരിച്ചറിവുമില്ലായിരുന്നു.കൊച്ചി നഗരം ലഹരിയുടെ പിടിയിൽ നിന്നും പതിയെ പുറത്തു വരാൻ തുടങ്ങി എന്നാൽ അതിന് പുറകിലെ കാരണം ഏവർക്കും അജ്ഞാതമായിരുന്നു …….. End .