#PSSM World ಎಂದರೆ ಏನು? 'ಪ್ರೀತಿ'ಗೆ ಇದುವರೆವಿಗೂ ಸಾರ್ವತ್ರಿಕವಾದ, ಎಲ್ಲರೂ ಒಪ್ಪುವಂತಹ ವ್ಯಾಖ್ಯಾನವು ಇಲ್ಲ, ಹಾಗೂ ಎಂದಿಗೂ ಇರಲಾರದು. ಆದರೂ, ಪ್ರೀತಿಯನ್ನು ಹಲವಾರು ಭಾವನೆಗಳ ಸಮ್ಮೇಳನ ಎಂದು ಸ್ಥೂಲವಾಗಿ ಹೇಳಬಹುದು: ೧. ಬೇರೊಂದು ಜೀವಿಯೊಂದಿಗಿನ/ವಸ್ತುವಿನ ಒಡನಾಟದಿಂದ ಯಾವುದೋ ತಿಳಿದ/ತಿಳಿಯಲಾಗದ ಕಾರಣದಿಂದ ಉಂಟಾದ ಆನಂದವು/ಶಾಂತಿಯು ಮರೆಯಲಾರದಷ್ಟು ಇಷ್ಟವಾಗಿ, ಆ ಆನಂದವು ಮತ್ತೆ ಮತ್ತೆ ಬೇಕು ಎನಿಸಿ, ಅದು ಎಂದೆಂದಿಗೂ ಹೀಗೇ ಇರಲಿ ಎನಿಸಿ, ಅದು ಎಂದೂ ಕಳೆದುಹೋಗದೆ ಇರಲಿ ಎನಿಸಿ, ಉಳಿದೆಲ್ಲಕ್ಕಿಂತ ಅದೇ (ಅದೊಂದೇ!) ಹೆಚ್ಚಾದುದು ಎನಿಸಿ, ಅದರೊಂದಿಗೆ ಉಂಟಾಗುವ ಗಾಢವಾದ 'ನಂಟು'. ೨. ಆ ಜೀವಿಯು/ವಸ್ತುವು ತನ್ನದು, ತನಗೆ ಸೇರಿದ್ದು, ತಾನೂ ಅದಕ್ಕೆ ಸೇರಿದ್ದು ಎಂಬಂತಹ 'ಮಮಕಾರದ', 'ಸ್ವಾಮ್ಯದ', ಪಾರಸ್ಪರಿಕವಾದ ಸಂಬಂಧಧ' ನಂಟು. ೩. ಆ ಜೀವಿಗೆ/ವಸ್ತುವಿಗೆ ಸದಾ ಒಳ್ಳೆಯದೇ ಆಗಲಿ, ಅದು ಸದಾ ಸುಖವಾಗಿ ಹಾಗೂ ಕ್ಷೇಮವಾಗಿ ಇರಲಿ ಎಂಬ ಸದ್ಭಾವನೆಯ‌, ಹಿತವನ್ನೇ ಕೋರುವ/ಮಾಡುವ ನಂಟು. ೪. ಆ ಜೀವಿಯಿಂದ/ವಸ್ತುವಿನಿಂದ ತನಗೆ ಎಂದೂ ನೋವಾಗುವುದಿಲ್ಲ ಎಂಬ ಸರಳವಾದ, ಮುಗ್ಧವಾದ ವಿಶ್ವಾಸದ ನಂಟು; ಹಾಗೊಮ್ಮೆ ನೋವಾದರೂ ಅದನ್ನು ಗಮನಿಸದೆ, ಮನಸ್ಸನ್ನು ಕಹಿಯಾಗಿಸಿಕೊಳ್ಳದೆ, ಅದಕ್ಕೆ ಪ್ರತೀಕಾರವನ್ನು ಮಾಡದೆ, ಅದನ್ನೂ ಒಪ್ಪಿಕೊಂಡು, ಸಂತಸದಿಂದ ಒಳಿತನ್ನೇ ಕೋರುವ ನಂಟು. ೫. ಆ ಜೀವಿಗೂ ತನ್ನ ಬಗ್ಗೆ ‌ ಇದೇ ರೀತಿಯ ಭಾವನೆಗಳು ಇದೆ/ಇರಲಿ ಎಂಬ ತೀವ್ರವಾದ ನಂಬುಗೆಯ/ತುಡಿತದ ನಂಟು.