#🙏श्री गुरुदेव दत्त💐 निराश अवस्थेत आमच्या मुलाला पाहून मी म्हणालो ,काय झालं ? आज इतका हतबल दिसत आहेस ? म्हणाला .काका गेले काही दिवस कलियुगाचा प्रत्यय येत आहे . अहो विरोध करणे शक्य नाही पण अन्याय सहन तरी कसा करावा ? मी एकंदर परिस्थितीचा अंदाज घेतला आणि म्हणालो बैस इथे ,तुला दत्त माहात्म्यातील एक गोष्ट सांगतो . गालव मुनी जेव्हा जेव्हा काही अनुष्ठान करत तेव्हा तेव्हा राक्षस वर्ग त्यांना त्रास देत असे .या मंडळीत पातालकेतू हा मुख्य होता . गालव मुनींना काही सुचेना ,काय करावे ? शाप द्यावा तर पुण्यक्षय होईल आणि सर्व अनुष्ठाने सोडून द्यावीत तर ते कसे शक्य आहे ? त्यांनी कळवळून भगवंताची प्रार्थना केली आणि तितक्यात आकाशवाणी होत तिथे एक काळा अश्व खाली उतरला . आकाशवाणीत गालव मुनींना काय मार्गदर्शन झाले ? तर या अश्वाला घेऊन शत्रुजित राजाकडे जावे आणि यज्ञ रक्षणार्थ सहाय्य मागावे . गालव मुनी त्याप्रमाणे राजाकडे गेले आणि शत्रूजित राजाच्या मुलाने ऋतूध्वजाने या राक्षसांचा त्या अश्वावर बसून पाताल लोकापर्यंत पाठलाग करीत संहार केला . गुरुचरित्रात देखील सायंदेवाला एका यवन अधिकाऱ्याकडून भय निर्माण झाले . काय करावे ? एक लक्षात घेण्यासारखी गोष्ट म्हणजे सर्व कथाभागात त्या विरोधी मनुष्याचा नाश करावा म्हणून कुठेही प्रार्थना नाही किंवा सायंदेवाचा प्रयत्नही नाही . ज्याचे हृदयी गुरुस्मरण l भय कैचे तया दारुण ll जो अनन्य भावाने भगवंताला शरण जाईल त्याला अनुभव निश्चित आहे . महाराजांनी असा काही बुद्धिभेद केला कि पुढे सायंदेव पंधरा वर्षे सेवेत भयमुक्त होता . धसकाच घेतला असेल सायंदेवाचा . तेव्हा मुला ,तू देखील दत्त महाराजांना शरण जा . जो अनन्य भावाने शरण गेला तो भयमुक्त झाला . कोणतेही भय नाही .उपाय काय करायचा ते दत्त महाराज पाहून घेतील . आता वल्लभेश ब्राह्मण द्रव्य घेऊन निघाला आणि आडमार्गात त्याला चोरांनी गाठत त्याचा वध केला ,शेवटच्या क्षणी त्याने आर्ततेने हाक मारली ,धाव श्रीपादा धाव S S तात्काळ दत्त महाराज प्रकट झाले आणि त्यांनी चोरांचा वध केला . हाक मारताना आर्तता मात्र अवश्य आवश्यक आहे . आपला योगक्षेम ते चालवतात तेव्हा या योगक्षेमात सर्व काही आले .श्रीगुरुदेव दत्त !!!---अभय आचार्य