#🥰 ചങ്ക് കൂട്ടുകാർ ഷുഗർ കുറയുന്നത് മരുന്നിന്റെ അളവ് കൂടുന്നത് കൊണ്ട് മാത്രമല്ല;* *ശരീരത്തിൽ സംഭവിക്കുന്നത് എന്തൊക്കെ?* *നിങ്ങളുടെ നിലവിലെ പ്രമേഹ നിയന്ത്രണത്തിൽ ചില മാറ്റങ്ങൾ ആവശ്യമാണെന്ന് നിങ്ങളുടെ ശരീരം നൽകുന്ന സൂചനയാണിത്* *"ഞാൻ ദിവസവും 10,000 ചുവടുകൾ നടക്കാറുണ്ട്. രാത്രി ഭക്ഷണത്തിന് ശേഷം 500 മില്ലിഗ്രാം മെറ്റ്ഫോർമിൻ കഴിക്കുന്നുമുണ്ട്.* *എന്നാൽ ഉച്ചഭക്ഷണത്തിന് മുൻപും വൈകുന്നേരങ്ങളിലും എനിക്ക് കടുത്ത ക്ഷീണവും പഞ്ചസാര കുറയുന്ന അവസ്ഥയും അനുഭവപ്പെടുന്നു. ഇത് എന്താണ് സൂചിപ്പിക്കുന്നത്?"* എന്റെ ഒരു രോഗി അദ്ദേഹത്തിന്റെ അനുഭവത്തെക്കുറിച്ച് ഇങ്ങനെ പറയുകയുണ്ടായെന്ന് ന്യൂഡൽഹിയിലെ ഇന്ദ്രപ്രസ്ഥ അപ്പോളോ ഹോസ്പിറ്റൽസിലെ എൻഡോക്രൈനോളജി സീനിയർ കൺസൾട്ടന്റ് ഡോ.സപ്തർഷി ഭട്ടാചാര്യ വിശദീകരിച്ചു. *നിങ്ങളിൽ എത്രപേർക്ക് സമാനമായ അനുഭവങ്ങളുണ്ട്?* വ്യായാമം, ഭക്ഷണക്രമം, മരുന്നുകൾ എന്നിവ തമ്മിലുള്ള അസന്തുലിതാവസ്ഥയാണ് ഇത്തരം ലക്ഷണങ്ങൾക്ക് കാരണം. നിങ്ങളുടെ നിലവിലുള്ള രീതികളിൽ മാറ്റം വരുത്തേണ്ടതുണ്ട് എന്നാണ് ഇത് സൂചിപ്പിക്കുന്നതെന്ന് ഡോ.ഭട്ടാചാര്യ അഭിപ്രായപ്പെട്ടു. *എന്താണ് ഹൈപ്പോഗ്ലൈസീമിയ?* രക്തത്തിലെ പഞ്ചസാരയുടെ അളവ് 70 mg/dL-ൽ താഴെയാകുന്ന അവസ്ഥയാണിത്. വിറയൽ, തലകറക്കം, അമിതമായി വിയർക്കുക, വിശപ്പ്, ആശയക്കുഴപ്പം, ബോധക്ഷയം എന്നിവ ഇതിന്റെ ലക്ഷണങ്ങളാണ്. *പഞ്ചസാര കുറയാനുള്ള സാധ്യതകൾ* *1. മരുന്നുകൾ:* മെറ്റ്ഫോർമിൻ സാധാരണയായി കരൾ ഉൽപ്പാദിപ്പിക്കുന്ന പഞ്ചസാരയുടെ അളവ് കുറയ്ക്കുകയും ഇൻസുലിൻ പ്രവർത്തനത്തെ മെച്ചപ്പെടുത്തുകയുമാണ് ചെയ്യുന്നത്. മെറ്റ്ഫോർമിൻ മാത്രം കഴിക്കുന്നത് കൊണ്ട് പഞ്ചസാര അമിതമായി കുറയുന്നത് വളരെ അപൂർവ്വമാണ്. എന്നാൽ 'സൾഫോണൈലൂറിയ' വിഭാഗത്തിൽപ്പെട്ട മരുന്നുകളോ ഇൻസുലിനോ ഉപയോഗിക്കുന്നവർക്ക് പഞ്ചസാര പെട്ടെന്ന് കുറയാൻ സാധ്യതയുണ്ട്. നിങ്ങൾ കഴിക്കുന്നത് ശരിയായ മരുന്നാണോ എന്ന് ഡോക്ടറെ കണ്ട് ഉറപ്പുവരുത്തുക. പ്രമേഹത്തിന് കഴിക്കുന്ന മറ്റ് മരുന്നുകൾക്കൊപ്പം നാട്ടുചികിത്സകളോ മറ്റ് സപ്ലിമെന്റുകളോ ഉപയോഗിക്കുന്നുണ്ടെങ്കിൽ പ്രത്യേകം ശ്രദ്ധിക്കണം. ചില സന്ദർഭങ്ങളിൽ ഇത്തരം സപ്ലിമെന്റുകളിൽ അശാസ്ത്രീയമായി ചേർക്കുന്ന മരുന്നുകൾ പഞ്ചസാര അപകടകരമായി കുറയാൻ കാരണമായേക്കാം. *2. റിയാക്ടീവ് ഹൈപ്പോഗ്ലൈസീമിയ:* ഭക്ഷണം കഴിച്ച് 2–4 മണിക്കൂറുകൾക്ക് ശേഷം രക്തത്തിലെ പഞ്ചസാരയുടെ അളവ് കുറയുന്ന അവസ്ഥയാണിത്. പ്രമേഹത്തിന്റെ പ്രാരംഭ ഘട്ടങ്ങളിൽ, കാർബോഹൈഡ്രേറ്റ് അടങ്ങിയ ഭക്ഷണങ്ങൾ (പ്രത്യേകിച്ച് നാരുകൾ കുറഞ്ഞതും സംസ്കരിച്ചതുമായ ഭക്ഷണങ്ങൾ) കഴിക്കുമ്പോൾ ശരീരം അമിതമായി ഇൻസുലിൻ ഉത്പാദിപ്പിക്കുന്നത് മൂലമാണ് ഇത് സാധാരണയായി സംഭവിക്കുന്നത്. ഉച്ചഭക്ഷണത്തിന് മുൻപോ, അല്ലെങ്കിൽ വൈകുന്നേരങ്ങളിലോ ലളിതമായ കാർബോഹൈഡ്രേറ്റുകൾ അടങ്ങിയ ലഘുഭക്ഷണങ്ങൾ കഴിക്കുകയാണെങ്കിൽ രക്തത്തിലെ പഞ്ചസാരയുടെ അളവ് വളരെയധികം കുറയാൻ സാധ്യതയുണ്ട്. *3. ഭക്ഷണക്രമവും സമയവും:* കൃത്യസമയത്ത് ഭക്ഷണം കഴിക്കാതിരിക്കുന്നതോ, വ്യായാമത്തിനനുസരിച്ച് ഭക്ഷണക്രമത്തിൽ മാറ്റം വരുത്താതിരിക്കുന്നതോ ഹൈപ്പോഗ്ലൈസീമിയയ്ക്ക് കാരണമാകാം. *ഇത് എന്തിനെ സൂചിപ്പിക്കുന്നു?* നിങ്ങളുടെ നിലവിലെ പ്രമേഹ നിയന്ത്രണത്തിൽ ചില മാറ്റങ്ങൾ ആവശ്യമാണെന്ന് നിങ്ങളുടെ ശരീരം നൽകുന്ന സൂചനയാണിത്. നിങ്ങളുടെ ഡോക്ടർ മരുന്നുകളുടെ അളവ് പുനപരിശോധിച്ചേക്കാം. മെറ്റ്ഫോർമിൻ എന്ന മരുന്നിന്റെ സാധാരണ പാർശ്വഫലമല്ല ഹൈപ്പോഗ്ലൈസീമിയ, കാർബോഹൈഡ്രേറ്റ് ദഹനം സാവധാനത്തിലാക്കുന്ന ചില മരുന്നുകൾ ഇത്തരം സാഹചര്യങ്ങളിൽ സഹായകരമായേക്കാം. ചെറിയ അളവിൽ സന്തുലിതമായ ഭക്ഷണങ്ങൾ കഴിക്കുന്നത് രക്തത്തിലെ പഞ്ചസാരയുടെ അളവ് നിയന്ത്രിക്കാൻ സഹായിക്കും. സങ്കീർണമായ കാർബോഹൈഡ്രേറ്റുകൾ, പ്രോട്ടീൻ, ആരോഗ്യകരമായ കൊഴുപ്പുകൾ എന്നിവ ഇതിൽ ഉൾപ്പെടുത്തണം. കൃത്യമായ ഇടവേളകളിൽ രക്തപരിശോധന നടത്തുന്നതും, വ്യായാമത്തിന് മുൻപോ അല്ലെങ്കിൽ പഞ്ചസാരയുടെ അളവ് കുറയുന്നു എന്ന് തോന്നുമ്പോഴോ ലഘുഭക്ഷണം കഴിക്കുന്നതും ഹൈപ്പോഗ്ലൈസീമിയ നിയന്ത്രിക്കാൻ സഹായിക്കും. റിയാക്ടീവ് ഹൈപ്പോഗ്ലൈസീമിയയുടെ പ്രധാന കാരണം ഇൻസുലിൻ പ്രതിരോധവും, ആഹാരത്തിന് ശേഷം രക്തത്തിലെ പഞ്ചസാരയുടെ അളവ് കൂടുന്നതിനനുസരിച്ച് ഇൻസുലിൻ ഉൽപ്പാദിപ്പിക്കപ്പെടുന്നതിലെ സമയവ്യത്യാസവുമാണ്. ശരീരഭാരം കുറയ്ക്കുന്നത് ഇൻസുലിൻ പ്രതിരോധം കുറയ്ക്കാനും അതുവഴി ഇത്തരം അവസ്ഥകൾ ഒഴിവാക്കാനും സഹായിക്കും. *ഹൈപ്പോഗ്ലൈസീമിയ തടയാനുള്ള വഴികൾ* രക്തത്തിലെ പഞ്ചസാരയുടെ അളവ് നിരീക്ഷിക്കുക. കൃത്യമായ പരിശോധനകൾ മാറ്റങ്ങളും ലക്ഷണങ്ങളും തിരിച്ചറിയാൻ സഹായിക്കും. സങ്കീർണമായ കാർബോഹൈഡ്രേറ്റുകൾ, പ്രോട്ടീനുകൾ, ആരോഗ്യകരമായ കൊഴുപ്പുകൾ എന്നിവ അടങ്ങിയ ആഹാരം കഴിക്കുക. ദിവസം മുഴുവൻ ആവശ്യത്തിന് വെള്ളം കുടിക്കുന്നത് ശീലമാക്കുക. കൂടുതൽ സമയം നീണ്ടുനിൽക്കുന്ന വ്യായാമങ്ങളിൽ ഏർപ്പെടുമ്പോഴോ അതിന് മുൻപോ ലഘുഭക്ഷണം കഴിക്കുക. പെട്ടെന്നുണ്ടാകുന്ന ഹൈപ്പോഗ്ലൈസീമിയ നേരിടാൻ ഗ്ലൂക്കോസ് ടാബ്‌ലെറ്റുകൾ കൈവശം വെക്കുന്നത് നല്ലതാണ്. *(ഈ ലേഖനം പൊതുവായ വിവരങ്ങൾക്കായാണ്. ഇത് വൈദ്യോപദേശത്തിനോ രോഗനിർണ്ണയത്തിനോ ചികിത്സയ്ക്കോ പകരമല്ല. ആരോഗ്യ പ്രശ്നങ്ങൾക്കോ ജീവിതശൈലി മാറ്റങ്ങൾക്കോ എപ്പോഴും ആരോഗ്യ വിദഗ്ധന്റെ ഉപദേശം തേടുക)* #🏝️ പ്രവാസി #💪🏻 ആരോഗ്യ നുറുങ്ങുകൾ #👨‍👩‍👧‍👦 കുടുംബം #🤝 സുഹൃദ്ബന്ധം