அமெரிக்காவின் வீழ்ச்சிக்கு வித்திடும் டிரம்பின் போக்கு ஈரானை எதிர்த்து கடுமையான நிலைப்பாடு எடுத்து வருகிறார் டிரம்ப். ஆனால் வரலாறு சொல்லும் பாடங்களை அவர் புறக்கணித்து வருகிறார் என்பது பல அரசியல் ஆய்வாளர்களின் கருத்து. ஒரு நாட்டின் இராணுவ வலிமை மட்டும் போரை வெற்றிகரமாக முடித்துவிடாது; புவியியல், கூட்டணிகள், உள்ளூர் ஆதரவு, பொருளாதார சக்தி போன்ற பல அம்சங்கள் அதனை நிர்ணயிக்கின்றன. ரஷ்யா-உக்ரைன் போர் தொடங்கியபோது, வல்லரசான ரஷ்யா ஒரு மாதத்திற்குள் உக்ரைனை முறியடித்துவிடும் என பலர் கணித்தனர். ஆனால் நான்கு ஆண்டுகள் கடந்தும் அந்தப் போர் நீடித்து வருகிறது. எல்லையை பகிர்ந்து கொள்ளும் அண்டை நாடுகளுக்கிடையே கூட இவ்வளவு தூரம் போர் நீள்கிறது என்றால், கடல்கள் பல கடந்து தொலை தூரத்தில் உள்ள ஈரான் மீது போர் நடத்துவது எவ்வளவு சிக்கலானது என்பதை யூகிக்கலாம். ஈரான் என்பது பொருளாதார ரீதியாக பலவீனமான மற்றொரு வெனிசுலா அல்ல; அது மத்திய கிழக்கில் ஆழமான அரசியல், மதம் மற்றும் இராணுவ வலையமைப்பை கொண்ட நாடாகும். U.K. போன்ற அமெரிக்க நட்பு நாடுகளின் ஆதரவு உறுதியானதா என்ற கேள்வியும் எழுகிறது. ஐரோப்பிய சூழலும் தெளிவற்றதாகவே உள்ளது. மேலும் NATO உறுப்பினரான துருக்கி கூட தனித்துவமான நிலைப்பாட்டை எடுக்கக்கூடும். ஈரானைச் சுற்றி பல ஆயுதமேந்திய கிளர்ச்சிக் குழுக்கள் செயல் படுகின்றன. அவை நேரடியாக போரில் ஈடுபடா விட்டாலும், பிராந்தியத்தில் ஓர் அசாதாரண நிலையை உருவாக்கக்கூடும். இந்த சூழலில் U.S. நேரடி மோதலில் இறங்கினால், அது ஒரு குறுகிய கால இராணுவ நடவடிக்கையாக அல்லாமல் நீண்டகால சிக்கலாக மாற வாய்ப்புள்ளது. உள்நாட்டிலும் நிலைமை ஒன்றும் சீராக இல்லை. டிரம்பின் வெளிநாட்டு சாகசங்களை பெரும்பாலான அமெரிக்க மக்கள் விரும்பவில்லை. அண்டை நாடுகளான கனடா மற்றும் இந்தியா போன்ற ஜனநாயக நாடுகளுடனான அதன் உறவுகளும் நல்ல நிலைமையில் இல்லை என்ற விமர்சனங்கள் உள்ளன. இத்தகைய சூழலில் ஈரான் மீது விதிக்கப்படும் கட்டுப்பாடுகளை உலக நாடுகள் முழுமனதுடன் கடைப்பிடிப்பது சந்தேகமே. ரஷ்யா மற்றும் சீனா போன்ற வல்லரசுகள், இந்த மோதலின் மூலம் அமெரிக்காவிற்கு ஒரு சிறந்த பாடத்தைக் கற்றுக் கொடுக்க வேண்டும் என்ற மறைமுகமான திட்டங்களுடன் செயல்படலாம். எனவே, இப்படி பல்வேறு காரணங்களினாலும், டிரம்பின் ஈகோவினாலும் அரசியல், பொருளாதாரம் மற்றும் பாதுகாப்பு ரீதியாக U.S. பெரிய அளவில் பாதிக்கப் படக்கூடிய வாய்ப்புக்கள் உள்ளன. இந்தப் போரின் மூலம் இஸ்ரேல் ஓரளவுக்கு பாதுகாப்பு ரீதியான நன்மைகளைப் பெறக்கூடும். ஆனால் U.S.க்கு இது நீண்டகால பொருளாதார சுமை, பாதுகாப்பு அச்சம் மற்றும் உலகளாவிய செல்வாக்கு குறைதல் போன்ற விளைவுகளை ஏற்படுத்தும். வரலாறு காட்டுவது ஒன்றே — போர் தொடங்குவது எளிது; அதை முடிப்பது மிகக் கடினம். அது புரியாமல் எடுக்கப்படும் முடிவுகள், ஒரு வல்லரசின் வீழ்ச்சிக்கே வழிவகுக்கலாம். இஸ்ரேலுக்கு டிரம்பைப் போன்ற ஓர் ஆள் சிக்குவது அரிது. இதில், "இஸ்ரேல் டிரம்ப்புக்கு எப்படி, எதை வைத்து அழுத்தம் கொடுக்கிறது?" என்ற மறைமுகமான கேள்வியும் உள்ளது. எனி வே, விதி வலியது. அதை யாரும் வெல்ல முடியாது. ஒருவேளை இதுவே அமெரிக்கா ஈடுபடப்போகும் இறுதிப் போராகக்கூட இருக்கலாம்... அதை யார் கண்டது? ஒன்றும் சொல்வதற்கு இல்லை! #Trump #Nethanyahu #iran #usa #middleeast #israelnews #📺அரசியல் 360🔴 #🚹உளவியல் சிந்தனை