#🧟 പ്രേതകഥകൾ! #📙 നോവൽ #✍ തുടർക്കഥ #✍️ വട്ടെഴുത്തുകൾ #💥💤🌟 മീഞ്ചട്ടി മുഖം ( കഥയും കഥാപാത്രങ്ങളും സാങ്കല്പികം. മരിച്ചവരോ മരിക്കാൻ പോകുന്നവരോ ആയി സാമ്യം തോന്നിയാൽ യാദൃശ്ചികം മാത്രം) ……………………………………. ഇടുക്കിയിലെ ഹൈറേഞ്ച് പാതകളിലൂടെ ലൈലയുടെ പഴയ അംബാസഡർ കാർ കിതച്ചു കയറുകയാണ്. പുറത്ത് കോരിച്ചൊരിയുന്ന മഴയും കാടിന്റെ കറുത്ത ഇരുട്ടും. ബിജു പുറകിലിരുന്ന് ഒരു കുപ്പി തുറന്നു. "എടാ ആദർശേ, ഈ കാടിന് ഒരു പ്രത്യേക മണമുണ്ടല്ലോടാ... കരിയില കത്തുന്ന മണമോ അതോ ആരെങ്കിലും ചത്തോ?" ബിജുവിന്റെ തമാശ കേട്ട് ആദർശ് തന്റെ ഗോപ്രോ തലയിൽ ഉറപ്പിച്ചു. "ഗയ്സ്, വ്ലോഗിംഗിന് വേണ്ടി ഞങ്ങൾ ഇതാ മരണത്തിന്റെ മടിത്തട്ടിലേക്ക് പോവുകയാണ്! കേരളത്തിലെ മോസ്റ്റ് ഹോണ്ടഡ് തറവാടുകളിലൊന്നായ കരിമടം മന'യിലേക്കുള്ള യാത്ര. സബ്സ്ക്രൈബ് ചെയ്യാൻ മറക്കല്ലേ!" സന്ധ്യ ജനാലയിലൂടെ പുറത്തെ മൂടൽമഞ്ഞിലേക്ക് നോക്കി ഇരുന്നു. ലൈലയുടെ മുഖത്ത് മാത്രം ഒരുതരം ഗൗരവം നിഴലിച്ചു. ഈ തറവാട് അവളുടെ അപ്പൂപ്പന്റേതാണ്, വർഷങ്ങളായി ആരും അങ്ങോട്ട് പോയിട്ടില്ല. അവിടെ പതിയിരിക്കുന്ന രഹസ്യങ്ങൾ ലൈലയെപ്പോലും ഭയപ്പെടുത്തിയിരുന്നു. …… തറവാടിന്റെ മുന്നിലെത്തിയപ്പോൾ ബിജുവിന് ആവേശം കൂടി. മുറ്റത്തെ കിണറിന് അരികിൽ പായൽ പിടിച്ചു കിടക്കുന്ന ആ പഴയ മൺചട്ടി കണ്ട് അവൻ ആർത്തുവിളിച്ചു. "ഇതാണോ നിന്റെ അപ്പൂപ്പന്റെ ഫേമസ് മീഞ്ചട്ടി? ഇതിലിട്ടാണോ നിന്റെ അപ്പൂപ്പൻ സജിതൻ തമ്പി നാട്ടുകാരെയൊക്കെ കറി വെച്ചിരുന്നത്?" “ ഒന്ന് പോടാ “ ലൈല ദേഷ്യപ്പെട്ടു ആ മീഞ്ചട്ടിക്ക് രണ്ടു ഹോൾ ഉണ്ടായിരുന്നു—ആരോ വരച്ചു ചേർത്ത രണ്ട് കണ്ണുകൾ പോലെ. ബിജു ആ ചട്ടി എടുത്ത് തലയിൽ വെച്ചു. "നോക്കടാ... മീഞ്ചട്ടി മാസ്ക്! അയ്യോ, ഇതിനകത്ത് എന്തോ പശപശപ്പുള്ള സാധനം ഇരിക്കുന്നുണ്ടല്ലോ!" അവൻ ചിരിച്ചു. പക്ഷേ ആ പശപശപ്പ് പഴയ ചോരയും തലമുടിയും ഒട്ടിപ്പിടിച്ചതാണെന്ന് ആരും ശ്രദ്ധിച്ചില്ല. …….. ടക്... ടക്... ടക്... രാത്രി പന്ത്രണ്ട് മണിയായി. തറവാട്ടിലെ ജനാലകൾ കാറ്റിൽ ആഞ്ഞടിക്കുന്നു. ലൈബ്രറിയിൽ പഴയ പുസ്തകങ്ങൾ തിരയുകയായിരുന്നു ലൈല. പെട്ടെന്ന് മുകളിലെ നിലയിൽ നിന്ന് ഒരു ശബ്ദം കേട്ടു. ആരോ ഒരാൾ ചങ്ങലയിട്ട പാദങ്ങൾ വലിച്ചിഴച്ച് നടക്കുന്നതു പോലെ തോന്നി …… സിജി തന്റെ റൂമിൽ ഇരിക്കുകയായിരുന്നു. അവളുടെ വാതിൽക്കൽ ഒരു മുട്ടു കേട്ടു. "ബിജൂ... നിന്റെ പ്രാങ്ക് ആണെങ്കിൽ നിർത്തിക്കോ," അവൾ പേടിയോടെ പറഞ്ഞു. വാതിൽ തുറന്നപ്പോൾ അവൾ കണ്ടത് തറയിൽ ഇഴഞ്ഞു വരുന്ന ആദർശിനെയാണ്. അവന്റെ നാവുകൾ ക്രൂരമായി മുറിക്കപ്പെട്ടിരുന്നു. ചോര വായിലൂടെ ഒലിക്കുമ്പോഴും അവൻ മുകളിലേക്ക് കൈ ചൂണ്ടുന്നുണ്ടായിരുന്നു. പെട്ടെന്ന് തട്ടിൻപുറത്തുനിന്ന് ഒരു രൂപം ചാടി വീണു. മീഞ്ചട്ടി ധരിച്ച ആ രൂപം ആദർശിന്റെ ഫോൺ എടുത്ത് അവന്റെ തലയ്ക്ക് തന്നെ അടിച്ചു . "വ്ലോഗ് ചെയ്യണോടാ നിനക്ക്? ഇതാ നിന്റെ അവസാനത്തെ കണ്ടന്റ്!" ഒരു വോയിസ് ചേഞ്ചറിലൂടെ എന്ന പോലെ ആ രൂപം മന്ത്രിച്ചു. എന്നിട്ട് ഒരു കശാപ്പുകാരന്റെ വലിയ കത്തി കൊണ്ട് ആദർശിന്റെ നെഞ്ച് പിളർന്നു. എല്ലാം തന്റെ ക്യാമറയിൽ റെക്കോർഡ് ആകുന്നുണ്ടെന്ന് ആ കൊലയാളി ഉറപ്പുവരുത്തി. “ആ” സിജി ഇതൊക്കെ കണ്ടു ബോധമറ്റു നിലം പതിച്ചു ……… താഴെ ഹാളിൽ ബിജു അപ്പോഴും കുപ്പിയിലായിരുന്നു. "ആദർശേ... നീ പോയോടാ? ഒരു പെഗ് കൂടി അടിക്കാരുന്നു," അവൻ ഇരുട്ടിലേക്ക് നോക്കി വിളിച്ചു പറഞ്ഞു. പെട്ടെന്ന് മീഞ്ചട്ടി മുഖം ബിജുവിന്റെ മുന്നിൽ വന്നു നിന്നു. ബിജു മദ്യലഹരിയിൽ ചിരിച്ചു. "എടാ ആദർശേ ഇതൊക്കെ തലയിൽ വെച്ചാണോ നടക്കുന്നെ, ആ ചട്ടി കുറച്ച് ടൈറ്റ് ആണല്ലേ? നിനക്ക് ശ്വാസം മുട്ടുന്നില്ലേ എനിക്ക് തന്നെ കണ്ടിട്ട് ശ്വാസം മുട്ടുന്നു" വാചകം പൂർത്തിയാക്കുന്നതിന് മുൻപ് ആ കത്തി ബിജുവിന്റെ കഴുത്തിൽ ആഴ്ന്നു. " നിനക്ക് ഇപ്പൊ ശ്വസിക്കാൻ ബുദ്ധിമുട്ടുണ്ടെങ്കിൽ ഞാൻ അത് ശരിയാക്കിത്തരാം," കൊലയാളി പരിഹാസത്തോടെ പറഞ്ഞു. ബിജു പിടയുമ്പോൾ അവന്റെ കയ്യിലുണ്ടായിരുന്ന മദ്യക്കുപ്പി വാങ്ങി മുറിവിലേക്ക് കുത്തി ഇറക്കി. "ആൽക്കഹോൾ മുറിവ് ഉണക്കും എന്നല്ലേ നിന്റെ വിചാരം? അനുഭവിക്കടാ!" ബിജുവിന്റെ വേദന കണ്ട് കൊലയാളി ആദർശിന്റെ ഫോണിൽ വീഡിയോ എടുത്തു. "ഗയ്സ്, ബിജുവിന് മദ്യം ഡയറക്റ്റ് ആയി കൊടുക്കുകയാണ്. ലൈക്ക് ഷെയർ ആൻഡ് സബ്സ്ക്രൈബ്! ഹ ഹ ഹ" ……… ലൈലയും സന്ധ്യയും ബോധം തിരിച്ചു കിട്ടിയ സിജിയും ലൈബ്രറിയിൽ ഓടി ഒളിച്ചു. ലൈലയ്ക്ക് ഒരു പഴയ ഡയറി കിട്ടി. അതിൽ അവളുടെ സജിതൻ തമ്പി അപ്പൂപ്പൻ കുറിച്ചിരുന്നു: "ഈ തറവാടിന്റെ ഐശ്വര്യത്തിന് വേണ്ടി ഞാൻ ഒരു ബലി നൽകി. ആ സ്ത്രീയുടെ ആത്മാവ് മീഞ്ചട്ടിയിലാണ്. അവൾ തിരിച്ചു വരും, ഇവിടെ വരുന്ന ഓരോരുത്തരെയും അവൾ കൊന്നുതള്ളും." "അപ്പോൾ ഇത് ആത്മാവാണോ?" സിജി വിറയലോടെ ചോദിച്ചു. പെട്ടെന്ന് മുറിയിലെ വെളിച്ചം അണഞ്ഞു. മിന്നൽ വെളിച്ചത്തിൽ ലൈബ്രറിയിലെ വലിയ കണ്ണാടിയിൽ ഒരു രൂപം കണ്ടു. മീഞ്ചട്ടി ധരിച്ച രൂപം! അവർ ചിതറി ഓടി. ലൈല കിച്ചണിലേക്കും സന്ധ്യയും സിജിയും മുകളിലേക്കും. കിച്ചണിൽ ഒളിച്ചിരുന്ന ലൈലയ്ക്ക് മുകളിൽ നിന്ന് സിജിയുടെ നിലവിളി കേട്ടു. അവൾ ഓടിച്ചെന്നു. അവിടെ കണ്ടത് ഭയാനകമായിരുന്നു. സിജിയുടെ കഴുത്തിൽ കത്തി ആഴ്ന്നിറങ്ങിയിരുന്നു. അവൾ മരിച്ചു കിടക്കുന്നു. ലൈല ആ രൂപത്തിന് നേരെ ഒരു മൺവെട്ടി എടുത്തു വീശി. "ആരാണ് നീ? എന്റെ സുഹൃത്തുക്കളെ നീ എന്തിന് കൊന്നു?" ……. കൊലയാളി സാവധാനം തന്റെ മീഞ്ചട്ടി തലയിൽ നിന്ന് മാറ്റി. ലൈലയുടെ കണ്ണുകൾ വിടർന്നു. അത് സന്ധ്യയായിരുന്നു! അവളുടെ മുഖത്ത് യാതൊരു ഭാവവ്യത്യാസവുമില്ല. അവൾ ആദർശിന്റെ ക്യാമറ ലൈലയുടെ മുഖത്തിന് നേരെ പിടിച്ചു. "അപ്പൂപ്പൻ എഴുതിയത് സത്യമാണ് ലൈലാ ഹ ഹ ഹ," സന്ധ്യ ക്രൂരമായി ചിരിച്ചു. "പക്ഷേ ആ ബലി നൽകപ്പെട്ടത് ഒരു ആത്മാവല്ല. എന്റെ അമ്മയായിരുന്നു! നിന്റെ അപ്പൂപ്പൻ സ്വത്തിന് വേണ്ടി കൊന്ന എന്റെ അമ്മ! ഈ മീഞ്ചട്ടിയിൽ അമ്മയുടെ ചോരയുണ്ട്." ലൈല ഞെട്ടിപ്പോയി. "സന്ധ്യാ... നീ എന്താ ഈ പറയുന്നത്? അവരൊക്കെ നിന്റെ സുഹൃത്തുക്കളായിരുന്നില്ലേ?" "സുഹൃത്തുക്കളോ?" സന്ധ്യ പരിഹാസത്തോടെ ചോദിച്ചു. "അവർ എനിക്ക് വെറും പ്രോപ്പർട്ടികൾ മാത്രമായിരുന്നു. ആദർശിന്റെ വ്ലോഗിംഗിനെ എനിക്ക് വെറുപ്പായിരുന്നു, അതുകൊണ്ട് അവന്റെ നാവ് ഞാൻ എടുത്തു. ബിജു കുടിച്ച് നശിക്കുന്നത് കൊണ്ട് അവന് മുറിവിലൂടെ മദ്യം കൊടുത്തു. സിജി വെറും പേടിത്തൊണ്ടി ആയതുകൊണ്ട് അവളെ പേടിപ്പിച്ചു കൊന്നു. ഒരു ജീവന് പകരം നാല് ജീവൻ.അതാണ് എന്റെ കണക്കു. എന്റെ അമ്മ മരിച്ചപ്പോൾ ആരും വീഡിയോ എടുത്തില്ല ലൈലാ... പക്ഷേ നിങ്ങളുടെ മരണം മില്യൺ കണക്കിന് ആളുകൾ കാണും! ഗയ്സ്, ലൈലയുടെ ചോര വീഴാൻ പോകുന്നു. സ്റ്റേ ട്യൂൺഡ്!" …… പെട്ടെന്ന് മുറിയിൽ മീൻ കറിയുടെ രൂക്ഷമായ ഗന്ധം പടർന്നു. സന്ധ്യയുടെ പിന്നിലെ ഇരുട്ടിൽ നിന്ന് മറ്റൊരു രൂപം ഉയർന്നു വന്നു. സന്ധ്യ ധരിച്ചിരുന്ന അതേ മീഞ്ചട്ടി മുഖം! സന്ധ്യ ഞെട്ടിത്തിരിഞ്ഞു. "അമ്മേ...?" അവൾ മന്ത്രിച്ചു. ആ രൂപം സന്ധ്യയുടെ തോളിൽ കൈവെച്ചു. അമ്മയും മകളും ഒരുമിച്ച് ലൈലയുടെ നേരെ തിരിഞ്ഞു. ……… പിറ്റേന്ന് പോലീസ് എത്തുമ്പോൾ ആദർശിന്റെ ക്യാമറ മാത്രം അവിടെ ബാക്കിയുണ്ടായിരുന്നു. അതിൽ സന്ധ്യ മീഞ്ചട്ടി ധരിച്ച് ചിരിക്കുന്ന ദൃശ്യത്തിന് ശേഷം ഒരു നിഴൽ രൂപം സന്ധ്യയെ ചേർത്തുപിടിക്കുന്നതും, പിന്നീട് ക്യാമറയിലേക്ക് നോക്കി ആ രൂപം മീഞ്ചട്ടി മാറ്റുന്നതും പതിഞ്ഞിരുന്നു. ക്യാമറയിൽ തെളിഞ്ഞ ആ മുഖം പക്ഷെ ലൈലയുടേതായിരുന്നു! അവളുടെ കണ്ണുകൾ പൂർണ്ണമായും കറുത്തിരുന്നു. ……. End