08/03/2026 ആയ ഇന്ന് വലിയ നോമ്പിലെ നാലാം ഞായറാഴ്ചയിലേക്ക് നാം ഓരോരുത്തരും പ്രവേശിക്കുകയാണല്ലോ? ഈ ഞായറാഴ്ചയെ ക്നാനയ്തോ ഞായർ എന്ന് അറിയപ്പെടുന്നു. ക്നാനയ്തോ ഞായർ ആചരിക്കുന്ന ഈ ദിവസം നിങ്ങളുമായി പങ്കുവെക്കാൻ ആഗ്രഹിക്കുന്ന ഒരു സുവിശേഷ ഭാഗമാണ് മത്തായി 15:21-28. ഈ എട്ടു വചനങ്ങളെപ്പറ്റി ആഴമായി ചിന്തിച്ചപ്പോൾ എനിക്ക് മനസ്സിലാക്കുവാൻ കഴിഞ്ഞത് കനാൻ കാരിയുടെ വിശ്വാസം യേശുവിനാൽ പരീക്ഷിക്കപ്പെട്ട് മൂന്ന് തലങ്ങളിലൂടെ കടന്നുപോകുന്നുണ്ട് എന്നതാണ്. അതായത്, ദൃഢമായ വിശ്വാസം, ദൈവവിശ്വാസം എളിമ എന്നിങ്ങനെ. കനാൻസ്ത്രീയുമായി ബന്ധപ്പെട്ട് പറയുമ്പോൾ കനാൻ എന്ന വാക്കിന് തീക്ഷ്ണത ഉള്ളത് എന്ന ഒരു അർത്ഥമുണ്ട്. സുവിശേഷകൻ ഈ വചനത്തിലൂടെ പ്രാധാന്യം കൊടുത്തിരിക്കുന്നത് 'യേശുവിലുള്ള വിശ്വാസത്തിലും തന്റെ മക്കളോടുള്ള സ്നേഹത്തിലും അചഞ്ചലമായ തീക്ഷ്ണത' പുലർത്തിയ കനാൻ സ്ത്രീയുടെ വിശ്വാസത്തെയാണ്. കൂടുതൽ ആഴമായി ചിന്തിക്കുമ്പോൾ കാണാൻ കഴിയുന്നത് യേശുവിന്റെ പരസ്യജീവിതത്തിൽ അന്യജാതിയിലുള്ള ഒരു സ്ത്രീയുടെ വിശ്വാസത്തെയും, അവൾക്ക് ലഭിച്ച സൗഖ്യത്തെയും, വിവേചനമില്ലാത്ത ദൈവസ്നേഹത്തെയും പറ്റിയാണ്. ഇപ്പോൾ ഒരു വചനം എന്റെ മനസ്സിലേക്ക് കടന്നു വരുന്നു. യാക്കോബ്‌ 4 : 10 അതായത്, "കര്‍ത്താവിന്റെ സന്നിധിയില്‍ താഴ്‌മയുള്ളവരായിരിക്കുവിന്‍. അവിടുന്നു നിങ്ങളെ ഉയര്‍ത്തും" എന്ന്. ഈ വചനം എന്നോട് പറയുന്നത്. 'കാനാൻകാരിയുടെ എളിമയും വിശ്വാസവുമാണ് അവളെ ദൈവസന്നിധിയിൽ ഉയർത്തിയത്' എന്നാണ്. അവൾ നമുക്ക് കാണിച്ചുതരുന്ന മാതൃക 'ദൈവസമക്ഷം എളിമയോടെയും, ദീർഘവീക്ഷണത്തോടെയും, വിശ്വാസത്തോടെയും പ്രാർത്ഥിച്ചാൽ നമുക്കും അസാധ്യമായ കാര്യങ്ങളും സാധ്യമാകുമെന്ന ഒരു ഓർമ്മപ്പെടുത്തൽ' കൂടിയാണ്. പ്രിയമുള്ളവരെ, വിശ്വാസം വികാരത്തെ വീഴ്ത്തുകയും അഹങ്കാരം അനുസരണക്കേടിലേക്ക് എത്തിക്കുകയും ചെയ്യുന്ന ഈ കാലഘട്ടത്തിൽ ജീവിക്കുന്ന നാം ഓരോരുത്തർക്കും കാനാൻകാരിയുടെ ആഴമായ എളിമയും വികാരത്തെ ജയിക്കുന്ന വിശ്വാസവും ലഭിക്കാൻ തീക്ഷ്ണതയോടെ പ്രാർത്ഥിക്കാം. ദൈവം നിങ്ങളെ ഓരോരുത്തരെയും സമൃദ്ധമായി അനുഗ്രഹിക്കട്ടെ എന്ന് പ്രാർത്ഥിക്കുന്നു. കടപ്പാട്: ബിനോജ് ബാബു (ദി ഹാപ്പി ഫാമിലി) #💞 നിനക്കായ് #😇 ഇന്നത്തെ ചിന്താവിഷയം #വലിയ നോമ്പ് സ്റ്റാറ്റസ് #വലിയ നോമ്പ് കാലം