கர்த்தாதி கர்த்தன் உலகளந்த ஆண்டவர் அய்யா வைகுண்டர் அருளிய அகிலத்திரட்டு அம்மானை ஐந்தாம் நாள் வாசிப்பு தொடர்ச்சி - நாள் 12.01.2026. . அய்யா துணை . தினமொரு நேரம் எந்தன் திருமொழி யதனைக் கேட்டால் பனிவெள்ளம் போலே பாவம் பறந்திடும் நிசமே சொன்னோம் – அய்யா வைகுண்டர். . அகிலம் ========= மகாவிஷ்ணு திருவனந்தபுரம் அடைதல் ===================== புலச்சிக்கு அருளியது ===================== என்றந்தக் கேத்திரனுக்(கு) இத்தனையுந் தான்கூறி அன்றந்த நீசன் அவ்வூரி லெம்பெருமாள் நீச னிடத்தில் நீலவண்ணர் வந்ததுதான் தேச மறிய செச்சை புலச்சிகண்டு ஒளித்தா ரொருஇடத்தில் ஊர்தேச முமறிய விழித்தாள் புலச்சி விதமறிந் தெல்லோரும் நீச னறிந்து நெருங்கமணி மேடைவைத்து வீசை முறுக்கி விசையாக அந்நீசன் கோவில் சிவாலயங்கள் கொந்துகொந் தாயமைத்துப் பாவித்துப் பூசை பண்ணத் துணிந்தனனே மேடைக்குக் கால்கள் மிகுத்தத்தங்கத் தால்நிறுத்தி வாடைக் கமகமென வாத்தியங்கள் நின்றதிர தீபம் புலச்சி தீவட்டித் தான்கொடுக்கப் பாவக் குடும்பத்தோர் பண்ணினார் பூசையது . விளக்கம் ========= . இந்த உலகத்தில் தர்ம நியதிகள் பிறளாத ஆட்சியை ஏற்படுத்திய பிறகே நான் பூசை புனக்காரங்களை ஏற்பேன் என்று சேத்திரனின் வினாவிற்கு விடையருளிய மகாவிஷ்ணு அன்றே திருவனந்தபுரத்திற்கு வந்து சேர்ந்தார். . தாம் அங்கே வந்துள்ளதை நாடறிய வேண்டும் என நினைத்த மகாவிஷ்ணு, நீசகுலத்தினரால் கடைச் சாதிகளில் இதுவும் ஒரு சாதி என ஒடுக்கப்பட்ட, புலையன், புலைச்சி என ஒதுக்கப்பட்ட வகுப்பில் பிறந்த ஒரு பெண்மணியின் பார்வையில், உதயச் சந்திரன் போல், இன்னும் சொல்வதானால் குழைந்து வைத்த செஞ்சாந்து நிறத்தில் சிவந்த நீலம் கலந்தது போன்ற தம் திருமேனியைக் காட்டி மறைந்தார். . அந்த ஜோதி வடிவான திருமேனியை, சுந்தரவடிவத்தைக் கண்ணுற்ற அந்தக் காரிகையோ, அதிர்ச்சியுற்றாள். சற்று நேரத்தில் அருண்டெழுந்தாள். தான் கண்ட காட்சி எங்கேயென எண்திசையும் ஏறிட்டுப் பார்த்தாள். இறுதியாகத் தான் இது இறைவனின் தோற்றமென தெளிவு பெற்றாள். கடவுளே எனக் கதறினாள். இந்த இடத்தில் இறைவனைக் கண்டேனென ஏகமறியக் கூவினாள். கூடினர் மக்கள். வினவினர் அவளிடம். அந்த அப்பாவி பெண்ணோ, தான் கண்ட அற்புதக் காட்சியை அனைவரும் அறியும்படி ஆனந்தக் கண்ணீரோடு விவரித்தாள். . இச்செய்தி திருவாங்கூர் மன்னனின் செவிகளுக்கு எட்டியது. உடனே அந்தப் பாமரப் பெண்மணியின் கண்களில், கார்முகில் வண்ணன் காட்சியளித்த அந்தத் திருவிடத்தில் மிகப்பெரிய ஆலயம் ஒன்றை அமைத்தான். கருவறை மேடையில் நிறுவப்பெற்ற கால்களுக்கெல்லாம் தங்கத் தகடு பொதிந்து, மகாவிஷ்ணு எப்பொழுதும் அங்கேயே உறைந்திருக்கிறார் என்ற பாவனையோடு எந்நேரமும் பணிவடைகள் செய்வதற்கான ஏற்பாடுகளைச் செய்தான். . பன்னீர், சந்தனம், சவ்வாது போன்ற வாசனை வஷ்துக்கள் அந்த ஆலயத்தில் தமக்குரிய குணத்தை மணமாக, இதமாகச் சொரிந்தன. வாத்தியங்களோ வகை வகையாக ஒலித்த வண்ணமாயின. அரசனால் அமைத்து ஆராதிக்கப்படும் அந்த ஆலயத்திற்கு தீபமேற்றுவதற்கான நெருப்போ, அன்று மகாவிஷ்ணுவை உதயச்சந்திரத் திருமேனியனாய்க கண்டாளே, அந்த எளிய குலத்து ஏந்திழையாள் கொடுத்து வந்தாள். இவ்வகையான ஏகோபித்த ஏற்பாடுகளோடு அந்த பாவக் குடும்பத்தோராகிய மன்னனின் வம்சத்தார் மகாவிஷ்ணுவிற்கு வகை வகையாய்ப் பணிவிடை புரிந்தனர். . . அகிலம் ======== நம்பூரி வேதியர்கள் நாடி யகமகிழ்ந்து பம்பைப் பரத்தை பகட்டுக்கை காட்டலோடு நாடி மகிழ்ந்து நல்ல அனந்தபுரம் கோடிநூ றாயிரம்போல் கூண்டரிய தீபமொடு தேடரிய மாமறையோர் சிந்தைகளித் தேயிருக்க நாடதிக மாகி நல்ல அனந்தபுரம் மாத மும்மாரி வருசிக்கத் தான்பொழிந்து வாரமுடன் செந்நெல் மாறாம லேவிளைந்து தென்னங் குலைசிதறித் தேர்ப்போ லலங்கரித்து என்னென்ன பவிசு எல்லா மிகப்பெருத்து ஒப்பில்லாத் தேசம் உற்ற அனந்தபுரம் செப்பத் தொலையாது சிறந்தப் பெருமையது நன்றாகச் சீமை நாடோறு மேவாழ்க அன்றுஸ்ரீ ரங்கர் அங்கே யகமகிழ்ந்து நீசன் நினைத்த நினைவுபோ லெம்பெருமாள் தேசப் பவிசும் சிறப்பு மிகக்கொடுத்து நீசன் தனக்கெதிரி நீணிலத்தி லில்லையென்று தோசக் கலிப்புவியைச் சூட்டியர சாளுகையில் மதலைய தில்லாமல் மனஞ்சலித்து மாநீசன் குதலையி னேதுவினால் கொஞ்சஞ் சடைவாகி ஆதித் திருமால் அடியை மிகப்போற்றிச் சோதியே யென்றனக்குச் சிறுவனொன்று தாருமென்றான் . விளக்கம் ========== அதனால் நம்பூரிகளும், வேதியர்களும் மிக்க மகிழ்ச்சியடைந்தார்கள். பம்பை வாத்தியத்திற்கு இசைந்து தேவதாசியர்கள் நடனமாடி பக்தர்களுக்குப் பரவசமூட்டினர். அந்த ஆலயத்துள் ஏற்றி வைத்திருந்த புதிய திருவிளக்குகளோ நூறாயிரமோ என வியக்கத் தக்கதாய் பிரகாச்த்தன. இதையெல்லாம் கண்ணுற்ற நல்ல மறையோர்கள் மனமகிழ்ச்சி அடைந்தனர். . திருமாலின் வருகையால் திருவனந்தபுரமே திருவிழாக் கோலம் பூண்டிருந்தது. அதனால் மாதம் மும்மாரி முறையாகப் பொழிந்தது. நஞ்சையும். புஞ்சையும் நன்றாக மகசூலைத் தந்தது. இப்படி என்னென்ன செழிப்பும், சிறப்பும் ஒரு நாட்டிற்குத் தேவையோ அவை அனைத்தும் திருவாங்கூர் ராச்சியத்தில் மிகுதியாயின. எனவே, அந்நாடு ஒப்பு உவமைகளுக்கு உட்படாத தேசமாய் விளங்கியது. . அப்போது அங்கே அமர்ந்திருந்த மகாவிஷ்ணு அக மகிழ்ச்சியோடு, திருவாங்கூர் மன்னனின் நினைவுகளுக்கேற்ப அந்த மன்னனுக்கும், அவன் ஆண்டு கொண்டிருந்த நாட்டிற்கும் எல்லாச் சிறப்புகளையும் கொடுத்ததால், அந்த மன்னன் தனக்கு எதிரி எவருமே இல்லை என்ற ஆணவத்தோடு அகங்காரம் மிகக் கொண்டான். . ஆகவே, உலகிலுள்ள ஒட்டுமொத்தக் கலியும் அவன் உள்ளத்திலே ஊடாடத் தொடங்கியது. அப்போதுதான் இத்தனை பவுசுகளையும் தமக்குப் பின் ஏற்று நடத்த தனக்கொரு வாரிசு இல்லையே என்ற ஏக்கம் மன்னனை வாட்டி வதைத்தது. எனவே, மகாவிஷ்ணுவை நினைத்து மனம் வருந்தினான். ஜோதி வடிவானவனே எனக்கொரு ஆண்குழந்தை வேண்டுமென்று அவன் அமைத்த ஆலயத்தினுள் மகாவிஷ்ணுவின் சிலையருகே அன்றாடம் நிலையாக நின்று வேண்டினான். . . தொடரும்... அய்யா உண்டு. #💚Ayya 💗 Vaikundar💚 #🚩அய்யா வைகுண்டர் 🚩 #அய்யா வைகுண்டர் {1008} #Ayya Vaikundar #அய்யா வைகுண்டர்