#PSSM World ಧರ್ಮ ಗ್ರಂಥಗಳ ಹೊರತಾಗಿ ಬೇರೆ ಸಾಮಾಜಿಕ ವೈಙಙಾನಿಕ ಐತಿಹಾಸಿಕ ವಿಷಯದ ಬಗ್ಗೆ ಏನು ಪ್ರಶ್ನಿಸದಿರುವದು ಏಕೆ?
ನಿಮ್ಮ ಪ್ರಶ್ನೆ ಒಂದು ಅರ್ಥದಲ್ಲಿ ಚೆನ್ನಾಗಿದೆ ಮತ್ತು ಸರಿಯಾಗಿದೆ.
ಬಹುಶಃ ನಿಮ್ಮ ಉದ್ದೇಶ ನಾವೇಕೆ ಅನ್ಯರ ಧರ್ಮಗಳ ಬಗ್ಗೆ ಹೆಚ್ಚು ತಲೆಕೆಡಿಸಿಕೊಳ್ಳಬೇಕು ಎಂಬುದು ಎಂದು ಕಾಣುತ್ತೆ.
ಮನುಷ್ಯನ ಬದುಕಿನಲ್ಲಿ ಧರ್ಮದ ಪ್ರಾಮುಖ್ಯತೆ ಎಷ್ಟು ಎಂದು ನಾವು ಮೂಲಭೂತವಾಗಿ ಪ್ರಶ್ನೆ ಮಾಡಿಕೊಳ್ಳಬೇಕು. ಧರ್ಮವು ಯಾವುದೇ ಇರಲಿ ಅದು ನೇರವಾಗಿ ನಮಗೆ ಜೀವನಕ್ಕೆ ಬೇಕಾದ ಆಹಾರ ವಸ್ತ್ರಗಳನ್ನು ಕೊಡಲು ಸಾಧ್ಯವಿಲ್ಲ.
ಮನುಷ್ಯರಾದವರು ಎಂದೋ ಸಾವಿರಾರು ವರ್ಷಗಳ ಹಿಂದೆ ಒಟ್ಟಿಗೆ ಬಾಳುವೆ ಮಾಡಲು ಒಂದಷ್ಟು ಕಟ್ಟುಪಾಡುಗಳನ್ನು ತಾವೇ ಹಾಕಿಕೊಂಡಿದ್ದಾರೆ. ಇದು ಸಾಮಾಜಿಕ ಅಥವಾ ಧಾರ್ಮಿಕ ರೂಪದಲ್ಲಿ ಸಮಾಜದಲ್ಲಿ ಮಿಳಿತವಾಗಿದೆ.
ಜನರಲ್ಲಿ ಅಕ್ಷರ ಜ್ಞಾನ ಹೆಚ್ಚಿದಂತೆ ಎಲ್ಲವನ್ನು ಪ್ರಶ್ನೆ ಮಾಡುವ ಮನೋಭಾವ ಹೆಚ್ಚುತ್ತಲೇ ಇರುತ್ತದೆ. ವೈಜ್ಞಾನಿಕವಾಗಿ ನೋಡಿದರೂ ಸಹ ಪ್ರಶ್ನೆ ಮಾಡಿ ಒಪ್ಪಿಕೊಳ್ಳುವ ರೀತಿ ಒಳ್ಳೆಯದು.
ಮನುಷ್ಯ ಬುದ್ಧಿವಂತ ಪ್ರಾಣಿ ಆದ್ದರಿಂದ ಅವನ ಯೋಚನೆ ಮತ್ತು ಕಲ್ಪನೆಗಳಿಗೆ ಇತಿಮಿತಿ ಇರುವುದಿಲ್ಲ.
ಉದಾಹರಣೆಗೆ ದೇವರು ಇದ್ದಾನೋ ಅಥವಾ ಇಲ್ಲವೋ ಎಂಬ ಜಿಜ್ಞಾಸೆ. ದೇವರನ್ನು ನಂಬುವವನು ಆಸ್ತಿಕನಾದರೆ ದೇವರೇ ಇಲ್ಲ ಎನ್ನುವವನು ನಾಸ್ತಿಕ ಎನಿಸಿಕೊಳ್ಳುತ್ತಾನೆ. ನಾಸ್ತಿಕರು ಕೂಡ ಮನುಷ್ಯರೇ ಅಲ್ಲವೇ?
ಹಾಗೆಯೇ ಪ್ರಾರ್ಥನೆ ಮತ್ತು ಪೂಜೆ ಸಲ್ಲಿಸುವವರು ಕೂಡ ಕೆಲವರಲ್ಲಿ ದೇವರಿಗೆ ರೂಪ ಕೊಟ್ಟರೆ ಕೆಲವರು ನಿರಾಕಾರ ದೇವರನ್ನು ನಂಬುತ್ತಾರೆ ಮತ್ತು ಆರಾಧಿಸುತ್ತಾರೆ. ಇವೆಲ್ಲವೂ ವೈವಿಧ್ಯಮಯ ಎಂದು ಸ್ವೀಕರಿಸಬೇಕು.
ಪ್ರಪಂಚದ ಭೂಭಾಗ ಬಹಳ ದೊಡ್ಡದಿದ್ದು, ಬೇರೆ ಬೇರೆ ಪ್ರದೇಶಗಳಲ್ಲಿ ಬೇರೆ ರೀತಿಯ ಧಾರ್ಮಿಕ ಆಚರಣೆಗಳು ಆರಂಭಗೊಂಡು ಜನರು ಅದನ್ನು ಅನುಸರಿಸುತ್ತಿದ್ದಾರೆ.
ವಿಜ್ಞಾನ ಬೆಳೆದು ಸಂವಹನವು ಹೆಚ್ಚು ಜನರನ್ನು ತಲುಪುವ ಸಾಧ್ಯತೆಯನ್ನು ಸಾಮಾಜಿಕ ಮಾಧ್ಯಮಗಳು ಕೊಟ್ಟಿರುವುದರಿಂದ ಜನರು ಎಲ್ಲಾ ವಿಷಯಗಳ ಕುರಿತಂತೆ ಮಾತನಾಡಲು ಆರಂಭಿಸಿದ್ದಾರೆ. ದುರಾದೃಷ್ಟ ಎಂದರೆ ಕೆಲವರು ನಕಾರಾತ್ಮಕ ವಿಚಾರಗಳನ್ನು ಹಂಚಿಕೊಳ್ಳುತ್ತಾರೆ.
ಇನ್ನು ನಿಮ್ಮ ಪ್ರಶ್ನೆಗೆ ಬಂದರೆ ಜನರಿಗೆ ಬದುಕಿಗೆ ಅವಶ್ಯವಾದ ಎಷ್ಟೊಂದು ವಿಚಾರಗಳ ಬಗ್ಗೆ ತಿಳುವಳಿಕೆ ಇಲ್ಲದಿದ್ದಾಗಲೂ ಕೇವಲ ಧರ್ಮದ ಬಗ್ಗೆ ಅನಗತ್ಯ ಚರ್ಚೆ ಮಾಡುತ್ತಿದ್ದಾರೆ ಎಂದು ನಿಮಗೆ ಅನಿಸಿರಬಹುದು. ಅದು ನಿಮ್ಮ ಅಭಿಪ್ರಾಯ ಮತ್ತು ನಿಮ್ಮ ಅಭಿಪ್ರಾಯದಲ್ಲಿ ಯಾವುದೇ ಗೊಂದಲವೂ ಇಲ್ಲ.
ಹಾಗೆಯೇ ಜನರ ಅಭಿರುಚಿ ಮತ್ತು ಆಸಕ್ತಿ ಗಳನ್ನು ನಾವು ಗೌರವಿಸಬಹುದಲ್ಲವೇ? ಅವರಿಗೆ ಬೇಕಾದ ವಿಷಯಗಳನ್ನು ತಿಳಿದುಕೊಳ್ಳುವ ಮುಕ್ತ ಸ್ವಾತಂತ್ರ ಸಾಮಾಜಿಕ ಮಾಧ್ಯಮಗಳು ಕೊಟ್ಟಿವೆ. ಬಹುಶಃ ಅದನ್ನು ಅವರು ಬಳಕೆ ಮಾಡಿಕೊಳ್ಳುತ್ತಿದ್ದಾರೆ ಎಂದು ತಿಳಿಯೋಣ.
ಧರ್ಮದ ವಿಷಯದಲ್ಲಿ, ಅದು ಯಾರದ್ದೇ ಧರ್ಮವಿರಲಿ ಪರಸ್ಪರ ತಿಳಿದುಕೊಳ್ಳುವುದರಲ್ಲಿ ಯಾರಿಗೂ ಹಾನಿ ಉಂಟಾಗುವುದಿಲ್ಲ ಎಂದು ನಾನು ನಂಬುತ್ತೇನೆ. ಅಂತಹ ಹಾನಿಕರ ಸನ್ನಿವೇಶಗಳನ್ನು ಉಂಟು ಮಾಡದೆ ಎಚ್ಚರದಿಂದ ಇರಬೇಕು ಎಂದು ಕೂಡ ನಂಬುತ್ತೇನೆ.