#గ్యాస్ సంక్షోభం 🫣 *గ్యాస్ సంక్షోభం పేరుతో 5% అదనం.. కేఫ్ బిల్లు వైరల్❗* 17.05.2026🔥 అసలు గ్యాస్ కు సంబంధం లేని నిమ్మరసం ఆర్డర్ చేస్తే గ్యాస్ ఛార్జ్ వేయడం ఏంటని నెటిజన్లు ఆ హోటల్ యాజమాన్యంపై తీవ్రంగా మండిపడుతున్నారు. ఆ వివరాలు ఇలా వున్నాయి.. సాధారణంగా హోటల్‌కు వెళ్తే సర్వీస్ ఛార్జ్ లేదా జీఎస్టీ వేయడం మనం చూస్తుంటాం. కానీ బెంగళూరులోని ఒక హోటల్ మాత్రం వింతగా 'గ్యాస్ సంక్షోభం ఛార్జ్' అంటూ కస్టమర్ల జేబులకు చిల్లు పెట్టింది. గ్యాస్ సిలిండర్ల కొరతను సాకుగా చూపి బిల్లుపై అదనంగా 5 శాతం వసూలు చేయడం ఇప్పుడు సోషల్ మీడియాలో పెద్ద చర్చకు దారితీసింది. అసలు గ్యాస్ కు సంబంధం లేని నిమ్మరసం ఆర్డర్ చేస్తే గ్యాస్ ఛార్జ్ వేయడం ఏంటని నెటిజన్లు ఆ హోటల్ యాజమాన్యంపై తీవ్రంగా మండిపడుతున్నారు. ఆ వివరాలు ఇలా వున్నాయి.. నిమ్మరసం తాగితే గ్యాస్ ఛార్జీ?: ఈ వింత సంఘటన బెంగళూరులోని ఒక ప్రముఖ కేఫ్‌లో జరిగింది. ఆదివారం సెలవు రోజు కావడంతో ఓ కస్టమర్ రిఫ్రెష్‌మెంట్ కోసం ఆ కేఫ్‌కు వెళ్లి రెండు గ్లాసుల లెమన్ జ్యూస్ ఆర్డర్ పెట్టి తాగారు. ఆ రెండు జ్యూస్‌ల ధర కలిపి రూ.358 అయ్యింది. అయితే బిల్లును జాగ్రత్తగా గమనించిన కస్టమర్ ఒక్కసారిగా అవాక్కయ్యారు. అందులో 'గ్యాస్ క్రైసిస్ ఛార్జ్' పేరుతో అదనంగా రూ.17.01 కలిపారు. అసలు నిమ్మరసం చేయడానికి గ్యాస్‌తో పనేముంది? పొయ్యి వెలిగించకుండా చేసే జ్యూస్‌కు కూడా గ్యాస్ ఛార్జీలు వసూలు చేయడమేంటని ప్రశ్నించారు. ఆ వినియోగదారులు తమకు వచ్చిన బిల్లును ఫోటో తీసి సోషల్ మీడియాలో పోస్ట్ చేయడంతో అది కాస్తా క్షణాల్లో వైరల్ అయ్యింది. హోటల్ వాళ్లు దోపిడీకి కొత్త కొత్త పేర్లు వెతుకుతున్నారు. 'రేపు గాలి పీల్చుకున్నందుకు ఎయిర్ ఛార్జ్ అని కూడా వేస్తారేమో' అంటూ నెటిజన్లు సెటైర్లు వేస్తున్నారు. గ్యాస్ ధరలు పెరిగితే వంట చేసే పదార్థాల ధరలు పెంచుకోవాలి కానీ, ఇలా విడివిడిగా ఛార్జీలు వేయడం ఏంటని సామాన్యులు ఆగ్రహం వ్యక్తం చేస్తున్నారు. ఈ బిల్లు కాపీ వేల సంఖ్యలో షేర్ అవ్వడంతో ఈ విషయం కాస్తా అధికారుల దృష్టికి వెళ్ళింది. రంగంలోకి దిగిన వినియోగదారుల కమిషన్: ఇక ఈ వ్యవహారం తీవ్రస్థాయికి చేరడంతో కర్ణాటక రాష్ట్ర ఆహార, పౌరసరఫరాలు మరియు వినియోగదారుల హక్కుల కమిషన్ వెంటనే స్పందించింది. హోటల్ యాజమాన్యం చేస్తున్న ఈ పని చట్టవిరుద్ధమని భావించిన అధికారులు, సదరు హోటల్‌కు నోటీసులు జారీ చేశారు. వినియోగదారులను మోసం చేస్తూ ఇలాంటి అక్రమ ఛార్జీలు వసూలు చేయడంపై వివరణ ఇవ్వాలని ఆదేశించారు. హోటల్స్ తమ ఇష్టానుసారంగా ఇలాంటి కొత్త కొత్త ఛార్జీలు వసూలు చేస్తే కఠిన చర్యలు తీసుకుంటామని అధికారులు హెచ్చరించారు. ఏదైనా సమస్య వచ్చినప్పుడు దాన్ని సాకుగా చూపి సామాన్యులను దోచుకోవడం సరైన పద్ధతి కాదు. బెంగళూరు కేఫ్ చేసిన ఈ పని ఇప్పుడు హోటల్ పరిశ్రమలో పెద్ద హాట్ టాపిక్‌గా మారింది. వినియోగదారులు కూడా తాము చెల్లించే బిల్లులను ఒకటికి రెండుసార్లు సరిచూసుకోవడం ఎంతో అవసరమని ఈ ఘటన మరోసారి గుర్తుచేస్తోంది. ఇక అక్రమంగా వసూలు చేసే ఛార్జీలపై గళమెత్తితేనే ఇలాంటి దోపిడీలకు అడ్డుకట్ట వేయగలం అంటున్నారు నెటిజన్స్.