#📙 നോവൽ - മുറ ചെറുക്കൻ...... 🔻 ഭാഗം _24 ✍️ രചന - Aysha akbar മോൾക്ക് ദോശ വേണ്ടേ..... പോയി മുഖം കഴുകി വാ.... നല്ല സൂപ്പർ ദോശ എടുക്കാം ഞാൻ.... ഗോപി അതും പറഞ്ഞു കൊണ്ട് ഇഷാനിയെ നോക്കുമ്പോൾ അവളൊന്നു പുഞ്ചിരിച്ചു..... അവൾ അടുക്കള പുറത്തേക്ക് നടക്കും വഴി സ്ലാബിനു മുകളിരുന്നിരുന്നവനെ യൊന്നു നോക്കി.... അതേ..... ആ മിഴികൾ ഒരു പ്രത്യേക ഭാവത്തോടെ തന്നെ നോക്കുന്നുണ്ട്.... അവളുടെ മനസ്സ് വല്ലാതെ നിറഞ്ഞത് പോലെ....... അവൾ പുറത്ത് പോയി വന്നതും തനൂജ അവൾക്കൊരു പ്ളേറ്റ് എടുത്ത് കൊടുത്തു....... കറുത്ത ഇരുമ്പ് ചട്ടിയിൽ നെയ് തടവി..... അതിലേക്ക് നുരഞ്ഞു പൊങ്ങി വന്ന മാവോഴിച്ചു പരത്തി ദോശയുണ്ടാക്കി ചട്ടുകം കൊണ്ടെടുത്ത് അവളുടെ പാത്രത്തിലേക്കിട്ട് കൊടുത്തത് ഗോപിയായിരുന്നു...... ഇത് സിൻഡ്രല്ല ക്കാണ്.... അതും പറഞ്ഞായിരുന്നു ആ അപ്പം അയാൾ അവളുടെ പാത്രത്തിലേക്കിട്ട് കൊടുത്തത്.... സിൻഡ്രല്ല യല്ല അച്ഛേ..... ഇഷാനി....... ഗോപിക്ക് തെറ്റ് പറ്റിയെന്ന വണ്ണം മീനുവത് പറയുമ്പോൾ ഗോപി അവളെയൊന്ന് നോക്കി..... ഞാനിവളെ സിൻഡ്രല്ല യെന്നേ വിളിക്കു...... ഗോപി അവളെ നോക്കി ഒരു ചിരിയോടെ അത്‌ പറയുമ്പോൾ അതിന്റെ കാരണം അറിയാത്തത് കൊണ്ട് തന്നെ ഇഷാനി കണ്ണുകളോന്ന് വിടർത്തിയിരുന്നു.... സച്ചുവിന്റെ അദരങ്ങളും എന്തിനോ ഒന്ന് വിടർന്നത് പോലെ..... അതെന്താ അങ്ങനെ..... സംശയം ചോദിച്ചത് മീനു തന്നെയായിരുന്നു ... അതങ്ങനെയാണ്...... നേർത്തൊരു പുഞ്ചിരിയോടെ അയാളതും പറഞ്ഞു തിരിയുമ്പോൾ അതേ ചിരി ഇഷാനിയിലേക്കും പടർന്നിരുന്നു....... അവൾ ചൂട് ദോശ പതിയെ വായിലേക്ക് വെച്ചിരുന്നു.... നെയ്യിൽ മൊരിഞ്ഞ ആ ദോശക്ക് പതിവില്ലാത്ത സ്വാധുണ്ടായിരുന്നു.... അതിലേറെ അവൾ ചുറ്റുമോന്ന് നോക്കി.... ഭക്ഷണത്തെക്കാൾ രുചി അവിടെ നിറഞ്ഞു നിൽക്കുന്ന സ്നേഹത്തിനാണെന്ന് അവൾക്ക് തോന്നി പ്പോയിരുന്നു.... അമ്മുവിനും മീനുവിനും സച്ചുവിനും ദോശ ചുട്ട് പാത്രത്തിലേക്കിട്ട് കൊടുക്കുന്നതോടൊപ്പം മുത്തഷിക്കും തനൂജക്കും അയാൾ കൊടുക്കുന്നുണ്ട്...... സാധാരണ ടേബിളിൽ എല്ലാവരും കൂടിയിരുന്നു കഴിക്കുന്നതേ വല്ലാത്ത സ്വാധായി തോന്നിയിരുന്ന അവൾക്ക് അത്‌ നൽകിയ ആനന്ദം ചെറുതായിരുന്നില്ല.... ഇങ്ങനെയും ജീവിക്കാം.... ഇത്ര കുഞ്ഞു കാര്യങ്ങളിലും സന്തോഷിക്കാമെന്ന് അവളറിയുകയായിരുന്നു... അയാൾ വരുന്നതിൽ നീരസം തോന്നിയിരുന്ന അവൾക്ക് ആ വരവോടെ ആ വീട് ഒന്ന് കൂടി വെളിച്ചമുള്ളതായി മാറിയത് പോലെ തോന്നിയിരുന്നു....... അയാളുടെ തമാശകളും വിശേഷങ്ങളും കേൾക്കാൻ എല്ലാവരുടെയും കൂടെ അവളുമിരുന്നിരുന്നു...... മീനുവിനെ നോക്കുന്ന അതേ കണ്ണിലൂടെ അദ്ദേഹം തന്നെ യും നോക്കുന്നത് അവളറിഞ്ഞു.... ആ ചേർത്ത് പിടിക്കലുകൾക്ക് അത്ര മേൽ ആത്മാർഥത യുണ്ടായിരുന്നു...... എപ്പോഴും ചിരിച്ചു മാത്രം കാണുന്ന അയാൾ ആ വീട്ടിലാകെ നിറഞ്ഞു നിൽക്കും പോലെ.... തന്റെ പപ്പയോക്കെ വീട്ടിലേക്ക് വന്നാൽ തന്നെ അവിടെയൊരു ശ്മശാന മാവാറാണ് പതിവ്..... ഒന്ന് ശ്വാസമെടിക്കാൻ പോലും ഭയമായിരിക്കും....... എന്നാൽ ഇവിടെയുള്ള അച്ഛൻ എല്ലാവരെയും ചിരിപ്പിച്ചു സന്തോഷിപ്പിച്ചു കൊണ്ടങ്ങനെ നടക്കുകയാണ്.... അതിനിടക്ക്.... ആ വീട്ടിലെ ഓരോ ജോലികളും ചെയ്യുന്നുണ്ട്...... എന്റെ സുന്ദരി പെണ്ണിനോരു റെസ്റ്റാവട്ടെ യെന്ന് പറഞ്ഞു അയാൾ താനൂജയുടെ കവിളിലൊന്ന് നുള്ളുമ്പോൾ ഏറെ നാണത്തോടെ ആ കവിളിണകൾ വിരിയുന്നത് ഇഷാനി കണ്ടു.... അവളുടെ ചൊടിയിൽ അവൾ പോലുമറിയാതൊരു പുഞ്ചിരി സ്ഥാനം പിടിച്ചിരുന്നു...... മനസ്സ് നിറയുന്ന ആ കാഴ്ചകളിൽ അവളുടെ മനസ്സ് കുരുങ്ങി കിടന്നിരുന്നു....... ഉച്ചക്കുള്ള ഭക്ഷണം പാകം ചെയ്തതും അമ്മാവൻ തന്നെയായിരുന്നു..... ആള് നല്ലൊരു കുക്ക് ആണെന്ന് ഇതിനോടകം അവൾക്ക് മനസിലായിരുന്നു..... അയാളുണ്ടാക്കുന്ന ഭക്ഷണത്തോടൊപ്പം അയാളുടെ സ്നേഹം കൊണ്ട് അവൾ അവളിലേക്ക് ചേർത്ത് വെച്ചിരുന്നു...... ഉച്ചക്ക് ഉറങ്ങി കിടക്കുന്ന ഗോപിയുടെ മുഖത്ത് മേക്കപ്പ് ചെയ്യാൻ മീനു ഇഷാനിയെയും കൂടെ കൂട്ടി........ മീനു ഓരോന്നും എടുത്ത് ആ മുഖത്ത് പുരട്ടുമ്പോൾ ഇഷാനിക്കെന്തോ ഒരു ഭയം തോന്നിയിരുന്നു...... എത്രയായാലും ഇതൊക്കെ ഇഷ്ടപ്പെടുമോയെന്നൊരു ഭയം..... എന്നാൽ പെട്ടെന്ന് ഉറക്കിൽ നിന്നുണർന്ന ആൾ അത്‌ കണ്ട് പൊട്ടി ചിരിക്കുകയാണ് ചെയ്തത്...... തങ്ങൾ രണ്ട് പേരുടെയും ചെവിയിൽ ചെറുതായി പിടിക്കുമ്പോൾ മീനു തന്റെ കയ്യും പിടിച്ചു കൊണ്ട് ചിരിയോടെ അവിടെ നിന്നോടിയിരുന്നു..... മനസ്സ് നിറഞ്ഞു നിൽക്കുന്ന ആനന്ദത്തിൽ തന്നെ അവൾ പുഞ്ചിരിച്ചു......... ഒരു നിമിഷം മീനുവിനോട് അതിയായ അസൂയ തോന്നി പോയവൾക്ക്..... ഈ സ്ഥാനത് തന്റെ പപ്പയായിരുന്നെങ്കിലെന്നൊരു വേള അവൾ ചിന്തിച്ചു പോയിരുന്നു..... തിരികെ പോകുന്ന കാര്യത്തെ കുറിച് അവൾ പാടെ മറക്കാൻ ശ്രമിച്ചു....... കാരണം.... അവൾക്കിവിടം വിട്ട് പോകേണ്ടിയിരുന്നില്ല..... 🔷🔷🔷🔷🔷🔷🔷🔷🔷🔷🔷🔷🔷🔷🔷🔷 സന്ധ്യ വീണു തുടങ്ങിയ ആ സമയം ഓരോരുത്തരും ഓരോ ഭാഗത്താകുകയാണ് പതിവ്...... എന്നാൽ അന്നെല്ലാവരും ആ ഉമ്മറത്തുണ്ടായിരുന്നു..... ഗോപിയുടെ സംസാരവും വിശേഷങ്ങളും എല്ലാം എല്ലാവരും കേട്ടിരിക്കുമ്പോഴും അതിൽ അവരെ ചിരിപ്പിക്കാനുള്ള വിദ്യ കൂടി അയാൾ കലർത്തിയിരുന്നു.... നല്ല ഹ്യൂമർ സെൻസുള്ള ആളായിരുന്നു അദ്ദേഹം.... ഒരോ വാക്കുകൾക്കും എല്ലാവരും പൊട്ടി ചിരിച്ചു..... ഇഷാനിയും മനസ്സറിഞ്ഞു നിഷ്കളങ്കമായി ചിരിച്ചു..... അപ്പോഴാണ് സച്ചു വിന്റെ ബൈക്ക് അവിടെ വന്നു നിൽക്കുന്നത്....... ഇഷാനിയുടെ മനസ്സ് ഒരു നിമിഷം അങ്ങോട്ട് ചലിച്ചു....... അകത്തേക്ക് കയറി വരുന്നവനെ ഒരു നിമിഷം അവൾ കണ്ണിമ വെട്ടാതെ നോക്കി..... എങ്ങോട്ടാ നീ യീ കയറി പോകുന്നത്..... അവിടെ യിരിയെടാ....... ഓഹ്.... ഈ തള്ള് കേൾക്കാൻ ഇത്രേം പേര് പോരെ...... അവൻ അകത്തേക്ക് കയറുന്നത് കണ്ട് ഗോപിയത് ചോദിച്ചതും സച്ചു അതും പറഞ്ഞു അവിടെ തന്നെ യിരിക്കാൻ തുടങ്ങി...... തിണ്ണയിലാണ് അച്ഛനിരിക്കുന്നത്.... അതിന്റെ താഴെയായി എല്ലാവരും അങ്ങനെ യിരിക്കുന്നുണ്ട്.... മുത്തശ്ശി കാലു നീട്ടി അപ്പൂറത്താണ്.. അമ്മയും അമ്മുവും മുത്തശ്ശിയുടെ ഇപ്പുറമായാണിരിക്കുന്നത്... അതിനും ഇപ്പുറത്തായാണ് മീനുവും ഇഷാനിയും.... ഇഷാനിക്കരികിലായി സ്ഥലമുണ്ടെ ന്നൊഴിച്ചാൽ അവിടെ യിരിക്കാൻ വേറെ സ്ഥലമില്ല..... അച്ഛൻ പറഞ്ഞ സ്ഥിതിക്ക് അകത്തേക്ക് കയറി പ്പോകാനും വയ്യ.... അവനവൾ ക്കരികിലേക്കായിരിക്കുമ്പോൾ അവളുടെ മുഖത്തേക്ക് നോക്കിയിരുന്നില്ല...... ഒട്ടും പ്രതീക്ഷിക്കാത്ത കാര്യമായത് കൊണ്ട് തന്നെ ഇഷാനി യൊന്ന് ഞെട്ടിയിരുന്നു...... അവൾക്കരികിലായി ചുമരിൽ ചാരി അവനിരുന്നതും അവളുടെ ഹൃദയം അനിയന്ത്രിതമായി മിടിച്ചു തുടങ്ങി....... അവളുടെ കൈ കാലുകൾ വിറക്കും പോലെ.... അവൾക്കപ്പുറത്തായിരുന്നിരുന്ന മീനു ചിരിയോടെ അവളുടെ കയ്യിലൊന്ന് തട്ടി..... മീനുവിനെ പോലും മുഖമുയർത്തി നോക്കാൻ കഴിയാതെ അവലൊന്നുലഞ്ഞു പോയിരുന്നു.... അവൻ തന്നിലേക്ക് നോക്കില്ലെന്ന് അവൾക്കറിയാമായയിരുന്നെങ്കിൽ കൂടി ആ മനസ്സ് തന്റെ ചലനങ്ങളിലാകുമെന്ന് അവൾക്ക് തോന്നി....... അവൻ ഗോപിയെ തന്നെ നോക്കിയിരിക്കുകയാണ്.... പക്ഷെ നിലത്തു കുത്തി വെച്ച വലം കയ്യിലെ വാച്ചിലേക്ക് പാറി വീഴുന്ന മുടിയിഴകളിൽ മനസ്സ് തെന്നി കളിക്കുന്നത് അവൻ സ്വയം കണ്ടില്ലെന്ന് നടിച്ചു...... വീണ്ടും എല്ലാവരും അവരുടെ സംസാരത്തിലും ചിരിയിലും കൂടി കലർന്നപ്പോൾ ഇഷാനിക്ക് മാത്രം ചിരിക്കാൻ കഴിഞ്ഞില്ല..... അവൾ മറ്റേതോ ലോകത്തായിരുന്നു..... അവൾ ഇടം കണ്ണാൽ അവനെയൊന്ന് നോക്കി... അവനതറിഞ്ഞു തന്നെ നോക്കിയെന്ന് തോന്നിയ ആ നിമിഷം തന്നെ അവൾ കണ്ണ് വെട്ടിച്ചിരുന്നു.... ശരീരത്തിൽ പടർന്നു കയറിയ വിറയൽ അവളറിഞ്ഞു.... നെറ്റിയിലേക്ക് വീണു കിടക്കുന്ന കുറു നിരകൾ അവൾ വെപ്രാളത്തോടെ ഒന്നോതുക്കി വെച്ചു..... എല്ലാവരും ചിരിക്കുമ്പോഴും അവന്റെ മുഖത്ത് മാത്രം ഗൗരവമാണ്.... അവൻ ശെരിക്കും പറഞ്ഞാൽ ആ അച്ഛനെ പോലെയേ യല്ല...... എപ്പോഴും അടക്കി പിടിച്ചൊരു ഗൗരവമുണ്ടാ മുഖത്ത്...... എന്നാലെവിടെയോ ഒരിളം പുഞ്ചിരി ആ അദരങ്ങളിൽ പറ്റി പ്പിടിച്ചിരിക്കുന്നത് പോലെയും തോന്നാറുണ്ട്..... അവൾക്ക് ചുറ്റുമുള്ള യാതൊരു ശബ്ദങ്ങളും കേൾക്കുന്നില്ലായിരുന്നു.... ചെവി രണ്ടും കൊട്ടിയടച്ചത് പോലെ.... മിഴികൾ ഇടയ്ക്കിടെ അവനിലേക്ക് പാറി വീഴാൻ കൊതിക്കുന്നു.... അവൾ സ്വയം പിടിച്ചു നിർത്തി...... കാരണം തിരികെയുള്ള അവന്റെ നോട്ടത്തെ തനിക്ക് താങ്ങാൻ കഴിയില്ല.... അത്ര മേലെന്തൊക്കെയോ വികാരങ്ങൾ അവയിൽ കത്തി നിൽക്കുന്നുണ്ടാവും...... അവന്റെ ഗന്ധം തന്റെ കയ്യെത്തും ദൂരത്തുണ്ട്..... അവന്റെ ചുടു നിശ്വാസം വിരലുകളിലെവിടെയോ പതിക്കുന്നത് പോലെ.... ഇരുളു നിറഞ്ഞ ആകാശം തന്നിലേക്ക് മാത്രമായി ഒരു വെളിച്ചം വീഴ്ത്തുന്നത് പോലെ അവൾക്ക് തോന്നി...... വിരിഞ്ഞു തുടങ്ങിയ ഉണ്ട മുല്ല യുടെ മണം അവർക്കെന്ന പോൽ അവിടമാകെ പരന്നു..... അപ്പോഴും ഇളം കാറ്റിൽ നന്ദ്യാർ വട്ട പ്പൂക്കൾ കൊഴിഞ്ഞു വീണു കൊണ്ടിരുന്നു....... അവളുടെ മിനുസമേറിയ മുടികളാ കാറ്റിലോ ന്നിളകി അവന്റ മുഖത്തേക്ക് പാറി വീഴുമ്പോഴും അവനങ്ങനെ തന്നെയിരുന്നു.. ഇടം കണ്ണാൽ പതിയെ അവൾ അവനെയൊന്ന് നോക്കിയതും അവൻ പെട്ടെന്ന് അവൾക്ക് നേരെ യൊന്നു നോക്കിയിരുന്നു... ആ കണ്ണുകൾ പരസ്പരം ഒന്ന് കവർന്ന് പിടിച്ചതും ഇളം റോസ് നിറമുള്ള ആ മുഖത്ത് നിന്ന് കണ്ണെടുക്കാൻ അവനും ഒരു വേള കഴിഞ്ഞിരുന്നില്ല... ആ കണ്ണുകളിൽ നിറഞ്ഞു നിൽക്കുന്ന നിഷ്കളങ്കമായ ഭാവം അവന്റെ ഹൃദയത്തെയും ഒന്ന് പിടിച്ചു കുലുക്കിയത് പോലെ..... മ്മ്.....? അവന്റെ കണ്ണുകളിലെ ഭാവം അവൾ പിടിക്കപ്പെടാതിരിക്കാൻ അവൻ ചോദ്യ ഭാവത്തോടെ അവൾക്ക് നേറെ പുരികമുയർത്തിയതും അവൾ പെട്ടെന്ന് ഒന്നുമില്ലെന്ന അർത്ഥത്തിലൊന്ന് ചുമൽ കൂച്ചി നാവൊന്ന് കടിച്ചു കൊണ്ട് തിരിഞ്ഞിരുന്നു..... മീനുവിന്റെ കയ്യിൽ അവളമ ർത്തി പിടിച്ചു... മീനു വേദനിച്ചെന്ന വണ്ണം അവളെ കണ്ണുകൾ കൂർപ്പിച്ചോന്ന് നോക്കി.... അപ്പോഴും അവളുടെ ഹൃദയത്തിന്റെ മിടിപ്പ് താഴ്ന്നിട്ടില്ലായിരുന്നു.... ശക്തിയായങ്ങനെ മിടിച്ചു മിടിച്ചു ആ ഹൃദയം പൊട്ടി പ്പോകുമോയെന്നവൾക്ക് തോന്നിപ്പോയിരുന്നു... ഹൃദയത്തിൽ പെട്ടെന്നുണ്ടായ ആ പിടപ്പിൽ സച്ചുവിലും ഒരു പുഞ്ചിരി വിരിഞ്ഞിരുന്നു.. എപ്പോഴുമെന്ന പോൽ അവനതിനെ മറക്കാൻ ശ്രമിക്കുമ്പോഴും ഓരോ ദിവസം കഴിയും തോറും മനസ്സിൽ നിന്നത് മാഞ്ഞു പോകാതെ നിൽക്കുന്നത് അവനറിയുന്നുണ്ടായിരുന്നു.... ഹൃദയത്തിന്റെ ഭിത്തിയിൽ പറ്റി പിടിച്ചു നിൽക്കുന്നത് പോലെ.... മറവിയിലേക്ക് പോകാൻ വിസമ്മതിച്ചു ഏറെ ശാഢ്യം പിടിക്കും പോലെ.... ഒഴുകി വന്ന വരെ തഴുകുന്ന കുളിർ കാറ്റിനു പോലുമെന്തോ പതിവ് പോലെ അവനെ ചലിപ്പിക്കാൻ കഴിഞ്ഞില്ല... എന്തോ ഒരു നിർവികാരത അവനെ പൊതിഞ്ഞു പിടിച്ചത് പോലെ...... അപ്പോഴും ആ കുളിരിലെന്ന പോലങ്ങനെ ലയിച്ചു സ്വപ്‌നങ്ങൾ നെയ്തു തുടങ്ങിയിരുന്നു ഇഷാനി....... (തുടരും) എന്റെ തിരക്കുകൾ കൊണ്ട് കഥ lag ആവുന്നുണ്ടല്ലേ... അല്ലെങ്കിലും ഞാൻ തുടക്കത്തിലേ പറഞ്ഞതാണല്ലോ കൂടുതലൊന്നും പ്രതീക്ഷിക്കാതെ വായിച്ചിരിക്കണമെന്ന്.... വീട് പണി പെട്ടെന്ന് തീർത്തിരിക്കാനുള്ള തിരക്കിലാണ്....... അടുത്ത പാർട്ട്‌ മുതൽ നമുക്ക് സ്പീഡ് ആക്കാം ❤️ Aysha Akbar