*_MAAGHA PURANAM -- 1_* *_మాఘ పురాణం – 1వ అధ్యాయం_* *ఒకప్పుడు సకల పురాణములకు ఆలవాలమైన నైమిశారణ్యమందు శౌనకాది మహాఋషులు లోక కళ్యాణార్థమై, ఒక మహాయజ్ఞము చేయ తలట్టారు. ఆ మహాయజ్ఞము పూర్తవడానికి ఒక పుష్కరకాలము అనగా పన్నెండు సంవత్సరములు పడుతుంది*. *శౌనకాది మునులు ఎన్ని అడ్డంకులు వచ్చినా ఆ యజ్ఞమును పూర్తి చేయాలి అన్న దీక్షతో యజ్ఞస్థలముగా నైమిశారణ్యములో ప్రవహించు గోమతీ నదీతీరమును ఎన్నుకొని ఒక శుభ ముహూర్తములో యజ్ఞమును ప్రారంభము చేసారు*. *అంత పెద్ద యజ్ఞమును చూచి తరించాలి అన్న కోరికతో భరతఖండము నలుమూలలనుంచి ఎందరో తపోధనులు వచ్చి యజ్ఞస్థల సమీపమునందు నివాసములు ఏర్పరచుకొన్నారు*. *అక్కడకు వచ్చిన మునీశ్వరులలో బ్రహ్మతేజస్సు గల శతవృద్ధులు, వేదములు ఆమూలాగ్రముగా అవగాహన చేసుకున్న వేదమూర్తులు, సకల శాస్త్రములు అధ్యయన చేసిన మునికుమారులు ఉన్నారు*. *మునీశ్వరులందరూ తమ తమ శిష్య బృందములతోను, పరివారముల తోను, తండోపతండములుగా యజ్ఞస్థలానికి చేరుకొన్నారు*. *వేలకొలది ఋషిపుంగవులతో ఆ యజ్ఞస్థలము క్రిక్కిరిసి ఉన్నది*. *సకల లోకములకు శుభకరమై, పుణ్యప్రదమై, 12 సంవత్సరములు ఏకధాటిగా జరుగు మహాయాగమగుటవలన పురాణ పురుషుడగు సూత మహాముని కూడా తన శిష్యబృందముతో వచ్చి యాగ కార్యక్రమములో పాల్గొన్నారు*. *దూర ప్రాంతములనుండి వచ్చిన ఋషులు సూతులను దర్శన భాగ్యం కలిగినందున అమితానందము పొంది వారి ఆశీర్వచనములతో నిర్విఘ్నముగా యాగము జరుగుతుందని అందరూ సంతోషపడ్డారు*. *సూత మహాముని సకల శాస్త్రములు ఆమూలాగ్రముగ తెలిసిన మహానుభావుడు*. *వేద, పురాణ, ఇతిహాసాది సమస్త విషయములలో వారికి తెలియనిది లేదు. వారి ముఖవర్చస్సు నుండి ప్రకాశించు బ్రహ్మ తేజస్సు, ఎల్లవేళలా నవ్వులొలికించు ముఖారవిందము, మేలిమి బంగారం వలె ప్రకాశించుచున్న శరీరము వర్ణింప అలవికానిది. పుణ్య పురుషుడగు సూత మహాముని ఆగమనమునకు స్వాగతం పలికి, సాష్టాంగ దండ ప్రణామములాచరించి యజ్ఞం జరుగు ఆ పన్నెండు సంవత్సరములలో ఎన్నో పురాణగాధలు విని తరించవలెననెడి కోరికతో ముని పుంగవులందరూ ఎదురు చూస్తూ ఉన్నారు*. *సూతుల వారు శౌనకాది మునుల కోరికలను గ్రహించినారు*. *ఇటువంటి పుణ్య కార్యములందు పురాణ పఠనం గావించి అశేష మునిసత్తములను తృప్తి పరచుట తన విద్యుక్తధర్మమని ఎంచి వారి కోరికను మన్నించారు*. *ఒక శుభ ముహూర్తమున ఆశ్రమ వాసులందరూ సూతుల వారికి అర్ఘ్య పాద్యములొసంగి ఉచితాసనములపై ఆసీనులను చేసి “మునిశ్రేష్ఠా! మునికులతిలకా!* *ఇంతకుముందు ఎన్నో పురాణ గాధలు తమరు తెలియజేయగా విని ఆనందించి ఉన్నాము. అనేక ఇతిహాసములను ఆలకించి, అందలి సారమును గ్రహించితిమి*. *సమయము వచ్చినప్పుడు సకల శాస్త్రములలోని నీతికథలు మాకు వినిపించుచునే ఉన్నారు*. *అయినను మీరు సిద్ధపురుషులు పదునాలుగు లోకములు సంచారము చేసి ఎన్నో విషయములయందు అవగాహన కలిగిన వారు. వినదగు విషయములను విరామ కాలములో మాకు వినిపించవలయు”నని శౌనకాది మునులు ప్రార్థించిరి*. *శౌనకాది మునులు తన వలన కొత్త సంగతులు తెలుసుకొనవలెనన్న కుతూహలం కనపరచినందున వారలను చూచి సూత మహాముని* - *“ముని పుంగవులారా! మీ మనోవాంఛను గ్రహించితిని. మీరు వినదగిన కథను నాకు తెలిసినంత వరకూ విచారించి మీకు తృప్తి కలిగించెదను*. *ఇటువంటి మహా సమయమున పుణ్యకథలు చెప్పుట వలన నాకు, వినుట వలన మీకు పరమార్థము కలుగు తుంద” ని పలికెను*. *శౌనకాది మునుల కోరిక* *సూతమహామునిని అడిగినదే తడవుగా వారందులకు అంగీకరించగా* *“ధన్యులమైతి”మని మునులందరూ అమితానందము పొంది సూతులవారి పాదములను కళ్ళకు అద్దుకొని సూతమహామునితో –* *_“ఆర్యా!_* *పద్మపురాణమందు లీనమైయున్న మాఘమాసము యొక్క మహాత్మ్యమును మరల మరల వినవలయుననెడి కుతూహలం కలుగుచున్నది*. *అదియునుగాక రాబోవు మాసం మాఘమాసమే అయినందున ఆ మాస మహాత్మ్యం, ఆచరించవలసిన విధానం, మాకు వివరించవలసింది’’ అని కోరారు.* *మునులు కోరుటవలన సూతమహర్షి మిక్కిలి సంతసించి -* *“ముని పుంగవులారా! మీరందరూ అతిముఖ్యమైన విషయాన్నే అడుగుతున్నారు* *మాఘమాసం కూడా ప్రారంభం కాబోవుచున్నది. ఇటువంటి సమయములో మాఘపురాణము వినుటవలన కలిగే ఫలము అంతింత కాదు. అంతేగాక ఈ మహాయజ్ఞం జరుగుచున్న సమయములో మాఘమాసం యొక్క మహాత్మ్యం మీకు వివరించవలసిన భాగ్యము కలిగినందులకు నేను అదృష్టవంతుడనే. సావధాన మనస్కులై ఆలకింపు”డని సూతమహర్షి ఈ విధముగా చెప్పసాగిరి –* *“నేను నా తండ్రి శిష్యుడగు రోమహర్షుని శిష్యుడను. అతడు మహా తపస్వి, జ్ఞాని. నాతండ్రి వద్ద సకల శాస్త్రములు అభ్యసించెను. విష్ణు అంశ సంభూతుడగు వేదవ్యాస మహర్షికి ప్రియ పాత్రుడను. వారి దయవలన నాకు కలిగిన జ్ఞానంతో మీలాంటి వారడిగిన ప్రశ్నలకు జవాబు చెప్పగల శక్తి సామర్ధ్యములు కలిగిన వాడిని అయ్యాను. నేను తెలియచేయుచున్న నీతిబోధలు సకల లోకములకు శుభములు కలుగును*. *మీరడిగినటులే పూర్వం దిలీప మహారాజుకు తన కులగురువైన వశిష్ఠమహాముని మాఘమాస మహాత్మ్యమును వివరించారు. ఆ విషయమునే నేను మీకు వివరించబోవుచున్నాను* #మన సంప్రదాయాలు సమాచారం