#📔 കഥ ഭാഗം ആറ് അകലം പൂക്കുന്ന വെയിൽചില്ലകൾ ഒരു ദിവസം ഉമ്മയുടെ നമ്പറിൽ നിന്ന് കൂട്ടുകാരിയെ വിളിച്ച് വീട്ടിലേക്ക് വരാൻ പറഞ്ഞു.. അവൾ വന്നപ്പോൾ അവളുടെ മൊബൈലിൽ നിന്ന് മുറി അടച്ചിട്ടിരുന്ന്  റിയാസിനെ വിളിച്ചു.. പരിചയമില്ലാത്ത നമ്പറായതിനാൽ ആദ്യമെടുത്തില്ല.. രണ്ടാമത്തെ റിംഗിൽ ഫോണെടുത്തപ്പോൾ പറഞ്ഞു "ഞാൻ റസിയയാണ്.." കുറച്ച് നേരത്തെ നിശബ്ദതക്ക് ശേഷം അവൻ ചോദിച്ചു "ഇതേതാണ് നമ്പർ" "കൂട്ടുകാരി വന്നിട്ടുണ്ട് അവളുടെ നമ്പറാണ്" "ഉം" "എന്നെ മറന്നു അല്ലേ" "കാണാതിരുന്നാലോ സംസാരിക്കാതിരുന്നാലോ മറന്നു എന്ന് കരുതാനാകുമോ റസിയാ.. മനസിനുള്ളിൽ ഒരു നീറ്റലായി കൊണ്ടു നടക്കും ചില സാഹചര്യങ്ങൾ കൊണ്ട് അത് പുറത്ത് പറയാനാവാതെ ഉരുകുന്നവരുണ്ട് അക്കൂട്ടത്തിലാണ് ഞാനും " " നമ്മളിനി എന്തു ചെയ്യും.. " " ഇവിടെ പ്രശ്നമൊന്നുമില്ല.. നീ വരുമെങ്കിൽ ഇവിടെ ഒരു കസിന്റെ വീടുണ്ട് അവിടെ വെച്ച് വിവാഹം നടത്താം.. പള്ളി അടുത്തുണ്ട് അതിൽ രജിസ്റ്റർ ചെയ്യാം അന്യമതമല്ലല്ലോ ഒരു പ്രശ്നവുമില്ല.. നീ വരുമെങ്കിൽ സ്വീകരിക്കാൻ ഞാനും എന്റെ വീട്ടുകാരും തയ്യാറാണ് " " എനിക്ക് പോകാനിനി വേറെ ഇടമില്ലല്ലോ എന്നാണ് വരേണ്ടത്.. * "വരുന്ന വെള്ളിയാഴ്ച താഴെ ജുമാമസ്ജിദിന്റെ അവിടേക്ക് വന്നാൽ മതി ബാക്കി അവിടെ വെച്ച് ആവാം.. ഞാൻ വീട്ടുകാരോട് ചോദിച്ച് അറിയിക്കാം" "എങ്ങനെ അറിയിക്കും" "ഈ നമ്പർ നിന്റെ കൂട്ടുകാരിയുടെ അല്ലേ അവളെ വിളിച്ച് പറഞ്ഞാൽ നീയറിയില്ലേ നിന്നെ കിട്ടാനാണെന്ന് പറഞ്ഞ് ഉമ്മയെ അവൾക്ക് വിളിക്കാലോ " " ഉം" അവൻ ചോദിച്ചു " റസിയാ.. മൂളൽ മാത്രേ ഉള്ളൂ.. വേറൊന്നുമില്ലേ" തൊട്ടടുത്തിരുന്ന കൂട്ടുകാരിയുടെ മുഖത്തേക്ക് നോക്കി നാണത്തോടെ ചോദിച്ചു.. " എന്താ വേണ്ടത് " " ഫോൺ വഴി തലരാനാവുന്നത് ചുംബനമാണല്ലോ വീഡിയോ കോളിലല്ലേ. ബാക്കിയെല്ലാം " " തല്ക്കാലം ആദ്യത്തേത് തരാം.. എനിക്കൊരു ഫോൺ മേടിച്ചു തന്നാൽ ബാക്കി എല്ലാം തരാം " " ഇനി ഒരാഴ്ചയല്ലേ ഉള്ളു തല്ക്കാലം അതുവരേക്ക് ഇതുമതി.. ബാക്കിയെല്ലാം അതുകഴിഞ്ഞ്" "എന്നാലുയെനിക്കൊരു ഫോൺ വാങ്ങി തരില്ല അല്ലേ.. എന്നെ സംശയമാണോ " " എന്തിന് സംശയം..കടകളില്ലാത്ഥോണ്ടാണ്.. നിനക്ക് അത്ര അത്യാവശ്യമാണെങ്കിൽ ഞാനെന്റെ സുഹൃത്തിനോട് പറഞ്ഞ് ഒരു ഫോൺ വാങ്ങി വെക്കാം.. നാളെ നിനക്ക് മൻഫ ഉൽ ഉലൂം കോംപ്ലക്സിന്റെ അവിടേക്ക് വരാമോ " " എപ്പോൾ" " വൈകീട്ട് മതി " " വരാം..പിജിക്ക് അപ്ലൈ ചെയ്യാൻ ശ്രീകലയുടെ വീട്ടിലേക്ക് ആണെന്ന് പറഞ്ഞ് ഇറങ്ങാം " " ഒകെ.. എന്നാൽ നാളെ കാണാം " " തന്നില്ല" എന്ത്" "നേരത്തെ ചോദിച്ചത്". ജനലിനടുത്തേക്ക് മാറി ചുണ്ടുകൾ ഫോണിലേക്കമർത്തി കൊണ്ട് പറഞ്ഞു "തന്നു" അവനിടറിയ ശബ്ദത്തോടെ ചോദിച്ചു "എവിടെ" "എല്ലായിടത്തും". "എന്നുവെച്ചാൽ" ചെറിയ ചിരിയോടെ പറഞ്ഞു "ഭൂപടത്തിലെ സ്ഥലങ്ങൾ അടയാളപെടുത്തി പറയാനൊന്നുമെനിക്കറിയില്ല.. അതിനു പറ്റിയ സാഹചര്യവുമല്ല.. ഫോൺ വാങ്ങി തരൂ.. രാത്രി തരാം" #ഉം.. ശരി അപ്പോൾ നാളെ മുതൽ നീ ഭൂപടത്തിലെ പ്രധാന സ്ഥലങ്ങൾ നോക്കി വെച്ചോളൂ.. അതിരുകളില്ലാത്ത. ഭൂപടത്തിലെ ഓരോയിടങ്ങളിലെ ചെക്ക് പോയിന്റുകളിലും നമുക്ക് ചുംബനത്തിന്റെ ഔട്പോസ്റ്റുകൾ പണിയാം പിന്നെ..." "മതി.. മനസിലായി..ബാക്കി പറഞ്ഞെന്നെ ഭ്രാന്താക്കല്ലേ.. പിന്നെ അതിനുപറ്റിയ സാഹചര്യവുമല്ല" " ഉം.. ശരി.. നാളെ കാണാം " " ഉം" " ഫോൺ കട്ട് ചെയ്ത്.. മുനീറയുടെ കയ്യിൽ കൊടുത്തപ്പോൾ മുനീറ ചോദിച്ചു ".. " രണ്ടാളും കൂടി എനിക്ക് പണിയാക്കുമോ ". " ഇല്ലെടീ.. " " എന്താ പറഞ്ഞത് " " അത് കേട്ട് നീ സുഖിക്കണ്ട " " ഓ.. എനിക്കത് കേട്ട് സുഖിക്കാനൊന്നുമില്ല.. എന്നും രാത്രി ഫൈസൽ വിളിക്കാറുണ്ട്.. അവനുള്ളതൊക്കെ തന്നെയല്ലേ ഇവനുമുള്ളൂ " " വല്ലാത്ത ജാതി തന്നെ.. വെറുതെയല്ല ആകെ തൂങ്ങി തുടങ്ങുന്നത് " " എന്ത് " " എല്ലാം " " ഒന്നു പോടീ.. വൃത്തികെട്ടവളേ ". " ഉവ്വ്.. പറയുന്ന ഞാൻ വൃത്തികെട്ടത് ചെയ്യുന്ന നിങ്ങൾ നല്ലവർ " അവൾ ഇടുപ്പിൽ കുത്തിപ്പിടിച്ച് വലിച്ചടുപ്പിച്ച് കൊണ്ട് പറഞ്ഞു " കാക്ക കൊത്തണതും പശൂനൊരു സുഖം അത്രേള്ളൂ " " ഉം.. " " എന്നാ നിനക്ക് ഫോൺ കിട്ടുക " " നാളെ.. " " ഉം.. അപ്പോൾ നിന്റെ ഉറക്കത്തിനുമൊരു തീരുമാനമായി...സന്തോഷം " " എന്നിട്ട് ഫോണുള്ളവരാരും ഉറങ്ങണില്ലേ " "ഉറങ്ങാത്തവരുണ്ടാവില്ല പക്ഷേ പാതിര കഴിയുമെന്ന് മാത്രം... നേരിൽ കാണുമ്പോൾ സംസാരിക്കാത്തവർ വരെ ഫോണിലൂടെ വാചാലരാകും.. " " എന്താ പ്പോ അത്ര പറയാനുണ്ടാവുക.. " "അത് എതിർവശത്തുള്ള ആൾക്കനുസരിച്ചായിരിക്കും.. ചിലരോട് സംസാരിച്ചാൽ നേരം പോകുന്നതറിയില്ല ചിലരോട് സംസാരിച്ചു തുടങ്ങിയാൽ വേഗം നിർത്തുകയും ചെയ്യും.. മനുഷ്യരെ മനസിലാക്കാനെളുപ്പം ഫോണിലൂടെയാണ്.. ഒന്നോരണ്ടോ വാക്ക് സംസാരിച്ചാലറിയാം ആളേതുതരമാണെന്ന് " " ഒന്നു പോടി...ഇവിടെ നേരിട്ട് കണ്ടിട്ട് തന്നെ ആളുകളെ മനസിലാക്കാനാവുന്നില്ല എന്നിട്ടാണ് " " മനുഷ്യരെ നേരിൽ കാണുമ്പോൾ ഉണ്ടാവാത്ത പലതൂം ഫോണിലൂടെ നമുക്കുണ്ടാവും... കരയിപ്പിക്കാനും ചിരിപ്പിക്കാനും വികാരഭരിതരാക്കാനും പ്രണയിപ്പിക്കാനുമെല്ലാം ഇതിലൂടെ കഴിയും സൈസൽപം കുറവാണെങ്കിലും ഒരു ഞെക്കലിലും തോണ്ടലിലും. എന്തൊക്കെ അനുഭവങ്ങളാണെന്നോ ഇത് തരൂന്നത് " " ആണോ.. " " ഒന്നുമറിയാത്ത ഒരു പാവം.. മെറിന്റെ കൂടെ ഉണ്ടായിരുന്നതല്ലേ നീ.. അതോണ്ട് തീർച്ചയായും നിനക്കൊന്നുമറിയുകയുണ്ടാവില്ല.. അവളേതാണ് മുതലെന്ന് എനിക്കറിയാലോ.. നീയെന്നെ വലിപ്പിക്കല്ലേ റസിയാ " " ഹേയ്.. ഫോണൊന്നും വേണമെന്നില്ല ചിലതറിയാൻ " " ഉം.. ഇനിയേതായാലും എല്ലാം അറിയാനും അനുഭവിക്കാനും തുടങ്ങുകയല്ലേ.. ഏതായാലും ഈ രക്തത്തിലെനിക്ക് പങ്കില്ല ട്ടോ " " ഉം. " "നിന്റെ ഫ്യൂച്ചർ പ്ലാനെന്താ " " ഒന്നു കെട്ടണം നാല് കുട്ടികളെ പ്രസവിക്കണം അതന്നെ ഫ്യൂച്ചർ പ്ലാൻ " " നീ പിജിക്ക് പോണില്ലേ " " പോകണമെന്നൊക്കെ ഉണ്ടായിരുന്നു.. അപ്പോഴേക്കല്ലേ നിക്കാഹ് കഴിഞ്ഞത് അവനാണേൽ പ്രവാസിയും.. രാത്രി പഠിക്കാൻ പറ്റില്ല.. പകലും അത് നടക്കില്ല.. വെറുതെ ഫീ കളയണ്ടല്ലോ എന്ന് കരുതി " " രാത്രിയും പകലും സിലബസിലില്ലാത്ത പഠിപ്പാവുമല്ലേ " " പോടി... അതൊന്നുമല്ല.. കുറേ നേരം സംസാരിച്ചിരിക്കും.. " " ഉം.. മുഴുവൻ സംസാരിച്ച് തീർക്കണ്ട ഇപ്പോൾ തന്നെ.. കെട്ടികഴിഞ്ഞ് കൂടെ കൂടുമ്പോൾ പിന്നെ സംസാരിക്കാൻ വാക്കുകളുണ്ടാവില്ല.. അഥവാ ഉണ്ടെങ്കിലത് കുറ്റപെടുത്തലിന്റേതാവും " " ഓഹോ.. നിനക്കറിയാമല്ലേ എല്ലാം ജീവിതത്തെ കുറിച്ച് ഏതാണ്ടൊരു ഐഡിയ ഉണ്ടല്ലേ ".. " അതുണ്ടായതോണ്ടല്ലേ പിജിക്ക് പോകണമെന്ന് തോന്നുന്നത്.. സ്വന്തം കാലിൽ നിവർന്നു നിൽക്കുന്നവർക്കേ എവിടെയും വിലയുള്ളൂ...പിന്നീട് ഏതോ പൊളിഞ്ഞുപോയ ഭൂതകാലത്തിലെ ഓർമ്മകളുടെ പുഴുകുത്തുള്ള ആർക്കും വേണ്ടാത്ത പ്രതിമയാവാതിരിക്കാൻ  ചിലതെല്ലാം മുൻപേ തീരുമാനിക്കണം... ഒരു പ്രസവയന്ത്രം മാത്രമാവാനെന്തായാലും ഞാനില്ല " " ഉം.. ശരി നീയെന്താണെന്ന് വെച്ചാൽ തീരുമാനിക്ക് ഞാൻ പോവാണ്.. ഫോൺ കിട്ടിയാൽ വിളിക്ക് " " ഇനി ഭക്ഷണം കഴിഞ്ഞ് പോകാം ". " വേണ്ട.. നിന്റെ പോലെയല്ല.. നെറ്റ് ഓൺചെയ്താലിപ്പോൾ കുറേ മെസേജ് വന്ന് കിടപ്പുണ്ടാവും മൂപ്പരുടെ നിക്കാഹ് കഴിഞ്ഞ പെണ്ണാണ് ഞാൻ.. എവിടെ പോയി.. എന്തിന് പോയീന്നൊക്കെ പറയേണ്ടി വരും " " ചുരുക്കം പറഞ്ഞാൽ ഇന്ത്യക്ക് സ്വാതന്ത്ര്യം കിട്ടീതറിയാത്ത പാർട്ടിയാണല്ലേ.. തുടക്കത്തിലേ കാണൂ ഇതൊക്കെ.. പിന്നെ നീയാ വീട്ടിലുണ്ടെന്നത് പോലും ചിലപ്പോഴാരുമറിയില്ല ". " സ്വാതന്ത്ര്യം ആദ്യം കിട്ടേണ്ടത് കുടുംബത്തിനും ചിലരുടെ  മനസിനുമാണ് റസിയാ.. ചില സമയത്ത് തോന്നും ഒന്നും വേണ്ടായിരുന്നു എന്ന്.. വല്ലിപ്പയും എളാപ്പയും കൂടി ഉപ്പയെ നിർബന്ധിച്ച് നിക്കാഹ്  നടത്തീതാണ്.. അനുഭവിക്കാൻ ഞാനുണ്ടല്ലോ ".. " ഉം.. ഇട്ടിട്ടു പോരാനാവാത്ത കുരുക്ക് അല്ലേ " " നീയും ആ കുരുക്കിലേക്ക് തലവെക്കാൻ പോവുകയല്ലേ " " ഹേയ്.. ഞാൻ ഇപ്പോൾ ആലോചിക്കുന്നത് ഇവിടെ നിന്നൊരു രക്ഷപെടലാണ്.. ഇത്തയാണ് ഇവിടെ കാര്യങ്ങൾ തീരുമാനിക്കുന്നത് മടുത്തു.. ഞാനൊരു വേലക്കാരിയാണെന്ന് ചിലപ്പോഴൊക്കെ തോന്നുന്നു " "അതൊന്നും കാര്യമാക്കണ്ട.. ഏതായാലും ഒന്നൂകൂടി ആലോചിക്ക്.. കാര്യങ്ങൾ കൈവിട്ട് പോകാനെളുപ്പമാണ് " " ഉം.. "" "എന്നാൽ ഞാൻ പോട്ടെ.. വിളിക്ക് നീ" അവൾ പോയപ്പോ താഴെനിന്നും ഇത്ത വിളിക്കുന്നത് കേട്ടു ബെഡിൽ കിടന്ന തട്ടം തലയിലേക്കിട്ട് ചുരിദാർ ശരിയാക്കി താഴേക്കിറങ്ങി. എന്തു ചെയ്യണമെന്ന് മനസിൽ ഒരു രൂപവുമില്ലായിരുന്നു.. കിച്ചണും ഹോളും അടിച്ചു വാരുമ്പോൾ ഇത്ത ചിപ്സ് ഒരു പ്ലേറ്റിലേക്കിട്ട് സോഫയിൽ ചാരി കിടന്ന് ടിവി കാണുകയായിരുന്നു.. ഇറുകിയ പാന്റിലും ബനിയനിലും മുഴച്ച് നിൽക്കുന്ന ശരീരഭാഗങ്ങളിലധികവും പുറത്ത് കാണിച്ചിരിക്കുന്ന ഇത്തക്ക് തല മറക്കേണ്ട ആവശ്യമൊന്നുമില്ലെന്ന് തോന്നി.. സത്യത്തിൽ ഉപ്പക്കും ഉമ്മക്കും ഇത്തയെ പേടിയായിരിക്കാം.. അടിച്ചു വാരി കഴിഞ്ഞ്  ഒന്നും മിണ്ടാതെ മുകളിലേക്ക് തന്നെ കയറി.. എന്നെ അറിയാൻ ആ വീട്ടിൽ മുറിയുടെ നാല് ചുമരുകൾക്കേ കഴിയൂ എന്ന് തോന്നി. അപ്പോഴും അവൾ കൈവിരലുകളിലെ പിടിവിട്ടിരുന്നില്ല.. ഇടക്ക് അവൾ  നഖം കൊണ്ട് എന്റെ നഖത്തിനുള്ളിലേക്ക് കുത്തിയപ്പോൾ ചെറുതായി വേദനിച്ചു...തോളിലേക്ക് വീണ തട്ടം ശരിയാക്കാതെ അവൾ എന്തോ ഓർത്തുകൊണ്ടിരുന്നു.. ഇടതൂർന്ന അവളുടെ മുടിയുടെ ഭംഗി തട്ടമിട്ട് മറക്കുന്നതെന്തിനാണെന്നോർത്തു.. അങ്ങിങ്ങായി കൂട്ടം തെറ്റി  കണ്ട ചെമ്പിച്ച മുടിയിഴകൾ കാറ്റിൽ ഇളകൂന്നുണ്ടായിരുന്നു.. അവളുടെ കൈകൾക്കടിയിലെ വിയർപ്പ് പടർന്ന് നനഞ്ഞ ജാക്കറ്റിന്റെ പുറം പാളികൾക്ക് പുറത്തേക്ക് മാംസം തുറിച്ചു നിൽക്കുന്നുണ്ടായിരുന്നു.. അവൾ ഇടക്ക് തലയുയർത്തി കൊണ്ട് ചോദിച്ചു "ശരിക്കും പടച്ചവൻ മനുഷ്യരിൽ ചിലരെ കളിപ്പാട്ടം പോലെയാണ് സൃഷ്ടിച്ചതല്ലേ" " ഹേയ്... അങ്ങനൊന്നുമില്ല നമ്മൾ പടച്ചവനെ കാണുന്ന രീതിക്കാണ് കുഴപ്പം നമ്മുടെ എല്ലാ പ്രശ്നങ്ങളും പരിഹരിക്കാനായി പടച്ചവനെ ആശ്രയിക്കുന്നു  ഉത്തരം കിട്ടാത്ത പലചോദ്യങ്ങളുടെയും അവസാനത്തിൽ ആശ്വാസമായി തോന്നുന്ന ഒരു വാക്കാണല്ലോ ദൈവമെന്നത്.. ആരുമിതുവരെ കണ്ടിട്ടില്ലെങ്കിലും അങ്ങനൊരാളുണ്ടെന്ന് വിശ്വസിക്കുന്നു.. ചിലരുടെ രൂപത്തിൽ ചിലവാക്കുകളായി പലപ്പോഴും നമ്മുടെ തൊട്ടയികിലെത്തുന്ന ദൈവത്തെ ആരും കാണാറില്ല.. വിശന്നിരിക്കുമ്പോൾ ഭക്ഷണം വാങ്ങി തരുന്നവർ ശരിക്കും ദൈവമായി അപ്പോൾ തോന്നും വിശപ്പ് മാറിയാലത് മറക്കും.. മറവിയുടെ കൂട്ടത്തിൽ ദൈവത്തിനും സ്ഥാനമുണ്ട്.. മതം ജാതി വേലികെട്ടുകളെല്ലാം മനുഷ്യർ മനുഷ്യരെ അടിമകളാക്കി വെക്കാനായി ഉണ്ടാക്കിയതാണ്.. സ്വതന്ത്ര്യം കിട്ടിയാൽ മനുഷ്യർ പറന്നകന്നാലോ എന്ന പേടി കൊണ്ട്...സൃഷ്ടിച്ചപ്പോൾ തന്നെ വിധി പ്രസ്താവിക്കാനും അവകാശമുള്ള ഒരേ ഒരാൾ.. നമ്മൾ സ്വയം കളിപ്പാട്ടമായി മാറുകയാണ് ചെയ്യുന്നത്.. മനുഷ്യൻ എല്ലാം നേടികഴിഞ്ഞാൽ ദൈവത്തിനെ പോലൂം മറക്കുമെന്നറിയാവുന്നത് കൊണ്ടാണ് ഒന്നും പൂർണ്ണമായി നല്‍കാത്തത്....എല്ലാമുള്ളവരാണെന്ന് നമുക്ക് തോന്നുന്നവർക്ക് നേടാനാവാത്ത പലതും ഈ ഭൂമിയിലുണ്ട്... അങ്ങനെ ചിന്തിച്ചാൽ കിട്ടിയതിൽ സന്തോഷം കണ്ടെത്തി മൂന്നോട്ട് പോകാനാവും " " ഉം.. പക്ഷേ അങ്ങനെ ചിന്തിക്കാനാണ് പ്രയാസം.. നമ്മുടെ കണ്ണുകളും മനസും നമ്മൾ കടം കൊടുത്തിരിക്കുകയല്ലേ മറ്റുള്ളവർക്ക് " " കടം കൊടുത്തതെല്ലാം തിരിച്ചെടുത്ത് സ്വന്തമാക്കുക.. അവനവന്റെ നാലതിരുകളിൽ തന്നെ സന്തോഷം തരുന്ന പലതുമുണ്ട് അത് കണ്ടെത്തണമെന്ന് മാത്രം " " ഉം" നട്സൂം വെള്ളവും തീർന്നപ്പോൾ റസിയ പറഞ്ഞു.. " മ്യൂസിയത്തിന്റെ പിറകിലൊരു ക്യാന്റീനുണ്ട് അവിടെ പോയി ഭക്ഷണം കഴിക്കാം അതുകഴിഞ്ഞ് മ്യൂസിയമൊന്ന് കാണാം.. അതുകഴിഞ്ഞ് തണലുള്ള മറ്റൊരിടത്തിരുന്ന് കഥയുടെ ബാക്കി പറയാം" " ഉം.. ആയിക്കോട്ടെ നിന്റെ ഇഷ്ടം ". " അപ്പോൾ  നിങ്ങൾക്കിഷ്ടമൊന്നുമില്ലേ" "എന്റെ ഇഷ്ടങ്ങൾ പലതും എന്റെയുള്ളിൽ തന്നെ അടങ്ങും.. ചിലയിഷ്ടങ്ങൾ അവനവന് മാത്രമനുഭവിക്കാനും ആസ്വദിക്കാനുമുള്ളതാണ്.. ഒരിക്കലുമത് മറ്റൊരാളോട് ഷെയർ ചെയ്യാനാവാത്തതാണ് ". " അങ്ങനത്തെ ഇഷ്ടമൊക്കെ ഉണ്ടോ " " ഉണ്ട്.. അത് നിനക്കും എനിക്കും എന്നല്ല എല്ലാവർക്കുമുണ്ട്.. എല്ലാം പറഞ്ഞു കഴിഞ്ഞാ പിന്നെ ഇഷ്ടപെടാനൊന്നുമില്ലാതാകും.. ആകാശവും ഭൂമിയും പോലൊരകലം വരും.. ചുറ്റിലും ശൂന്യത നിറയും.. ഒറ്റക്കിരിക്കുമ്പോൾ തനിച്ചാവാതിരിക്കാൻ മാറ്റി വെക്കുന്ന ഓർമ്മകളുടെ ചിലയിഷ്ടങ്ങൾ  ബാക്കി വെക്കണം " " നമിച്ചു... ഞാനിനി ഒന്നും പറയുന്നില്ല.. " അതുപറഞ്ഞവൾ കൈയ്യിൽ പിടിച്ച് എണീറ്റ് നിന്നു.. പിന്നെ ചാരി തോളിലൊന്ന് തട്ടിക്കൊണ്ട് പറഞ്ഞു.. യു ആർ വെരി നൈസ് ഡിയർ".. അവളെ തൊട്ടുരുമ്മികൊണ്ട് ക്യാന്റീനിലേക്ക് നടക്കുമ്പോൾ ബദാം മരത്തിൽ നിന്നും പഴുത്തൊരില ഞെട്ടറ്റ് താഴേക്ക് വീണു.. ഭൂതകാലത്തിലെ ഒരു പാളിയടർന്നു വീഴുന്ന പോലെ തുടരും രമേഷ് കൃഷ്ണൻ