പ്രിയമുള്ളവരെ, ഈസ്റ്ററിനു മുന്നോടിയായി പൗരസ്ത്യ ക്രൈസ്‌തവസഭകളിൽ ആചരിക്കപ്പെടുന്ന നോമ്പുകളിൽ ഏറ്റവും പ്രധാനപ്പെട്ടതായ വലിയ നോമ്പിന്റെ പത്താം ദിവസത്തിലേക്ക് നാം ഇന്ന് കടക്കുകയാണല്ലോ. അതായത് യേശുവിന്റെ അത്ഭുത പ്രവർത്തികളെ സൂചിപ്പിക്കുന്ന വലിയ നോമ്പിന്റെ ഒന്നാം ഞായർ / കൊത്തിനെ ഞായർ (കാനായിൽ വെള്ളം വീഞ്ഞാക്കിയത്), വലിയ നോമ്പിലെ രണ്ടാം ഞായർ / ഗർബോ ഞായർ (കുഷ്‌ഠരോഗിയെ സൗഖ്യമാക്കിയത്) എന്നിവ പിന്നിട്ടു കഴിഞ്ഞു. യഥാർത്ഥമായ ഈ നോമ്പിനെ കുറിച്ച് / അതിന്റെ അർത്ഥത്തെക്കുറിച്ച് നാം ചിന്തിച്ചിട്ടുണ്ടോ? ഈ നോമ്പ് (Nombu) എന്ന വാക്കിന്റെ അർത്ഥം  എന്താണ്? അതിന് വ്രതം അല്ലെങ്കിൽ ഉപവാസം (Fasting/Abstinence) എന്ന് പറയുന്നു. നോമ്പിനെ പിരിച്ചെഴുതുമ്പോൾ നോവ് + അൻപ് എന്ന് എഴുതുന്നു. ഈ നോവ് എന്നത് (വേദന/സഹനം) എന്നിവയെ സൂചിപ്പിക്കുന്നു. അൻപ് എന്നത് ( സ്നേഹം/കരുണ) എന്നിവയെ സൂചിപ്പിക്കുന്നു. നോവ് + അൻപ് എന്നിവ കൂടി ചേരുമ്പോൾ നോമ്പ് എന്ന വാക്കുണ്ടാകുന്നു. അതായത്, സഹനങ്ങളെ സ്നേഹത്തോടെയോ കരുണയോടെയോ ഏറ്റെടുക്കുന്നതാണ് നോമ്പ് എന്നാണ് ഇതിന്റെ ആഴമായ അർത്ഥം. നോമ്പുകാലത്തെ ഒരോ ഞായറാഴ്ചകൾ യേശുവിന്റെ അത്ഭുത പ്രവർത്തികളെ അനുസ്മരിക്കുന്നു. അതിൽ രണ്ട് ഞായറാഴ്ചകൾ നാം പിന്നിട്ടു കഴിഞ്ഞു. ബാക്കിയുള്ളവ ഇപ്രകാരമാണ് : 01/03/2026 വലിയ നോമ്പിലെ മൂന്നാം ഞായർ മ്ശറിയോ ഞായർ (തളർവാതരോഗിയെ സൗഖ്യമാക്കിയത്) 08/03/2026 വലിയ നോമ്പിലെ നാലാം ഞായർ ക്നാനയ്തോ ഞായർ (കനാൻകാരിയുടെ മകളെ സൗഖ്യമാക്കിയത്) 15/03/2026 വലിയ നോമ്പിലെ അഞ്ചാം ഞായർ ക്‌പിഫ്താ ഞായർ (കൂനിയെ സൗഖ്യമാക്കിയത്) 22/03/2026 വലിയ നോമ്പിലെ ആറാം ഞായർ സമിയോ ഞായർ (കുരുടനെ സൗഖ്യമാക്കിയത്) ഏഴാമത്തെ ഞായറാഴ്ചയായ 29/03/2026 ഓശാന ഞായർ മുതൽ 05/04/2026 ഈസ്റ്റർ /ക്യംതാ (ഉയിർപ്പു പെരുന്നാൾ) വരെയുള്ള നോമ്പിലെ അവസാന ആഴ്ചയെ ഹാശാ ആഴ്ച അഥവാ കഷ്ടാനുഭവ ആഴ്ച അല്ലെങ്കിൽ പീഡാനുഭവ വാരം എന്ന് വിളിക്കുന്നു. ഈ കാലഘട്ടങ്ങളിൽ പ്രധാനമായും നാം നോമ്പ് അനുഷ്ഠിക്കുന്നത് മറ്റുള്ളവരെ കാണിക്കാനല്ല, മറിച്ച് ദൈവത്തിന് വേണ്ടിയാണെന്ന ബോധ്യം നാം ഓരോരുത്തരിലും ഉണ്ടായിരിക്കണം. കൂടുതൽ സമയം പ്രാർത്ഥനയിലും വിശുദ്ധ ഗ്രന്ഥ പാരായണത്തിലും ചെലവഴിക്കണം. പട്ടിണി കിടക്കുന്നവരുടെ വിശപ്പറിഞ്ഞ് അവർക്ക് ഭക്ഷണം നൽകുകയും സഹായിക്കുകയും ചെയ്യണം. ഓഫീസുകളിലും ഭവനങ്ങളിലും വഴിയോരങ്ങളിലും തൊഴിൽ മേഖലയിലും ആശുപത്രികളിലും വിദ്യാഭ്യാസ സ്ഥാപനങ്ങളിലും അങ്ങനെ എവിടെയും ആയിക്കൊള്ളട്ടെ നാം ദോഷകരമായ വാക്കുകളും അനാവശ്യ സംസാരങ്ങളും പൂർണ്ണമായും ഒഴിവാക്കണം. മനസ്സിനെ ദുഷിച്ച ചിന്തകളിൽ നിന്ന് മോചിപ്പിച്ച് ദൈവചിന്തയിൽ സദാ മുഴുകണം. ആഹാര വർജ്ജനത്തിനൊപ്പം മനസ്സിനെയും ശരീരത്തെയും എല്ലാവിധ പാപങ്ങളിൽ നിന്നും തിന്മകളിൽ നിന്നും ഗാഗുൽത്തായിലെ രക്തത്താൽ ശുദ്ധീകരിച്ച് ദൈവത്തോട് കൂടുതൽ അടുക്കുന്ന ഒരു സമർപ്പണ പരിശീലനം ആയിരിക്കണം ഈ നോമ്പുകൊണ്ട് നാം തെരഞ്ഞെടുക്കേണ്ടത്. ഇത്തരം വ്യക്തമായ ലക്ഷ്യത്തോടെയുള്ള ഉപവാസം മനസ്സിനെയും ശരീരത്തെയും ഒരുപോലെ ശക്തിപ്പെടുത്തുന്നു അതോടൊപ്പം .ഇന്ദ്രിയങ്ങളെ നിയന്ത്രിക്കാനും, ആത്മീയ വിശുദ്ധീകരണം കൈവരിക്കാനും, ദൈവത്തോട് കൂടുതൽ അടുക്കുവാനും സഹായിക്കുന്നു. ഈ വലിയ നോമ്പിന്റെ നാളുകളെ പൂർണമായും ഉൾക്കൊണ്ടുകൊണ്ട് യഥാർത്ഥ ഉപവാസം ചെയ്യുന്ന ഓരോ വ്യക്തികൾക്കും അവരുടെ ജീവിതത്തിൽ സ്വയം വിശുദ്ധീകരണത്തിനും, ദൈവീക കൃപ ലഭിക്കുന്നതിനും ഇടയാകട്ടെ എന്ന് ആത്മാർത്ഥതയോടെ പ്രാർത്ഥിക്കുന്നു. കടപ്പാട് : ബിനോജ് ബാബു. ദി ഹാപ്പി ഫാമിലി. #😇 ഇന്നത്തെ ചിന്താവിഷയം #💞 നിനക്കായ് #വലിയ നോമ്പ് സ്റ്റാറ്റസ് #വലിയ നോമ്പ് കാലം #വലിയ നോമ്പ് 2026🙏🙏