#🤘 My Status ਖੁਸ਼ੀ ਲੱਭਦਿਆਂ-ਲੱਭਦਿਆਂ ਲੋਕਾਂ ਦੀਆਂ ਉਮਰਾਂ ਲੰਘ ਜਾਂਦੀਆਂ ਨੇ, ਪਰ ਖ਼ੁਸ਼ੀ ਫਿਰ ਵੀ ਹੱਥ ਨਹੀਂ ਆਉਂਦੀ, ਕਿਉਂਕਿ ਇਸ ਨੂੰ ਕਲਾਵੇ ਲੈਣ ਲਈ, ਸਾਰੇ ਦੁਨਿਆਵੀ ਲਾਲਚ ਤਿਆਗਣੇ ਪੈਂਦੇ ਹਨ, ਜੋ ਹਰ ਕਿਸੇ ਦੇ ਵੱਸ ਦਾ ਰੋਗ ਨਹੀਂ, ਤਾਂਹੀ ਰੋਂਦੀ ਪਿੱਟਦੀ ਫਿਰਦੀ ਆ ਦੁਨੀਆ..! ਸਮਾਂ ਬੀਤਣ ਮਗਰੋਂ ਕਈਆਂ ਨੂੰ ਅਹਿਸਾਸ ਹੁੰਦਾ ਹੈ ਕਿ ਖ਼ੁਸ਼ ਤਾਂ ਉਹੀ ਹੁੰਦੇ ਹਨ, ਜੋ ਸਮੇਂ ਸਿਰ ਖ਼ੁਸ਼ੀਆਂ ਨੂੰ ਹੰਢਾਉਣਾ ਤੇ ਵੰਡਾਉਣਾ ਸਿੱਖ ਲੈਂਦੇ ਹਨ। ਕਿਉਂਕਿ ਖ਼ੁਸ਼ੀ ਕੋਈ ਸੰਭਾਲ ਕੇ ਰੱਖਣ ਵਾਲੀ ਚੀਜ਼ ਨਹੀਂ, ਸਾਂਝਾ ਕਰਨ ਵਾਲਾ ਪਵਿੱਤਰ ਅਹਿਸਾਸ ਹੈ। ਜ਼ਿੰਦਗੀ ਦੇ ਆਸ਼ਿਕ ਉਹ ਨਹੀਂ ਹੁੰਦੇ ਜੋ ਸਿਰਫ਼ ਸਰੀਰਾਂ ਦੀ ਸੁੰਦਰਤਾ ‘ਤੇ ਮਰ ਮਿੱਟਣ, ਅਸਲ ਆਸ਼ਿਕ ਤਾਂ ਉਹ ਹੁੰਦੇ ਹਨ ਜੋ ਕੁਦਰਤ ਦੇ ਹਰ ਨੂਰ ‘ਤੇ ਫ਼ਿਦਾ ਹੋ ਜਾਂਦੇ ਹਨ, ਜਿਵੇਂ… ਆਸ਼ਿਕ ਓਹ ਨਹੀਂ ਹੁੰਦੇ, ਜਿਹੜੇ ਮਰਦੇ ਸਿਰਫ਼ ਸਰੀਰਾਂ ‘ਤੇ, ਅਸੀਂ ਆਸ਼ਿਕ ਕੁਦਰਤ ਦੇ, ਮਰ ਜਾਂਦੇ ਹਾਂ ਜੰਡ ਕਰੀਰਾਂ ‘ਤੇ। ਮੇਰੀ ਮਸ਼ੂਕ ਜ਼ਿੰਦਗੀ ਹੈ, ਮੈਂ ਜ਼ਿੰਦਗੀ ਦਾ ਆਸ਼ਿਕ ਹਾਂ। ਤਸਵੀਰਾਂ ਵਿੱਚ ਤਾਂ ਸਿਰਫ਼ ਚਿਹਰੇ ਹੁੰਦੇ ਹਨ, ਪਰ ਸਾਡੇ ਉਨ੍ਹਾਂ ਚਿਹਰਿਆਂ ‘ਤੇ ਅਸਲ ਨੂਰ ਕੁਦਰਤ ਦਾ ਹੁੰਦਾ ਹੈ। ਇਸੇ ਲਈ ਜ਼ਿੰਦਗੀ ਮੈਨੂੰ ਨਿਰਾ ਹੁਸਨ ਲੱਗਦੀ ਹੈ, ਇੱਕ ਐਸਾ ਹੁਸਨ, ਜੋ ਹਰ ਪਲ ਨਵਾਂ ਰੂਪ ਧਾਰਦਾ ਹੈ, ਚਮਕਦਾ ਹੈ, ਖਿੱਚ ਪੈਂਦਾ ਕਰਦਾ ਹੈ, ਕੋਲ ਬੁਲਾਉਂਦਾ ਹੈ ਅਤੇ ਦਿਲ ਨੂੰ ਨਿੱਘੀਆਂ ਗਲਵੱਕੜੀਆਂ ਪਾਉਂਦਾ ਹੈ। ਇਹ ਦਿਲ ਦੀ ਕਲੀ ਨੂੰ ਮਹਿਕਾਉਂਦਾ ਹੈ, ਖ਼ੁਸ਼ਬੂਆਂ ਵੰਡਦਾ ਹੈ, ਨਵੀਆਂ ਆਸਾਂ ਨੂੰ ਜਨਮ ਦਿੰਦਾ ਹੈ ਅਤੇ ਵਿਸ਼ਵਾਸ ਦੇ ਬੀਜ ਬੀਜਦਾ ਹੈ। ਜ਼ਿੰਦਗੀ ਅਨੇਕਾਂ ਰੂਪਾਂ ਵਿੱਚ ਸਾਹਮਣੇ ਆਉਂਦੀ ਹੈ… ਕਦੇ ਵਹਿੰਦੀ ਨਦੀ ਬਣ ਕੇ, ਕਦੇ ਵਗਦੀ ਹਵਾ ਬਣ ਕੇ, ਕਦੇ ਵਰ੍ਹਦੇ ਮੀਂਹ ਵਾਂਗ, ਕਦੇ ਹਿਰਦੇ ਨੂੰ ਠਾਰਦਾ ਠੰਡਾ ਬੁੱਲਾ ਬਣ ਕੇ। ਕਦੇ ਇਹ ਉੱਡਦਾ ਪੰਛੀ ਹੈ, ਕਦੇ ਉਗਦਾ ਪੌਦਾ, ਕਦੇ ਖਿੜਦੀ ਕਲੀ। ਕਦੇ ਇਹ ਗਿੱਧੇ ਵਿੱਚ ਨੱਚਦੀ ਮੁਟਿਆਰ ਹੈ, ਕਦੇ ਦੌੜਦੀ ਲਹਿਰ ਹੈ, ਕਦੇ ਸੰਗੀਤ ਦੀ ਆਨੰਦਮਈ ਧੁਨ ਹੈ। ਜ਼ਿੰਦਗੀ ਸੱਚ ਦਾ ਹੌਕਾ ਵੀ ਹੈ, ਪਿਆਰ ਦਾ ਵਪਾਰ ਵੀ, ਮੋਹ ਦਾ ਬਜ਼ਾਰ ਵੀ ਅਤੇ ਰੂਹ ਨੂੰ ਅਸਲ ਦਾ ਸ਼ਿੰਗਾਰ ਵੀ। ਇਹ ਇੱਕ ਐਸਾ ਹੁਸਨ ਦਾ ਮੇਲਾ ਹੈ, ਜਿਸ ਨੂੰ ਮਹਿਸੂਸ ਕਰਨ ਲਈ ਦਿਲ ਤ ਜ਼ਮੀਰ ਦਾ ਜਾਗਦਾ ਹੋਣਾ ਲਾਜ਼ਮੀ ਹੈ। ਹੌਂਸਲੇ ਵਾਲੀ ਜ਼ਿੰਦਗੀ ਦੀ ਫ਼ਿਤਰਤ ਵਿੱਚ ਰੁਕਣਾ ਨਹੀਂ ਹੁੰਦਾ। ਇਹ ਰੁੱਸਣ ਜਾਂ ਹਾਰ ਮੰਨਣ ਦੀ ਆਦੀ ਨਹੀਂ ਹੁੰਦੀ। ਨਾ-ਉਮੀਦੀ ਇਸ ਦਾ ਸੁਭਾਅ ਨਹੀਂ। ਇਹ ਤਾਂ ਚੱਲਣ ਵਿੱਚ ਵਿਸ਼ਵਾਸ ਕਰਦੀ ਹੈ, ਉਹ ਵੀ ਸਿਰਫ਼ ਅਗਾਂਹ ਵੱਲ, ਭਲਕੇ ਵੱਲ, ਉੱਚਾਈ ਵੱਲ। ਇਸ ਦੀ ਖ਼ੂਬੀ ਇਹ ਹੈ ਕਿ ਇਹ ਪਿੱਛੇ ਮੁੜ ਕੇ ਨਹੀਂ ਵੇਖਦੀ, ਇਸ ਦਾ ਹਰ ਕਦਮ ਅਗਲੇ ਕਦਮ ਤੋਂ ਅੱਗੇ ਵਧਣ ਲਈ ਬੇਚੈਨ ਰਹਿੰਦਾ ਹੈ। ਮੈਂ ਕਦੇ ਆਪਣੀ ਮਸ਼ੂਕ ਜ਼ਿੰਦਗੀ ਨਾਲ ਬੇਵਫ਼ਾਈ ਕਰਨ ਬਾਰੇ ਸੋਚ ਵੀ ਨਹੀਂ ਸਕਦਾ। ਜਿਉਂਦੇ ਜੀਅ ਇਸ ਨਾਲ ਵਫ਼ਾਦਾਰੀ ਨਿਭਾਉਣ ਦੀ ਕੋਸ਼ਿਸ਼ ਹੀ ਮੈਂ ਆਪਣੀ ਸਭ ਤੋਂ ਵੱਡੀ ਕਾਮਯਾਬੀ ਮੰਨਦਾ ਹਾਂ, ਅੱਜ ਵੀ, ਕੱਲ੍ਹ ਵੀ ਅਤੇ ਆਉਣ ਵਾਲੇ ਸਮੇਂ ਵਿੱਚ ਵੀ… ਕਦੇ-ਕਦੇ ਜ਼ਿੰਦਗੀ ਮਸਕਰੀ ਕਰਕੇ ਕਹਿੰਦੀ ਹੈ… “ਵੇ ਕਮਲਿਆਂ! ਮੇਰਾ ਆਸ਼ਿਕ ਹੋਣ ਲਈ ਅਜੇ ਤੈਨੂੰ ਰੂਹ ਦੇ ਰਾਹ ਹੋਰ ਸਮਝਣੇ ਪੈਣਗੇ। ਹਰ ਦਿਲ ਦਾ ਦਰਦ ਵੱਖਰਾ ਹੁੰਦਾ ਹੈ, ਹਰ ਰੂਹ ਦੀ ਪੀੜ ਅਨੋਖੀ ਹੁੰਦੀ ਹੈ। ਤੂੰ ਤਾਂ ਹੈ ਪਿੱਤਲ ਦੇ ਕੁੰਡੇ ਵਰਗਾ, ਮੇਰਾ ਹੁਸਨ ਤਾਂ ਸੁੱਚਾ ਮੋਤੀ ਹੈ।” ਕੀ ਕਰਾਂ? ਜ਼ਿੰਦਗੀ ਨੂੰ ਜਿੱਤਿਆ ਨਹੀਂ ਜਾ ਸਕਦਾ, ਇਸ ਨੂੰ ਹਰ ਹਾਲ ਵਿੱਚ ਸਵੀਕਾਰਿਆ ਹੀ ਜਾਂਦਾ ਹੈ। ਰਿਹ ਖੁਸ਼ੀ ਵੀ ਮੇਰੇ ਲਈ ਅਵੱਲੀ ਹੈ। ਇਸ ਲਈ ਦਿਲ ਦੀ ਸੰਦੂਖੜੀ ਵਿੱਚ ਮੋਹ ਦੀਆਂ ਪੂਜੀਆਂ ਸਾਂਭ ਸੰਭਾਲ ਕੇ ਰੱਖੀਆਂ ਨੇ, ਸਿਦਕ ਦਾ ਜਿੰਦਰਾ ਲਾ ਕੇ ਸਬਰ ਦੀਆਂ ਕੁੰਜੀਆਂ ਨਾਲ ਇਸ ਨੂੰ ਖੋਲ੍ਹਣਾ ਸਿੱਖ ਰਿਹਾ ਹਾਂ..! ਕਦੇ ਫੁੱਲਾਂ ਕੋਲੋਂ ਪੁੱਛ ਕੇ ਵੇਖਿਓ, ਕਿਵੇਂ ਓਹ ਮਹਿਕਾਂ ਨਾਲ ਸ਼ਰਤਾਂ ਲਾਉਂਦੇ ਸੀ..? ਐਵੇਂ ਨਹੀਂ ਪੋਟੇ ਛਿੱਲੇ ਗਏ, ਮੁਹੱਬਤਾਂ ਤੋਂ ਨਫ਼ਰਤ ਦੀਆਂ ਪਰਤਾਂ ਲਾਹੁੰਦੇ ਸੀ। ✍🏻ਹਰਫੂਲ ਸਿੰਘ ਭੁੱਲਰ 🌹 ਹਰਮੰਦਰ ਸਿੰਘ ਵਿਰਕ 📞+919463215026