*மசாபியேல் குகையில் அர்ச்.பெர்னதெத் கண்ட அன்னை - லூர்து காட்சிகள்*
~ ஆசிரியர் அருட்தந்தை மெத்தோடியஸ் அவர்கள்
பாகம்-8
4-வது காட்சி
அன்று பெப்ருவரி மாதம் 19-ம் நாள். வெள்ளிக்கிழமை. காலையில் திருப்பலி முடிந்து சுமார் ஒரு மணிக்கு பெர்னதெத் கெபிக்குப் புறப்பட்டாள். அவளுடன் தாய் லூயிசா ஃபீரும், அத்தை பெர்னர்ட் காஸ்ட்ரோ, மதாம் மில்லெட் இன்னும் பல பெண்கள் சென்றனர்.
பெர்னதெத் முழந்தாளிலிருந்து தன் மீது சிலுவை அடையாளம் வரைந்து செபமாலை செபிக்கத் தொடங்கினாள். பெர்னதெத்தின் முகம் பூரிப்பால் மலர்ந்தது. குகையில் அம்மா தோன்றி விட்டார்கள் என்பதைச் சூழ நின்றவர்கள் புரிந்து கொண்டனர். பொனதெத் பரவச நிலையில் ஆழ்ந்தாள்.
அவளுடைய பரவச நிலையைப் பார்த்த தாய் லூயிசா சூபீரு, "ஓ! கடவுளே! இது என்ன மாயமோ! என் பிள்ளையைக் காப்பாற்றும்” எனக் கதறினாள். இன்னொரு அம்மா "என்ன அழகு! என்ன அழகு" என்று தன்னை மறந்து கத்தினாள், அவளுடைய அந்தக் குரல் மலை எங்கும் பரவி எதிரொலித்தது.
பெர்னதெத்தின் வருகைக்கு நன்றி கூறிவிட்டு, சில இரகசியங்களையும் சொல்வதாகக் கூறி மெதுவாக அம்மா மறைந்து விட்டார்கள்.
5-வது காட்சி
அன்று பெப்ருவரி மாதம் 20-ம் நாள், சனிக்கிழமை. திருப்பலி பூசை முடிந்ததும் பெர்னதெத் தன் தாயுடனும், அத்தையுடனும் கெபிக்குப் புறப்பட்டாள். காலை 6.30 மணி. அப்படியிருந்தும், குளிரைப் பொருட்படுத்தாமல் பெரிய கூட்டம் பெர்னதெத்தின் வருகைக்காகக் காத்திருந்தது.
வழக்கம்போல் தரையில் குனிந்து தெண்டனிட்டு செபமாலை செபிக்கத் தொடங்கினாள். பெர்னதெத் பரவசத்தில் ஆழ்ந்தாள். கரங்களைக் குவித்தபடி குகையை உற்றுப் பார்த்துக் கொண்டிருந்தாள். முகம் நீல நிறமாகவும், களைப்புற்றும் தோன்றியது. சில வேளை முகத்தில் மகிழ்ச்சி தெரிந்தது. சில வேளை கவலை தெரிந்தது. கண்களிலிருந்து கண்ணீர் வழிந்து கொண்டிருந்தது. தலை குனிந்து வணங்கியபோதும், சிரித்த போதும், கரங்களை அசைத்தபோதும் எல்லாமே தெய்வீசுமாகத் தோன்றின.
நாற்பது நிமிடங்கள் காட்சி நீடித்தது. அந்தத் தாய் ஒரு செபத்தைப் பெர்னதெத்துக்கு ஒவ்வொரு வார்த்தையாகச் சொல்லி கற்றுக் கொடுத்தார்கள். அந்த செபம் அவளுக்கு மட்டும்தான். இந்த செபத்தை வாழ்நாள் முழுவதும் பெர்னதெத் யாருக்கும் தெரியாமல் தினமும் செபித்து வந்தாள்.
தொடர்ந்து இனைந்திருங்கள்.....
ஆமென்.
#✝️இயேசுவே ஜீவன் #✝பைபிள் வசனங்கள் #✝️இயேசு #⛪ வேளாங்கண்ணி சர்ச்
