छत्रपतींचे नाव घेतल्यावरच एक विलक्षण तेजस्वी व्यक्तिमत्त्व आपल्यासमोर उभे राहते. शिवरायांच्या व्यक्तिमत्त्वाचा वेध घेण्याचा प्रयत्न अनेक इतिहासकारांनी, शिवप्रेमींनी केला आहे. ज्याने त्याने आपापल्या मगदुराप्रमाणे त्याचा अर्थ लावला आहे. असाच एक प्रयत्न जदुनाथ सरकारांनी केला. सरकार म्हणजे अखिल भारतीय पातळीवरील एक महत्त्वाचे नाव. १८ व १९ ऑगस्ट १९४९ रोजी दयानंद कॉलेज, सोलापूर येथे सर जदुनाथ सरकार यांनी The Saindas foundation च्या वतीने दोन व्याख्याने दिली... ● छत्रपती शिवाजी महाराजांचे गुणवैशिष्ट्य सर जदुनाथ सरकार लिहितात, “खरा नेता मग तो राजा असो वा उपजत सेनानी असो वा कुशल राजनीतिज्ञ असो, त्याला सुयोग्य साधनांची निवड व माणसांची अचूक पारख करता येणे आवश्यक आहे. माणसाकडे पाहूनच त्याची पारख करण्यात शिवाजी महाराज चाणाक्ष होते. या सर्वोच्च गुणामुळे त्यांनी आपल्या भोवती अनेक कर्तबगार माणसे उभी केली. या मुद्द्याचा अधिक विस्तार करताना जदुनाथ सरकारांनी मिर्झाराजे जयसिंह आणि औरंगजेब यांच्यातील एका पत्राचा दाखला दिला आहे. ‘जयसिंग लिहितो, की शिवरायांना कैद करून किंवा मारून काही उपयोग नाही. कारण त्यांनी निघण्यापूर्वी राज्याची व्यवस्था उत्तम लावली आहे. त्यांचे कारभारी त्यांच्या अनुपस्थितीत व्यव‌स्थित कारभार करू शकतात.’ जयसिंहांचे म्हणणे पुढे १६८० ते १७०७ या मराठ्यांच्या स्वातंत्र्ययुद्धाच्या कामात खरे ठरल्याचे आपणास दिसते...” ● शिवरायांचे आणखी एक वैशिष्ट्य जदुनाथ सरकार सांगतात ते म्हणजे, ‘त्यांनी राष्ट्रीय आदर्शासाठी देशातील सर्व गुणवान माणसांना एकत्र आणण्याचे कार्य केले. कोणताही राष्ट्रीय नेता जनतेच्या संपूर्ण पाठबळाशिवाय आपले कार्य पूर्णत्वास नेऊ शकत नाही..’ या सगळ्याचा सारांश एका वाक्यातच जदुनाथ सरकार देतात. तो म्हणजे ‘सर्वत्र कायदा आणि सुव्यवस्थेचे राज्य असावे, हे मूलभूत कर्तव्य शिवरायांनी परिपूर्णतेने पार पाडले. त्यामुळे ते लोकांचा अत्यंत जिवलग बनणे अगदी स्वाभाविक होते...’ : सर जदुनाथ सरकार. गडवाट शिवजयंती संस्कारदर्शक 🚩 १९ फेब्रुवारी २०२६. गडवाट प्रवास सह्याद्रीचा इतिहासकर्ते मरहाट्टे छत्रपती शिवाजी महाराज #🙏शिवदिनविशेष📜 #📜इतिहास शिवरायांचा #😇आमचे प्रेरणास्थान: छत्रपती🙏 #🚩शिवरायांचे भक्त #🚩मी शिवबा भक्त