*सशक्त राजनीतिज्ञ आदर्श पुरुष...* *'संत्रा मार्केटमध्ये कुठलीशी कॉन्फरन्स आहे. तिथं डॉ. आंबेडकरांचे भाषण आहे. आपण जाऊ' असा मित्राचा आग्रह होता. शनिवारचा दिवस. सकाळची शाळा सुटताच दप्तर मनगटावर अडकवून खेळत-बागडत आम्ही संत्रामार्केटमध्ये पोहोचलो. भाषणं आटोपली होती. लोक पांगले होते. मात्र चार-पाच खुच्र्यांवर काहीजण बसून होते. टाय लावलेली आणि सुटाबुटात बसलेली व्यक्ती बाबासाहेब आहेत असं माझ्या मित्रांनी मला सांगितल्याचं आठवतं. त्यांचं मला घडलेलं हे प्रथमदर्शन.* *आमच्या मोहल्ल्यात गांधी, नेहरू, सुभाष अशी नावे चर्चेत येत. मधून मधून आंबेडकरांचाही उल्लेख व्हायचाच. पण तुरळकच. आमच्या वॉर्डात काँग्रेस, हिंदुमहासभा, संघवाल्यांचं संमिश्र वातावरण असे. बॅ. जीना आणि आंबेडकरांचा उल्लेख अधूनमधून कानी पडत असे. तसं विशेष मला कुठं काहीच कळत नव्हतं. गुलामी कळत होती, पण शोषण, शूद्र, जातिव्यवस्था, राजकारणातलं तसं समजत नव्हतं. मजूर पक्ष, रिपब्लिकन पार्टी आणि डॉ. आंबेडकर गव्हर्नर जनरलचे सल्लागार झाले असं काहीसं कानावर पडे वा वाचनात येई. 'घटना' झाल्यानंतरचं त्यांनी दिलेलं भाषण-लॉ कॉलेजच्या विद्यार्थ्यांनी त्या भाषणाची कात्रणंच फ्रेम केलेली आठवतंय.* *नागपूर कॉपर्पोरेशनचे मेयर बंधुराज रा. पै. समर्थ होते. महानगरपालिकेने डॉ. बाबासाहेबांना जे मानपत्र दिले त्या कार्यक्रमाला मी हजर नव्हतो, पण त्यांच्या अनुयायांनी नागपूरचे रस्ते गजबजून जावे एवढी गर्दी मी पाहिली आहे. सर्वच वर्तमानपत्रांत त्यांचं छापलेलं भाषण मी वाचल्याचं आठवतं. माझ्या एका मित्राच्या आग्रहावरून डॉ. बाबासाहेबांची तीन पोर्ट्रेटस् मी काढून दिली होती. डॉ. बाबासाहेबांच्या मृत्यूची वार्ता मी वाचली. त्यावर उलट-सुलट वादही वाचले. त्यानंतर मी बाबासाहेबांच्या कामगिरीची चर्चा ऐकत असे. काही लेखही वाचत होतो. पण मला तीव्र रुची अशी नव्हतीच.* *अहंकाराने ग्रस्त ब्राह्मण्यवृत्तीच्या कपटांची आच मला बसू लागली. कलेच्या आणि व्यक्तित्वविकसनाच्या आडं शूद्रांचे शत्रू कार्यरत असल्याचे जाणवले. मग मी भारतीय राजकारण, समाजव्यवस्था, भांडवलदारी पकड, नोकरशाहीत अन्याय करणाऱ्या स्वतःला श्रेष्ठवर्षीय समजणाऱ्यांची कारस्थाने समजू लागलो, तसतसं मला मार्क्सवादी आणि आंबेडकरी चळवळीचं भान वाढवून घेण्याची आवश्यकता जाणवू लागली. फुले, शाहूमहाराज, डॉ. आंबेडकर, रामस्वामी नायकर-पेरियार यांची पुस्तके वाचू लागलो.* *सावरकर, आगरकर आणि तत्कालीन सुधारकांचे लेखन वाचून समजून घेऊ लागलो.* *डॉ. बाबासाहेब आंबेडकर आणि दलित साहित्यावर व्याख्यानाची निमंत्रणं येऊ लागली. आग्रहाने खेडोपाडी आणि शहरात बोलावू लागले. लोक मला महारच समजू लागले, इतक्या तळमळीने नि पोटतिडिकेने आंबेडकर- मी मला समजलेले आंबेडकर-समजावून सांगू लागलो.* *मी आंबेडकर वाचत राहिलो तो अंधश्रद्धावादी म्हणून मुळीच नाही. कालमानानुसार भारतात असणारी-बदलणारी स्थिती समजूनच त्यांनी उपयुक्त विचार मांडले, घोषणा दिल्या.* *गनिमीकाव्याचा सशक्त राजनीतिज्ञ आदर्श पुरुष असा डॉ. बाबासाहेबांशिवाय दुसरा नेता मला भेटलाच नाही..* *संदर्भ डॉ बाबासाहेब* *आंबेडकरांच्या आठवणी* *लेखक भाऊ समर्थ, नागपूर* #🙂Positive Thought #😇प्रेरणादायक डायलॉग व्हिडिओ #💪बुद्धांची तत्वे📜 #🙏 प्रेरणादायक बॅनर