പ്രിയരേ, ഈ പുതിയ പ്രഭാതത്തിൽ സങ്കീർത്തനം 46:1. നമുക്ക് ധ്യാനിക്കാം. ദൈവമാണ് നമ്മുടെ അഭയവും ശക്തിയും. കഷ്ടതകളിൽ അവിടുന്നു സുനിശ്ചിതമായ തുണയാണ്... ഈ വചനത്തെ ആധാരമാക്കി അവിടുത്തെ അഭിഷേകത്തിനായി ഇപ്രകാരം നമുക്ക് പ്രാർത്ഥിക്കാം. സ്വർഗ്ഗസ്ഥനായ പിതാവേ, യേശുക്രിസ്തുവിന്റെ നാമത്തിൽ ഞാൻ അങ്ങയുടെ സന്നിധിയിൽ വരുന്നു. ഈ പ്രഭാതത്തിൽ എന്റെമേൽ പുതിയൊരു അഭിഷേകം ഈ വചനത്തിലൂടെ പകർന്നു നൽകണേ. സ്നേഹപിതാവായ ദൈവമേ. ഈ പ്രഭാതത്തിൽ ഞാൻ അങ്ങയെ സ്തുതിക്കുന്നു, ആരാധിക്കുന്നു, മഹത്വപ്പെടുത്തുന്നു, നന്ദി പറയുന്നു. ദൈവത്തിന്റെ പരിശുദ്ധാത്മാവേ, എന്റെ ശരീരം, മനസ്സ്, ആത്മാവ് എന്നിവയെ അങ്ങയുടെ അഗ്നിയാൽ നിറയ്ക്കണമേ. കർത്താവേ, വചനമാകുന്ന എണ്ണയാൽ എന്റെ തലയിൽ അഭിഷേകം ചെയ്ത് എന്റെ പാനപാത്രം കവിഞ്ഞൊഴുക്കേണമേ. അവിടുത്തെ അഭിഷേകത്താൽ എന്റെ ജീവിതത്തിലെ എല്ലാ നുകങ്ങളും എന്നെ ബന്ധിക്കുന്ന എല്ലാ അന്ധകാരശക്തികളും തകരട്ടെ. രോഗങ്ങൾ, ഭയങ്ങൾ, അസ്വസ്ഥതകൾ, സാമ്പത്തിക തടസ്സങ്ങൾ എന്നിവയൊക്കെ മാറി, അങ്ങയുടെ വിടുതൽ എന്റെ മേൽ ഉണ്ടാകട്ടെയെന്നു യേശുക്രിസ്തുവിന്റെ നാമത്തിൽ ഞാൻ പ്രാർത്ഥിക്കുന്നു. എന്റെ വാക്കുകളിലും, പ്രവൃത്തികളിലും, വിചാരങ്ങളിലും അങ്ങയുടെ സാന്നിധ്യം മാത്രം വെളിപ്പെടട്ടെ. എല്ലാ ദുഷ്ടശക്തികളെയും അനുകൂലമല്ലാത്ത സാഹചര്യങ്ങളെയും ദൈവഹിതമല്ലാത്ത ഫലങ്ങളെയും എന്നിൽ നിന്നും അകറ്റി കളയണമേ. എന്നെ അവിടുത്തെ ഒരു പ്രവാചകശബ്ദമായി, അത്ഭുതങ്ങൾ പ്രവർത്തിക്കുന്ന ഉപകരണമായി, ഒരു വെളിച്ചമാക്കി മാറ്റണമേ. കർത്താവേ, എന്നെ കാൽവരി രക്തം കൊണ്ട് കഴുകി ഹീസോപ്പിനാൽ പൂർണ്ണമായി വിശുദ്ധീകരിക്കണമേ. അവിടുത്തെ ഹിതം പൂർത്തിയാക്കുവാൻ എന്നെ സഹായിക്കണമെ. യേശുവിന്റെ നാമത്തിൽ പൂർണ്ണഹൃദയത്തോടെയും വിശ്വാസത്തോടെയും എന്റെ അപേക്ഷ ഞാൻ സമർപ്പിക്കുന്നു. എന്റെ പ്രാർത്ഥന കേട്ട് ഉത്തരമരുളണമെ... ആമേൻ. കടപ്പാട് : ബിനോജ് ബാബു #😇 ഇന്നത്തെ ചിന്താവിഷയം #💞 നിനക്കായ്