#😇My Status #సంకల్ప బలం *సంకల్ప బలం* మనిషి జీవితంలో సుఖాలు, దుఃఖాలు, విజయాలు, వైఫల్యాలు అనే కొండలను, లోయలను ఎక్కుతూ దిగుతూ ముందుకు పయనించాల్సిందే! నిజానికి ఒక వ్యక్తి తన లక్ష్యాన్ని చేరుకోవడానికి అవసరమైన ప్రాథమిక ఇంధనం ఏమై ఉంటుందీ అంటే- సంకల్ప బలం అని చెప్పొచ్చు. అది మనిషి లోపల దాగి ఉండే అద్భుతమైన శక్తి! మనిషిని మనీషిగా, సాధారణాన్ని అసాధారణంగా మలిచే గొప్ప గుణం! మహాభారతంలోని ఆనుశాసనిక పర్వంలో సంకల్ప బలం గురించి మంచి కథ ఉంది. ఉపమన్యుడు నిరుపేద కుటుంబంలో జన్మించాడు. ఆ బాలుడు ఒకరోజు తల్లితో కలిసి మేనమామ ఇంటికి చుట్టంచూపుగా వెళ్లాడు. అక్కడ మేనమామ పిల్లలు పాలు తాగుతూ ఇతడికి కూడా కొంచెం ఇచ్చారు. ఉపమన్యుడికి ఊహ వచ్చాక పాలు రుచి చూడటం అదే మొదటిసారి. దాంతో తిరిగి ఇంటికి వెళ్లాక తల్లిని పాలు కావాలని అడిగాడు. ‘మన దురదృష్టం వల్ల పేదవారిగా పుట్టాం. పాలు కొని తాగలేని నిర్భాగ్యులం’ అని బుజ్జగిస్తూ చెప్పింది తల్లి. ఉపమన్యుడు ఒక్కసారిగా బావురుమన్నాడు. పిల్లాడి ఏడుపు చూసి తల్లి తల్లడిల్లిపోయింది. వార్చిన అన్నపు గంజిలో నీళ్లు, కాస్త తీపి కలిపి ‘నాయనా ఇవిగో పాలు, తాగు’ అని ఇచ్చింది. వాటి రుచి చూడగానే బాలుడు ‘ఇవి పాలు కానే కాదు. నాకు నిజమైన పాలే కావాలి’ అంటూ మారాం చేశాడు. ‘నా చిట్టితండ్రీ! శివుడి ఆజ్ఞ లేకుండా ఏదీ జరగదు. కాబట్టి పరమేశ్వరుణ్ని స్మరించు. అప్పుడు గిన్నెడు పాలే కాదు, ఆ క్షీరసాగరమే తరలివస్తుంది. నీ కోరికలన్నీ ఫలిస్తాయి’ అని ఉపదేశించింది. తల్లి పలుకులు శ్రద్ధగా ఆలకించిన ఉపమన్యుడు కంటినీరు తుడుచుకుంటూ, లేత మనసును దృఢం చేసుకున్నాడు. శివుడి అనుగ్రహం కోరుతూ హిమాలయాల్లో కఠిన తపస్సు చేయనారంభించాడు. ఉపమన్యుడి భక్తికి ముగ్ధుడైన శివుడు ఇంద్రుడి వేషంలో అతడి ముందు ప్రత్యక్షమై ఏదైనా వరం కోరుకోమని అడిగాడు. పరమేశ్వరుడి అనుగ్రహం కోసం దృఢ సంకల్పంతో ఉన్న ఉపమన్యుడు తన అచంచల భక్తిని ప్రదర్శిస్తూ, ‘నాకు శివయ్య దర్శనం తప్ప మరే ఇతర వరం వద్దు’ అని నిరాకరించాడు. ఆ భక్తికి సంతోషించిన శివుడు తన నిజరూపాన్ని వెల్లడించి అపార దయా వర్షం కురిపించాడు. పార్వతీదేవి సైతం తన కరుణా కటాక్ష వీక్షణాలను అతడిపై ప్రసరింపజేసింది. ఉపమన్యుడి కథ స్వచ్ఛమైన, అచంచలమైన భక్తికి, సంకల్ప సిద్ధికి ప్రతీక! సంకల్ప బలం అంటే ఏదైనా చేయాలనే కోరిక మాత్రమే కాదు. ఆ కోరికను కార్యరూపంలోకి మార్చేందుకు తీసుకునే దృఢ నిర్ణయం, అవిచ్ఛిన్నమైన పట్టుదల కూడా! ఏకాగ్రతతో మనసు, శరీరం మధ్య సమన్వయాన్ని సాధించి, అన్ని ఆటంకాలను అధిగమించే సామర్థ్యం! లోతైన భక్తికి, నిష్కామమైన కోరికలకు భగవానుడు తప్పకుండా దాసోహమవుతాడు. సంకల్పం సరైనదైతే దానికి బలంగా ఆయనే మారతాడన్నది సత్యం!