#🙏श्री गुरुदेव दत्त💐 विष्णूंच्या चोवीस अवतारातील कोणत्याही अवताराचे दर्शन आपल्यासारख्या क्षुद्र जीवांना दुर्लभ आहे . अवतार दर्शन तर सोडाच पण पापराशींमुळे त्यांच्या प्रतिमेचं नित्य दर्शन , नामस्मरण देखील होत नाही. असे असले तरी अनेक महान भक्तांना या भगवंताच्या दोन / तीन अवतारांचे दर्शन घडले आहे . अनेक उदाहरणे अशी आहेत . दत्त पुराणात आलेली दोन उदाहरणे म्हणजे कार्तवीर्य सहस्त्रार्जुन आणि भक्त प्रह्लाद . कार्तवीर्य सहस्त्रार्जुनाला गर्ग मुनींच्या मार्गदर्शनाने दत्त महाराजांचे दर्शन घडले आणि दत्त महाराजांकडून वरदान मागताना तो म्हणाला ,माझ्याहून ख्यातीने अधिक असलेल्या अशाकडून मला मृत्यू यावा . याठिकाणी भवत्तुल्य हा शब्दप्रयोग दत्त माहात्म्यात केला आहे . त्याप्रमाणे जमदग्नी मुनीं आणि रेणुका मातेच्या पोटी भगवान विष्णूंनी (भार्गव ) राम अवतार घेतला आणि त्यांनी कार्तवीर्याचा समरात वध केला . भगवान विष्णूंचे हे दोन अवतार म्हणजे दत्त महाराज आणि भगवान परशुराम कार्यवीर्याला पाहता आले . दुसरे उदाहरण म्हणजे भक्त प्रह्लादाचे . दत्त पुराणातील उपासना कांड म्हणजे दत्त माहात्म्य . पण या दत्त माहात्म्यात मात्र प्रह्लादाचे वर्णन अथवा गुणसंकीर्तन आलेले नाही . दत्त पुराणाच्या व्दितीय अष्टकातील सातव्या अध्यायात हा कथाभाग आला आहे . प्रह्लादाला भगवान विष्णूंच्या नरसिंह रूपाचे दर्शन घडले . हिरण्यकश्यपूच्या वधानंतर राज्यकारभार जरी प्रह्लाद करीत असला तरी त्याचे मन कशातच लागत नसे . कायम उदासीन अशा अवस्थेत शिकारीच्या निमित्ताने रानावनातून हिंडत असताना कावेरी नदीच्या काठी एका अवधूताला प्रह्लादाने पाहिले . हे अवधूत जमिनीवर झोपलेल्या अवस्थेत ,धुळीने माखलेले अंग असलेले ,लोकांनी तिरस्कृत ,गूढ ,रागादी मलरहित मात्र अत्यंत तेजस्वी असे होते . प्रह्लादाने त्या अवधूतांना नमस्कार करून म्हटले ,हे मुने , उद्योगाने धन मिळते ,धनाने भोग मिळतात ,भोगामुळे शरीर पुष्ट होते तेव्हा झोपून राहून ,उद्योग न करता शरीर मात्र भोगी धनिकाप्रमाणे पुष्ट आहे ,हे कसे ? आपण विद्वान ,व्यवहारदक्ष दिसता पण असे असून देखील वृत्ती रागद्वेषादी शून्य कशी ? ( दत्त पुराण दुसरे अष्टक ,अध्याय ७ - ४०ते ४६) यावर अवधूत रूपात असलेल्या दत्त महाराजांनी स्मितहास्य करीत प्रह्लादाला ज्ञान दिले अशी कथा आहे . दत्त महाराजांच्या प्रत्यक्ष दर्शनाचा भाग्ययोग नसला तरी या कथारूपात दर्शन योग आहे हे अहोभाग्य ! श्रीगुरुदेव दत्त !!!--- अभय आचार्य