#📙 നോവൽ son... 6 ഫാദർ ജേക്കബ് പറയുന്നത് സിസ്റ്റർ മാർത്ത കേട്ടുനിന്നു.. " ഇതൊക്കെ ഉള്ളതാണോ ഫാദർ.. എനിക്കിതൊന്നും വിശ്വസിക്കാനാവുന്നില്ല. ഒരുപക്ഷേ അതൊക്കെ ഫാദറിന്റെ തോന്നലായിരുന്നെങ്കിലോ.. നമ്മൾ കാണുന്ന സ്വപ്നമൊക്കെ ഫലിക്കണം എന്നില്ലല്ലോ ഫാദർ.. " സിസ്റ്റർ മാർത്ത പറഞ്ഞു.. " ഇല്ല മാർത്ത.. ഈ കാലത്തിനുള്ളിൽ ഇതുപോലൊരു സ്വപ്നം ഞാൻ കണ്ടിട്ടില്ല.. നമ്മൾ ഈ ചോര മരവിച്ചു എന്നൊക്കെ പറയില്ലേ.. അതുപോലെയായിരുന്നു എന്റെ അവസ്ഥ.. " " ഒരു വൈദികനായ ഫാദർ ഇങ്ങനെ ഭയന്നാൽ സാധാരണക്കാരുടെ അവസ്ഥയൊക്കെ എന്താവും ഫാദർ.. " മാർത്ത സിസ്റ്റർ പറഞ്ഞു.. " സിസ്റ്റർ മാർത്ത.. ഫാദർ ജേക്കബ് എന്നു പറയുന്നത് സാധാരണ ഒരു മനുഷ്യൻ മാത്രമാണ്. ദൈവത്തിനു വേണ്ടി സ്വന്തം ജീവിതം ഉഴിഞ്ഞു വെച്ച ഒരു വൈദികൻ.. അതിനുമപ്പുറം ഒന്നുമല്ല.. അത്ഭുത സിദ്ധി പ്രവർത്തിക്കാൻ ഞാൻ ഒരു വിശുദ്ധനോ.. പ്രേതങ്ങളെ ഓടിക്കാൻ ഞാൻ കടമറ്റത്ത് പൗലോസ് അച്ഛനോ അല്ല .. " ഫാദർ പറഞ്ഞപ്പോൾ പിന്നെ മാർത്ത ഒന്നും പറഞ്ഞില്ല.. " സിസ്റ്റർ മാർത്ത ഞാൻ പ്രാർത്ഥനാ മുറിയിലേക്ക് പോവുകയാണ്.. മാർത്ത പ്രാർത്ഥിക്കുന്നില്ലേ.." " ഇല്ല ഫാദർ ഞാൻ രാവിലെ പ്രാർത്ഥിച്ചതാണ്..ശരി ഫാദർ എനിക്ക് കുറച്ച് ജോലിയുണ്ട്.. " മർത്ത പറഞ്ഞു.. മാർത്ത പോയി കഴിഞ്ഞതും ഫാദർ പള്ളിക്കകത്തേക്ക് കയറി.. എന്നാൽ പള്ളിക്കകത്ത് കയറിയ ഫാദർ നടുങ്ങിപ്പോയി.. ക്രൂശിത രൂപത്തിനു മുന്നിൽ നിന്നും അൾത്താരയിലേക്ക് നോക്കി പ്രാർത്ഥിനാ നിരതയായി മുട്ടിൽ നിൽക്കുന്ന സിസ്റ്റർ മാർത്ത.. ഫാദർ നോക്കിനിൽക്കെ കുരിശു വരച്ച് മാർത്ത എഴുന്നേറ്റു.. പുറത്തേക്കിറങ്ങാൻ തിരിഞ്ഞു.. അപ്പോഴാണ് ഫാദർ ജേക്കബിനെ മാർത്ത കണ്ടത്.. " ഈശോമിശിഹായ്ക്ക് സ്തുതിയായിരിക്കട്ടെ ഫാദർ.. " അച്ഛന് സ്തുതി കൊടുത്തുകൊണ്ട് മാർത്ത പറഞ്ഞു.. " ഇപ്പോഴും എപ്പോഴും തമ്പുരാന് സ്തുതിയായിരിക്കട്ടെ.. " മാർത്ത ഫാദറിന്റെ അടുത്തേക്ക് ചെന്നു.. " മാർത്ത എങ്ങനെ പള്ളിക്കകത്ത് കയറി.. ഇത്രയും നേരം പുറത്തുനിൽക്കുകയായിരുന്നില്ലേ.. പ്രാർത്ഥിക്കുന്നില്ല എന്ന് പറഞ്ഞ് പുറത്തേക്കല്ലേ പോയത്.. അകത്തേക്ക് കയറുന്നത് ഞാൻ കണ്ടില്ലല്ലോ.. " അമ്പരപ്പോടെ ഫാദർ ചോദിച്ചു.. " ഞാനോ.. ഞാൻ അകത്തേക്ക് വരുമ്പോൾ ഫാദർ സിൻഡ്രല്ലയോട് സംസാരിച്ചുകൊണ്ടിരിക്കുകയായിരുന്നു.. ഞാൻ അപ്പോഴേക്കും അകത്തേക്ക് കയറിപ്പോന്നു.. ഫാദർ എന്നെ കണ്ടില്ല.. " മാർത്ത പറഞ്ഞു.. " അല്ല.. അല്ല.. അങ്ങനെയല്ല.. നീ ഇത്രയും നേരം എന്നോടൊപ്പം പുറത്തു നിൽപ്പുണ്ടായിരുന്നു മാർത്ത.. " " ഫാദർ എന്തൊക്കെയാ ഈ പറയുന്നത്.. ഞാനിവിടെ പ്രാർത്ഥിക്കാൻ വന്നതാണ് ഫാദർ.. ഫാദറെന്നെ കണ്ടിട്ടില്ല നമ്മൾ തമ്മിൽ സംസാരിച്ചിട്ടില്ല.. ഞാനെന്തിനാ ഫാദറിനോട് കള്ളം പറയുന്നേ.. ആ ഒരു പാപം ഞാൻ ചെയ്യില്ല.. " മാർത്ത തീർത്തു പറഞ്ഞു.. ഫാദർ ജേക്കബ് ആകെ അങ്കലാപ്പിലായി.. പെട്ടെന്നാണ് സിസ്റ്റർ മാർത്തയുടെ കഴുത്തിൽ കിടക്കുന്ന കുരിശുരൂപം ഒരു സ്വർണം പോലെ തിളങ്ങി പ്രകാശിച്ചത്.. അതിന്റെ പ്രകാശം ഫാദർ ജേക്കബിന്റെ നെറ്റിയിൽ പതിഞ്ഞു..അതിന്റെ പ്രകാശ രശ്മികൾ ഏറ്റ് ഫാദർ ജേക്കബ് തന്റെ കണ്ണുകൾ അടച്ചു കളഞ്ഞു.. ഒരു വെളിപാട് പോലെ ആ നിമിഷം ഫാദറിന്റെ മനസ്സിലൂടെ ചില രംഗങ്ങൾ കടന്നുവന്നു.. സിസ്റ്റർ മാർത്ത പുറത്തുനിന്ന് തന്നോട് സംസാരിക്കുന്നു.. എന്നാൽ സിൻഡ്രല്ല അവളോടൊന്നും പറയുന്നില്ല അവൾ സിൻഡ്രല്ലയോടും ഒന്നും പറഞ്ഞിട്ടില്ല.. സിൻഡ്രല്ല പോയതിനുശേഷം ആണ് അവൾ തന്നോട് സംസാരിച്ചത്.. ഒരുപക്ഷേ സിൻഡ്രല്ലയും അവളെ കണ്ടിട്ടില്ലേ.. വീണ്ടും മറ്റൊരു രംഗം ഫാദറിന്റെ മനസ്സിൽ തെളിഞ്ഞു.. അതെ അതുതന്നെ.. പുറത്തുനിന്ന് സംസാരിച്ചിരുന്ന സിസ്റ്റർ മാർത്തയുടെ കഴുത്തിൽ കുരിശു രൂപം ഇല്ല. അന്നേരം ഒരു മിന്നായം പോലെ താനത് കണ്ടതാണെങ്കിലും കാര്യമാക്കിയില്ല... ഒരു ഇടിമിന്നൽ വെട്ടിയത് പോലെ ഫാദറിന്റെ മനസ്സിൽ തോന്നി.. ഫാദർ ജേക്കബ് തന്റെ കണ്ണുകൾ തുറന്നു.. കർത്താവേ അല്പം മുൻപ് സിസ്റ്റർമാർത്തയുടെ രൂപത്തിൽ തന്നോട് വന്ന് സംസാരിച്ചത് ആരാണ്.. കഴുത്തിൽ കുരിശുരൂപം ധരിക്കാത്ത സ്ഥിതിക്ക് അതൊരു നെഗറ്റീവ് എനർജിയാണ്.. " ഫാദർ എന്താണ് ആലോചിക്കുന്നത്.. " സിസ്റ്റർ മാർത്ത ചോദിച്ചു.. " നമ്മുടെ നാടിന് വലിയൊരു ദുരന്തം വരാൻ പോകുന്നു.. എന്തോ വലിയൊരു അപകടം.. " അതും പറഞ്ഞു ഫാദർ നേരെ അൾത്താരയ്ക്ക് മുന്നിൽ ചെന്നു.. ക്രൂശിതരൂപത്തിന് മുന്നിൽ മുട്ടിൽ നിന്ന് തന്റെ കൈകൾ വിടർത്തി പ്രാർത്ഥിച്ചു.. " കരുണാമയനായ പിതാവേ.. എന്തു ദുരന്തമാണ് ഇവിടെ വരാൻ പോകുന്നത്.. ഇന്നലെ ഞാൻ കണ്ട സ്വപ്നം... ഇന്ന് ഞാൻ നേരിട്ട് അനുഭവിച്ച അനുഭവം.. ഇതെല്ലാം എന്തിനെയാണ് സൂചിപ്പിക്കുന്നത്.. എന്തോ ദുരന്തം വരാൻ പോകുന്നു എന്ന് ഉറപ്പായി.. ശിരസ്സില്ലാത്ത ഒരു പെൺകുട്ടിയുടെ മൃതദേഹം കഴിഞ്ഞ ദിവസം കാണപ്പെട്ടു.. പോലീസ് ഇപ്പോഴും ഇരുട്ടിൽ തപ്പുന്നു.. പ്രതികളെ കിട്ടിയിട്ടില്ല.. ഇതിന്റെയൊക്കെ അർത്ഥം എന്താണ്.. ഇരുട്ടിന്റെ നരക ആത്മാക്കൾ ഭൂമിയിലേക്ക് വന്നുകൊണ്ടിരിക്കുന്നു.. മോർത്താവിയൂസ് ആ പേര് താൻ എവിടെയൊ കേട്ടിട്ടുണ്ട്.. എന്തായാലും വരാൻ പോകുന്നത് നല്ല കാര്യങ്ങളല്ല.. തമ്പുരാനെ ഈ ദുരന്തങ്ങളിൽ നിന്നും ഞങ്ങളെ രക്ഷിക്കേണമേ.. ഫാദർ ജേക്കബ് അൾത്താരയിൽ വച്ചിരുന്ന വിശുദ്ധ ബൈബിൾ എടുത്തു.. പ്രാർത്ഥിച്ചുകൊണ്ട് ബൈബിൾ നിവർത്തി.. ആദ്യം കണ്ണ് എത്തിയ ഭാഗം വായിച്ചു.. " അനന്തരം അവൻ ഗെത് സെമൻ തോട്ടത്തിൽ പോയി പിതാവായ ദൈവത്തോട് പ്രാർത്ഥിച്ചു.. " പിതാവേ, കഴിയുമെങ്കിൽ ഈ പാനപാത്രം എന്നിൽ നിന്നും നീങ്ങി പോകട്ടെ.. എങ്കിലും എന്റെ ഹിതമല്ല നിന്റെ ഹിതം തന്നെ നിറവേറട്ടെ.. " ഫാദർ ജേക്കബ് ബൈബിൾ അടച്ചു.. അദ്ദേഹത്തിന്റെ കണ്ണുകൾ നിറഞ്ഞിരുന്നു... മനുഷ്യൻ ചെയ്തുകൂട്ടുന്ന തെറ്റുകൾക്ക് ഫലം അനുഭവിച്ചേ പറ്റൂ.. പണത്തിനും സ്വത്തിനും വേണ്ടി സ്വന്തം മാതാപിതാക്കളെ പോലും മക്കൾ കൊന്നൊടുക്കുന്നു.. മറ്റൊരു പുരുഷനോടൊപ്പം ജീവിക്കുവാൻ വേണ്ടി അമ്മമാർ പോലും പിഞ്ചുകുഞ്ഞിനെ കഴുത്തു ഞെരിച്ചു കൊല്ലുന്നു.. സ്ത്രീധനത്തിന്റെ പേരിൽ മരുമക്കളെ കൊല്ലുന്നു.. അന്ധവിശ്വാസവും ആഭിചാര കർമ്മത്തിനും വേണ്ടി നരബലികൾ നടത്തുന്നു.. മനുഷ്യന്റെ മാംസം പോലും മനുഷ്യൻ ഭക്ഷിക്കുന്നു.. പെൺകുട്ടികൾക്ക് പ്രായപൂർത്തി ആവണമെന്നില്ല പിഞ്ചു കുഞ്ഞുങ്ങളെ പോലും ലൈംഗികമായി ഉപയോഗിക്കുന്നു.. മതത്തിന്റെയും പാർട്ടിയുടെയും പേരിൽ പരസ്പരം കൊന്നൊടുക്കുന്നു.. മനുഷ്യൻ പാപങ്ങളാൽ നിറഞ്ഞു നിൽക്കുമ്പോൾ ആ മനുഷ്യന്റെ നിലവിളി ദൈവം കേൾക്കില്ല.. മനുഷ്യരിൽ നിന്നും ദൈവം ചെവി കൊട്ടി അടയ്ക്കും.. പാപികളായ മനുഷ്യൻ നശിക്കട്ടെ എന്ന് ഒരുപക്ഷേ ദൈവം കരുതി കാണും.. ദൈവവിശ്വാസം ഇല്ലാതെ നിരീശ്വര വാദത്തിലേക്ക് മറ്റും മനുഷ്യൻ തിരിയുമ്പോൾ അവിടെ സാത്താൻ കണ്ണുതുറക്കുന്നു.. ഇനിയങ്ങോട്ട് ലൂസിഫറിന്റെ കാലം ആണ്.. അഗ്നി മഴ പെയ്തു ലോകം മുഴുവൻ നശിക്കും.. ഭൂമി പ്രളയത്തിലാവും..ഭൂമി ശവശരീരങ്ങൾ കൊണ്ട് നിറയും.. എല്ലാം ദൈവവിധി.. ഫാദർ അവിടെ മുട്ടിൽ നിന്ന് തേങ്ങി കരഞ്ഞു.. ************************** സ്കൂളിലെ ബാത്റൂമിൽ നിന്നും യൂറിൻ പാസ് ചെയ്തു പുറത്തേക്കിറങ്ങുകയായിരുന്നു എഡ്വിൻ.. ബാത്റൂം ഡോറിന് മുന്നിൽ നിൽക്കുന്നു അഭിജിത്ത്.. കൂടെ അവന്റെ കൂട്ടുക്കാരും എഡ്വിൻ ഭയന്നുപോയി.. പാഞ്ഞു വന്ന അഭിജിത്ത് എഡ്വിന്റെ മുഖത്തടിച്ചു.. വേച്ചു വീണ എഡ്വിന്റെ ഷർട്ടിൽ കുത്തിപ്പിടിച്ച് ഭിത്തിയിൽ ചാരി നിർത്തി അഭിജിത്ത്.. " നിനക്ക് രേഷ്മയോട് എന്താടാ..പ്രേമമാണോ.. " എഡ്വിൻ ഭയന്നു വിറച്ചു.. " രണ്ടെണ്ണം കൊടുക്കടാ.. അവനിട്ട്.. " ദീപു അഭിജിത്തിനോട് പറഞ്ഞു.. അതുകേട്ടതും അഭിജിത്ത് കൈ ചുരുട്ടി എഡ്വിന്റെ കീഴ് വയറിനിട്ട് രണ്ടെണ്ണം കൊടുത്തു.. ഇടികൊണ്ടതും എഡ്വിൻ നിലവിളിച്ചു പോയി.. " വിളിക്കെടാ നിന്റെ കരാട്ടക്കാരി പെങ്ങളെ.. വന്നു നിന്നെ രക്ഷിക്കാൻ പറയ്.. " ദീപു പറഞ്ഞു.. " രേഷ്മ എന്റേതാണ്.. അവളുടെ അടുത്തെങ്ങാൻ നീ സംസാരിക്കുകയോ മറ്റോ ചെയ്താൽ.. ഇടിച്ചു നിന്റെ പരിപ്പ് ഞാൻ എടുക്കും..കേട്ടോടാ.. " ഭീഷണിയുടെ സ്വരത്തിൽ അഭിജിത്ത് പറഞ്ഞു.. " മതിയെടാ വിട്ടേക്ക്.. ഇനി അവൻ ഇത് ആവർത്തിച്ചാൽ നോക്കാം നമുക്ക്... " ദീപു അഭിജിത്തിന്റെ തോളിൽ പിടിച്ചുകൊണ്ട് പറഞ്ഞു.. " പോട്ടെടാ.. ഇനി രേഷ്മയോട് മിണ്ടാൻ പോകുമ്പോൾ ഇത് നീ ഓർക്കണം .. " എഡ്വിന്റെ മുഖത്ത് ഒന്നു കൂടി കൊടുത്തു കൊണ്ട് അഭിജിത്ത് പറഞ്ഞു... അവർ ബാത്റൂമിൽ നിന്നും ഇറങ്ങിപ്പോയി.. എഡ്വിന് നടക്കാൻ ബുദ്ധിമുട്ടുണ്ടായിരുന്നു.. ഒന്ന് ഉറക്കെ കരയാൻ തോന്നിപ്പോയി അവന്.. അവൻ തന്റെ ക്ലാസിൽ കയറി ബാഗ് എടുത്തു പുറത്തേക്കിറങ്ങി.. സമയം ഉച്ചയാവുന്നതേയുള്ളൂ.. ഇനി ക്ലാസ്സിൽ ഇരിക്കാൻ വയ്യ.. ആരെയും ഫെയ്‌സ് ചെയ്യാൻ വയ്യ.. എഡ്വിൻ ബേഗുമെടുത്ത് പുറത്തേക്ക് ഇറങ്ങി.. " എഡ്വിൻ.. നീ എങ്ങോട്ടാ പോകുന്നത്.. " പുറകിൽ നിന്നും രേഷ്മ വിളിച്ചു ചോദിച്ചു.. മറുപടി പറയാതെ എഡ്വിൻ ബാഗും എടുത്ത് ധൃതിയിൽ മുന്നോട്ട് പോയി.. ************************** വീടിന്റെ ഗേറ്റ് തുറന്ന് എഡ്വിൻ മുന്നോട്ട് നടന്നു.. ഫ്രണ്ടിൽ തന്നെ പരിചയമുള്ള ഒരു കാർ കിടപ്പുണ്ട്.. അത് ഡോക്ടർ ജോണിയുടെ കാറാണെന്ന് കണ്ടതും എഡ്വിന് ചെറിയൊരു ഭയം ഉള്ളിൽ വന്നു.. ജോണി അങ്കിൾ എന്തിനാ ഇവിടെ ഇപ്പോൾ വന്നത്.. പപ്പയും മമ്മിയും ഉണ്ടോ.. ഫ്രണ്ട് ഡോർ ചാരിയിട്ടേ ഉണ്ടായിരുന്നുള്ളൂ.. എഡ്വിൻ അകത്തേക്ക് കയറി.. ആരെയും കാണുന്നില്ല.. പെട്ടെന്ന് വാതിൽ തുറക്കുന്ന ശബ്ദം കേട്ടു.. ബെഡ്റൂമിന്റെ വാതിൽ തുറന്ന് അകത്തു നിന്നും ഇറങ്ങി വരുന്ന ഡോക്ടർ ജോണി.. അയാൾ ഷർട്ട് ഇട്ടിട്ടില്ല.. പപ്പയുടെ മുണ്ടാണ് ധരിച്ചിരിക്കുന്നത്.. എഡ്വിനെ കണ്ടതും ജോണി ഒന്നും ചിരിച്ചു.. " എഡ്വിൻ നേരത്തെ പോന്നോ.. " ജോണി എഡ്വിനോട് ചോദിച്ചു.. പക്ഷേ എഡ്വിൻ മറുപടി പറഞ്ഞില്ല.. സംശയത്തോടെ അകത്തേക്ക് നോക്കി.. അകത്തുനിന്ന് നൈറ്റിയുടെ ഹുക്കിട്ട് അഴിഞ്ഞുപോയ മുടി വാരി കെട്ടി പുറത്തേക്കിറങ്ങി വരുന്നു മമ്മി ഗ്ലാഡിസ്.. തുടരും...