#📙 നോവൽ - കാശിയുടെ പെണ്ണ് 💐💐 🔻 പാർട്ട് _4 ✍️ രചന - ജിഫ്ന നിസാർ ❤‍🔥❤‍🔥 കറുപ്പ് കളറിലൊരു ഷർട്ടും നീല ജീൻസും.. നീളം കുറഞ്ഞ മുടി ഉയർത്തി കെട്ടി വെച്ചിരിക്കുന്നു. എന്നിട്ടും അവിടെ ഇവിടെയായി ഒഴുകി പടർന്നു കിടക്കുന്ന മുടിയിഴകൾ.. കയ്യിലൊരു വാച്ചും കാതിലൊരു മൊട്ടു കമ്മലും മാത്രം. എന്നിട്ടും എന്തൊരു ഭംഗിയുള്ള മുഖം.. പോട്ടെ അശോകേട്ടാ.. ടൈം ആയി.. " അവളുടെ നോട്ടം സഹിക്കാൻ വയ്യാഞ്ഞിട്ടാണ് കാശി പെട്ടന്ന് പറഞ്ഞത്. "മോളെ ഓട്ടോ കയറ്റി വിടണം..കേട്ടോ കാശി..." അയാൾ ഓർമിപ്പിച്ചു. സ്റ്റാൻഡിൽ അര മണിക്കൂർ വെയ്റ്റിംഗ് ഉണ്ട് കാശിക്ക്. കൂടെ കൊണ്ട് പോകുന്ന എല്ലാപ്പോഴും അവിടെ നിന്നും അവളെ കോളേജിലേക്ക് ഓട്ടോ കയറ്റി വിടുന്നത് അവനാണ്. താൻ ഓർമ്മിപ്പിച്ചില്ലെങ്കിലും കാശി അത് ചെയ്യുമെന്ന് അശോകന് അറിയാം. എങ്കിലും അയാളത് പറയാൻ മറക്കില്ല. "പെണ്ണിന്റെയൊരു വൈബ് പ്രേമം.. എത്ര കാറാ ഇവിടെ കിടക്കുന്നത്.. അവൾക്കാണേൽ ഡ്രൈവിങ്ങും അറിയാം. എന്നാലും അതിൽ പോണ്ട.. അവൾക്ക് ബസ്സിൽ പോയാൽ മതി.. കാശി ഉള്ളത് കൊണ്ടാ. ഇല്ലേൽ ഇതൊന്നും നടക്കില്ല.. കേട്ടോടി.." തുളസി ചേച്ചി കാർത്തികയുടെ നേരെ നോക്കി കണ്ണുരുട്ടി. കാശി ഉള്ളത് കൊണ്ട്.. അതാണ്.. ആ വിശ്വസമാണ് ഈ കുരുത്തം കെട്ട പെണ്ണ് നശിപ്പിക്കാൻ നോക്കുന്നത്. അവളുടെയൊരു പ്രേമം.. ലോകത്ത് അവൾക്ക് വേറെ ആളില്ലാത്ത പോലെ.. അവൻ തിരിഞ്ഞു നിന്നിട്ട് പല്ല് കടിച്ചു പിടിച്ചു ദേഷ്യമൊതുക്കി. അത് പിന്നെ എനിക്ക് പാട്ടൊക്കെ കേട്ട്.. വൈബ് പിടിച്ചു രസത്തിന് പോകാനല്ലേ.. " കാർത്തിക കാശിയെ ഇടം കണ്ണിട്ട് നോക്കി കൊണ്ടാണ് അത് പറഞ്ഞത്. അവളെയൊരു രസം..അത് സാമ്പാറാക്കി കൊടുക്കാൻ അറിയാൻ വയ്യാഞ്ഞിട്ടല്ല.. മറ്റേത് പെണ്ണായിരുന്നാലും അത്‌ അറിയിച്ചു കൊടുക്കേണ്ട സമയം കഴിഞ്ഞു പോയിരിക്കുന്നു. ഇവളോടത് പക്ഷേ അത് പറ്റില്ലല്ലോ. ഇവളെ ഓർത്തല്ല.. അശോകേട്ടനെ തനിക്ക് ഓർക്കണമല്ലോ.. "പോയിട്ട് വരാട്ടോ അച്ഛാ.. അമ്മാ.." വികാരനിർഭരമായിരിക്കും ആ യാത്ര പറച്ചിലെന്നുള്ളത് കാശ്ശിക്കറിയാം. അവനതിന് മുന്നേയും ഇത് പോലുള്ളതിന് സാക്ഷിയായിട്ടുണ്ട്. ബാഗ് താ... കാർത്തികയ്ക്ക് നേരെ അവൻ കൈനീട്ടി. ചോദിക്കാൻ കാത്തിരുന്നത് പോലെ തിടുക്കത്തോടെ അവളത് ഊരി അവന്റെ കയ്യിലേക്ക് കൊടുത്തു. അതുമായി കാശി തിരിഞ്ഞു നടക്കുമ്പോൾ പിന്നിൽ നിന്നും അശോകേട്ടനും തുളസി ചേച്ചിയും കാർത്തികയെ കെട്ടിപിടിച്ചുമ്മ കൊടുത്തു തുടങ്ങിയിരുന്നു.. കുഞ്ഞാറ്റ എന്നോഴുതിയ ബസ്സിന്‌ നേരെയാണ് കാശി നടന്നു ചെന്നത്. ഡോർ തുറന്നു പ്രാർത്ഥനയോടെ അകത്തു കയറി കയ്യിലുള്ള ബാഗ് മുന്നിൽ നിന്നും രണ്ടു സീറ്റ് മാറിയുമുള്ള മറ്റൊരു സീറ്റിലേക്ക് വെച്ചു. വെറുതെയാണ്. അവിടെയൊന്നും അവളിരിക്കില്ല. അതവനും അറിയാം.. ഡ്രൈവിംഗ് സീറ്റിലേക്ക് കയറിയിരുന്നു കൊണ്ട് അവനൊരു നിമിഷം കണ്ണടച്ച് പിടിച്ചു. തനിക് വേണ്ടിയല്ല. തന്നെ വിശ്വസിച്ചു കൊണ്ട് അതിനകത്തു കയറുന്നവരുടെ ജീവന് വേണ്ടിയുള്ള പ്രാർത്ഥന. താൻ കാരണം അവർക്കൊരു ബുദ്ധിമുട്ട് വരരുത് എന്ന് കരുതിയുള്ള പ്രാർത്ഥന.. അതെന്നും പതിവാണ്. അല്ലെങ്കിലും തനിക് വേണ്ടി ഇനിയെന്ത് പ്രാർത്ഥന നടത്താൻ.? ആ പതിവൊക്കെ നിന്നിട്ട് വർഷങ്ങളായി. വീട്ടിൽ നിന്നും പോരും വഴി ഒരമ്പലമുണ്ട്.. ചെറുതാണ്.. എന്നും രാവിലെ അവിടെ കയറി പ്രാർത്ഥന നടത്തുന്നതും യാത്ര സുഖമായിരിക്കാനും അപകടങ്ങളിൽ നിന്നും രക്ഷിക്കാനും വേണ്ടിയാണ്. കിടന്നു പോയാൽ പോലും കാശി ഒറ്റക്കാണ്.. സ്റ്റാർട്ട് ചെയ്തു അവനൊന്നു കൂടി സ്റ്റിയറിങ്ങ് തൊട്ട് കണ്ണിൽ വെച്ചു.. മുന്നിലേക്ക് നോക്കുമ്പോൾ അവരുടെ വികാരപ്രകടനം ഇനിയും തീർന്നിട്ടില്ല. ഡോക്ടർ ആവണം എന്നുള്ള മകളുടെ മോഹം കൊണ്ടാണ്.. ഇല്ലേൽ കാർത്തികയെ അത്രയും ദൂരം വിട്ടൊന്നും അശോകേട്ടൻ പഠിപ്പിക്കില്ല എന്ന് കാശ്ശിക്കറിയാം. ഏഴരകൃത്യം.. കാശി വണ്ടി പതിയെ മുന്നോട്ടെടുത്തു. അപ്പോഴേക്കും കാർത്തിക ഓടി ഇറങ്ങി വരുന്നുണ്ടായിരുന്നു. ഇനിയിപ്പോ ഡൗണിൽ എത്തും വരെയുമുള്ള പത്തു മിനിറ്റ്.. അതിനിടയിൽ യാത്രകാർ ഒന്നുമില്ല. കണ്ടക്ടറായി ശിവ തന്നെയാണ്. തന്നെയാണ്. അവൻ സ്റ്റാന്റിൽ വരാറാണ് പതിവ്. അതായത് അവിടെ വരെയും അവളുടെ ഇരയാണ് താൻ. കാശിക്കൊരു മടുപ്പ് തോന്നി. ഒരിക്കലും നടക്കില്ലെന്നുറപ്പുള്ളൊരു ഇഷ്ടം ഇവളെന്തിനാണിങ്ങനെ മനസ്സിലിട്ട് വളർത്തി കൊണ്ട് വരുന്നത് എന്നായിരുന്നു അവന്റെ ഏറ്റവും വലിയൊരു ആസ്വസ്ഥത.. ഓടി വന്നിട്ട് കാർത്തിക ബസ്സിൽ കയറി. ഡോർ വലിച്ചടക്കുന്ന ശബ്ദം. കാശി പല്ല് കടിച്ചു കൊണ്ട് കണ്ണുകൾ ഇറുകെ അടച്ചു. മനഃപൂർവം തന്നെ ദേഷ്യം പിടിപ്പിക്കുകയാണ്. ബസ് അവളുടെ അച്ഛന്റെ സ്വന്തമാണെങ്കിലും വർഷങ്ങളായിട്ട് ഇതിനോടുള്ള തന്റെ അറ്റാച്മെന്റ് ആ പിശാചിന് ശെരിക്കും അറിയാം.. പക്ഷേ അവനൊന്നും മിണ്ടിയില്ല. പോട്ടെ.. ബൈ.. " ഡോറിൽ പിടിച്ചു നിന്ന് കൊണ്ട് ഗെറ്റ് കടക്കുവോളം അവൾ കൈ വീശി കാണിക്കുന്നുണ്ട്. കയറി നിക്ക്.. " റോഡിൽ ഇറങ്ങിയിട്ടും അവളവിടെ തന്നെ നിൽക്കുന്നത് കണ്ടിട്ട് കാശി ഒട്ടും അയവില്ലാതെ പറഞ്ഞു. "അപ്പോൾ എന്നോട് സ്നേഹമൊക്കെയുണ്ട് ല്ലെ.. കാശിയേട്ടാ.." അവളൊരു ചിരിയോടെ ചോദിച്ചു കൊണ്ട് സ്റ്റെപ്പിൽ നിന്നും കയറി മുന്നിലെ നീളൻ സീറ്റിലേക്ക് ഇരുന്നു. "നിന്റെ ബാഗ് പിന്നിലാ.. അവിടെ പോയിരുന്നോ.." മുന്നിലേക്ക് നോക്കി കൊണ്ട് കാശി പറഞ്ഞു. "ഓഓഓ.. ബാഗ് അവിടുന്നോളും.. അതിന് ഒറ്റക്കിരുക്കാൻ പേടിയിന്നുമില്ല.. എന്റെ ബാഗ് നല്ല സ്ട്രോങ്ങ്‌ ആണ്.. എന്നേ പോലെ..ഞാനേ ഇവിടിരിക്കും.." അവൾക്കൊരു കള്ളത്തരം. "ആ.. നീ അവിടിരിക്കും..അവിടെ ഇരുന്നാലല്ലേ നിനക്ക് എന്റെ ചോര ഊറ്റാൻ പറ്റൂ.. യക്ഷി.." കാശിയിരുന്നു ഞൊടിഞ്ഞു. "ഇന്നലെ എന്താ വരാഞ്ഞത് കാശിയേട്ടാ.. ഞാൻ കാത്തിരുന്നു..കേട്ടോ" അവൾക്ക് പരിഭവം.. "ആഹ്.. അത് കൊണ്ട് തന്നെയാ വരാഞ്ഞത്.." അവനും അലസതയോടെ പറഞ്ഞു. "എന്തൊരു കഷ്ടമാണിത്.. എന്റെ സ്നേഹം നിങ്ങളെന്താ കാണാത്തത്..എത്ര കൊല്ലമായി ഞാൻ ഇങ്ങനെ നാണം കെട്ട് പിറകെ നടക്കുന്നു.എനിക്കെന്തോരും സങ്കടം ണ്ട് ന്നറിയോ.." കാർത്തിക അവനെ നോക്കി മുഖം വീർപ്പിച്ചു. "എനിക്ക് നിന്നെ ഇഷ്ടമല്ലെന്ന് ഞാനും എത്ര പ്രാവശ്യം എത്ര കാലമായി പറയുന്നു. അത് വല്ലതും നീ കേൾക്കുന്നുണ്ടോ.." "എനിക്ക് ഇഷ്ടമായത് കൊണ്ടല്ലേ.. കൂടെ ജീവിക്കാൻ കൊതിയുള്ളത് കൊണ്ടല്ലേ.." "നോക്ക് കാർത്തിക.. കുറെ വട്ടം പറഞ്ഞു തന്നതല്ലേ നിനക്ക് ഞാൻ..നീ കരുതും പോലെ...നമ്മൾ തമ്മിലൊരു." കുഞ്ഞാറ്റ എന്ന് വിളിക്.. കാശ്യേട്ടൻ അങ്ങനെ വിളിച്ചു കേൾക്കാൻ എനിക്ക് കൊതിയാവുന്നു..' അവളിരുന്നു ചിണുങ്ങി. കാശി ദേഷ്യത്തോടെ സ്റ്റിയറിങ്ങിൽ ഒന്ന് തട്ടി. കുഞ്ഞു പിള്ളേരെ പോലെ കുണുവാവ..കളിക്കുവാ. അവൻ അവളെ നോക്കാതെ പിറു പിറുത്തു.. "ദേഷ്യപ്പെടുമ്പോൾ പോലും ന്തൊരു സ്വീറ്റാ ന്റെ കാശ്യേട്ടൻ " കാർത്തിക ഒറ്റ കണ്ണിറുക്കി ചിരിച്ചു. അതോടെ കാശിയുടെ മുഖം കൂടുതൽ ചുവന്നു പോയി.. "അശോകേട്ടൻ ഇത് വല്ലതും അറിഞ്ഞ.. എനിക്കത് ഓർക്കാൻ കൂടി വയ്യ..കാർത്തിക. അത് കൊണ്ട് നീ ഞാൻ പറയുന്നതൊന്ന് കേൾക്.. നിനക്ക് പറ്റിയ ആളല്ല ഞാൻ. എന്റെ കൂടെ ജീവിക്കാൻ ഒട്ടും എളുപ്പല്ല.. എന്റമ്മ പോലും എന്റെ കൂടി നിൽക്കില്ല.. ആ എന്നേ നീയെങ്ങനെ..അതൊന്ന് മനസിലാക് നീ.. പ്ലീസ്.." അവളെ നോക്കാതെയാണ് കാശി പറയുന്നത്. "അച്ഛന്റെ കാര്യം ഞാൻ നോക്കി കൊള്ളാം.. എനിക്ക് വിട്ടേക്ക് ന്ന് എത്ര വട്ടം ഞാനും പറഞ്ഞു. എന്റച്ഛന് എന്നേക്കാൾ വലുതായി ഒന്നുമില്ലെന്ന് കാശ്യേട്ടനും അറിയില്ലേ.." അവളുടെ ആത്മ വിശ്വാസം.. കാശിയുടെ മനസ്സ് വീണ്ടും അസ്വസ്ഥമായി. ഇവൾക്കറിയാത്ത ഒരു മുഖം കൂടിയുണ്ട് ഇവളുടെ അച്ഛന്. അവനത് അവളോട് പറഞ്ഞു കൊടുക്കാനും വയ്യ. രണ്ടിന്റെയും ഇടയിൽ പെട്ടു ശ്വാസം മുട്ടുന്നത് മുഴുവനും അവനാണ്. "എന്നിട്ടാണോ നിന്റച്ഛൻ നിനക്ക് വേണ്ടി മഹേഷിനെ കല്യാണം പറഞ്ഞു വെച്ചത്.. നിന്റെ പഠനം കഴിഞ്ഞ ഉടനെ കല്യാണത്തിന് ഡേറ്റ് നോക്കണമെന്ന് കഴിഞ്ഞ ആഴ്ച പോലും നിന്റച്ഛൻ എന്നോട് നേരിട്ട് പറഞ്ഞിട്ടുണ്ട്.." കാശി വെല്ലുവിളി പോലെ അവളെ നോക്കി. "ചുമ്മാ പറയുവാ കാശ്ശിയേട്ടേൻ. എന്റച്ഛൻ അങ്ങനൊന്നും പറയില്ല. മഹിയെട്ടനെ എനിക്കിഷ്ടമല്ലെന്ന് അച്ഛനോട് ഞാനും പറഞ്ഞിട്ടുണ്ട്.. എന്റെ കുഞ്ഞാറ്റക്ക് ഇഷ്ടമല്ലാത്തതൊന്നും അച്ഛൻ ചെയ്യുകയില്ലെന്ന് എനിക്ക് വാക്കും തന്നിട്ടുണ്ട്.. അപ്പഴാ.. എന്റെ മനസ് മാറ്റാൻ കാശിയേട്ടൻ നുണ പറയുവാ.. പക്ഷേ എന്തൊക്കെ പറഞ്ഞിട്ടും കാര്യമില്ല മോനെ കാശിയേട്ടാ. എനിക്ക് നിങ്ങളെ വേണം.. പ്രണയം.. പ്രേമം എന്നീ വികാരങ്ങളൊക്കെ അറിഞ്ഞു തുടങ്ങിയ നാള് തൊട്ട് ഈ കാർത്തിക സ്നേഹിച്ചു തുടങ്ങിയതാ നിങ്ങളെ.. അത്രയും പെട്ടന്നൊന്നും അത് ഇല്ലാതായി പോവില്ല. അയിന് വേണ്ടി നിങ്ങളിങ്ങനെ ഇല്ലാത്ത നുണ പറഞ്ഞു രക്ഷപ്പെട്ടു പോകാൻ നോക്കണ്ട.. വിടില്ല ഞാനും.. കാർത്തിക വാശി പോലെ പറഞ്ഞിട്ട് അവനെ നോക്കി. കാശി പിന്നെ അവളെ നോക്കാനെ പോയില്ല. "നാല് മാസം കൂടെ കഴിഞ്ഞു എന്റെ പഠനം തീരുന്ന അന്ന്...അന്ന് ഞാനും അച്ഛനോട് പറയും എനിക്ക് കാശ്യേട്ടനെ വേണം ന്ന്.. എന്നെ പോലെ തന്നെ നിങ്ങളേം അച്ഛന് നല്ല ഇഷ്ടമാണ്.. കാശി മിടുക്കനാണെന്ന്.. ഒരുപാട് വലിയ നിലയിൽ എത്തേണ്ട ആളായിരുന്നു എന്നൊക്കെ അച്ഛൻ വീട്ടിൽ പറയാറുണ്ട്. എനിക്ക് ഇഷ്ടമാണെന്ന് പറയുമ്പോൾ അച്ഛൻ സന്തോഷത്തോടെ അംഗീകരിച്ചു തരും.. എനിക്കുറപ്പുണ്ട്.." കാർത്തികയുടെ ആത്മ വിശ്വാസം.. അതൊരിക്കലും നടക്കാത്ത കാര്യമാണെന്ന് അവനുറപ്പുണ്ട്. പക്ഷേ അതെത്ര പറഞ്ഞിട്ടും.. എങ്ങനെയൊക്കെ പറഞ്ഞിട്ടും അവൾക്ക് മനസ്സിലാവുന്നില്ല എന്ന് മാത്രം. "നിന്റച്ഛന്റെ ഗുണ്ടയാണെടി കോപ്പേ ഞാൻ. ആ എന്നേ പിടിച്ചു നിനക്ക് കെട്ടിച്ചു തരുംന്ന് കരുതാൻ മാത്രം വിഡ്ഢിയായ നീ എന്തിനാ വെറുതെ പഠിച്ചു ഡോക്ടറാവുന്നത്.. അതോ ഇനി അതും നിന്റച്ഛൻ കാശ് കൊടുത്തു സെറ്റാക്കി തരുന്നതാണോ?" കാശി പരിഹാസത്തോടെ അവളെനോക്കി. "അനാവശ്യംപറഞ്ഞ മൂക്കിടിച്ചു പരത്തും ഞാൻ.. കാർത്തിക അവനു നേരെ കൈ ചുരുട്ടി പിടിച്ചു കാണിച്ചു. "നീ ഒലത്തും.. കാശിയുടെ മേൽ നൊന്താ മോള് വിവരമറിയും..നിന്റെ ശവമടക്ക് നടത്തും ഞാൻ.." "ഏയ്‌.. അതൊന്നും വേണ്ട.. എന്നെ സ്നേഹിച്ച മതി.. എന്നോട് ഇഷ്ടമാണെന്ന് പറഞ്ഞമതി.., മ്മ്.. പറയും പറയും..കുറെ.. നീ നോക്കിയിരുന്നോ.." അവൻ പുച്ഛത്തോടെ ചുണ്ട് കോട്ടി. "എന്നോട് നിങ്ങൾക്കെന്താ ഇഷ്ടമില്ലാത്തത്.. ഞാൻ അമ്പലപറമ്പിൽ അശോകന്റെ മോളായി എന്നത് കൊണ്ടാണോ കാശിയേട്ടാ..അതൊന്ന് പറഞ്ഞു തായോ.." ഇപ്രാവശ്യം പതിവുപോലെ കുറുമ്പില്ല അവളുടെ സ്വരത്തിലും മുഖത്തും.. കാശി അവളെ തന്നെ സൂക്ഷിച്ചു നോക്കി.. എപ്പോഴും പറയുന്ന ഉത്തരത്തിൽ നിന്നും അൽപ്പമെങ്കിലും മാറ്റം വന്നൊരു ഉത്തരം അവൻ പറയുമോ എന്നറിയാനുള്ള ആകാംഷയോടെ കാർത്തിക അവനെയും.. തുടരും.. ഒരു സാധാരണ കഥ... ക്ളീഷേ തീം ആയിരിക്കും. പക്ഷേ ഞാൻ പറയുന്ന പോലെ വേറെ ആരും പറഞ്ഞു കാണില്ല.. അത്രയും ഉറപ്പേ എനിക്ക് തരാനൊള്ളു.. നിങ്ങളുടെ സപ്പോർട്ടിന്റെ കൈ പിടിച്ചു കൊണ്ടാണ് ആ ഉറപ്പ് പോലും.. എന്നാലും ഈ ചെക്കനെന്താ അവളെ ഇഷ്ടമാവാത്തത് ന്നാ എനിക്ക്..? എന്തൊരു ജാടയാണെന്ന് നോക്കണേ.. പിറകെ നടന്നു ഇഷ്ടം പറയുമ്പോ അല്ലേലും ഈ കോപ്പന്മാർക്ക് ഒടുക്കത്തെ ജാഡ ആണ്.. പരട്ടകൾ.. കാർത്തിക ഇങ്ങനാണ് കേട്ടോ.. ഈ പെണ്ണ് കുറച്ചു ഓവറണോ എന്ന് തോന്നീയേക്കാം.. ഒരു ഡോക്ടർക്ക് വേണ്ട പക്വതയില്ല എന്നും തോന്നിയേക്കാം.. സ്വാഭാവികം.. അങ്ങനെ ആരെങ്കിലും പറഞ്ഞാ മറ്റേ ഡയലോഗ് എടുത്തിട്ടലക്കും ഞാൻ.. കുറച്ചു ഓവറായാലല്ലേ ആളുകൾ ശ്രദ്ധിക്കൂ ന്ന് 🫣 പിന്നേയ് കമന്റ് &ലൈക് ഇല്ലേൽ ഡെയിലി പോസ്റ്റ്‌ ഞാൻ മുക്കും... പറഞ്ഞില്ലെന്നു വേണ്ട.. എനിക്കിപ്പോഴും ആ പരട്ട സ്വഭാവം തന്നെയാ.. മാറീട്ടൊന്നും ഇല്ലന്നേ 😆 റിവ്യൂ ഇട്ടിട്ട് പോണേ.. സ്നേഹത്തോടെ jif #💞 പ്രണയകഥകൾ #📔 കഥ