நினைக்கும் போதே ஆஹா =================== குயிலின் குரலை விட மிக அழகான குரல் வளம் கொண்ட பாடகர் என்று யாராவது சொல்ல முடியுமா? எனக்குத் தெரிந்து அப்படி ஒரே ஒரு பாடகர் ஏ.எம்.ராஜா தான். ஏமல மன்மதராஜு ராஜா என்ற ஏ.எம்.ராஜாவின் குரலில் ஒலித்த தமிழின் இனிமை நூறாண்டுகளானாலும் மறக்க முடியாது. ஆந்திரா மாநிலம் சித்தூரைச் சேர்ந்த ஏ.எம்.ராஜா படிப்பதற்காக ஆந்திராவில் இருந்து சென்னைக்கு இடம் பெயர்ந்தவர். சென்னையின் தொன்மையான பச்சையப்பன் கல்லூரியில் பி.ஏ படித்த ஏ.எம்.ராஜா, கர்நாடக, மேற்கத்திய இசையில் பாண்டித்தியம் பெற்றிருந்தார். கல்லூரியில் நடந்த பாட்டுப் போட்டிகளில் பங்கேற்று பரிசு பெற்ற ராஜாவின் திறமையை ஹெச்எம்வி நிறுவனமே கண்டுபிடித்தது. இரண்டு தெலுங்கு மெல்லிசை பாடல்களை ஏ.எம்.ராஜாவே எழுதிய இசையமைத்தார். அவருக்கு இசை உதவி செய்தவர் திரையிசை திலகம் கே.வி.மகாதேவன். ஹலோ ஸ்டாப்.. ஸ்டாப்... இது ஏ.எம்.ராஜா கட்டுரையா என நீங்கள் கேட்பது காதில் விழுகிறது. இல்லவே இல்லை. ஏ.எம்.ராஜா அரிதாக பாடிய ஒரு படத்தின் இசையமைப்பாளர் குறித்த பதிவு. ஒவ்வொரு நடிகருக்கும் ஒரு குரல் பொருந்திப் போகும். எம்.ஜி.ஆர், சிவாஜி, எஸ்.எஸ்.ராஜேந்திரன், ரவிச்சந்திரன், ஜெய்சங்கர் உள்பட பலருக்கு டி.எம்.சௌந்தரராஜனின் குரல் அச்சு அசலாக மாறிப்போனது. ஒவ்வொருக்கும் தக்கவாறு குரலை மாற்றி டிஎம்எஸ் பாடி விடுவார். ஆனால், ஏ.எம்.ராஜாவும் எம்.ஜி.ஆர், சிவாஜி ஆகியோருக்கு பாடல்களைப் பாடியுள்ளார். ஆனால், அவர் குரலுக்கு மிகப்பொருத்தமான நடிகராக ஜெமினிகணேசன் இருந்தார். பூலோக ரம்பை படத்தில் ஆசை நெஞ்சமே அலைமோதும் கடல் மீது நானே, உன் கண்ணிலாடும் ஜாலம் யாவும் ஆகிய பாடல்களும், கல்யாணப்பரிசு படத்தில் ஆசையினாலே மனம் அஞ்சுது கெஞ்சுது தினம்,காதலிலே தோல்வியுற்றான் காளையொருவன், வாடிக்கை மறந்ததும் ஏனோ என்னை வாட்டிட ஆசை தானோ,உன்னை கண்டு நான் வாட என்னை கண்டு நீ வாட ஆகிய பாடல்களும், மிஸ்ஸியம்மா படத்தில் வாராயோ வெண்ணிலாவே கேளாயோ எங்கள் கதையே, பிருந்தாவனமும் நந்தா குமாரனும் யாவருக்கு பொது செல்வமன்றோ,எல்லாம் உனக்கே தருவேனே இனி, முடியுமென்றால் படியாது படியும் என்றால் முடியாது, பழக தெரிய வேணும் உலகில் பார்த்து நடக்க வேணும் ஆகிய பாடல்களும், மனம் போல் மாங்கல்யம் படத்தில் மாப்பிள்ளை டோய் மாப்பிள்ளை டோய், , ஆடிப்பெருக்கு படத்தில் கண்ணிழந்த மனிதர் முன்னே ஓவியம் வைத்தார்,பெண்களில்லாத உலகத்திலே கண்களினாலே என்ன பயன், தனிமையிலே இனிமை காண முடியுமா என எத்தனை எத்தனை உணர்ச்சி மிகுந்த பாடல்களை ஜெமினி கணேசனுக்காக ஏ.எம்.ராஜா பாடியுள்ளார். தமிழ் சினிமாவில் இவ்வளவு மெல்லிய குரல் வளம் கொண்ட பாடகர் யாரும் இல்லையென்று சொல்லக்கூடிய வகையில் ஏ.எம்.ராஜா பாடிய தென்றலைப் போன்ற மெல்லிசை பாடல்கள் காலம் கடந்தும் இசை நேசர்களை இன்புற வைக்கிறது. இப்படித்தான் ஜெமினி கணேசன் நடித்த ஒரு படத்தில் ஏ.எம்.ராஜா பாடிய ஒரு பாடலைக் கேட்டவுடன் யார் இந்த இசையமைப்பாளர் எனத் தேடினேன். ஆனால், அவர் அந்த படத்தை தவிர வேறு படத்திற்கு இசையமைத்தற்கான அடையாளமே இல்லை. ஏ.எம்.ராஜா, பி.சுசீலா இணைந்து பாடிய அந்த பாடல் உங்களுக்கும் மிகவும் பிடித்த பாடல் தான். நினைக்கும் போதே ஆஹா இனிக்குதே என் மனமே நினைக்கும் போதே ஆஹா இனிக்குதே என் மனமே பயந்து ஓடி வயலில் வீழ்ந்து எடக்குப் பேசி நின்றதை எண்ணியே இனிக்குதா?.... மிக அற்புதமான மெட்டு கொண்ட இந்த பாடல் இடம் பெற்ற படம் இல்லறமே நல்லறம். பாடலின் வரிகளைக் கேட்க கேட்க மகிழ்ச்சி பொங்கும். கன்னம் சிவந்திடத் தனிமையிலே காண வந்ததை நினைத்திடுதா? கன்னம் சிவந்திடத் தனிமையிலே காண வந்ததை நினைத்திடுதா? எனையும் காணாமல் தூங்காமல் இருவிழி இருந்த அந்நாளை என்னுள்ளம் மறக்குமா? குறும்பு செய்து பெண்கள் கையில் பரிசு வாங்கி நின்றதை எண்ணியே இனிக்குதா?.... கேள்வி கேட்பதைப் போன்ற தன்மையில் அமைக்கப்பட்ட இந்த பாடலில் ஒலிக்கும் துள்ளல் இசை மனசை மயக்கும். 1958ம் ஆண்டு பி.புல்லையா இயக்கத்தில் வெளிவந்த இப்படத்தில் ஜெமினிகணேசன், அஞ்சலி தேவி, வி.நாகையா, பி.எஸ்.ஞானம், கே.சூரியகலா, எம்.என்.நம்பியார், சி.ஆர்.பிரதாபன், வி.ஆர்.ராஜகோபால், வி.எம்.ஏழுமலை, எம்.ஆர்.சாந்தாராம் உள்பட பலர் நடித்துள்ளனர். சரோஜாதேவி தமிழில் அறிமுகமான படமிது தான். சரளா என்ற நடனக்கலைஞராக இவர் இப்படத்தில் நடித்திருப்பார். நிலவே அவன் யார் தெரியுமா தனிவேளை தன்னில் வந்தானே கனிவாக பேசி சென்றானே என்ற அற்புதமான பாடலுக்கும் சரோஜாதேவி நடனமாடியிருப்பார். 1958ம் ஆண்டு ஆகஸ்ட் 1ம் தேதி இப்படம் வெளியானது.ஆனால், அதே ஆண்டு ஆகஸ்ட் 22ம் தேதி வெளியான நாடோடி மன்னன் படத்தில் சரோஜாதேவி கதாநாயகியானார். இப்படத்தில் இடம் பெற்ற அனைத்துப் பாடல்களும் சூப்பர் ஹிட். பாடல்களை ஏ.மருதகாசி, பி.ஹனுமந்தராவ், கு.மா.பாலசுப்ரமணியம், கே.வி.கிருஷ்ணன் ஆகியோர் எழுதினர். மைனர் லைஃப் என்று ஏ.எம்.ராஜா பாடிய புகழ் பெற்ற பாடலும் இப்படத்தில் இடம் பெற்றது. அகார்டியன், தபேலாவின் கலவை ஒலிக்கிடையே மென்மையாக ஒலிக்கும் ஏ.எம்.ராஜாவின் குரலில் ஆங்கிலம் கலந்து வந்தது இந்த வித்தியாசமான பாடல். கு.மா.பாலசுப்ரமணியம் எழுதிய என்னை ஆனந்த ராஜா என்ற ஜிக்கியின் காலத்தால் அழியாத காவியபாடலும் இப்படத்தில் தான் ஒலித்தது. பி.சுசீலா குரலில் ஒலிக்கும் ஆசை மொழி பேசும் இவர் யாரடி, பாடிய மனமே உனதாவல் யாவும் கனவோ, டி.எம்.சௌந்தரராஜன் பாடிய அணையாதே அன்பெனும், ஏ.எல்.ராகவன், எஸ்.ஜானகி பாடிய ஜானி நீ வா வா, எஸ்.ஜானகி பாடிய நிலவே அவன் யார் தெரியுமா போன்ற பாடல்கள் இடம் பெற்ற இப்படத்தின் இசையமைப்பாளர் கே..ஜி.மூர்த்தி. இவ்வளவு அற்புதமான இசை மீட்டிய இந்த இசையமைப்பாளரிடம் தான் சூலமங்கலம் சகோதரிகள் இசை பயின்றுள்ளனர் என்ற செய்தி பதிவாகியுள்ளது. 1931ம் ஆண்டு முதல் 1975ம் ஆண்டு வரை 35 தமிழ், தெலுங்கு படங்களுக்கு மேல் சி.புல்லையா தயாரித்து இயக்கியுள்ளார். இவரது படங்களுக்கு சி.ஆர்.சுப்புராமன், கே.வி.மகாதேவன், பெண்டியாலா நாகேஸ்வரராவ், ரீமா - நாராயணன், பி.நரசிம்மராவ், ஏ.ராமாராவ், மாஸ்டர் வேணு, கண்டசாலா உள்பட இசையமைப்பாளர்களைப் பயன்படுத்தியுள்ளார். ஆனால், அவர் அறிமுகப்படுத்திய கே.ஜி.மூர்த்தி இவ்வளவு சிறப்பான பாடல்களைத் தந்த பிறகும் வேறு படங்களில் ஏன் இசையமைக்கவில்லையென தெரியவில்லை. தெரிந்தவர்கள் பின்னூட்டத்தில் தெரிவிக்கலாம். - ப.கவிதா குமார் #😍Old மூவிஸ் #📷நினைவுகள் #💪கெத்து ஸ்டேட்டஸ் #🎬 சினிமா #🎬தமிழ்ப்பட மாஸ் சீன்ஸ்🔥