കാസർഗോഡ് ജില്ലാ മൾട്ടി പർപ്പസ് സ്റ്റേഡിയം നാടിനു സമർപ്പിച്ചു. കിഫ്ബി മുഖേന 23.92 കോടി രൂപ ചെലവഴിച്ചാണ് ഈ സ്റ്റേഡിയം നിർമ്മിച്ചിരിക്കുന്നത്. അന്താരഷ്ട്ര നിലവാരമുള്ള നീന്തൽക്കുളം, അതിലെ ജലത്തിന്റെ നിലവാരം പരിശോധിക്കുന്നതിനുള്ള സംവിധാനങ്ങൾ, വോളിബോൾ, ബാസ്‌കറ്റ് ബോൾ, ഹാൻഡ്ബോൾ, ബാഡ്മിന്റൺ കോർട്ടുകൾ, ടേബിൾ ടെന്നീസ്, എന്നിവയടക്കമുള്ള സൗകര്യങ്ങൾ ഉൾക്കൊള്ളുന്നതാണ് ഈ മൾട്ടി പർപ്പസ് സ്റ്റേഡിയം. കാസർഗോഡ് ജില്ലയിലെ കായിക മുന്നേറ്റത്തിൽ മികച്ച സംഭാവന നൽകുന്നവയാവും ഉദ്ഘാടനം ചെയ്യപ്പെട്ട ഈ സ്റ്റേഡിയം എന്ന് പ്രതീക്ഷിക്കുന്നു. കളിക്കളങ്ങളില്ലാത്ത ഒരു പഞ്ചായത്ത് പോലും സംസ്ഥാനത്ത് ഉണ്ടാകരുതെന്ന കാഴ്ചപ്പാടോടെയാണ് ഇടതുപക്ഷ ജനാധിപത്യ മുന്നണി സർക്കാർ 'ഒരോ വാർഡിലും ഒരു കളിക്കളം' എന്ന ലക്ഷ്യത്തോടെ നീങ്ങുന്നത്. ആദ്യം എല്ലാ പഞ്ചായത്തിലും കളിക്കളം. പിന്നീട് ഓരോ വാർഡിലും കളിക്കളം. ഈ നിലയിലാണ് പദ്ധതി നടപ്പാക്കുന്നത്. കായിക വകുപ്പിന്റെ വിഹിതം, എം എൽ എ ഫണ്ട്, പഞ്ചായത്ത് വിഹിതം, വിവിധ കമ്പനികളുടെ സി എസ് ആർ ഫണ്ടുകൾ തുടങ്ങിയവ ഏകോപിപ്പിച്ചാണ് പദ്ധതിക്ക് തുക കണ്ടെത്തുന്നത്. മുഴുവൻ ജനങ്ങൾക്കും പ്രയോജനപ്പെടുന്ന രീതിയിലാകും പ്രാദേശിക കളിക്കളങ്ങൾ ഒരുക്കുക. നടക്കാനും ചെറിയ വ്യായാമങ്ങൾ ചെയ്യാനുമുള്ള സൗകര്യം കളിക്കളത്തിനൊപ്പം ഉണ്ടാകും. കുട്ടികൾ മുതൽ വയോജനങ്ങൾ വരെ ഏതു പ്രായത്തിലുള്ളവർക്കും കായിക പ്രവർത്തനങ്ങളിൽ ഏർപ്പെടാൻ കഴിയുന്ന നിലയിലാവും ഈ കളിക്കളങ്ങൾ ഒരുങ്ങുക. കായികരംഗത്തെ മുന്നേറ്റത്തിന് ഏറ്റവും അനിവാര്യമാണ് മെച്ചപ്പെട്ട കായികസംസ്‌കാരം രൂപപ്പെടുത്തുക എന്നത്. മെച്ചപ്പെട്ട കായികസംസ്‌കാരം രൂപപ്പെടണമെങ്കിൽ കായികസാക്ഷരതയുടെ കാര്യത്തിൽ നമ്മൾ ഏറെ മുന്നോട്ടുപോകണം. കുട്ടികളും മുതിർന്നവരും ഒരുപോലെ കായിക സാക്ഷരത നേടേണ്ടതുണ്ട്. എല്ലാവർക്കും ആരോഗ്യം എന്ന കാഴ്ചപ്പാട് അടിസ്ഥാനമാക്കിയാണ് സംസ്ഥാന സർക്കാർ പുതിയ കായികനയം രൂപപ്പെടുത്തിയിരിക്കുന്നത്. കമ്മ്യൂണിറ്റി സ്പോർട്സ് എന്ന ആശയം നടപ്പാക്കുന്നതിലൂടെ മുഴുവൻ ജനങ്ങളുടെയും വെൽനസ് ആണ് ലക്ഷ്യമിടുന്നത്. അതിന് നമ്മുടെ കായിക മേഖലയിലെ അടിസ്ഥാന സൗകര്യങ്ങൾ മെച്ചപ്പെടണം. ഈ മേഖലയിലെ അടിസ്ഥാന സൗകര്യങ്ങൾ മെച്ചപ്പെടുത്താൻ 1,500 കോടി രൂപയുടെ പദ്ധതികൾ സംസ്ഥാനത്ത് നടപ്പാക്കിവരുന്നുണ്ട്. ഇതിനുപുറമേ കായികരംഗത്ത് നിക്ഷേപം ആകർഷിക്കുന്നതിനും കായികരംഗത്തെ അടിസ്ഥാന സൗകര്യങ്ങൾ മെച്ചപ്പെടുത്തുന്നതിനും ഉതകുന്ന വിധത്തിൽ ഒരു സ്‌പോർട്‌സ് എക്കോണമി തന്നെ രൂപപ്പെടുത്തുകയാണ്. #🆕 ലേറ്റസ്റ്റ് അപ്ഡേറ്റ്