#📙 നോവൽ - പ്രളയം... 🔻 പാർട്ട് _16 ✍️ രചന - Aniprasad ഷെറിന്റെ മനക്കണ്ണിലൂടെ പഴയ കുറെ ഓർമ്മകൾ ഓളം തുഴഞ്ഞ് പൊയ്ക്കൊണ്ടിരുന്നു. "നീ പിന്നെയും കള്ളം പറഞ്ഞു ഞങ്ങളെ വഴിതെറ്റിയ്ക്കാൻ നോക്കിയാൽ.." ഷാജൻ മുറുമുറുത്ത്‌ കൊണ്ട് കയ്യിൽ ചുരുട്ടിപ്പിടിച്ചിരുന്ന ബെൽറ്റിൽ പിടി മുറുക്കുന്നത് കണ്ടതോടെ മേരിയമ്മ വന്ന് അവർക്കിടയിലേക്ക് കയറി നിന്നു. "വെറുതേ എന്റെ കുഞ്ഞിനെ ഇനി തൊട്ട് പോകരുത്. അത് അപ്പനായാലും ശരി മകനായാലും ശരി.. അവൾക്കെന്തെങ്കിലും പറയാനുണ്ടോ എന്ന് പോലും ചോദിയ്ക്കാതല്ലേ വിചാരണയും, ശിക്ഷാ വിധിയും..." മകൾക്ക് രക്ഷയുടെ ഒരു പ്രതിരോധംതീർത്തമട്ടിൽ നിൽക്കുകയാണ് മേരിയമ്മ. "നീ മാറി നിൽക്ക്. അവൾക്ക് പറയാനുള്ളത് ഇവിടാർക്കെങ്കിലും കേൾക്കണ്ട എന്ന് പറഞ്ഞോ.. ഇല്ലല്ലോ.. വാ തുറന്ന് പറയേണ്ട സമയത്ത്‌ ഇവൾ മിണ്ടാപൂച്ച നടിച്ചു നിന്നിട്ട് ഇപ്പോൾ വന്നു കുമ്പസാരിയ്ക്കുന്നോ. അമ്മയ്ക്കും തരും മകൾക്കും തരും ഞാൻ. അത് വേണ്ടെന്നുണ്ടെങ്കിൽ മിണ്ടാതെ മാറി നിന്നോണം." പീലിപ്പോസ് ഭാര്യയുടെ കൈത്തണ്ടയിൽ പിടിച്ചു ദൂരേയ്ക്ക് മാറ്റി നിർത്തി. "നീപറഞ്ഞത് അവിടെ പള്ളിയ്ക്കുള്ളിൽ കയറി വന്ന ആ ചെറ്റയെ കുറിച്ചാണോടീ.." പീലിപ്പോസ് മകളെ നോക്കി തിരക്കി. ദേഷ്യം വന്നിട്ട് അയാൾ കൈവിരലുകൾ കൂട്ടി ഞെരിയ്ക്കുന്നുണ്ടായിരുന്നു. "അതേ. അയാൾ നിങ്ങൾ കരുതുന്ന ആളേ അല്ല പപ്പാ. അയാളുടെ പേര് വിക്ടർ എന്നാണ്.. അല്ലാതെ എസ്തപ്പാൻ എന്നല്ല അയാളുടെ പേര്. അയാളിവിടെ എന്നെ പിന്തുടർന്ന് വന്നത് എന്നെകൊണ്ട് പോകാനൊന്നും അല്ല. അയാൾക്ക് വേണ്ടത് സിതാരയെ ആണ്.. തുലാപ്പള്ളിയിലെ ചന്ദ്രമോഹൻ അങ്കിളിന്റെ മകൾ സിതാരയെ.." "സിതാര നാട്ടിലില്ലല്ലോ.വിദേശത്ത്‌ ജീവിയ്ക്കുന്ന അവളെ തിരക്കി അവനെന്തിനു നിന്റെ മനസ്സമ്മത ചടങ്ങ് നടക്കുന്നയിടത്തേയ്ക്ക് വരണം. നീ ഞങ്ങളെ വീണ്ടും കബളിപ്പിയ്ക്കാൻ നോക്കുകയാണോടി.. സർവമാന ജനങ്ങൾക്കും മുമ്പിൽ വച്ച് ഞങ്ങളിലേക്ക് നാണക്കേടിന്റെ വഴുവഴുപ്പ് കോരിയൊഴിച്ചിട്ട് കുറച്ച് കള്ളം പറഞ്ഞു രക്ഷപ്പെട്ടു കളയാമെന്നാണോ നീ കരുതിയേക്കുന്നത്.. നടക്കില്ല അത്." ഷാജൻ അവളുടെ മുടിക്കുത്തിനു പിടിയ്ക്കാനായി കൈനീട്ടിയെങ്കിലും പീലിപ്പോസ് അവനെ പിന്നിലേക്ക് വലിച്ചു മാറ്റി. "നിൽക്ക്.. അവൾക്കുള്ള ശിക്ഷ വിധിയ്ക്കും മുമ്പ് അവൾക്ക് പറയാനുള്ളത് എന്താണെന്ന് നോക്ക്..." അത്രയും പറഞ്ഞ ശേഷം അയാൾ മകൾക്ക് നേരെ തിരിഞ്ഞു. "സത്യം മാത്രമേ പറയാവൂ.. നിന്നെ തിരക്കി വന്നതല്ല അവനെങ്കിൽ സിതാരയെ തിരക്കി തുലാപ്പള്ളിയിലെക്കല്ലേ അവൻപോകേണ്ടത്.. സിതാരയും അവനും തമ്മിൽ സ്നേഹത്തിലായിരുന്നോ..." ഷെറിൻ മെല്ലെ ശിരസ്സ് ചലിപ്പിച്ചു. "അവന്റെ പേര് വിക്ടർ എന്നാണെങ്കിൽ അവൻ ആരാണ്.. സിതാരയുടെ ജീവിതത്തിലേക്ക് അവനെങ്ങിനെ കടന്നു വന്നു. ഇതുപോലൊരു വൃത്തികെട്ടവനെ ഇഷ്ടപ്പെടാൻ മാത്രം അധപ്പതിച്ചു പോയോ ആ പെൺകുട്ടി.." "സിതാര അയാളെ പരിചയപ്പെട്ടത് എവിടെ വച്ചാണെന്നോ, എങ്ങിനെയാണെന്നോ എനിയ്ക്കറിയില്ല.. ഹോസ്റ്റലിൽ വച്ച് ഒരുദിവസം രാത്രി നിന്നെ ഞാൻ നാളെ ഒരാളേ പരിചയപ്പെടുത്തി തരുന്നുണ്ട് എന്ന് സിതാര എന്നോട് പറയുന്നതോടെയാണ് അയാളെ കുറിച്ച് ഞാനും അറിയുന്നത്.. ചങ്ങനാശ്ശേരി യിലെ പദ്മ കഫേയിൽ വച്ചാണ് വിക്ടറിനെ ഞാൻ ആദ്യമായി കാണുന്നത്.. സിതാരയുടെ സാന്നിധ്യത്തിൽ. സിതാരയെ കാണും മുമ്പേ ഷെറിനെയായിരുന്നു ഞാൻ ആദ്യം കണ്ടതെങ്കിൽ നിന്റെ സ്ഥാനത്ത്‌ ഷെറിൻ ഇരുന്നേനെ മോളേ എന്ന്ആദ്യമായി കണ്ടപ്പോൾ സിതാരയുടെ സാന്നിധ്യത്തിൽ വച്ച് തന്നെ ഒരു തമാശ രൂപേണ പറഞ്ഞ ആ നിമിഷത്തിൽ തന്നെ അയാളെ കുറിച്ച് ഞാൻ സിതാര യ്ക്ക് വാണിങ് കൊടുത്തതാണ്, അത് വിട്ടേക്കാൻ.. നീ കരുതുന്ന ഒരാളേ അല്ല അയാൾ എന്ന് അവളോട് ആവും വിധം ഞാൻ പറഞ്ഞു നോക്കിയെങ്കിലും സിതാര അതൊന്നും ചെവിക്കൊള്ളാൻ തയ്യാറായിരുന്നില്ല." ഷെറിൻ ഒന്ന് നിർത്തിയിട്ട് എന്തോ ഓർത്തെടുക്കും മട്ടിൽ നിന്നു. കഴിഞ്ഞു പോയ സംഭവങ്ങൾ ഒരു കാൻവാസിൽ എന്നവണ്ണം അവളുടെ മനസ്സിൽ തെളിഞ്ഞു വന്നു കൊണ്ടിരുന്നു. "സുന്ദരമായൊരു മുഖവും ആരെയും ആകർഷിയ്ക്കുന്ന ആകാര വടിവുള്ളൊരുശരീരവും ഉണ്ടെന്നല്ലാതെ അയാളെ കുറിച്ച് നിനക്ക് എന്തറിയാം മോളേ... അവൻ ആരാണ്.. അവന്റെ കുടുംബസ്ഥിതി എന്താണ്... എന്തെങ്കിലും ജോലിയോ കൂലിയോ ഉള്ള ആളാണോ... വെറും ഒരു വാക്ക് തന്നിട്ടുള്ളതല്ലാതെ അയാൾ നിന്നെ ജീവിതകാലം മുഴുവൻ കൂടെ കൂട്ടും എന്ന് എന്താണ് ഉറപ്പ്... അങ്ങനെ കൂടെ കൂട്ടാൻ അയാൾ തയ്യാറായാൽ തന്നെ ചന്ദ്രമോഹൻ അങ്കിൾ അത് സമ്മതിച്ചു തരുമെന്ന് നിനക്ക് തോന്നുന്നുണ്ടോ... ചന്ദ്രമോഹൻ അങ്കിളിന്റെ സമ്മതമില്ലാതെ ഈ ഭൂമിയുടെ ഏത് കോണിൽ പോയാലും നിങ്ങൾക്ക് ഒന്നിച്ച് ജീവിയ്ക്കാൻ കഴിയുമെന്നാണോ നീ കരുതുന്നത്.'' അവളെ എങ്ങിനെയും ആ ബന്ധത്തിൽ നിന്നും പിന്മാറ്റാനായിരുന്നു എന്റെ ശ്രമം.. അതിന് വേണമെങ്കിൽ ഈ ബന്ധത്തെ കുറിച്ച് സിതാരയുടെ അച്ഛനോട് പറയാൻ വരെ ഞാൻ തയ്യാറായിരുന്നു. "എനിയ്ക്കും വിക്ടറിനും ഈ ഭൂമിയിൽ ജീവിയ്ക്കാൻ എന്റെ പപ്പയുടെ സമ്മതം ഞങ്ങൾക്ക് വേണ്ടെങ്കിലോ... എന്റെ പപ്പയെ പേടിച്ച് ഈ ഭൂമിയുടെ ഏതെങ്കിലും ഒരു കോണിൽ പോയല്ല, ഇവിടെ ജീവിയ്ക്കും ഞങ്ങൾ.. നിങ്ങളെല്ലാം ജീവിയ്ക്കുന്ന ഇതേ നാട്ടിൽ... ഈ ലോകത്ത്‌ നമ്മുടെസന്തോഷങ്ങളുമായി ആരെയും നോവിയ്ക്കാതെ ജീവിയ്ക്കാൻ നമ്മളെന്തിനു മറ്റുള്ളവരെ ഭയക്കണം... പിന്നെ, എന്റെ പപ്പയുടെ സമ്മതമില്ലാതെയാ ഞങ്ങൾ സ്നേഹിച്ചു തുടങ്ങിയതെങ്കിൽഞങ്ങൾക്കൊന്നിച്ചു ജീവിയ്ക്കാനും എന്റെ പപ്പയുടെ സമ്മതം ആവശ്യമില്ല... പിന്നെ അവൻ ആരാണെന്ന് നീ എന്നോട് ചോദിച്ചില്ലേ... ഞാൻ സ്നേഹിയ്ക്കുന്നതിന്റെ നൂറിരട്ടി എന്നെ സ്നേഹിയ്ക്കുന്ന എന്റെ പുരുഷൻ.. അവൻ ആരാണെന്ന് നീ ചോദിച്ചില്ലേ.. എന്റെ ജീവൻ എന്ന് മാത്രമേ എനിയ്ക്കതിനു മറുപടി പറയാൻ കഴിയൂ.. അവന്റെ കുടുംബ സ്ഥിതിയെ കുറിച്ച് നീ ചോദിച്ചതിന് അത് അന്വേഷിയ്ക്കേണ്ടുന്ന കാര്യം എനിയ്ക്കില്ലെന്നാണ് എന്റെ മറുപടി... വിക്റ്ററിന്റെ ജോലി കൂലിപ്പണി ആയിക്കോട്ടെ, അത് ഞാൻ അംഗീകരിച്ചു കൊടുക്കുന്നു.. കാരണം ആ ജോലി ചെയ്തായാലും വിക്റ്ററിന് എന്നെ പോറ്റാനുള്ള കഴിവ്ഒണ്ടോഎന്ന് മാത്രം നോക്കിയാൽ പോരെ എനിയ്ക്ക്... വിവാഹ ജീവിതത്തിന്റെയോ, സ്നേഹത്തിന്റെയോ കാര്യത്തിൽ മാത്രമല്ല നമ്മുടെ ജീവന്റെ കാര്യത്തിലും നമുക്കൊരു പോസിറ്റിവായിട്ടുള്ള വിശ്വാസത്തിനപ്പുറം എന്തുവാഗ്ദാനങ്ങളാണ് ഒരു മനുഷ്യന് മറ്റൊരു മനുഷ്യന് നൽകാൻ കഴിയുന്നത്... ഞാൻ വിക്റ്ററിന്റെ ഹൃദയത്തിലും, വിക്ടർ എന്റെ ഹൃദയത്തിലും ഉള്ളിടത്തോളം കാലം ഞങ്ങളുടെ വിശ്വാസം പരസ്പരം നൽകിയിട്ടുള്ള വാക്കുകൾ തന്നെയാണ്. ഇനി നീ ആദ്യം ചോദിച്ച ചോദ്യത്തിനുള്ള മറുപടി... സുന്ദരമായ മുഖവും, ആരെയും ആകർഷിയ്ക്കുന്ന ആകാര വടിവുള്ളൊരു ശരീരവും ഉണ്ടെന്നല്ലാതെ അയാളെ കുറിച്ച് നിനക്ക് എന്തറിയാം എന്ന് നീ ചോദിച്ചില്ലേ... ഈ ലോകത്ത്‌ വിക്ടറിനെ കുറിച്ച് എന്തെങ്കിലും അറിയാം എന്നുണ്ടെങ്കിൽ അത് എനിയ്ക്ക് മാത്രമാണ് മോളേ... മനസ്സതുറന്ന് സ്നേഹിയ്ക്കാനൊരു ഹൃദയവും, പ്രാണനെ പോലെ നെഞ്ചോട് ചേർത്തുപിടിയ്ക്കാനുള്ള ശക്തമാർന്ന കരങ്ങളും ഉള്ള പുരുഷനാണ് വിക്ടർ. ഒരു പെണ്ണിന് അവൾ സ്നേഹിയ്ക്കുന്നവനിൽ നിന്ന് കിട്ടേണ്ട സ്നേഹം എത്ര അളവിൽ വേണോ അതിന് പതിന്മടങ്ങു സ്നേഹം എന്റെ വിക്ടർ എനിയ്ക്ക് മടക്കി തരുന്നുണ്ട്... മറ്റൊന്നും എനിയ്ക്ക് വേണ്ട... ജീവൻ പോയാലും അന്യോന്യം കൈ വിട്ടു കളയില്ലെന്ന് ഞങ്ങൾ അന്യോന്യം വാക്ക് നൽകി കഴിഞ്ഞു. " അത് പറയുമ്പോൾ അവളുടെ കണ്ണുകളിലെ ആത്മ വിശ്വാസത്തിന്റെ തിളക്കം എനിയ്ക്ക് കാണാൻ കഴിയുന്നുണ്ടായിരുന്നു. ചന്ദ്രമോഹൻ അങ്കിളിന് എന്നല്ല ദൈവത്തിനു പോലും അവരെ പിരിയ്ക്കാൻ കഴിയില്ലെന്ന് അതോടെ എനിയ്ക്കുറപ്പായി. അതുമല്ല അവരെ പിരിയ്ക്കാനുള്ള ശ്രമം അവിടെ വച്ച് ഞാൻ ഉപേക്ഷിച്ചു കളയുകയും ചെയ്തു. വിക്ടറിനെ കുറിച്ച് എന്റെ മനസ്സിൽ തോന്നിയ ദുഷ് ചിന്തകളും ഞാൻമനസ്സിൽ നിന്നെടുത്തു കളഞ്ഞു. അയാളെ കുറിച്ചുള്ള നെഗറ്റീവ് ചിന്തകൾ എല്ലാം എന്റെ വെറും തോന്നലുകൾആകാം എന്നാണ് എനിയ്ക്കപ്പോൾ തോന്നിയത്. ചിലപ്പോൾ അയാൾ, സിതാര കരുതും പോലെ നല്ലവനായേക്കാം. അന്ന് അബദ്ധത്തിലെങ്ങാനും അയാളുടെ നാവിൽ നിന്ന് അങ്ങനെയൊരു വാചകം വീണു പോയതിന്റെ വാലിൽ തൂങ്ങി ഞാനും പോകാൻ പാടില്ലായിരുന്നു. ഡിഗ്രി അവസാന വർഷ കോഴ്‌സ് തീരാൻ ബാക്കിയുള്ളതിന്റെ ഒരാഴ്ച മുൻപാണ് ഞാൻ സിതാരയിൽ ഒരു ഉന്മേഷക്കുറവ് ദർശിയ്ക്കുന്നത്. ആദ്യം ഞാൻ കരുതിയത് ഇനി എക്സാമിന് മുൻപുള്ള ലീവിന് വീട്ടിലേക്ക് പോകേണ്ടതിനാൽ അവൾക്ക് വിക്ടറനെ കാണാൻ പറ്റില്ലല്ലോ എന്ന സങ്കടം ആകും എന്നാണ്. എന്തിനോടും ഏതിനോടുമുള്ള അവളുടെ നിസ്സംഗത കൂടി തുടങ്ങിയതോടെ ഞാൻ സിതാരയോട് കാര്യം തിരക്കി. ആദ്യമൊക്കെ അവൾ ഒഴിഞ്ഞു മാറിയെങ്കിലും അവസാനം അവൾ എനിയ്ക്ക് മുൻപിൽ മനസ് തുറന്നു. വിവിധ ആവശ്യങ്ങൾ പറഞ്ഞു വിക്ടർ പലപ്പോഴായി അവളുടെ അക്കൗണ്ടിൽ നിന്ന് പിൻ വലിച്ചു സ്വന്തമാക്കിയ വലിയ തുകകൾ... ആദ്യമൊക്കെ അവൾ താൻ സ്നേഹിയ്ക്കുന്ന പുരുഷന് അവൻ പറയുന്ന തുക ബാങ്കിൽ നിന്നെടുത്ത്‌ കൊടുക്കുമ്പോൾ ഒരു അഭിമാനത്തോടെ അത് ആസ്വദിച്ച് കൊണ്ടിരിയ്ക്കയായിരുന്നു. പിന്നെ പ്പിന്നെ ബാങ്കിൽ നിന്നും പണം പിൻവലിയ്ക്കാൻ താമസം നേരിട്ടാൽ ക്രുദ്ധനാവുന്ന വിക്ടറിനെയാണ് അവൾക്ക് കാണാൻ കഴിയുന്നത്.. അവന്റെ ഓരോ ഭാവമാറ്റവും അവളെ ഭയപ്പെടുത്തുന്നുണ്ടായിരുന്നു. മദ്യമോ മയക്കുമരുന്നോ ഒക്കെ അവിചാരിതമായി അവന്റെ പക്കൽ നിന്നും അവൾക്ക് കണ്ടെത്താൻ കഴിഞ്ഞതോടെ അവനെ കാണുന്നതെ അവൾക്ക് ഭയമായി കഴിഞ്ഞു. അവളുടെ സർവ്വ പ്രതീക്ഷകളെയും തകിടം മറിച്ച് കളഞ്ഞൊരു മനുഷ്യനെയാണ് വിക്റ്ററിൽ അവൾക്ക് പിന്നെ കാണാൻകഴിയുന്നത്.. അവൾക്ക് തന്നെഭയമായി കഴിഞ്ഞെന്ന് മനസിലായതോടെ ഇങ്ങനെ നമ്മൾ തുടരുന്നതിൽ അർത്ഥമില്ലെന്നും പിരിയാമെന്നും ആദ്യം പറഞ്ഞത് വിക്ടർ ആണ്. പക്‌ഷേ അവനിനി അവളെ കാണാൻ വരാതിരിയ്ക്കണമെങ്കിൽ നല്ലൊരു തുക അവന്റെ കയ്യിൽ കിട്ടണം. എന്തിനും തയ്യാറായിരുന്നു സിതാര. ഞാൻ പോലുമറിയാതെ, എന്നോട് പറയില്ലെന്ന് വിക്ടർ അവളോട് ഉറപ്പ് വാങ്ങിയ ശേഷം രണ്ട് തവണയായി അവളുടെ അക്കൗണ്ടിൽ ഉണ്ടായിരുന്ന ഭൂരിഭാഗം തുകയും അവൻ കൈക്കലാക്കി. എന്നിട്ടും മതിയാകാതെ അവൻ ഭീഷണി തുടർന്നപ്പോഴാണ് സിതാര എന്നോട് അക്കാര്യം പറയുന്നത്. ചന്ദ്രമോഹൻ അങ്കിളിനെ വിവരം അറിയിയ്ക്കാൻ ഞാൻ നിർദേശിച്ചെങ്കിലും അവൾ അതിന് തയ്യാറായിരുന്നില്ല. അച്ഛൻ ആനിമിഷം യു കെ യിൽ നിന്നും നാട്ടിലേക്ക് എത്തുമെന്നും, ചിലപ്പോൾ തന്നേയും അച്ഛൻ കൂടെ കൊണ്ട് പോയേക്കും എന്നായിരുന്നു സിതാ യുടെ പേടി.. ചന്ദ്രമോഹൻ അങ്കിളിലൂടെ മാത്രമേ സിതാരയ്ക്ക് ഒരു മോചനം സാധ്യമാകൂ എന്നറിയാമായിരുന്നതിനാൽ അങ്കിളിനോട് ഞാൻ വിവരം അറിയിച്ചു. പ്രതീക്ഷിച്ചത് പോലെ മൂന്നാമത്തെ ദിവസം അങ്കിൾ നാട്ടിലെത്തി. അങ്കിൾ നടത്തിയ അന്വേഷണത്തിൽ മനുഷ്യരൂപം പൂണ്ട ഒരുചെന്നായ തന്റെ മകളെ കബളിപ്പിച്ചു കൈക്കലാക്കിയിരിയ്ക്കുന്നത് പത്തു ലക്ഷത്തിൽ പരം രൂപയാണ്എന്ന് കണ്ടെത്തി. ഇതിനെതിരെ പ്രതികരിക്കാതെ പോയാൽ അവൻ മറ്റൊരു ഇരയെ ഇതേ കണ്ടെത്തും എന്നാൽ കേസും വഴക്കുമായി അങ്കിൾ നാട്ടിൽ തുടർന്നാൽ തന്റെയും മകളുടെയുംജീവിതത്തിനു മേൽ കുറെ അപവാദ കഥകൾവീഴുകയും, കുറെ എന്നതിനപ്പുറം യാതൊരു ഫലവും ഉണ്ടാകാൻ പോകുന്നില്ലന്ന് മനസിലാക്കിയിട്ടോ എന്തോ അങ്കിൾ അവനെതിരെ പരാതികൊടുക്കുന്ന തീരുമാനത്തിൽ എത്തിച്ചേർന്നു. ഒന്നോ രണ്ടോ ആഴ്ചയ്ക്കുള്ളിൽ തൻ മടങ്ങി പോകുമ്പോൾ സിതാരയെയും കൂടെ കൊണ്ടുപോകുന്നതോടെ ആ അദ്ധ്യായം തനിയേ അവസാനിക്കും. നാട്ടിൽ നിന്ന അവസരത്തിൽ ചന്ദ്ര മോഹൻ അങ്കിൾ ഒരു സ്വകാര്യ ഡിറ്റക്റ്റീവ് ഏജൻസിയെ കൊണ്ട് വിക്ടറിനെ കുറിച്ചൊരു അന്വേഷണം നടത്തി നോക്കി. അയാളുടെ വീടോ നാടോ ഊരോ ഒന്നും ആർക്കും അറിയില്ല... എവിടെനിന്നോ വരുന്ന അവൻ എവിടേയ്‌ക്കോ പോകുന്നു.. അടുത്തതായി കിട്ടിയ വിവരമാണ് എന്നെ കൂടുതൽ അമ്പരിപ്പിച്ചത്. കാപ്പ ചുമത്തി അയൽ ജില്ലയിൽ നിന്നും അടുത്ത ജില്ലയിലേക്ക് നാട് കടത്തപ്പെട്ട ഒരു കൊടും ക്രിമിനൽ ആണ് വിക്ടർ എന്ന സത്യമാണ് ഏജൻസി, ചന്ദ്രമോഹൻഅങ്കിളിന് കൈ മാറിയത് അത് കേട്ട് ചന്ദ്രമോഹൻ അങ്കിളിന്. മാത്രമല്ലമറ്റുള്ളവർക്കും ആധിയായി. അദ്ദേഹം തന്നെയാണ് അവനെ കുറിച്ചുള്ള ഈ വിവരം മറ്റാരോടും പുറത്ത് പറയരുതെന്ന് നിർദേശം വച്ചത്... സിതാരയെ തിരികെ കൊണ്ട് പോവുകയോ, വീട്ടു തടങ്കലിൽ വയ്ക്കുകയോ ചെയ്യാതെ തുടർന്നും ഹോസ്റ്റലിലേക്ക് പൊയ്ക്കൊള്ളാൻ അദ്ദേഹം പറഞ്ഞു ഇലയ്ക്കും മുള്ളിനും കേടില്ലാതെ സിതാരയെ അവനിൽ നിന്നും അടർത്തി മാറ്റുകയായിരുന്നു അദ്ദേഹത്തിന്റെ ലക്ഷ്യം. (തുടരും) #📔 കഥ