#📙 നോവൽ - ഹൃദയത്തിന്റെ അവകാശി 💜💜 🔻 പാർട്ട് _125 ✍️ രചന - ജിഫ്ന നിസാർ 💜 ഇപ്പൊ ഞാൻ നിന്നോട് പറഞ്ഞു തന്ന ഐഡിയ ഓപ്ഷൻ ബി ആണ് അച്ചു.. ഇനിയൊന്നു കൂടിയുണ്ട്. ഓപ്ഷൻ എ.. അത് പറയട്ടെ.. " കള്ളത്തരം നിറഞ്ഞൊരു ഭാവത്തോടെ ശ്രീ അച്ചുവിന്റെ അരികിലേക്ക് നീങ്ങിയിരുന്നു കൊണ്ട് ചോദിച്ചു. കാർത്യായിനിയമ്മക്ക് ജോലിക്ക് പോണമെന്നു പറഞ്ഞ കാര്യവും അവർക്ക് മടുപ്പ് മാറ്റി കൊടുക്കുന്ന കാര്യം താൻ ഏറ്റു പോന്നതുമെല്ലാം അച്ചുവിനോട് പറയുകയാണ് ശ്രീ. അവരുടെ ഓഫീസ് ട്രാസ്‌റ്റിൻറെ കീഴിൽ നടത്തി കൊണ്ട് വന്നിരുന്നൊരു ഓർഫനെജ് ഉണ്ടായിരുന്നു. തമ്പിയുടെ ഭരണപരിഷ്കാരങ്ങളിൽ പെട്ടത് പാടെ ശോചനീയാവസ്ഥയിലേക്ക് കൂപ്പു കുത്തി പോയെങ്കിലും.. വീണ്ടും അത് ഏറ്റെടുക്കാൻ താല്പര്യമുണ്ടെന്ന് ശ്രീയുടെ കൂടെ പോയി ജയഗോപൻ വാക്ക് കൊടുത്തിട്ടുണ്ട്. ആദ്യമാസത്തെ ഫണ്ട്‌ അവർക്ക് കൊടുക്കുകയും ചെയ്തു. നിരാലാംബരായ കുറച്ചു അമ്മമാരും ആർക്കും വേണ്ടാതെ ഉപേക്ഷിച്ചു കളഞ്ഞ കുറച്ചു പാവം കുട്ടികളുമുള്ള ഒരു സ്നേഹകൂടാരം. അങ്ങോട്ട് മേൽനോട്ടത്തിനായി കാർത്തുവിനെ പറഞ്ഞു വിട്ടാലോ എന്നായിരുന്നു ശ്രീ പറഞ്ഞ ആ ഓപ്ഷൻ ബി. അവിടെ ജോലിക്കല്ല.. ജോലിക്കാർക്ക് വേണ്ടുന്ന നിർദ്ദേശങ്ങൾ കൊടുക്കുന്ന ഒരാൾ. മടുപ്പെന്ന വാക്ക് പോലും പടി കടന്നങ്ങോട്ട് കയറില്ലെന്ന് ശ്രീക്കുറപ്പുണ്ട്. "പറയട്ടെ.. ഓപ്ഷൻ എ.." അച്ചു മിണ്ടാതിരിക്കുന്നത് കണ്ടതും ശ്രീ അവളെ പിടിച്ചു കുലുക്കി കൊണ്ട് ഒന്ന് കൂടി ചോദിച്ചു. "വേണ്ട.. നിങ്ങള് പറയേണ്ട.." അവൾകുമൊരു ചിരിയുണ്ട്. "ഹാ. അങ്ങനെ പറയല്ലേ.. എനിക്കത് പറയണം.. വേണ്ടന്നെ.. പറയാതെ തന്നെ എനിക്കറിയാം അതെന്തെങ്കിലും കോണിഷ്ടായിരിക്കും. കാരണം പറയുന്നത് നിങ്ങളല്ലേ ശ്രീയേട്ടാ.." വേദനിപ്പിച്ചു കൊണ്ടവൾ അവന്റെ മൂക്കിൽ തുമ്പിലൊന്ന് നുള്ളി.. "എങ്കിൽ നീ പറയ്യ്.. ഞാനെന്താ ഉദ്ദേശിച്ചത്..?" "ഞാനും പറയില്ല.." "എനിക്ക് തോന്നുന്നു.. ഓപ്ഷൻ ബി യെക്കാളും ഒന്ന് കൂടി ബെറ്റർ ഓപ്ഷൻ എ തന്നെ ആയിരിക്കും ന്ന്. അതാവുമ്പോൾ നമ്മുടെ കാർത്തൂന്നും ദേവികമ്മക്കും പിന്നെന്റെ അച്ചുമ്മാക്കും.. എന്തിന്.. നമ്മുടെ പാവം കുട്ടാപ്പിക്ക് പോലും മടുപ്പ് എന്നൊരു അസുഖമേ ഉണ്ടാവില്ല.. ഫുൾ എൻഗേജ്‌ഡ്.ഹാപ്പി..നമുക്കത് തന്നെ ഫിക്സ് ചെയ്താലോ അച്ചുവേ.." ചോദിക്കുന്നതിനൊപ്പം തന്നെ ശ്രീയുടെ ചുണ്ടും വിരലുകളും കുസൃതി കാണിച്ചു തുടങ്ങിയിട്ടുണ്ട്. "അങ്ങനിപ്പോ നമ്മളത് സെറ്റാക്കുന്നില്ല.. എനിക്കേ.. ജോലിക്ക് പോണം കുറച്ചു കൂടി.. എന്നിട്ടൊക്കെ മതി.." അച്ചു അവന്റെ കഴുത്തിൽ ചുറ്റി പിടിച്ചു കൊണ്ട് കൊഞ്ചി. "ഇതടിപൊളി ജോലിയാ പെണ്ണേ..എൻജോയ് ചെയ്യാൻ ബെസ്റ്റ് ഓപ്ഷൻ.." അവനൊന്നു കണ്ണ് ചിമ്മി കാണിച്ചു. എന്നാലും.. എനിക്ക് ശ്രീയേട്ടനെ സ്നേഹിച്ചു കൊതി തീർന്നില്ല.. ഏഹ്.. അതിന് എന്നേ വിട്ട് നീ എവിടെ പോണ്.. കൊതി തീരാതെ.. " "ശോ.. ഞാനെവിടേം പോണില്ല.. കുഞ്ഞൊക്കെ ആവുമ്പോൾ സ്നേഹം പങ്ക് വെച്ച് പോകില്ലേ.. അത് കൊണ്ടാ.." തന്റെ ഉദ്ദേശശുദ്ധിയെ കുറിച്ചവനോട് പറയുമ്പോൾ അവൾക്കൊരു ചമ്മലുണ്ട്. "മ്മ്മ്.. കുശുമ്പി തന്നെ.." ശ്രീ അവളെ നെഞ്ചിൽ അടക്കി പിടിച്ചു. "എങ്കിൽ നമ്മുക്ക് ഓപ്ഷൻ ബി തന്നെ ഫിക്സ് ചെയ്തേക്കാം.. അല്ലേ." "മ്മ്..." "നാളെ കഴിഞ്ഞു എനിക്ക് ഓഫീസിൽ പോയി തുടങ്ങണം.. എന്റമ്മാവൻ അറിഞ്ഞു കളിച്ചത് കൊണ്ട് ഒന്നോ രണ്ടോ മാസം കിണഞ്ഞു ശ്രമിച്ചാലെ ഇനിയും ഒന്ന് സെറ്റക്കി എടുക്കാൻ പറ്റൂ.. അത്രയും ക്രമകേടുകൾ നിറഞ്ഞിട്ടുണ്ടവിടെ.." ശ്രീ മുഖം ചുളിച്ചു. "അപ്പൊ സാറിന് കാട് കയറി ഊര് തെണ്ടി നടക്കുന്നൊരു ജോലിയില്ലേ.. അതെന്ത് ചെയ്യും. അത് വിട്ടോ.." അച്ചു അവന്റെ മുടിയിലൊന്ന് ചിക്കി കൊണ്ട് ചോദിച്ചു. "ഏയ്.. അതങ്ങനെ വിട്ട് കളയൊന്നുമില്ല.. അത്രേം ആഗ്രഹിച്ചു നേടിയതാണ്. പിന്നെ ഇപ്പൊ ലീവ് എടുത്തില്ലേൽ എല്ലാം കൂടി അച്ഛനെ കൊണ്ട് ഒറ്റയ്ക്ക് പറ്റില്ലെന്ന് തോന്നിയിട്ടാണ്.. അമ്മാവനെതിരെ ഒറ്റയ്ക്ക് അച്ഛനെ കൊണ്ട് കൂട്ടിയാൽ കൂടില്ല.. ആദ്യം ഓഫീസ് ഒക്കെയൊന്ന് റെഡിയാക്കി അത് അച്ഛനെയും നിന്നെയും ബാലയെയും ഏല്പിച്ചു കൊണ്ട് ഞാൻ വീണ്ടും കാട് കയറും.. ഇങ്ങനെ ഒരിടത്തുറച്ചു നിന്നിട്ടൊരു ജോലിക്ക് എനിക്ക് പറ്റിയില്ലെടി..ബോറിങ് പരിപാടി.. എനിക്ക് തുറന്നു വിട്ട കിളിയെ പോലെ പാറി പറന്നു നടന്നു സ്വപ്നം കാണണം.." ശ്രീ ചിരിയോടെ പറഞ്ഞു. "ആഹ്.. എന്നാൽ എന്നെയങ്ങനെ ഓഫീസിൽ കെട്ടിയിടാനും നോക്കണ്ട. എനിക്കും ഒറ്റയ്ക്ക് നിൽക്കാൻ പറ്റില്ല. ഈ ഊര് തെണ്ടി പോണയിടതൊക്കെ ഇനി ഞാനും ഉണ്ടാവും..പാറി പറക്കാൻ. വല്ലോരെയും ലൈൻ വലിക്കുന്നുണ്ടോ ന്ന് എനിക്കറിയണമല്ലോ.." അച്ചു കുറുമ്പോടെ പറഞ്ഞിട്ട് അവന്റെ മീശയിലൊന്ന് പിടിച്ചു വലിച്ചു.. "ഓഹോ.. അങ്ങനെയാണോ..എങ്കിൽ നിന്നെ കൊണ്ട് പോയിട്ട് തന്നേ കാര്യം.." ശ്രീക്കും കുസൃതിയാണ്.. "അമ്മാവന്റെ വിവരം വല്ലതുമുണ്ടോ ശ്രീയേട്ടാ.. ആളിപ്പോ എവിടാ.." അച്ചു ആകാംഷയിടെ ചോദിച്ചു. "ഹോസ്പിറ്റലിൽ തന്നെയാണ്.. നാളെയോ മറ്റന്നാളോ ഡിസ്ചാർജ് ചെയ്യുമെന്നാ അറിയാൻ കഴിഞ്ഞത്. അവിടിന്നിറങ്ങി നേരെ ജയിലിലോട്ട്.കുറച്ചു കൂടി കേസുണ്ട് മൂപ്പർക്ക് എതിരെ കുത്തി പൊക്കാൻ. അത് കൂടി ആകുമ്പോൾ പിന്നെ ജീവിതത്തിൽ പുറം ലോകം കാണാത്ത വിധം പൂട്ടി കൊള്ളാമെന്ന് രോഹി എനിക്ക് വാക്ക് തന്നിട്ടുണ്ട്.." ശ്രീയുടെ മുഖം വല്ലാതെ തിളങ്ങുന്നുണ്ട് അത് പറയുമ്പോൾ. അർജുന്റെ അവസ്ഥയോ..." "അവനല്ലേ കൂടുതൽ സുഖം.. കാലൊക്കെ പോയി.. ഇനിയിപ്പോ ജീവിതം മുഴുവനും ഒരു കിടക്കയിൽ ചെയ്തു കൂട്ടിയ സകലതും ഓർത്തു കൊണ്ടുള്ള സുഖിച്ച കിടത്തം.. ആഹാ.." ശ്രീ ആസ്വദിച്ചു ചിരിച്ചു. "ഈ കോലത്തിൽ അവൻ ജയിൽ പോണതിലും നല്ലത് ഇത് തന്നെയാ. അത് കൊണ്ടാ അവന്റെ പേരിൽ ഞാൻ കേസ് കൊടുക്കാത്തത്. പിന്നെ അവനെ നോക്കി അവന്റെ അമ്മയും അനിയത്തിയും.. ആരെയും വെറുതെ വിടില്ല ഞാൻ.. കുറച്ചൊന്നുമല്ല അവരെന്നെ കരയിപ്പിച്ചിട്ടുള്ളത്.. എന്റെ ബാല.. ഡെവി.. വിടില്ല ഞാൻ.." ശ്രീയുടെ അത് വരെയുമുള്ള മുഖമായിരുന്നില്ല അത് പറയുമ്പോൾ. അച്ചുവിന് പോലും ഭയം തോന്നും വിധം ക്രൂരത നിറഞ്ഞു.. അവനെയൊന്ന് തണുപ്പിക്കമെന്നുള്ള ഉദ്ദേശത്തിലാണ് അച്ചു പതിയെയാ നെറ്റിയിൽ ഉമ്മ വെച്ചത്.. പക്ഷേ ആ ഒരുമ്മ അവന്റെ പ്രണയത്തെ ചൂട് പിടിപ്പിക്കുകയാണ് ചെയ്തതെന്ന് തൊട്ടടുത്ത നിമിഷങ്ങളിൽ അവൾക്ക് മനസ്സിലായി.. 💜💜 "സത്യത്തിൽ ഇവിടൊരു ജോലിക്ക് ഒഴിവുണ്ടോ ഗിരീഷേ.." അത് വരെയും ഒന്നും മിണ്ടാതിരുന്നു കൊണ്ട് താൻ പറയുന്നതെല്ലാം കേട്ട വിനോദ് പെട്ടന്നങ്ങനെ ചോദിച്ചു കേട്ടപ്പോൾ ഗിരീഷ് അവനെ നോക്കി നെറ്റി ചുളിയിച്ചു. "എടാ.. നീ അവളോട് വെറുതെ പറഞ്ഞതാണോ ജോലിക്ക് ആളെ ആവിശ്യമില്ലെന്ന്. ഇവിടൊരാളെ വേണമെന്ന് ഇന്നലെ കൂടി എന്നേ വിളിച്ചപ്പോൾ നീ പറഞ്ഞതല്ലേ.. അതാണ്‌ ഞാൻ ചോദിച്ചത്.. ഓ അങ്ങനെ.." ഗിരീഷ് മനസ്സിലായത് പോലെ ഒന്ന് തലയാട്ടി ചിരിച്ചു. ആളെയൊക്കെ വേണം വിനോദെ. പക്ഷേ എനിക്കാ പെണ്ണിനെ പിടിച്ചില്ല. സർട്ടിഫിക്കറ്റ് നോക്കിയാൽ അതൊക്കെ വളരെ മോശം. പിന്നെ കാണാൻ വല്ല്യ കുഴപ്പമില്ല.. പക്ഷേ സംസാരിക്കാനൊന്നും അറിയില്ല. ഒരു അഹങ്കാരം.. അഹന്ത.. അങ്ങനെ എന്തൊക്കെയോ.. അത് കൊണ്ട് ഞാൻ നൈസായി ഒഴിവാക്കി വിട്ടതാ.." അത് പറഞ്ഞിട്ട് ഗിരീഷ് ഒന്ന് കണ്ണ് ചിമ്മി കാണിച്ചു. തെളിച്ചമില്ലാത്തൊരു ചിരിയോടെ വിനോദ് അവനെ നോക്കി. "എന്താടാ.. പുതിയ എന്തെങ്കിലും പ്രശ്നമുണ്ടോ..നിന്റെ കാര്യമൊക്കെ എന്റമ്മ പറഞ്ഞു.. നിന്റെ കല്യാണത്തിന് വരാൻ പറ്റിയില്ല എനിക്ക്. അന്നേക്ക് ലീവ് കിട്ടിയില്ലല്ലോ.വന്നിട്ടൊന്ന് വന്നു കാണാൻ തോന്നിയതാ.. പിന്നെ അമ്മ പറഞ്ഞു നീയിപ്പോ വല്ലാത്തൊരു അവസ്ഥ യിലാണെന്ന്.. അത് കൊണ്ട് വരാഞ്ഞതാ ഞാൻ..അത് കൊണ്ടാ നിന്നെ ഇങ്ങോട്ട് വിളിച്ചത്.." ഗിരീഷ് വിനോദിന്റെ കയ്യിൽ അമർത്തി പിടിച്ചു. വിനോദപ്പോഴും ചിരിക്കുക മാത്രം ചെയ്തു. "നിന്നെയൊക്കെ വിട്ടിട്ട് പോണമെങ്കിൽ അവളുടെയൊരു ഭാഗ്യദോഷം.ഞാനൊക്കെ ഒറ്റ കാലിൽ തപസ്സു ചെയ്താൽ പോലും നിന്നെ പോലെ ഒരാളാവാൻ പറ്റില്ല.. കുടിയില്ല വലിയില്ല.. മറ്റ് ബാഡ് ഹോബിസ് ഒന്നുമില്ല.. എന്നിട്ടും പിന്നെന്താ ടാ അവൾക്ക്..." ഗിരീഷ് ആത്മാർത്ഥമായ സങ്കടത്തോടെ വിനോദിനെ നോക്കി. "ഒന്ന് പോടാ.. മുന്നിൽ നിർത്തി മനുഷ്യനെ കളിയാക്കുന്നതിനും ഒരു പരിധി വേണടെ.." വിനോദ് അവന്റെ വയറ്റിനൊരു ഇടി കൊടുത്തു കൊണ്ട് കളിയോടെ ചോദിച്ചു. "ഒരു സത്യം പറഞ്ഞപ്പോ അവനതും വേണ്ടേ..സത്യത്തിനൊന്നും നാട്ടിലിപ്പോ ഒരു വിലയും ഇല്ലെടെ.. " "ഓ ആയിക്കോട്ടെ.. വരവ് വെച്ചിട്ടുണ്ട്.. പോരെ.."ഗിരീഷിന്റെ പരിഭവം കണ്ടതും വിനോദ് അവന്റെ തോളിലൊന്നു തട്ടി. "ആ വന്നവൾക്ക് തന്നെ നീയാ ജോലി കൊടുക്കുമോ ഗിരീഷേ.." ശേഷം വിനോദ് ചോദിക്കുമ്പോൾ ഗിരീഷ് അവനെ മിഴിച്ചു നോക്കി. "അവളെ നീ അറിയുമോ ഡാ.." "ചെറുതായി.." "എങ്ങനെ.. എവിടെ വെച്ച്.. എന്താ നിങ്ങളുടെ ബന്ധം.." ഗിരീഷ് തുടരെ തുടരെ ചോദിച്ചു. "ബന്ധം.. ചെറുതായി ഒരു കല്യാണം കഴിഞ്ഞു പോയിരുന്നു ഞാനും അവളുമായിട്ട്.." നേർത്തൊരു ചിരിയോടെ വിനോദ് പറയുമ്പോൾ ഗിരീഷ് ഞെട്ടി പോയി. "എടാ.. നീ എന്തൊക്കെയാ ഈ പറയുന്നേ.. അവൾ.. നിന്റെ.." "മ്മ്.. എന്റെയായിരുന്നു.. ഞാൻ സ്നേഹിച്ചു തുടങ്ങിരുന്നു..അവളെന്നേം.. അതിനി എന്റെ തോന്നലായിരുന്നോ.. അറിയില്ല.. പക്ഷേ ഒന്നറിയാം...ചില നോവുകൾക്ക് കാരണം സ്നേഹമാണ് ഗിരീഷേ.. സ്നേഹിച്ചു പോയി എന്നുള്ള ഒറ്റ കാരണമാണ് നീറേണ്ടി വരിക.. എന്നെ പോലെ.. വിനോദ് ഒന്ന് ശ്വാസമെടുത്തു.. "ഇഷ്ടങ്ങൾക്കൊരു പ്രതേകതയുണ്ട്. അത് ശീലമായി കഴിഞ്ഞാൽ പിന്നെ അതില്ലാതെ പിടിച്ചു നിൽക്കാൻ ഭയങ്കര ബുദ്ധിമുട്ടായിരിക്കും.. നമ്മളെത്ര ശ്രമിച്ചാലും അതിന് പറ്റിയെന്നു വരില്ല.. സന്തോഷം പോയി.. സമാധാനം പോയി.. നമ്മൾക്ക് നമ്മളെ പോലും നഷ്ടപ്പെട്ടു പോകും പോലായി തീരും.. ഇതിലൊക്കെ രസമെന്തെന്ന് വെച്ചാൽ തെറ്റ് ചെയ്തത് നമ്മളല്ലങ്കിലും ശിക്ഷ കിട്ടുന്നത് നമ്മുക്കും കൂടിയാവും.." പറഞ്ഞു കൊണ്ടിരിക്കെ തന്നെ വിനോദിന്റെ സ്വരമിടറി.. കണ്ണൊന്നു നനഞ്ഞു. അത് വരെയും ആരെയും തുറന്നു കാണിക്കാത്ത ഹൃദയം ആത്മാർത്ഥ സൗഹൃദത്തിന്റെ മുന്നിൽ തുറന്നു വെക്കുകയാണവൻ.. ഗിരീഷ് ഒന്നും പറയാതെ അവനെ നോക്കി കൊണ്ട് നിന്നു. വിനോദ് വിവാഹം കഴിക്കാൻ ഉദ്ദേശിച്ചത് മുതൽ ദുബായിൽ ബിസിനസ് ചെയ്യുന്ന അവൻ നാട്ടിലേക്ക് വരാൻ ശ്രമിക്കുകയാണ്. പക്ഷേ അവന്റെ അവിടെയുള്ള ഷോപ്പിൽ എന്തൊക്കെയോ പ്രശ്നം കാരണം കല്യാണത്തിന് മുന്നേ അവനു എത്തി പെടാൻ കഴിഞ്ഞില്ല. ഒരുവിധം പ്രശ്നങ്ങളെല്ലാം തീർത്തു വന്നപ്പോഴേക്കും കേൾക്കുന്ന വാർത്ത വിനോദിന്റെ ഭാര്യ അവനെ ഇട്ടിട്ട് പോയ വിശേഷവും. "അവളെയിനി വേണ്ടാന്നൊക്കെ ഒരിക്കൽ എന്റെ ഹൃദയമടക്കം എന്നോട് പറയുന്നതാ ഗിരീഷേ.. അമ്മയും അച്ഛനും ഏട്ടനുമൊക്കെ എന്റെ ഇഷ്ടം പോലെ ചെയ്തേക്കാൻ പറഞ്ഞു.. പക്ഷേ ഇന്നും അവളുടെ കാര്യത്തിൽ വ്യക്തമായൊരു തീരുമാനമെടുക്കാൻ എനിക്ക് പറ്റുന്നില്ല.. വേണ്ടായെന്ന്.. പറഞ്ഞു തന്ന് വിവേകം ഉപദേശിക്കുമ്പോൾ അവളെ വേണമെന്ന് ഹൃദയം വാശി പിടിക്കും പോലെ... എനിക്ക്.. എനിക്കിത് സഹിക്കാൻ വയ്യെന്റെ ഗിരീഷേ.." വിനോദ് മുഖം കുനിച്ചു. "എന്നാലുമെടാ.. നിന്നെയത്രയും നീചമായി ഉപേക്ഷിച്ചു പോയവൾ.. നിന്നോട് തെറ്റ് ചെയ്തവൾ.. ക്രിമിനൽ ബാക്ക്ഗ്രൗണ്ട് ഉള്ളവൾ.. നിന്നെ സമൂഹത്തിൽ നാണം കെടുത്തിയവൾ.. എന്നിട്ടും എങ്ങനാ വിനു നിനക്കവളെ...ഇനിയും ഇത്രയും സ്നേഹിക്കാൻ കഴിയുന്നത്.. ഇനിയും ഇങ്ങനൊക്കെ തന്നെ അവൾ ചെയ്യില്ലെന്ന് നിനക്കുറപ്പുണ്ടോ.." ചോദിക്കാതിരിക്കാൻ വയ്യെന്നത് പോലെ ഗിരീഷ് വിനോദിനു നേരെ നോക്കി.. "ഇപ്പഴല്ലേ ഡാ അവളെനിക്ക് ഇങ്ങനൊക്കെ ആയത്.. കുറച്ചു നാൾ അവളെന്റെ സന്തോഷമായിരുന്നു.. സ്വപ്നമായിരുന്നു.. ജീവിതവും ജീവനുമായിരുന്നു.. അതായിരിക്കാം ഞാനിന്ന് ഇത്രേം.. "കൈ പിടിയിൽ നിന്നും ഒരിക്കൽ വഴുതി പോയതിനെ വീണ്ടും ഹൃദയത്തിൽ അടക്കി പിടിക്കരുത് വിനു.. അത് നമ്മുടെ ഹൃദയഭാരം കൂട്ടും.. സ്വസ്ഥത കളയും..നമുക്കത് താങ്ങാൻ കഴിയില്ല.." ഗിരീഷ് മുന്നറിയിപ്പ് പോലെ പറഞ്ഞു. "എനിക്കറിയാം ഗിരീഷേ.. ജീവിതം എന്തെന്ന് അവൾക്കറിയില്ലായിരുന്നു. അവളുടെ അച്ഛന്റെ കാശിന്റെ ബലത്തിൽ എന്തൊക്കെയോ ചെയ്തു കൂട്ടിയവളാണ്. ഇപ്പഴാ അവളൊരു മനുഷ്യസ്ത്രീ ആയത് പോലും.. ഇപ്പൊഴീ ജോലിക്ക് തെണ്ടി നടക്കണമെങ്കിൽ എനിക്കും നിനക്കും ഊഹിക്കാവുന്നതിലും അപ്പുറം അവൾ സഹിച്ചു കാണും.. പഠിച്ചു കാണും.. കുറച്ചു കൂടി ജീവിതത്തിന്റെ പരീക്ഷണം കൊടുത്താൽ.. അതിൽ ജീവിതം പഠിച്ചാൽ അവൾ ഓകെയാവുമെടാ.. എനിക്കുറപ്പുണ്ട്.. അത്രയും മോശപ്പെട്ട ആളെന്നുമല്ല.. കുറച്ചൊക്കെ തെറ്റുണ്ട്.. അത് നല്ല ശിക്ഷണം കിട്ടാത്തതിന്റെ കുറവാണ്.. ഇപ്പൊ ജീവിതം തന്നെ അതൊക്കെ പഠിപ്പിച്ചു കൊടുത്ത സ്ഥിതിക്ക്.. ഇനി ഞാൻ.. ഞാനെന്ത് പറഞ്ഞിട്ട് മാറ്റി നിർത്തണം.. ഒന്നുമില്ലെങ്കിലും ഇപ്പൊ ഞാനീ അനുഭവിക്കുന്ന ഹൃദയഭാരം കുറക്കാണെങ്കിലും അവൾ കൂടെയുണ്ടെങ്കിൽ സാധിക്കുമെങ്കിൽ... അത്രയുമേ ഞാൻ ഓർത്തൊള്ളൂ.. എനിക്ക്.. എനിക്കിപ്പോഴും സ്നേഹമാണെടാ.. മറക്കാൻ കഴിയാത്ത സ്നേഹം. ചിലപ്പോൾ ആദ്യമായി സ്നേഹിച്ചതിന്റെ പ്രശ്നമാവും.. അല്ലേ..നിന്നെ പോലെ പഠിക്കുന്ന ടൈമിലെ പ്രേമിച്ചു തേച്ചു പഠിച്ചിരുന്നേൽ ചിലപ്പോൾ എനിക്കും... കണ്ണ് നിറച്ചു കൊണ്ടുള്ള ആ ചോദ്യം.. ഗിരീഷിന് പിന്നൊന്നും പറയാനില്ലായിരുന്നു.. കാരണം അത്രയും സ്നേഹിച്ചു പോയവർക്ക് വേണ്ടിയല്ലാതെ അവനങ്ങനെ കണ്ണ് നിറക്കില്ലെന്ന് അവനുറപ്പുണ്ടായിരുന്നു.. തുടരും.. ഇവരൊക്കെ സ്നേഹം കൊണ്ടിങ്ങനെ തോല്പിക്കാൻ ശ്രമിക്കുമ്പോൾ നമ്മൾ പ്രതേകിച്ചൊന്നും ചെയ്യേണ്ട.. വെറുതെ ആ കൂടെയങ്ങനെ. നിന്ന് കൊടുത്താൽ മതിയെന്നേ.. 🥰🥰 റിവ്യൂ ഇട്ടിട്ട് പോണേ.. പിന്നേയ്.. ലിപിയിൽ പുതിയൊരു സ്റ്റോറി ഇന്ന് മുതൽ ഞാൻ സ്റ്റാർട്ട്‌ ചെയ്തു തുടങ്ങിയിട്ടുണ്ട്.. ഫസ്റ്റ് പാർട്ടിന് കിട്ടുന്ന റിവ്യൂ ഒരു സ്റ്റോറിയെ മൊത്തത്തിൽ പോസിറ്റീവ് ആക്കും.. അവിടുള്ളവർ ഒന്ന് നോക്കിയേച്ചും പോണേ.. തുടക്കമൊന്ന് ഉഷാറാക്കി തരണം.സെറ്റല്ലേ കാശിയുടെ പെണ്ണ് എന്നാണ് സ്റ്റോറിയുടെ പേര്.. ഇവിടേം ഇടും.. പക്ഷേ ഇപ്പോഴല്ല... സ്നേഹത്തോടെ jif #📔 കഥ