#🗞அரசியல் தகவல்கள் #📽சினிமா தகவல்கள் #🎬 சினிமா #🧐நாட்டு நடப்பு ஜனவரி 24 வி.எஸ்.ராகவன் அவர்களின் 11வது ஆண்டு நினைவு நாள். பழம்பெரும் நடிகரும், மறைந்த 'இயக்குனர் சிகரம்' கே.பாலசந்தரின் நெருங்கிய நண்பருமான வி.எஸ்.ராகவன், கடந்த 2015 ஜனவரி 24ம் தேதி (வயது 90) காலமானார். எம்,ஜி.ஆர்., சிவாஜி கணேசன், ஜெமினி கணேசன், முத்துராமன் மற்றும் ரஜினிகாந்த், கமல்ஹாசன் மற்றும் இன்றைய இளைய தலைமுறை நடிகர்கள் சந்தானம், கார்த்தி, விஜய் சேதுபதி என மூன்று தலைமுறை நடிகர்களுடன் 1,500 படங்களுக்கு மேல் நடித்துள்ளவர் வி.எஸ்.ராகவன். தமிழ், இந்தி, ஆங்கிலம் உட்பட பல மொழிப் படங்களில் குணச்சித்திர வேடத்தில் நடித்துள்ளார். அவரது குரல் தனித்தன்மை கொண்டது. 1925ல் காஞ்சிபுரம் மாவட்டம் வெம்பாக்கம் கிராமத்தில் பிறந்த வி.எஸ்.ராகவன், தாம்பரம் கிறிஸ்தவக் கல்லூரியில் படித்தார். பிறகு அச்சகம் ஒன்றில் வேலை பார்த்தார். அங்கு அவரது நண்பர்களான மாலி, வாதிராஜ், நடராஜ், கே.பாலசந்தர் ஆகியோருடன் இணைந்து 'இந்தியன் நேஷனல் ஆர்டிஸ்ட்' என்ற அமைப்பை உருவாக்கி, நிறைய மேடை நாடகங்களில் நடித்தார். பிறகு 'மாலதி' என்ற இதழில் துணை ஆசிரியராகப் பணியாற்றினார். சினிமா ஆர்வம் காரணமாக, 1951ல் 'சந்திரிகா' என்ற படத்தின் மூலம் தன் திரையுலகப் பயணத்தை தொடங்கினார் வி.எஸ்.ராகவன். தமிழ்த் திரையுலகின் ஜாம்பவான்கள் எம்.ஜி.ஆர்., சிவாஜி, ரஜினி, கமல் மற்றும் தற்போதைய இளைய தலைமுறை நடிகர்கள் விஜய் சேதுபதி, அருள்நிதி என தமிழ்த் திரையுலக நடிகர்கள் அனைவருடனும் இணைந்து நடித்துள்ளார். 'சந்திரிகா', 'நெஞ்சில் ஒரு ஆலயம்', 'சாரங்கதாரா', 'பொம்மை', 'காதலிக்க நேரமில்லை', 'கர்ணன்', 'உரிமைக்குரல்', 'இரு கோடுகள்', 'ஆயிரம் ஜென்மங்கள்', 'கல்யாணராமன்', 'இதற்குத்தானே ஆசைப்பட்டாய் பாலகுமாரா', 'ஒரு கன்னியும் மூணு களவாணிகளும்' உள்பட 1,500 படங்களுக்கு மேல் குணச்சித்திரம், காமெடி, வில்லன் என வித்தியாசமான கேரக்டர்களை ஏற்று நடித்துள்ளார். வி.எஸ்.ராகவனுக்கு திருமணமாகி சீனிவாசன், கிருஷ்ணா என இரண்டு மகன்களும் மற்றும் பேரன், பேத்திகளும் உள்ளனர். சென்னை தியாகராய நகர் ராஜாமுத்தையா பள்ளி அருகில் குடும்பத்துடன் வசித்து வந்த வி.எஸ்.ராகவன், கடந்த சில நாட்களாக மஞ்சள் காமாலை காரணமாக தனியார் மருத்துவமனை ஒன்றில் சிகிச்சை பெற்று வந்தார். இந்நிலையில் சிகிச்சை பலனின்றி அவரது உயிர் பிரிந்தது.