कोंडाजीने कड्याला स्पर्श केला. जय शंभो! जय भवानी! कोंडाजी आणि इतर सारे तो कडा चढूं लागले. अगदी गुपचूप. अवाक्षरहि न बोलतां. चढताना ते जरूर तेव्हा एकमेकांना हाताचा आधार देत होते. सर्वजण सशस्त्र होते. एका मराठ्याजवळ मोठा थोरला कर्णा होता. कर्णा कशाला? कोंडाजीने असें ठरविलें होतें की, वर गडावर पोहोचल्यावर तो कर्णा खूप जोराने फुंकायचा व गडवाल्या शत्रूंमध्ये खळबळ उडवून द्यायची! त्यांना आव्हान द्यायचें! वाघांच्या गुहेंत शिरून बेसावध वाघांवर गोळ्या न झाडतां त्यांना हाका मारून लढायला बोलावण्यासारखें होतें हें! सर्वजण कडा चढून वर पोहोचले. सर्वत्र सामसूम होती. कोंडाजीने हुकूम देतां क्षणी त्या खणखणीत कर्ण्याची प्रचंड ललकार उठली. कर्णेवाला गडाच्या सर्व दिशेस कर्णा फिरवून फुंकीत होता. हा आवाज ऐकून पेंगणारे शाही हशम एकदम उठले. बाबूखान नांवाचा एक नाईक मोठमोठ्याने ओरडून विचारूं लागला, “अरे! वहाँ कौन सिंग फूंक रहा है?” कर्णा वाजतच होता. किल्लेदार खडबडून उठला. सारा गड उठला. एकच धावपळ उडाली. आरडाओरडा माजला. इतकी कडक गस्त ठेवूनहि शत्रू आला कसा हेंच कोणाला समजेना. शत्रूसैन्य अफाट आहे असेंहि त्यांना वाटलें असावें. कोंडाजीसह सारे हत्यारें उपसून धावले. गडावरचे सैन्य लढायला आलें. भयंकर गर्द लढाई जुंपली. शत्रू अनेक पटीने जास्त असूनहि कोंडाजीला आणि कोणालाच त्याची पर्वा वाटत नव्हती. साठ विरुद्ध शेकडो! खुद्द किल्लेदार आपल्या खाशा हशमांसह चालून आला. हा फार शूर होता. आल्या आल्या त्याने एक दोन मराठ्यांना ठार केलें. पण कोंडाजीने एकदम किल्लेदारावर तलवार उगारून चाल केली. तुंबळ कंदन माजले. कोंडाजीपुढे किल्लेदाराचा टिकाव लागेना. सपासप विजा जणू कडाडत होत्या आणि-उडालें! किल्लेदाराचे मुंडकें कोंडाजीच्या तलवारीने उडालें! गडावरच्या राजवाड्यापुढे तो ठार होऊन पडला. मराठ्यांच्या अंगीं आतापर्यंत वाघांची वीरश्री होती, ती एकदम सिंहांची झाली! ते कमालीच्या शौर्याने गडवाल्यांचीं खांडोळीं उडवीत होते. एक एक मराठा पन्नासांना भारी झाला होता. वाळलेल्या गवताच्या पेंढ्या वादळाने उडाव्यात, तशी शत्रूची गत झाली आणि आश्चर्य केवढें, केवढें, केवढें – पन्हाळा काबीज झाला! अहो अवघ्या साठ मराठ्यांनी गड गिळला! पूर्वीं सिद्दी जौहरला चाळीस हजार फौजेनिशी झगडूनहि जो गड मिळूं शकला नव्हता, तो हा पन्हाळा या चिमूटभर मराठ्यांनी जिंकला! (दि. ६ मार्च १६७३). अवघ्या दोन तीन तासांत जिंकला. गडाचा सबनीस नागोजी पंडित हा तर पळूनच गेला! गडाचा मेट पंतांनी आधीच मिळविल्यामुळे गड असा फत्ते झाला. #🙏शिवदिनविशेष📜 #📜इतिहास शिवरायांचा #😇आमचे प्रेरणास्थान: छत्रपती🙏 #🚩मी शिवबा भक्त #🚩शिवरायांचे भक्त