#తిరుమల లడ్డు #ఏపీ న్యూస్ ఏపీ పాలిటిక్స్ 🎯
*దేవుడంటే భయభక్తులెవరికి❓*
FEBRUARY 7, 2026🎯
కలికాలంలో అధర్మం నాలుగు పాదాలపై నడుస్తుందని పెద్దలు చెబుతుంటే, ఊత్తుత్తి కథలు చెప్పేవాళ్లు అనుకున్నాం. కానీ ఇప్పుడు ప్రత్యక్షంగా చూస్తున్నాం. స్వార్థ రాజకీయాలకని చెప్పడం చాలా తక్కువ చేసి చెప్పినట్టు అవుతుంది. అత్యంత నీచ, నికృష్ణ రాజకీయాల్ని ఆంధ్రప్రదేశ్లో చూస్తున్నాం.
చివరికి దేవున్ని కూడా అధికారం కోసం అడ్డగోలుగా వాడుకుంటున్న దుర్మార్గ కాలం. దీన్ని ఏమనాలో కూడా ఎవరికీ అంతుచిక్కడం లేదు. కలియుగ దైవం శ్రీ వేంకటేశ్వరస్వామిని ప్రపంచంలో ప్రతి హిందువు అత్యంత శక్తిమంతుడైన దైవంగా విశ్వసించి, పూజిస్తారు. స్వామిని దర్శించుకుని, తమ కష్టాలు చెప్పుకుంటే పరిష్కరిస్తారనే
విశ్వాసం. కలియుగం దైవం తమ మొర ఆలకించి, కష్టనష్టాల నుంచి బయటపడేశారని, మళ్లీ మొక్కులు తీర్చుకోవడం తెలిసిందే.
సర్వ మానవులకు రక్షకుడైన ఆ దేవదేవునికి కష్టాలు తీసుకొచ్చారంటే, కలికాలంలో పాపాత్ముల పడగ నీడలో బతకడం ఎంత భయంకరమో అర్థం చేసుకోవచ్చు. ప్రస్తుతం రాజకీయంగానే కాదు, దేవుడి పేరుతో రెండుగా పాలక ప్రతిపక్షాలు చీలిపోయాయి. నిత్యం తిరుమల శ్రీవారి ప్రసాదంగా రాజకీయ ప్రయోజనాల పొందేందుకు వికృత క్రీడకు పాల్పడుతుండడాన్ని సమాజం జాగ్రత్తగా గమనిస్తోంది.
దీనంతటికి ముఖ్యమంత్రి చంద్రబాబునాయుడు శ్రీకారం చుట్టారు. కలియుగ దైవం తమ ఇంటి దేవుడిగా చెబుతూనే, లడ్డూ ప్రసాదాన్ని పంది కొవ్వు, ఆవు కొవ్వుతో తయారు
చేశారని సంచలన ఆరోపణలు చేశారు. ఆయన తనయుడు లోకేశ్, డిప్యూటీ సీఎం పవన్ కూడా అవే ఆరోపణలకు చేపనూనె జత చేసి మరింత వేడి రగిల్చారు.
ఇదేమంటే ఎన్టీడీబీ రిపోర్ట్ ఆధారంగా ఈ వాస్తవాలు చెప్పామని దబాయింపు. అత్యున్నత స్థానాల్లో ఉన్న వ్యక్తులు ఎలాంటి ఆధారాలు లేకుండా పరమ పవిత్రమైన లడ్డూ ప్రసాదంపై ఏంటీ మాటలని సుప్రీంకోర్టు చీవాట్లు పెట్టింది.ఆ తర్వాత సీబీఐ ఏర్పాటు, ఇటీవల విచారణ పూర్తి చేసి నివేదిక సమర్పించడం.. అన్నీ జరిగిపోయాయి. సీబీఐ నేతృత్వంలోని సిట్ నివేదిక ఇచ్చిన తర్వాత లడ్డూ ప్రసాదం కేంద్రంగా, వివాదానికి ముగింపు పలుకుతారని అంతా భావించారు.
అయితే ఆ తర్వాత మరింత వికృతరూపందాల్చింది. తమ ఆరోపణలే నమ్మాలన్నట్టు సిట్ ఇచ్చిన నివేదికను పాలకులు పక్కన పెట్టారు. ఇప్పుడు కొత్తగా బాత్రూమ్లలో ఉపయోగించే రసాయనాలతో లడ్డూ ప్రసాదం తయారు చేశారని ఆరోపించే వరకూ వెళ్లడం హిందువుల మనోభావాల్ని తీవ్రంగా దెబ్బతీస్తోంది.
లడ్డూ ప్రసాదంలో పాలకులు ఆరోపించినట్టు జంతువుల కొవ్వులు, చేప నూనె, రసాయనాల కలయిక కంటే, పాలకుల ఆరోపణలే తీవ్ర దిగ్భ్రాంతిని కలిగిస్తున్నాయని శ్రీవారి భక్తులు వాపోతున్నారు. శ్రీవారి ప్రసాదంపై పాలకుల ఆరోపణలే తీవ్రంగా కలచివేస్తున్నాయనే కోణంలో దేశ వ్యాప్తంగా విస్తృత చర్చకు దారి తీసింది. అసలు అత్యున్నత స్థానంలో ఉన్నోళ్లు, నిజంగా శ్రీవారి ప్రతిష్టను కాపాడే మాటలేనా ఇవి? అంటూ ప్రతి ఒక్కరూ ప్రశ్నించే పరిస్థితి.
వైఎస్ జగన్ ను దైవ ద్రోహంగా చిత్రీకరించడానికి పాలకులు……… అంతిమంగా శ్రీవారిని బజారుకీడ్చడం అత్యంత దుర్మార్గం, క్షమించరాని నేరంగా ప్రజానీకం చెబుతోంది. శ్రీవారికి నిజమైన భక్తులెవరైనా స్వామి ప్రతిష్టను కాపాడేందుకు, ఎవరైనా నిరాధార ఆరోపణలు చేస్తే, చీల్చి చెండాడుతారు. అయితే కంటికి రెప్పలా కాపాడాల్సిన పాలకులే, కలియుగ దైవంపై అవాకులు చెవాకులు పేలుతుంటే, భక్తులు మౌనంగా రోదిస్తున్నారు.
మాజీ ముఖ్యమంత్రి వైఎస్ జగన్కు దేవుడంటే భయం, భక్తి లేవని డిప్యూటీ సీఎం పవన్కల్యాణ్ రెండు రోజుల క్రితం మీడియా సమావేశంలో సినిమా డైలాగ్ కొట్టారు. ఇదే పవన్ కల్యాణ్ పలు సందర్భాల్లో ఏమన్నారో, ఇప్పుడు సోషల్ మీడియాలో వీడియోలు వైరల్ అవుతున్నాయి. దేవుని ముందు వెలిగించిన దీపానికి తన తండ్రి సిగరెట్ వెలిగించే వాడని, ఆ తర్వాత మారిపోయాడని పవన్ చెప్పిన వీడియో సోషల్ మీడియాలో చక్కర్లు కొడుతోంది. పవన్ చీవాట్లు పెట్టడంతో వైఎస్ జగన్ను హిందూ ద్రోహిగా తిడుతూ నాగబాబు అత్యుత్సాహంతో వీడియో విడుదల చేశారు.
ఇదే నాగబాబు తాను నాస్తికుడిని అని, దైవం అంటే విశ్వాసం లేదని చెప్పిన వీడియో వెలుగులోకి వచ్చింది. ఒకవైపు తమకు దైవం అంటే నమ్మకం లేనోళ్లు, మరొకరి మత విశ్వాసాలను ప్రశ్నించడం, అవహేళన చేయడాన్ని నెటిజన్లు, రాజకీయ ప్రత్యర్థులు తీవ్రంగా తప్పు పడుతున్నారు.
ఇక వైఎస్ జగన్మోహన్రెడ్డి విషయానికి వెళ్లాం. ప్రతి
మీటింగ్లోనూ వైఎస్ జగన్ నోటి నుంచి పదేపదే వచ్చే మాట………పైన దేవుడున్నాడు, కింద మీరు (ప్రజలు) ఉన్నారని… దుర్మార్గంగా వ్యవహరించే ప్రత్యర్థుల కథేంటో చూసుకుంటారని చెబుతుంటారు. దేవుడు.. దేవుడు అని జగన్ నిత్యం నామస్మరణ చేస్తుంటారు. క్రిస్టియన్ మతంలో పుట్టడం జగన్ ఆప్షన్ కాదు. ఇదే విషయాన్ని ఆయన గతంలో చెప్పారు.
ఇతర మతాల విషయంలోనూ ఆయన అంతే భక్తిశ్రద్ధలతో వ్యవహరిస్తుంటారు. వైఎస్ జగన్ మతాన్ని అడ్డుపెట్టుకుని, హిందువుల ద్వేషిగా చిత్రీకరించే వారి చేష్టల్ని మెజార్టీ ప్రజలు అసహ్యించుకునే పరిస్థితి.
ముఖ్యంగా వైఎస్ జగన్ను మతం అడ్డుపెట్టుకుని నెగెటివ్ చేసేందుకు ప్రయత్నిస్తున్న వారి తీరును జాగ్రత్తగా గమనించాలి. తాము హిందువులం కావడంతో, ఆ మత విశ్వాసాలను పరిగణలోకి తీసుకోవాల్సిన అవసరం లేదని, ఏం చేసినా చెల్లుబాటు అవుతుందనే నిర్లక్ష్య, అహంకారాన్ని చూడొచ్చు. గతంలో హిందూమతానికి మచ్చ తెచ్చేలా, ఆ మతం వారే వ్యవహరిస్తున్నారనే పవన్కల్యాణ్ అభిప్రాయం ముమ్మాటికీ నిజం.
కాకపోతే, ఇప్పుడా జాబితాలో ఆరోపించిన వారినే అనుమానించే పరిస్థితి రావడం దురదృష్టకరం. ధర్మాన్ని రక్షిస్తే, ఆ ధర్మమే మనల్ని రక్షిస్తుందని వేదాలు చెప్పాయి. ధర్మాన్ని రక్షిస్తున్నామా? భక్షిస్తున్నామా? అని ఒక్కసారి రాజకీయాలకు అతీతంగా ఆలోచిస్తే, కలియుగ
దైవంపై అత్యంత దుర్మార్గమైన ఆరోపణలకు దిగనుగాక దిగరు. ఇప్పటికైనా స్వామివారికి చేసిన ద్రోహం చాలని, తప్పుల్ని సరిదిద్దుకుందామనే ఆలోచన పాపుల్లో వస్తే అందరికీ మంచిది.
