#🥀 മാപ്പിളപ്പാട്ടിന്റെ സുൽത്താൻ കോഴിക്കോട് അബൂബക്കർ അന്തരിച്ചു...കോഴിക്കോട്: പ്രശസ്ത മാപ്പിളപ്പാട്ട് കലാകാരനും സംഗീതസംവിധായകനും തബലിസ്റ്റുമായ കോഴിക്കോട് അബൂബക്കര്‍ (അവുക്ക80) അന്തരിച്ചു. അരീക്കാട് ഉള്ളിശ്ശേരി കുന്നിലെ വീട്ടില്‍ തിങ്കളാഴ്ച രാത്രി 12 മണിയോടെയാണ് അന്ത്യം. പക്ഷാഘാതം ബാധിച്ച് രണ്ടുമാസത്തോളം ചികില്‍സയിലായിരുന്നു. മൂവായിരത്തോളം പാട്ടുകള്‍ക്ക് ഈണമിട്ടിട്ടുണ്ട്. കിടപ്പിലാകുന്നതിനു രണ്ടുദിവസം മുന്‍പും വീടിന്റെ ഉമ്മറത്തിരുന്ന് പുതിയ പാട്ടിന് അബൂബക്കര്‍ ഈണമിട്ടിരുന്നു. അവസാനനാളുകളില്‍ കുടുബവും പ്രിയശിഷ്യരും മാത്രമായിരുന്നു കൂട്ട്. സിനിമാനടനായ മാമുക്കോയയും അബൂബക്കറും സഹപാഠികളായിരുന്നു. യേശുദാസ്, കെ എസ് ചിത്ര, എം ജി ശ്രീകുമാര്‍ തുടങ്ങി മലയാളത്തിലെ പ്രമുഖ ഗായകരെല്ലാം അബൂബക്കറുടെ സംഗീതത്തില്‍ പാടിയിട്ടുണ്ട്. മാപ്പിളപാട്ടു വേദികളില്‍ അദ്ദേഹത്തിന്റെ ഗാനമില്ലാതെ വരുന്നത് അപൂര്‍വമായിരുന്നു. ദേവരാജന്‍ മാസ്റ്ററുടെയും ബോംബെ രവിയുടെയും പ്രിയപ്പെട്ട തബലിസ്റ്റുമായിരുന്നു. ഭാര്യ: കെ വി സുബൈദ. മക്കള്‍: ഗുലാം അലി, പരേതനായ ഫയാസ്, റോഷ്നി, ഫെമിന, സജിന. മരുമക്കള്‍: സലാം, അസീസ്, അസീസ് കാഞ്ഞങ്ങാട്, സൗദാബി, അഫ്സീന. കബറടക്കം ഇന്ന് ഉച്ചയ്ക്ക് 12ന് ശേഷം മാന്തോട്ടം കബര്‍സ്ഥാനില്‍.