#✌️నేటి నా స్టేటస్ కొన్ని సందర్భాలలో పోలీసులకు ఓ అరుదైన అవకాశం వస్తుంది. నేరాలు చేసినప్పుడు లేదా హత్యలు జరిగినప్పుడు హంతకులను దొంగలను అరెస్ట్ చేయడం వాళ్ల వృత్తిలో భాగం కానీ వృత్తిలో ఆత్మసంతృప్తి సాధించాలి అంటే దానికి మించిన మంచి కార్యం చేయాలి. దానికి మంచి హృదయం ఉండాలి. నేరస్తుడు ఈరోజు కాకపోయినా రేపైనా అరెస్ట్ అవుతాడు. చట్టం నుంచి ఎవడు తప్పించుకోలేడు. కానీ ఓ పోలీస్ అధికారి ఆలోచన, విచక్షణ, పరిశీలన ఓ కుటుంబానికి న్యాయం చేసింది. ఇక జీవితంలో కుటుంబంతో కలవలేని ఓ తండ్రిని కుటుంబంతో కలిపింది. ఇది చాలా గొప్ప విషయం. ఓ పోలీసు అధికారి వినోద్ తన డ్యూటీ నిమిత్తం ఉత్తరాఖండ్ లోని అల్మోరా జిల్లాలో ఓ సెంటర్లో ఆపి ట్రాఫిక్ పరిశీలిస్తున్నాడు. అదే సమయంలో ఓ పెద్దాయన పక్కన కాలువ గట్టు మీద కూర్చుని పారేసిన ఆహారం తింటున్నాడు. ఎందుకనో పోలీస్ అధికారికి అతడితో మాట్లాడాలనిపించింది. కానిస్టేబుల్ పంపించి పిలిపించాడు. దాదాపు అరగంటసేపు అతడితో పిచ్చపాటి మాట్లాడాడు . తాను పోలీసు అన్న భయం ఆ మతిస్థిమితం లేని వ్యక్తికి పోగొట్టాడు. ఆ తర్వాత అతని వివరాలు అడగడం మొదలు పెట్టాడు. తనకు ఏమీ తెలియదని తనకేమీ గుర్తులేదు అని చెప్పాడు. పేరు కూడా చెప్పలేక పోయాడు. ఒక పుస్తకం తెప్పించి పెన్ ఇచ్చి కాగితం మీద తన ఇష్టం వచ్చింది రాయమన్నాడు. అలా ఆ మతిస్థిమితం లేని వ్యక్తి రాసిన దానిని చూస్తూ ఒక్క పదం దగ్గర ఎస్సై ఆగిపోయాడు. ఆ పదం ఉత్తర ప్రదేశ్ లో ఒక చిన్న పట్టణం పేరు . అదేమిటి అని అడిగాడు. తనకు తెలియదని తెలిసింది రాశానని చెప్పాడు . దీంతో వెంటనే ఆ పట్టణంలోని ఎస్ఐకి ఫోన్ చేసి వివరాలు చెప్పి ఇతడి ఫోటో కూడా పంపించాడు. ఎస్ఐ నాలుగు రోజుల తర్వాత ఆ గ్రామంలో కొంతమందిని ఎస్ఐ వినోద్ దగ్గరికి పంపించాడు. వాళ్ళు వృద్ధుడిని చూసి గుర్తుపట్టి ఆనందంతో ఎస్సై కాళ్ళ మీద పడి ఏడ్చేశారు. అతను తమ తండ్రి అని పదేళ్ల క్రితం మతిస్థిమితం లేక తప్పిపోయాడని ఐదేళ్లపాటు అంతా వెతికినా ప్రయోజనం లేదని చెబుతూ కన్నీటి పర్యంతమయ్యారు . తండ్రిని తమతో తీసుకెళ్లారు. చూశారా..? ఒక పోలీసు అధికారి ఆలోచన, వివేచన, విచక్షణ, పరిశీలన ఒక జీవితాన్ని కలిపింది . బహుశా భగవంతుడు కూడా చేయలేని పని లేదా భగవంతుడు ఆ ఎస్సై ద్వారా చేయించే పని . అది ఆత్మ సంతృప్తి అంటే...