ସୁନା କିଣିବା ଏବେ ସାଧାରଣ ଗ୍ରାହକଙ୍କ ପାଇଁ ସାତସପନ ପାଲଟିଛି । ଗତ କିଛି ଦିନ ହେବ ସୁନା ଦର ହୁ ହୁ ହୋଇ ବଢ଼ିବାରେ ଲାଗିଛି । ବିଶେଷ କରି ଗତ ୪ ଦିନ ମଧ୍ୟରେ ସୁନା ମୂଲ୍ୟରେ ଯେଉଁ ବୃଦ୍ଧି ଘଟିଛି, ତାହା ସମସ୍ତଙ୍କୁ ଚକିତ କରିଦେଇଛି । ମାତ୍ର ୪ ଦିନରେ ୨୪ କ୍ୟାରେଟ୍ ସୁନା ୧୦ ଗ୍ରାମ୍ ପିଛା ୮ ହଜାର ୩୫୦ ଟଙ୍କା ମହଙ୍ଗା ହୋଇଛି । ବଜାର ରିପୋର୍ଟ ଅନୁଯାୟୀ, ଏବେ ୨୪ କ୍ୟାରେଟ୍ ସୁନା ୧୦ ଗ୍ରାମ୍ ପିଛା ମୂଲ୍ୟ ୧ ଲକ୍ଷ ୫୨ ହଜାର ୩୫୦ ଟଙ୍କାରେ ପହଞ୍ଚିଛି । ସେହିଭଳି ଅଳଙ୍କାର ତିଆରି ପାଇଁ ବ୍ୟବହୃତ ହେଉଥିବା ୨୨ କ୍ୟାରେଟ୍ ସୁନା ଦର ମଧ୍ୟ ୭,୬୫୦ ଟଙ୍କା ବୃଦ୍ଧି ପାଇ ୧ ଲକ୍ଷ ୩୯ ହଜାର ୬୫୦ ଟଙ୍କା ହୋଇଛି ।ଚଳିତ ସପ୍ତାହରେ ଅନ୍ତର୍ଜାତୀୟ ବଜାରରେ ସୁନା ଦରରେ ପ୍ରାୟ ୭ ପ୍ରତିଶତ ବୃଦ୍ଧି ପରିଲକ୍ଷିତ ହୋଇଛି । ବିଗତ ୮ ମାସ ମଧ୍ୟରେ କୌଣସି ଗୋଟିଏ ସପ୍ତାହରେ ସୁନା ଦର ଏତେ ପରିମାଣରେ ବଢ଼ି ନଥିଲା । ଶୁକ୍ରବାର ସ୍ପଟ୍ ଗୋଲ୍ଡ ମୂଲ୍ୟ ୨.୩ ପ୍ରତିଶତ ବୃଦ୍ଧି ପାଇ ଆଉନ୍ସ ପିଛା ୪,୩୩୬.୦୨ ଡଲାରରେ ରହିଛି । ସୂଚନାଯୋଗ୍ୟ ଯେ, ଗତ ଜାନୁଆରି ମାସରେ ସୁନା ଦର ଆଉନ୍ସ ପିଛା ସର୍ବକାଳୀନ ରେକର୍ଡ ୫,୫୦୦ ଡଲାର ଛୁଇଁଥିଲା ।ସୁନା ଦର ବଢୁଥିବା ବେଳେ ରୁପା ଦରରେ ଆଜି ସାମାନ୍ୟ ଆଶ୍ୱସ୍ତି ମିଳିଛି । ରୁପା କିଲୋଗ୍ରାମ ପିଛା ୧୦୦ ଟଙ୍କା ହ୍ରାସ ଘଟି ୨,୪୯,୯୦୦ ଟଙ୍କାରେ ରହିଛି । ତେବେ ପୂର୍ବ ଦୁଇ ଦିନରେ ରୁପା ଦରରେ ବଡ଼ ଧରଣର ବୃଦ୍ଧି ଘଟିଥିଲା । ଗତ ୫ ତାରିଖରେ ୫,୦୦୦ ଟଙ୍କା ଓ ୬ ତାରିଖରେ ୧୦,୦୦୦ ଟଙ୍କା ବଢ଼ିଥିଲା ରୁପା ମୂଲ୍ୟ । ଅନ୍ତର୍ଜାତୀୟ ବଜାରରେ ଅସ୍ଥିରତା ଓ ନିବେଶକଙ୍କ ଆଗ୍ରହ ଯୋଗୁଁ ସୁନା ଦର ଆଗକୁ ଆହୁରି ବଢ଼ିପାରେ ବୋଲି ବଜାର ବିଶେଷଜ୍ଞମାନେ ଅନୁମାନ କରୁଛନ୍ତି । ବିବାହ ଋତୁ ପୂର୍ବରୁ ସୁନା ଦରର ଏଭଳି ଉଲ୍ଲମ୍ଫନ ସାଧାରଣ ଖାଉଟିଙ୍କ ଚିନ୍ତା ବଢ଼ାଇ ଦେଇଛି । #🔴ଡରାଉଛି ସୁନା...ଗ୍ରାହକ ଛାନିଆ😨