#😰 കൂട്ടുകാരുടെയും ടീച്ചർമാരുടെയും മോർഫ് ചെയ്ത ചിത്രങ്ങൾ ടെലഗ്രാമിൽ, വിദ്യാർഥി അറസ്റ്റിൽ പൊലീസ് അനുമതിയോടെ ശ്രീഹരിയുടെ ഫോണ്‍ പരിശോധിച്ച വിദ്യാർത്ഥികളാണ് ഞെട്ടിക്കുന്ന കാര്യങ്ങള്‍ കണ്ടത്. നഗ്ന ചിത്രങ്ങള്‍ ടെലഗ്രാം ഗ്രൂപ്പുകള്‍ വഴി വിറ്റതിനുള്ള തെളിവുകള്‍ ലഭിച്ചു. അധ്യാപകരുടെയും വിദ്യാർത്ഥികളുടെയും ചിത്രങ്ങള്‍ പ്രചരിപ്പിക്കാൻ പ്രത്യേക ഗ്രൂപ്പുകള്‍ ഉണ്ടാക്കിയിട്ടുണ്ടായിരുന്നു. ഫോണ്‍ പരിശോധിച്ച പെണ്‍കുട്ടികള്‍ അടക്കമുള്ളവരുടെ ചിത്രങ്ങളും പലതവണ ദുരുപയോഗം ചെയ്തിട്ടുണ്ട് എന്നും കണ്ടെത്താൻ സാധിച്ചിട്ടുണ്ട്. ശ്രീഹരി പകർത്തുന്ന ചിത്രങ്ങള്‍ ടെലഗ്രാമില്‍ അയച്ചുകൊടുക്കുമ്പോള്‍ തിരികെ മോർഫ് ചെയ്ത നഗ്നചിത്രങ്ങള്‍ ലഭിക്കുന്നതായിരുന്നു പിന്തുടർന്ന രീതി. ഇത് ചാറ്റ്ബോട്ട് സേവനമാണോ മറ്റാരെങ്കിലും സേവനം നല്‍കുന്നതാണോ എന്ന് വ്യക്തമാകേണ്ടതുണ്ട്. ക്യാമറ നന്നായി കൈകാര്യം ചെയ്യുന്നതിനാല്‍ കോളജില്‍ നടക്കുന്ന പരിപാടികളില്‍ മിക്കതിലും ശ്രീഹരിയായിരുന്നു ഫോട്ടോ എടുത്തിരുന്നത്. ഇയാളുടെ ഫോണില്‍ ഗേള്‍സ് ഹോസ്റ്റലിന്റെ ചിത്രം തിരിച്ചറിഞ്ഞു. അതിനാല്‍ ഹോസ്റ്റലില്‍ നിന്നും ചിത്രം പകർത്തിയതായി സംശയിക്കുന്നു. അധ്യാപകർ പഠിപ്പിക്കുന്ന സമയത്തെ ചിത്രങ്ങളാണ് പകർത്തിയിരിക്കുന്നത്. കോളജിലെ എത്ര പേർ ഈ റാക്കറ്റില്‍ ഉള്‍പ്പെട്ടിട്ടുണ്ട് എന്ന് പരിശോധിച്ചുവരികയാണ്. പുറത്തുനിന്ന് ആരൊക്കെ ഉള്‍പ്പെട്ടിട്ടുണ്ട് എന്നും പരിശോധിക്കുന്നു.