മൂവന്തി 16 " നീയെന്താ കാണണമെന്ന് പറഞ്ഞത്....?? " എന്തോ പ്രധാനപ്പെട്ട കാര്യം പറയാനുണ്ടെന്ന് പറഞ്ഞ് വിളിച്ചുവരുത്തിയിട്ട് ഒന്നും മിണ്ടാതെ ഇളകി മറിയുന്ന കടലിലേക്ക് തന്നെ നോക്കി നിൽക്കുകയായിരുന്ന നന്ദനെ കണ്ട് അവന്റെ സുഹൃത്തും സഹപ്രവർത്തകനും കൂടിയായിരുന്ന ഡേവിഡ് ചോദിച്ചു. " എനിക്ക് തത്കാലം ഇവിടുന്നൊന്ന് മാറണം ഡേവി..... " ചീറിയടിച്ച കടൽ കാറ്റിൽ പാറിക്കളിച്ചുകൊണ്ടിരുന്ന മുടിയിഴകളെ പിന്നിലേക്ക് മാടിയൊതുക്കിക്കൊണ്ട് നന്ദൻ പറഞ്ഞു. " നിനക്കിതെന്തുപറ്റി.....??? ആദ്യം പറഞ്ഞു ട്രാൻസ്ഫർ വേണമെന്ന്. ഇപ്പൊ അത് നടക്കാതെ വന്നപ്പോ മാറി നിൽക്കണമെന്ന് പറയുന്നു. ഇതിനും മാത്രം നിനക്കെന്താ നന്ദാ പ്രശ്നം.... നീയെന്താ ഒളിക്കുന്നത് കാര്യമറിഞ്ഞാലല്ലേ എനിക്ക് നിന്നെ സഹായിക്കാൻ എന്തെങ്കിലും ചെയ്യാൻ കഴിയുമോന്ന് പറയാൻ പറ്റൂ.... " ഡേവിഡ് നന്ദന്റെ മുഖത്തേക്ക് സൂക്ഷിച്ചുനോക്കി നിന്നുകൊണ്ട് ചോദിച്ചു. നന്ദനും അപ്പോൾ തന്നെ മനസിലാക്കാൻ കഴിയുന്ന ആരോടെങ്കിലുമൊന്ന് മനസുതുറക്കാൻ വെമ്പൽ പൂണ്ടു നിൽക്കുക തന്നെയായിരുന്നു. അതുകൊണ്ട് തന്നെ ഡേവിഡിനോട് എല്ലാമൊന്ന് തുറന്നുപറയാൻ അവനും തീരുമാനിച്ചു. " നമുക്കല്പം മാറിയിരിക്കാം ഡേവി.... എനിക്ക് കുറച്ച് സമാധാനമായിട്ട് സംസാരിക്കണം. എല്ലാം.... എല്ലാമെനിക്കൊന്ന് തുറന്നുപറയണം. " നന്ദൻ പറഞ്ഞതും ഡേവിഡ് അവനൊപ്പം നടന്നു. അവർ തിരക്കുകളിലും ബഹളങ്ങളിലും നിന്നും കുറച്ചുമാറിയൊരു സിമന്റ് ബെഞ്ചിലേക്ക് ചെന്നിരുന്നു. " ഇനി പറ ..... എന്താ നിന്റെ പ്രശ്നം....??? " " എടാ എന്റെ പിടി മൊത്തത്തിൽ വിട്ടുനിൽക്കുവാ..... സത്യം പറഞ്ഞാൽ ഞാൻ ആത്മഹത്യ ചെയ്യണോ ജീവിക്കണോ എന്നറിയാത്തൊരു അവസ്ഥയിലൂടെ കടന്നുപൊക്കൊണ്ടിരിക്കുവാ ഇപ്പൊ. " " നീയെന്തൊക്കെയാ നന്ദാ ഈ പറയുന്നത്....??? ഇപ്പൊ ആത്മഹത്യയേ കുറിച്ചൊക്കെ ചിന്തിക്കാനും മാത്രം നിന്റെ പ്രശ്നമെന്താ....?? ഇന്ദ്രയുമായി എന്തെങ്കിലും... ??? " ഡേവിഡ് ചോദ്യം മുഴുവനാക്കാതെ അവനെ നോക്കി. " എന്തെങ്കിലുമല്ല ഡേവി....ഇന്ദ്ര പോയി എന്റെ ജീവിതത്തിന്ന് എന്നത്തേക്കുമായി. ഡിവോഴ്‌സ് കേസിന്റെ ആദ്യ ഹിയറിങ്ങ് കഴിഞ്ഞു. " " ഡിവോഴ്‌സൊ.... എന്താ കാര്യം...??? " ഡേവിഡ് അമ്പരപ്പോടെ ചോദിച്ചു. " അത്.... അത്..... നിനക്കറിയാല്ലോ നേത്രയുടെ കാര്യം. അവൾ.... അവള് പ്രെഗ്നന്റ് ആയി . അത് ഇന്ദ്രയറിയുകയും ചെയ്തു. " " ആഹ് പഷ്ട്.... അന്നേ നിന്നോട് ഞാൻ പറഞ്ഞതാ. ആ ബന്ധം വേണ്ടെന്ന്. അതാ പെൺകുട്ടിക്ക് മാത്രമല്ല നിന്റെ കുടുംബജീവിതത്തിനും ദോഷമാണെന്നും പറഞ്ഞതാ. പക്ഷേ നീ കേട്ടില്ല. നീ വീണ്ടും അതെല്ലാം തുടർന്നു. ഇപ്പൊ കാര്യങ്ങളൊക്കെ ഇവിടെ വരെയെത്തിയപ്പോ നിനക്ക് സമാധാനമായല്ലോ...." ഡേവിഡ് കുറ്റപെടുത്തും പോലെ പറഞ്ഞപ്പോ നന്ദന് വല്ലാത്ത ആത്മനിന്ദ തോന്നി. പക്ഷേ പറഞ്ഞിട്ട് കാര്യമില്ലല്ലോ എന്നോർത്ത് അവൻ മിണ്ടാതിരുന്നു. " പറ്റിപ്പോയി ഡേവി... ഇനി നീയും കൂടി അതും പറഞ്ഞെന്നെ കുറ്റപ്പെടുത്തരുത്. " " പറ്റിയതല്ലല്ലോ നീ പറ്റിച്ചതല്ലേ.... ആഹ് ഇനിയിപ്പോ പറഞ്ഞിട്ടെന്താ. കടിച്ചതും പിടിച്ചതും പോയപ്പോ നിനക്ക് സമാധാനമായല്ലോ. " " ഒന്ന് നിർത്ത് ഡേവി.... ഇപ്പൊ കടിച്ചതും പിടിച്ചതുമൊന്നുമല്ല എന്റെ പ്രശ്നം. ഞാൻ വേറൊരു കുരുക്കിൽ പെട്ട് കിടക്കുവാ അതാ ഇവിടുന്ന് പോണമെന്ന് ഞാൻ പറഞ്ഞത്. " " അതിനിയെന്താണാവോ...??? " " എന്നെ പെടുത്തിയത് വേറാരുമല്ല എന്റെ സ്വന്തം അമ്മയും അനിയനും കൂടിയാ. അവനിപ്പോ എന്റെ കുഞ്ഞിനേം വയറ്റിൽ ഇട്ടോണ്ട് നടക്കുന്ന നേത്രയേ കെട്ടാൻ പോകുവാ. അതും അമ്മയുടെ ഫുൾ സപ്പോർട്ടും അവനുണ്ട്. അടുത്ത ഞായറാഴ്ചയാ അവരുടെ കല്യാണം. അതിനുമുൻപ് എനിക്ക് ഇവിടുന്ന് പോണം. " " ഏഹ് നീയിതെന്തൊക്കെയാ പറയുന്നത്. അതിന് നേത്ര സമ്മതിച്ചോ....??? " ഡേവി അത്ഭുതത്തോടെ ചോദിച്ചു. " പിന്നവള് സമ്മതിക്കാതെ കല്യാണത്തിന് മുഹൂർത്തം വരെ കുറിക്കുവോ. അവളെ പെണ്ണ് കാണാൻ അവിടെ ചെല്ലുന്നത് വരെ ഞാൻ കരുതിയത് ഇന്ദ്രയും പോയി ഇവളുടെ വയറ്റിൽ എന്റെ കുഞ്ഞ് വളരുന്നുമുണ്ട്. അതുകൊണ്ട് അവളെ എന്നെ കൊണ്ട് കെട്ടിക്കാൻ ആയിരിക്കുമെന്നാ. അങ്ങനെയെങ്കിലും എല്ലാത്തിനും ഒരു പരിഹാരമാകുമെന്ന് ഞാൻ വിചാരിച്ചു. പക്ഷേ..... " നന്ദൻ അമർഷത്തോടെ പറഞ്ഞത് കേട്ട് ദേവിഡ് അന്തംവിട്ടിരിക്കുകയായിരുന്നു. കഥയിൽ അങ്ങനെയൊരു ട്വിസ്റ്റ്‌ അവനൊരിക്കലും പ്രതീക്ഷിച്ചതേയില്ലായിരുന്നു. അതിന്റെ അമ്പരപ്പ് അവന്റെ മുഖത്ത് പ്രകടവുമായിരുന്നു. " അതൊക്കെ പോട്ടെ ഇതിന് നീയെന്തെങ്കിലുമൊരു പരിഹാരം പറ.... ഒരു ജോലി കിട്ടുമെങ്കിൽ ഈ ജോലി കളഞ്ഞിട്ട് പോകാമെന്നാ എന്റെ തീരുമാനം. " അവൻ പറഞ്ഞത് കേട്ട് ഡേവിഡ് കുറച്ചുസമയം ആലോചനയിലാണ്ടിരുന്നു. പിന്നെ പറഞ്ഞു തുടങ്ങി. " നന്ദാ ഞാൻ ആലോചിച്ചിട്ട് നീ ഒളിച്ചോടുവല്ല വേണ്ടത്. " " പിന്നെ ഞാനവൾക്കും അവനും ഇടയിൽ ആ വീട്ടിൽ തന്നെ താമസിക്കണോ.....??? " " വേണം.. നിന്റെ കുഞ്ഞിനെ വയറ്റിൽ ഇട്ടുകൊണ്ട് നിന്റെ അനിയന്റെ ഭാര്യയായി നിന്റെ വീട്ടിലേക്ക് വരാനുള്ള തന്റേടം അവൾക്കുണ്ടെങ്കിൽ അവളെ തളർത്താൻ നീയവിടെ തന്നെ ഉണ്ടായിരിക്കണം. " " നീയിതെന്തുവാ ഉദ്ദേശിക്കുന്നത്....??? " " എടാ ഈ പെണ്ണുങ്ങളുടെ സൈക്കോളജി നിനക്കറിയില്ല. അവളുമാർ എത്ര വെറുപ്പ് പുറമെ കാണിച്ചാലും ആദ്യമായി തന്നെ തൊട്ട പുരുഷനെ അവർക്കൊരിക്കലും പൂർണമായി വെറുക്കാനോ മറക്കാനോ സാധിക്കില്ല. ഇവിടെ നിന്റെ കേസിൽ അവളെ ആദ്യം തൊട്ടവൻ മാത്രമല്ല നീ ... അവളുടെ കുഞ്ഞിന്റെ അച്ഛൻ കൂടിയാണ്. അതൊരു ചെറിയ ബന്ധമല്ല. അതുകൊണ്ട് തന്നെ അവളുടെ ഉള്ളിന്റെ ഉള്ളിൽ നീയുണ്ടാകും എന്നുറപ്പാണ്. " " അതുകൊണ്ട്....??? " നന്ദൻ മനസിലാവാതെ ചോദിച്ചു. " അതുകൊണ്ട് രണ്ടുണ്ട. എടാ പൊട്ടാ.... താലി കെട്ടിയ ഭർത്താവിന്റെയും പഴയ കാമുകൻ കം കൊച്ചിന്റെ അച്ഛനായവന്റെയും കൂടെ ഒരേ സമയം ഒരു വീട്ടിൽ താമസിക്കേണ്ടി വരുന്ന ഒരു പെണ്ണിന്റെ മാനസികാവസ്ഥ നിനക്ക് ഊഹിക്കാനെങ്കിലും കഴിയുമോ....??? എങ്കിൽ ആ അവസ്ഥയിൽ നേത്രയേ കൊണ്ട് നിർത്തണം നീ. അങ്ങനെ സംഭവിക്കണമെങ്കിൽ നീ എങ്ങോട്ടുമോടി പോകുവല്ല വേണ്ടത്. അവിടെ ആ വീട്ടിൽ അവരുടെ കണ്മുന്നിൽ തന്നെ നിൽക്കണം. അത് അവൾക്ക് മാത്രമല്ല നിന്റെ അനിയനും ഒരു തിരിച്ചടി തന്നെയായിരിക്കും. താലി കെട്ടിയവൾ വീണ്ടും പഴയ കാമുകന്റെ അരികിലേക്ക് പോകുമോ എന്ന് ഭയന്ന് ഭയന്ന് അവനും ജീവിക്കണം. ഇതൊക്കെ നടക്കണമെങ്കിൽ നീയവിടെ തന്നെ ജീവിക്കണം. " ഡേവിഡ് പറഞ്ഞവസാനിപ്പിക്കുമ്പോൾ നന്ദൻ അവൻ പറഞ്ഞതിനെ കുറിച്ചുതന്നെ ആലോചിച്ചുകൊണ്ടിരിക്കുയായിരുന്നു. ഒടുവിൽ അവൻ പറഞ്ഞത് തന്നെയാണ് ശെരിയെന്ന തീരുമാനത്തിലേക്ക് എത്തിയിട്ടായിരുന്നു അവരവിടെ നിന്ന് പിരിഞ്ഞത്. ******************* ഞായറാഴ്ച രാവിലെ. ക്ഷേത്രത്തിൽ വച്ച് ഇരുകുടുംബങ്ങൾ മാത്രം പങ്കെടുക്കുന്ന ഒരു ചടങ്ങ് മാത്രമായിട്ടായിരുന്നു നീരജിന്റെയും നേത്രയുടെയും വിവാഹം. അതുകൊണ്ട് തന്നെ വധൂവരന്മാരെ കൂടാതെ ചടങ്ങിന് സാക്ഷിയായി അവിടെയുണ്ടായിരുന്നത് ഇരുവരുടെയും അമ്മമാരായ ഭാരതിയമ്മയും സുനന്തയും മാത്രമായിരുന്നു. സെറ്റ് സാരിയുടുത്ത് അല്പം മുല്ലപ്പൂവ് ചൂടിയത് മാത്രമായിരുന്നു നേത്രയ്ക്ക് ഒരുക്കമെന്ന് പറയാനുണ്ടായിരുന്നത്. നീരജും സാധാരണ മുണ്ടും ഷർട്ടും ആയിരുന്നു വേഷം. ക്ഷേത്രത്തിൽ തൊഴുതുവരുമ്പോഴേക്കും മുഹൂർത്തമായിരുന്നു. പിന്നീട് ഒട്ടും വൈകാതെ തിരുമേനി പൂജിച്ചുനൽകിയ താലി നീരജിന്റെ കയ്യാൽ നേത്രയുടെ മാറിൽ ചാർത്തപ്പെട്ടു. ശേഷം അവളുടെ സീമന്തരേഖയിൽ കുങ്കുമം ചാർത്തി പരസ്പരം തുളസി മാലയുമണിയിച്ചു. വിവാഹശേഷം നീരജിന്റെ കൈ പിടിച്ച് ശ്രീകോവിലിനു മുന്നിൽ തൊഴുതു നിൽക്കുമ്പോൾ നേത്രയുടെ കണ്ണുകൾ ധാര ധാരയായൊഴുകി. അവൾ ഇടംകൈകൊണ്ട് തന്റെ വീർത്തുതുടങ്ങിയ വയറിൽ പതിയെ തലോടി. തുടരും.... #📔 കഥ #📙 നോവൽ