#మహిళలకు ఉచిత ప్రయాణం! #ఏపీ అప్ డేట్స్..📖 *‘సూపర్ హిట్' అని ప్రకటించే నైతిక హక్కు ఉందా❓* AUGUST 16, 2025🚌 ఒక హామీని ప్రకటించి, రాష్ట్రంలోని మహిళలను ఏకంగా రెండు సంవత్సరాలకు పైగా సుదీర్ఘంగా వూరించిన తర్వాత ఎట్టకేలకు కార్యరూపంలోకి తీసుకువచ్చారు. చంద్రబాబు నాయుడు. ప్రపంచ చరిత్రలో ఎక్కడా కనీవినీ ఎరుగని అద్భుతాన్ని తానే ఆవిష్కరించినంత స్థాయిలో సొంత డబ్బా కొట్టుకుంటున్నారు. ఇవాళ ఆంధ్రప్రదేశ్ ప్రభుత్వం మహిళలకు ఉచిత బస్సు ప్రయాణం అవకాశాన్ని ప్రారంభించింది. దానికి స్త్రీ శక్తి అని పేరు కూడా పెట్టారు. మహిళలకు ఒక జిల్లా వరకు మాత్రమే ఉచిత ప్రయాణం అమలు చేస్తామని తెలుగుదేశం పార్టీ 2023 నాటి మహానాడులోనూ, తర్వాత ఎన్నికల మేనిఫెస్టో లోను ప్రకటించింది. కానీ ఆచరణలోకి వచ్చేసరికి రాష్ట్రమంతా ఉచిత ప్రయాణం వర్తించేలా విధివిధానాలు రూపొందించారు. అందుకు అభినందించాల్సిందే. అయితే ఈ ఉచిత బస్సు ప్రయాణం చుట్టూతా అనేక అనేక మాయలను ప్రచారం చేస్తున్నారు. తద్వారా ప్రజలు ఈ ప్రభుత్వం నుంచి ఇంకా ఏవేవైతే కోరుకుంటున్నారో, వాటి నుంచి దృష్టి మళ్లించగలం అని ప్రభుత్వం తలపోస్తున్నట్లుగా ఉంది. వివరాల్లోకి వెళితే.. చంద్రబాబు నాయుడు సూపర్ సిక్స్ హామీల గురించి ఎన్నికలకు ఏడాది ముందే ప్రచారం ప్రారంభించారు. ఇన్నాళ్లకు ఈ ఉచిత ప్రయాణం అమల్లోకి వచ్చింది. ఇక్కడితో సూపర్ సిక్స్ సూపర్ హిట్ అని నానా బీభత్సమైన ప్రచారం చేస్తున్నారు. హామీల అమలు సంపూర్ణం అయిపోయినట్లుగా ఆయన మాటల ధ్వనిస్తున్నాయి. సూపర్ సిక్స్ హామీల అమలు పూర్తయిపోయిందని, ఇంకా ఎవరైనా వాటి గురించి మాట్లాడితే వారికి నాలుక మందం అని గతంలోనే చంద్రబాబు అన్న సంగతిని కూడా మనం గుర్తు చేసుకోవాలి. ఈ ఉచిత ప్రయాణం అనేది ఒక మహాద్భుతం అన్నట్లుగా వారి మాటలున్నాయి. సూపర్ సిక్స్ లో ఇంకా మిగిలి ఉన్న రాష్ట్రంలోని ప్రతి మహిళకు నెలకు 1500 రూపాయలు ఇచ్చే పథకం, ప్రతి నిరుద్యోగ యువతకు నెలకు రూ.3,000 భృతి ఇచ్చే పథకాన్ని ప్రజలు మరిచిపోయేలా చేయగలనని చంద్రబాబు నాయుడు అనుకుంటున్నట్లుగా కనిపిస్తోంది. అందుకోసమే ఈ ఉచిత ప్రయాణం గురించి ఉన్నదానికంటే అతిగా ప్రచారం చేసున్నారని అరం అవుతోంది. రాష్ట్రమంతా ఉచిత ప్రయాణావకాశం కల్పించడం ఓకే. కానీ కొత్తగా 2000 బస్సులు కొంటున్నామని, బస్సు స్టేషన్లలో మరుగుదొడ్ల సహా అనేక సదుపాయాలు మెరుగుపరుస్తున్నామని, దాదాపుగా అన్ని బస్సులలోనూ సీసీ కెమెరాలు ఏర్పాటు చేస్తున్నామని ఈ మాయమాటలు అన్నీ చెబుతున్నారు ప్రభుత్వంలోని పెద్దలు. అక్కడికేదో ఈ వ్యవహారాలన్నీ ఉచిత ప్రయాణం కారణంగా చేస్తున్నట్లుగా బిల్డప్ ఇస్తున్నారు. ఈ పథకం లేకపోతే ఆ పనులేవీ చేయరా? ప్రజలను వారి మానాన వారిని వదిలేస్తారా? అనేది ప్రజల ప్రశ్న! కేవలం దీని కోసమే ప్రభుత్వం చాలా ఖర్చు పెట్టేస్తున్నట్లుగా కనిపించే కుట్ర ఇది? ఈ కుట్రవలన మిగిలిపోయిన రెండు సూపర్ సిక్స్ కీలక పథకాలను ప్రజలు మరిచిపోవాలని చంద్రబాబు కోరిక. కానీ అలా ఎన్నటికీ జరగదు. ఆయన హామీ ఇవ్వకుండా ఉంటే ఒకరకంగా ఉండేది. మాట ఇచ్చిన తర్వాత దానికి కట్టుబడి ఉండాల్సిందే. ప్రజలు ఆయన నుంచి మహిళలకు 1500, నిరుద్యోగులకు 3000 ఆశిస్తున్నప్పుడు కనీసం ఎప్పటి నుంచి ఆ పథకాలు అమలు చేస్తారో చంద్రబాబు చెప్పి తీరాలి. అప్పటిదాకా 'సూపర్ హిట్' అని ప్రకటించే అధికారం, నైతిక హక్కు ప్రభుత్వంలోని పెద్దలకు ఉండదని గ్రహించాలి.