#బాబు విజన్👁️
*ఇదేం ‘విజన్’ బాబు❓*
NOVEMBER 7, 2025🫣
ముఖ్యమంత్రి చంద్రబాబునాయుడు తనను తాను విజనరీగా చెప్పుకుంటారు. అలాగే ఆయన్ను ఆరాధించే మీడియా కూడా విజనరీ అంటూ గొప్పలకు పోతోంటోంది. విజనరీ అంటే ఎంతో ముందుచూపుతో ఆలోచించి, సమాజానికి మంచి చేయడం. సమాజానికి మంచి చేస్తామంటే ఎవరూ వ్యతిరేకించరు. మంచి నాయకుల కోసం ప్రజలంతా ఎదురు చూస్తున్నారు. తాత్కాలిక ప్రయోజనాల కోసం అబద్ధాలు చెప్పే నాయకులే మనకు కనిపిస్తున్నారు.
ప్రస్తుతానికి వస్తే గ్రామ, వార్డు సచివాలయాలకు పేరు మార్చాలని చంద్రబాబు సర్కార్ నిర్ణయించింది. వీటికి విజన్ యూనిట్లగా పేరు మార్చనున్నట్టు సీఎం చంద్రబాబు, ఇతర ప్రభుత్వ ముఖ్యులు ప్రకటించారు. సచివాలయాలకు పేరు మార్చాల్సిన అవసరం ఏమొచ్చిందో చెప్పాల్సిన అవసరం వుంది. ఇలాగైతే రాష్ట్ర సచివాలయానికి కూడా పేరు మార్చాలి కదా? అనే ప్రశ్న ఎదురవుతోంది. చంద్రబాబు ప్రభుత్వ నిర్ణయం ప్రకారమైతే రాష్ట్ర విజన్ యూనిట్గా పిలవాల్సి వుంటుంది.
చంద్రబాబు సంకుచిత స్వభావానికి గ్రామ, వార్డు సచివాలయాలకు పేరు మార్పే నిదర్శనం. మంచి పాలనాదక్షుడిగా చంద్రబాబుకు పేరు వుంది. ఇప్పుడు నాలుగో సారి ముఖ్యమంత్రిగా పని చేస్తున్నారు. తన హయాంలో పరిపాలనను నేరుగా ప్రజల వద్దకు తీసుకెళ్లడానికి గ్రామ, వార్డు సచివాలయాల వ్యవస్థను ఎందుకు తీసుకురాలేకపోయారు? అనే ప్రశ్న ఎదురవుతోంది.
మొదటిసారి సీఎం అయిన వైఎస్ జగన్ విజనరీకి గ్రామ, వార్డు సచివాలయ వ్యవస్థ గొప్ప ఉదాహరణ. కేవలం వైఎస్ జగన్ గుర్తొస్తారనే అక్కసుతో సచివాలయ వ్యవస్థకు పేరు మార్చారని జనం అనుకునే పరిస్థితి. ఆ వ్యవస్థకు జగన్ తన లేదా కుటుంబ సభ్యుల పేర్లు పెట్టుకోని విషయాన్ని గుర్తించుకోవాలి.
వెనుకటికి ఎవరో వస్తువుని తయారు చేస్తే, మరొకరు మేడ్ బై అని తన పేరు రాసుకున్నారట. చంద్రబాబు పాలనాతీరు గమనిస్తే, అట్లే వుంది. ఇలాంటి పనులు విజనరీ చేసేవి కావు. జగన్ కంటే గొప్పగా మరేదైనా వ్యవస్థను తీసుకొచ్చి వుంటే ప్రజలు అభినందించే వారు. గ్రామ, వార్డు సచివాలయ వ్యవస్థను కూడా మరిపించేంత అధునాతన వ్యవస్థ తీసుకొచ్చేందుకు విజనరీ చంద్రబాబు ఎందుకు ఆలోచించలేకపోయారు? శ్రమ జగన్, సోకు చంద్రబాబుది అన్నట్టుగా తయారవుతోంది.
గ్రామ, వార్డు సచివాలయాల కంటే గొప్ప పేరు ఏముంటుంది? విజనరీకి తాను బ్రాండ్ అంబాసిడర్గా భావించే, ఆ పేరు పెడితే చాలు తననే గుర్తించుకుంటారనే భ్రమలో చంద్రబాబు ఉన్నట్టున్నారు. ఇంకా ఎంతకాలం సామి ఈ భ్రమలు, పగటి కలలు అని నెటిజన్లు ప్రశ్నిస్తున్నారు. వాటి నుంచి చంద్రబాబు ఎంత త్వరగా బయటికొస్తే, ఆయనకే అంత మంచిది.
