శ్రీమల్లికార్జునసుప్రభాతం........!! ప్రాతస్స్మరామి గణనాథమనాథబంధుం సిందూరపూరపరిశోభితగండయుగ్మం . ఉద్దండవిఘ్నపరిఖండనచండదండ- మాఖండలాదిసురనాయకవృందవంద్యం .. 1.. కలాభ్యాం చూడాలంకృతశశికలాభ్యాం నిజతపః ఫలాభ్యాం భక్తేషు ప్రకటితఫలాభ్యాం భవతు మే . శివాభ్యామాస్తీకత్రిభువనశివాభ్యాం హృది పున- ర్భవాభ్యామానందస్ఫురదనుభవాభ్యాం నతిరియం .. 2.. నమస్తే నమస్తే మహాదేవ! శంభో! నమస్తే నమస్తే దయాపూర్ణసింధో! నమస్తే నమస్తే ప్రపన్నాత్మబంధో! నమస్తే నమస్తే నమస్తే మహేశ .. 3.. శశ్వచ్ఛ్రీగిరిమూర్ధని త్రిజగతాం రక్షాకృతౌ లక్షితాం సాక్షాదక్షతసత్కటాక్షసరణిశ్రీమత్సుధావర్షిణీం . సోమార్ధాంకితమస్తకాం ప్రణమతాం నిస్సీమసంపత్ప్రదాం సుశ్లోకాం భ్రమరాంబికాం స్మితముఖీం శంభోస్సఖీం త్వాం స్తుమః .. 4.. మాతః! ప్రసీద, సదయా భవ, భవ్యశీలే ! లీలాలవాకులితదైత్యకులాపహారే ! శ్రీచక్రరాజనిలయే ! శ్రుతిగీతకీర్తే ! శ్రీశైలనాథదయితే ! తవ సుప్రభాతం .. 5.. శంభో ! సురేంద్రనుత ! శంకర ! శూలపాణే ! చంద్రావతంస ! శివ ! శర్వ ! పినాకపాణే ! గంగాధర ! క్రతుపతే ! గరుడధ్వజాప్త ! శ్రీమల్లికార్జున విభో ! తవ సుప్రభాతం .. 6.. విశ్వేశ ! విశ్వజనసేవిత ! విశ్వమూర్తే ! విశ్వంభర ! త్రిపురభేదన ! విశ్వయోనే ! ఫాలాక్ష ! భవ్యగుణ ! భోగివిభూషణేశ ! శ్రీమల్లికార్జున విభో ! తవ సుప్రభాతం .. 7.. కల్యాణరూప ! కరుణాకర ! కాలకంఠ ! కల్పద్రుమప్రసవపూజిత ! కామదాయిన్ ! దుర్నీతిదైత్యదలనోద్యత ! దేవ దేవ ! శ్రీమల్లికార్జున విభో ! తవ సుప్రభాతం .. 8.. గౌరీమనోహర ! గణేశ్వరసేవితాంఘ్రే ! గంధర్వయక్షసురకిన్నరగీతకీర్తే ! గండావలంబిఫణికుండలమండితాస్య ! శ్రీమల్లికార్జున విభో ! తవ సుప్రభాతం .. 9.. నాగేంద్రభూషణ ! నిరీహిత ! నిర్వికార ! నిర్మాయ ! నిశ్చల ! నిరర్గల ! నాగభేదిన్ . నారాయణీప్రియ ! నతేష్టద ! నిర్మలాత్మన్ ! శ్రీపర్వతాధిప ! విభో ! తవ సుప్రభాతం .. 10.. సృష్టం త్వయైవ జగదేతదశేషమీశ ! రక్షావిధిశ్చ విధిగోచర ! తావకీనః . సంహారశక్తిరపి శంకర ! కింకరీ తే శ్రీశైలశేఖర విభో ! తవ సుప్రభాతం .. 11.. ఏకస్త్వమేవ బహుధా భవ ! భాసి లోకే నిశ్శంకధీర్వృషభకేతన ! మల్లినాథ ! శ్రీభ్రామరీప్రయ ! సుఖాశ్రయ ! లోకనాథ ! శ్రీశైలశేఖర విభో ! తవ సుప్రభాతం .. 12.. పాతాలగాంగజలమజ్జననిర్మలాంగాః భస్మత్రిపుండ్రసమలంకృతఫాలభాగాః . గాయంతి దేవమునిభక్తజనా భవంతం శ్రీమల్లికార్జున విభో ! తవ సుప్రభాతం .. 13.. సారస్వతాంబుయుతభోగవతీశ్రితాయాః బ్రహ్మేశవిష్ణుగిరిచుంబితకృష్ణవేణ్యాః . సోపానమార్గమధిరుహ్య భజంతి భక్తాః శ్రీమల్లికార్జున విభో ! తవ సుప్రభాతం .. 14.. శ్రీమల్లికార్జునమహేశ్వరసుప్రభాత- స్తోత్రం పఠంతి భువి యే మనుజాః ప్రభాతే . తే సర్వ సౌఖ్యమనుభూయ పరానవాప్యం శ్రీశాంభవం పదమవాప్య ముదం లభంతే .. 15.. ఇతి శ్రీమల్లికార్జునసుప్రభాతం సంపూర్ణం .🙏🙏🙏🙏🙏 #శ్రీశైలం మల్లికార్జున #శ్రీశైలం భ్రమరాంబ మల్లికార్జున స్వామి# #శ్రీశైలం...మల్లికార్జున స్వామి...🙏 నమశ్శివాయ #Srisailam Mallikarjuna Swamy🙏🏻