#🧟 പ്രേതകഥകൾ! #📙 നോവൽ #✍ തുടർക്കഥ #✍️ വട്ടെഴുത്തുകൾ #💥💤🌟 LAST SUPPER ( കഥയും കഥാപാത്രങ്ങളും സാങ്കല്പികം. മരിച്ചവരോ മരിക്കാൻ പോകുന്നവരോ ആയി സാമ്യം തോന്നിയാൽ യാദൃശ്ചികം മാത്രം) …………………………………………… ഇലന്തൂരിലെ തെരുവോരങ്ങൾ പതിയെ ശൂന്യമാകാൻ തുടങ്ങി. വേനൽച്ചൂടിന്റെ കാഠിന്യം പതിവിലും കനത്തിൽ നിലനിന്നു. ഉച്ചവെയിൽ മങ്ങിയിട്ടും അന്തരീക്ഷം കനത്ത ഈർപ്പത്താൽ വീർപ്പുമുട്ടി. നാട്ടിൻപുറത്തെ അമ്പലങ്ങളിലെ ഉത്സവപ്പാട്ടുകൾ എങ്ങും മുഴങ്ങിക്കേട്ടു. ആ താളത്തിനൊപ്പം ദൂരെയെങ്ങോ ഒരു വീട്ടിൽനിന്ന് കുറവന്മാരുടെ പാട്ട് നേർത്ത സ്വരത്തിൽ ഒഴുകിയെത്തുന്നുണ്ടായിരുന്നു. ഈ ഗ്രാമീണ നിശ്ശബ്ദതയ്ക്ക് നടുവിലായിരുന്നു നാട്ടിലെ പ്രധാന കള്ളുഷാപ്പ് തിരക്കൊഴിഞ്ഞ ഒരു പ്രവൃത്തി ദിനം പോലെ, ഒരൊറ്റ ടേബിൾ ഒഴികെ ബാക്കിയെല്ലാം ഒഴിഞ്ഞു കിടന്നു. ആ ഒഴിഞ്ഞ ടേബിളിലിരുന്ന് സജിതൻ തമ്പി ഏതോ വിദേശനിർമ്മിത സിഗരറ്റിന്റെ പുക ഇടയ്ക്കിടെഅകത്തേക്കെടുക്കുന്നുണ്ടായിരുന്നു. പുക ചുരുളുകൾ ഷാപ്പിന്റെ മങ്ങിയ വെളിച്ചത്തിൽ നൃത്തം ചെയ്തു. അയാൾ ആ നാടിന് അപരിചിതനായിരുന്നു. ഒറ്റ നോട്ടത്തിൽ ഒരു വലിയ തോട്ടമുടമയോ, വലിയ നഗരത്തിലെ ഒരു ബിസിനസ്സുകാരനോ എന്ന് തോന്നിപ്പിക്കും. അയാൾ ധരിച്ച വിലകൂടിയ കടുംനീല നിറമുള്ള ഷർട്ട്, ഇരുണ്ട അന്തരീക്ഷത്തിൽ കൂടുതൽ ശ്രദ്ധ നേടി. ഷർട്ടിന്റെ കോളറിൽ, അപൂർവ്വമായ ഒരു നീലക്കല്ല് പതിപ്പിച്ച ക്ലിപ്പ് തിളങ്ങി. അതിനു ചേരുന്ന പ്ലാറ്റിനം വാച്ചും, സൂക്ഷ്മമായി പോളിഷ് ചെയ്ത തുകൽ ഷൂസുകളും അയാളുടെ ആഢംബരത്തെ വിളിച്ചോതി. ക്ലീൻ ഷേവ് ചെയ്ത ആ മുഖത്ത്, കനത്ത കാത്തിരിപ്പിന്റെ ചെറിയ പിരിമുറുക്കം നിഴലിച്ചു. അവന്റെ കണ്ണുകളിൽ, എന്തോ ഒരു വലിയ പദ്ധതിയുടെ പ്രതീക്ഷയും ഒളിപ്പിച്ചുവെച്ച രഹസ്യവും ഉണ്ടായിരുന്നു. ഷാപ്പിന്റെ തടിയിലുള്ള ബെഞ്ചിൽ ചാരിയിരുന്ന്, ചൂട് കുറയ്ക്കാൻ തുറന്നിട്ടിരുന്ന ജനൽപ്പാളിയിലൂടെ അവൻ പുറത്തെ കാഴ്ചകൾ കണ്ടു. പഴുത്ത മാങ്ങകൾ നിറഞ്ഞുനിന്ന അയൽവീട്ടിലെ മാവിൻ കൊമ്പിലേക്കും, മൺപാതയിലൂടെ നടന്നുനീങ്ങുന്ന അപൂർവം ആളുകളിലേക്കും ആ സുന്ദരമായ ചാരനിറമുള്ള കണ്ണുകൾ പുറത്ത് ആരെയോ പരതി. ആകാംഷയുടെ ഭാരം അയാളുടെ വിരലുകളെ താളമില്ലാതെ ടേബിളിൽ ചലിപ്പിച്ചു. സമയം നീങ്ങും തോറും ഈ താളം വർദ്ധിച്ചു. "ചേട്ടാ, ഒരു കുപ്പി കൂടി എടുത്തോട്ടെ?" ഷാപ്പിലെ പയ്യൻ അടുത്തുവന്ന് ചോദിച്ചു. "വേണ്ട, അവൾ വരട്ടെ. അപ്പോൾ മതി തത്കാലം മത്തികറി കൊണ്ടുവാ ." സജിതൻ തമ്പി ഒരൽപ്പം അക്ഷമയോടെ മറുപടി പറഞ്ഞു. അവന്റെ കാത്തിരിപ്പ് ഒടുവിൽ വിരാമമിട്ടു. നാലാം വാർഡിന്റെ സമാന്തര നടപ്പാതയിലൂടെ കടന്നു വരുന്ന രൂപം കണ്ടപ്പോൾ അവന്റെ കണ്ണുകൾ പെട്ടെന്ന് തിളങ്ങി. കാത്തിരിപ്പിന് വിരാമമിട്ട ആ നിമിഷം അവന്റെ മുഖം പെട്ടെന്ന് ശാന്തമായി. കൈവിരലുകൾക്കിടയിൽ പിടിച്ചിരുന്ന സിഗരറ്റ് പുറകിലെ ടേബിളിൽ ഇരിക്കുന്ന ആഷ്‌ട്രേയിൽ കുത്തിക്കെടുത്തി. ആ ചാരനിറമുള്ള കണ്ണുകളിൽ സംതൃപ്തിയുടെ തിളക്കം മിന്നിമറഞ്ഞു. ഷർട്ട് രണ്ടു കൈകൾ കൊണ്ട് നേരെയാക്കി അവൻ പ്രവേശന കവാടത്തിലേക്ക് നോക്കി നിവർന്നിരുന്നു. വാതിലിന്റെ മുകൾ ഭാഗത്ത് തൂക്കിയിട്ടിരുന്ന ചെറിയ മണി കിലുങ്ങി. അവൻ ഒരു ദീർഘശ്വാസം എടുത്തു, ഉള്ളിൽ നിറച്ച വലിയ ആശ്വാസം പുറത്തേക്ക് വിട്ടു. . ഷാപ്പിൽ പ്രവേശിച്ച അവൾ കടുംചുവപ്പ് നിറമുള്ള സാരി ധരിച്ച . അവളുടെ ശരീരത്തിൽ , വെള്ളിയിൽ തീർത്ത ഒരു ചെറിയ അരഞ്ഞാണം കാണാമായിരുന്നു, അത് പുറത്തേക്ക് തെളിഞ്ഞു നിൽക്കുന്ന വയറിൽ നേരിയ തിളക്കം നൽകി. . വിഷുവിന്റെ തലേന്ന് അവൾ മനഃപൂർവം തിരഞ്ഞെടുത്തതായിരുന്നു ആ വേഷം. തോളിൽ കിടക്കുന്ന ചെറിയ ഭാണ്ഡം പോലെ തോന്നിക്കുന്ന ബാഗ്, അവൾ ആരെങ്കിലും കാണാതെ സൂക്ഷിക്കുന്നതുപോലെ തോന്നി. ഒരു ലോക്കറ്റ് കോർത്തിട്ട സ്വർണ്ണമാല അവളെ കൂടുതൽ സുന്ദരിയാക്കി. കൺപീലികൾക്ക് കീഴെ ഉരുണ്ടുകളിക്കുന്ന ഗോളങ്ങൾ അവനെ തിരഞ്ഞു. അവനെ കണ്ടതും അവ വിടർന്നു. ആ കണ്ണുകളിൽ പ്രതീക്ഷയുടെയും ആശ്വാസത്തിന്റെയും തിളക്കം മിന്നി. "ഇവൻ കാത്തിരുന്നുവെന്ന് തോന്നുന്നു," അവൾ മനസ്സിൽ വിചാരിച്ചു. ഇരുണ്ടുനിൽക്കുന്ന ചുറ്റുപാടിൽ മങ്ങിയ മൺചിരാതിന്റെ വെളിച്ചത്തിനു ചുവട്ടിലുള്ള ടേബിളിനടുത്തേക്ക് അവൾ പതിഞ്ഞ കാൽവെപ്പുകളോടെ നടന്നു വന്നു. അവൻ എഴുന്നേറ്റ് അവളെ കസേരയിൽ ഇരുത്തി. തിരികെ അവന്റെ കസേരയിൽ വന്നിരുന്നു. അവൾ ഇരുന്നതിന് ശേഷം മാത്രമാണ് അവൾ തന്റെ ബാഗ് ശ്രദ്ധയോടെ മടിയിൽ വെച്ചത്. അവളുടെ മുല്ലമൊട്ടു പല്ലുകൾ കാണിച്ച് അവൾ പുഞ്ചിരിച്ചു, അവളുടെ കണ്ണുകൾ അവനോടുള്ള പ്രണയത്തിൽ തിളങ്ങി. " വിഷു ആശംസകൾ, ഐശ്വര്യ! ഇത്രയും പെട്ടെന്ന് എത്തുമെന്ന് കരുതിയില്ല. കള്ള് തീരുന്നതിന് മുൻപേ എത്തിയല്ലോ." അവൻ ചിരിച്ചു. " വിഷു ആശംസകൾ, സജി! എനിക്ക് നിന്നെയൊന്ന് കണ്ടിട്ട് പോകാൻ തിടുക്കമായി. എനിക്ക് ഒട്ടും കാത്തിരിക്കാൻ കഴിഞ്ഞില്ല. നിന്റെ കയ്യിൽ ഇല്ലാത്ത ഒരു സർപ്രൈസ് എന്റെ കയ്യിലുണ്ട്." അവളുടെ ശബ്ദത്തിൽ പ്രണയം നിറഞ്ഞു. " ഐശ്വര്യ, ഈ വേഷത്തിൽ നീ വളരെ മനോഹരിയാണ്. കവികൾ വർണ്ണിക്കാറുള്ള സൗന്ദര്യസങ്കൽപ്പം നീയാണോ?" അവന്റെ വാക്കുകളിൽ അമിതമായൊരു സ്നേഹം നിറഞ്ഞു നിന്നു. " ഇന്ന് നല്ല മൂഡിലാണല്ലോ? സജി കള്ള് കൂടിപ്പോയോ?" അവൾ കളിയായി ചോദിച്ചു. സജിതൻ തമ്പി രണ്ടു കൈകളും കൂടിയടിച്ചു. അവന്റെ ചിരിയിൽ പതിവില്ലാത്ത ഒരു നിഗൂഢത ഐശ്വര്യക്ക് അനുഭവപ്പെട്ടു. എന്നാൽ അത് പ്രണയത്തിന്റെ നിഗൂഢതയായി അവൾ കരുതി. വെയ്റ്റർ സ്‌പെഷൽ ചെത്തു കള്ള് അവരുടെ അടുത്തേക്ക് വന്നു ഗ്ലാസുകളിലേക്ക് പകർന്നു. കള്ളിന്റെ മധുരവും പുളിയും അവരുടെ സംഭാഷണത്തിന്റെ തീവ്രത വർദ്ധിപ്പിച്ചു. ഇരുവരും ചിയേഴ്സ് പറഞ്ഞ് സന്തോഷത്തോടെ മോന്തിക്കുടിച്ചു. കള്ളിന്റെ ലഹരി അവളിൽ പതിയെ പടർന്നു. ഓരോ സിപ്പിലും ഐശ്വര്യ സജിതൻ തമ്പിയുടെ കണ്ണുകളിലേക്ക് ആഴത്തിൽ നോക്കി, അവൾ സ്വപ്നം കണ്ടിരുന്ന ജീവിതം തുടങ്ങാൻ പോകുന്നതിന്റെ ആവേശത്തിലായിരുന്നു അവൾ. . കാറിന്റെ ഡോർ അവൾക്കായി തുറന്നു കൊടുത്ത് സജിതൻ തമ്പി ഡ്രൈവിംഗ് സീറ്റിലേക്ക് കയറിയിരുന്നു. അതൊരു ബ്ലാക്ക് എസ്‌യൂവി ആയിരുന്നു, അതിന്റെ ആഢംബരം ഇലന്തൂരിലെ പാതകൾക്ക് അന്യമായിരുന്നു. വണ്ടിയുടെ എ.സി.യിൽ പോലും മണ്ണിന്റെയും വെയിലിന്റെയും നേർത്ത ഗന്ധം ഉണ്ടായിരുന്നു. അത് ടൗണിന്റെ ഹൃദയഭാഗത്തുനിന്നും ഉൾനാട്ടിലേക്ക്, ചെങ്കൽപ്പാറകളാൽ നിറഞ്ഞ ഒരു കുന്നിൻപ്രദേശത്തേക്ക് കടന്നു. റോഡിന്റെ ഇരുവശത്തും കുല നിറഞ്ഞ കവുങ്ങിൻ തോട്ടങ്ങൾ നിഴൽ വീഴ്ത്തി നിന്നു. "ഈ തോട്ടങ്ങളെല്ലാം നമ്മുടെ തറവാടിന്റെ ഭാഗമാണ്," സജിതൻ തമ്പി പറഞ്ഞു. ഐശ്വര്യ തന്റെ ബാഗ് മുറുകെ പിടിച്ചിരുന്നു. "സജി, നിന്റെ കുടുംബത്തെ കാണാൻ എനിക്ക് പേടിയും ആകാംഷയുമുണ്ട്. ഇതെല്ലാം പെട്ടെന്നായിരുന്നില്ലേ? ഈ ബന്ധം." അവൾക്ക് ഉള്ളിൽ ഒരു ചെറിയ അസ്വസ്ഥത അനുഭവപ്പെട്ടു. "പേടിക്കേണ്ട, ഐശ്വര്യ. അവർ നിന്നെ സ്നേഹിക്കും. നിനക്കുവേണ്ടി ഞാൻ എത്ര കാത്തിരുന്നു എന്നറിയാമോ? ഇത് നമ്മുടെ പുതിയ ജീവിതമാണ്, നമ്മുടെ ഭാവിക്ക് വേണ്ടിയുള്ള തുടക്കം." സജിതൻ തമ്പി അവളുടെ കൈകളിൽ അമർത്തിപ്പിടിച്ച് പറഞ്ഞു. അവന്റെ കണ്ണുകളിൽ ഭാവിയുടെ ഉറച്ച വാഗ്ദാനങ്ങൾ തിളങ്ങി. ആ സ്പർശത്തിൽ അവൾക്ക് ആശ്വാസം തോന്നി. ഒരു വലിയ ഇരുമ്പ് ഗേറ്റ് ആ കാർ ചെന്നു നിന്നപ്പോൾ ഓട്ടോമാറ്റിക് ആയി തുറന്നുവന്നു. ചുറ്റും ഇരുൾ പരന്ന ആ കുന്നിൻ മുകളിൽ, കൊട്ടാരം പോലെ തോന്നിപ്പിക്കുന്ന ഒരു നാലുകെട്ട് വീട് തലയുയർത്തി നിന്നു. ചുറ്റും കരിങ്കല്ലുകൾ പാകിയ വിശാലമായ മുറ്റം. വീടിന്റെ വാതിൽപ്പാളിയിൽ ചന്ദനക്കുറിയും കരിമഷിയും കൊണ്ട് എന്തോ ആലേഖനം ചെയ്തിരുന്നു. ആ ചിഹ്നം കണ്ടപ്പോൾ ഐശ്വര്യക്ക് ഒരു ചെറിയ തണുപ്പ് ശരീരത്തിലൂടെ കടന്നുപോയി. സജിതൻ തമ്പി അവളോട് കതക് തുറക്കുവാൻ ആംഗ്യഭാവത്തിൽ കൈകൾ നീട്ടി പറഞ്ഞു. അവൾ കതക് തുറന്നു. അവളെ അത്ഭുതപ്പെടുത്തിക്കൊണ്ട് സ്വീകരിക്കുവാൻ പത്തുപേരോളം വരുന്ന അവന്റെ കുടുംബാംഗങ്ങൾ കതകിനപ്പുറത്ത് കാത്തുനിൽക്കുന്നുണ്ടായിരുന്നു. അവൾ അകത്തേക്ക് കടന്നതും ആഡംബരമായിത്തന്നെ അവർ അവളെ സ്വീകരിച്ചു. അവരുടെ മുഖങ്ങളിൽ ആചാരപരമായ ഒരു ഗൗരവം ഉണ്ടായിരുന്നു, എന്നാൽ കൺകോണുകളിൽ ഒരുതരം ആകാംഷയും തിളക്കവും അവൾ ശ്രദ്ധിച്ചു. ഈ വലിയ കുടുംബത്തിന്റെ സ്നേഹം കണ്ടപ്പോൾ അവൾ സന്തോഷത്തോടെ വാ പൊത്തി കണ്ണുകൾ മിഴിച്ച് ചിരിച്ചു. അവൾ അവനുവേണ്ടി തിരിഞ്ഞപ്പോൾ പുറകിൽ മുട്ടുകുത്തി ഒരു റിംഗ് അവൾക്ക് നേരെ നീട്ടിക്കൊണ്ട് അവൻ ഇരിക്കുന്നു. അവൾ സന്തോഷത്തോടെ അത് സ്വീകരിക്കാൻ വിരലുകൾ നീട്ടി. അവൻ അവളുടെ വിരലുകളിൽ അത് അണിയിച്ചു കൊടുത്തു. മാന്യമായ സമ്പന്ന വസ്ത്രങ്ങൾ ധരിച്ച ആ കുടുംബാംഗങ്ങൾ അവളെ കെട്ടിപ്പിടിച്ചു മുത്തം നൽകിയും അവരുടെ ആനന്ദം പ്രകടിപ്പിച്ചു. അവന്റെ സെലക്ഷനെ അവർ അടിമുടി ചൂഴ്ന്നു നോക്കി. പ്രത്യേകിച്ച് അവളുടെ വയറിലേക്കും കണ്ണുകളിലേക്കും അവർ ആവർത്തിച്ച് നോക്കി. എങ്കിലും ആ സ്നേഹപ്രകടനത്തിൽ അവൾ സന്തോഷത്തോടെ വിറങ്ങലിച്ചു നിൽക്കുകയായിരുന്നു. കൂട്ടത്തിൽ മധ്യവയസ്കരായ ദമ്പതികൾ അവൾക്ക് അരികിലായി വന്നു. ആ മാന്യസ്ത്രീ അവളുടെ വദനങ്ങളിൽ തലോടി. " അവന്റെ സെലക്ഷൻ നന്നായിട്ടുണ്ടല്ലേ? വളരെ അനുയോജ്യമായവൾ." " തീർച്ചയായും. ഈ കുടുംബത്തിന് ഐശ്വര്യവും പൂർണ്ണതയും നൽകാൻ ഇവൾക്ക് കഴിയും." അവരുടെ ചോദ്യത്തിന് പങ്കാളി ഉത്തരം നൽകി. " 'സജിതൻ തമ്പിയുടെ' മാതാപിതാക്കൾ ആണ് ഞങ്ങൾ. മറ്റു കുടുംബാംഗങ്ങളെ അത്താഴത്തിന് വിശദമായി പരിചയപ്പെടാം. “മോളു പോയി തത്കാലം വിശ്രമിക്കൂ... ഇന്ന് രാത്രി പ്രധാനമാണ്." മാതാവ് പറഞ്ഞപ്പോൾ അവരുടെ ശബ്ദത്തിൽ ഒരു നിർബന്ധബുദ്ധി ഉണ്ടായിരുന്നു. അവൻ അവളെ മുകളിലെ നിലയിലേക്ക് ആനയിച്ചപ്പോൾ കൂട്ടത്തിലെ ചെറിയ പെൺകുട്ടി അവൾക്കായി ഒരു ഉണ്ണിയപ്പം നൽകി. അതിൽ ചുവന്ന നിറത്തിലുള്ള ഒരു മഷി പുരണ്ടിരുന്നുവോ? ഒരു നിമിഷം അവൾക്ക് തോന്നിയതാണ്. അവൾ സന്തോഷത്തോടെ അത് വാങ്ങികഴിച്ചു എന്നിട്ട് ആ സുന്ദരിയായ കുട്ടിയുടെ കവിളിൽ ഒരു മുത്തം നൽകി. അവൻ അവളെ മുകളിലെ നിലയിലെ ഒരു മുറിയിലേക്ക് കൊണ്ടുപോയി. നല്ല കേരളീയ തനിമയോടെ ഇന്റീരിയർ ചെയ്ത മുറിയായിരുന്നു അത്. ഇളം മഞ്ഞ, വെള്ള നിറങ്ങളുടെ മിശ്രിതമാണ് ചുമരുകളിൽ. മുറിയുടെ മൂലയിൽ, കിണ്ടിയിൽ വെള്ളം വെച്ചിട്ടുണ്ട്. അവൻ ഏതോ ഒരു സ്വിച്ച് അമർത്തിയപ്പോൾ മുറിയിലെ നിലവിളക്ക് തെളിഞ്ഞു. കനത്ത ചന്ദനത്തിരിയുടെ ഗന്ധം മുറിയിൽ നിറഞ്ഞു. ആ സുഗന്ധം അവളിൽ മയക്കം പടർത്തി. അവൾക്ക് ഇപ്പോഴും ഇതെല്ലാം ഒരു സ്വപ്നം പോലെ ആണ് തോന്നിയത് . ഒരിക്കലും പ്രതീക്ഷിക്കാത്ത കാര്യങ്ങളാണ് തൊട്ടുമുൻപ് നടന്നത്. അവൾ കട്ടിലിൽ ഇരുന്നു. 'സജിതൻ തമ്പി' കതകടച്ച് അവളുടെ അടുത്ത് വന്നിരുന്ന് കൈകൾ കോർത്തു പിടിച്ചു. " എനിക്ക് പേടിയായിരുന്നു ഐശ്വര്യ, നീ നോ പറയുമോയെന്ന്. നീ സമ്മതിച്ചില്ലായിരുന്നെങ്കിൽ എല്ലാം തീർന്നേനേ... " " എനിക്കിത് ഇപ്പോഴും വിശ്വസിക്കാൻ ആകുന്നില്ല. നിനക്കൊപ്പം ഈ കുടുംബത്തിൽ ഒരംഗമാകാൻ ഞാൻ എന്ത് ഭാഗ്യമാണ് ചെയ്തത്. ഞാൻ വളരെ ത്രില്ലിലാണ് സജി! എല്ലാം പെട്ടെന്ന് സംഭവിച്ചു, അതുകൊണ്ട് എന്റെ ബാഗിലുള്ളതൊന്നും നിനക്ക് കാണിക്കാൻ കഴിഞ്ഞില്ല. നിനക്ക് ഒരു സർപ്രൈസ് ഉണ്ടായിരുന്നു." " സർപ്രൈസ് ഇപ്പോൾ വേണ്ട ഐശ്വര്യ. നമുക്ക് ഇഷ്ടം പോലെ സമയമുണ്ടല്ലോ. " അവൻ അവളെ കൂടുതൽ ചേർത്തുപിടിച്ചു. അവളുടെ ചുണ്ടുകളിൽ മുത്തം നൽകി. ആഴത്തിലുള്ള ആ ചുംബനത്തിൽ, അവന്റെ ചുണ്ടുകൾക്ക് നേരിയ ലോഹത്തിന്റെ രുചിയുണ്ടെന്ന് അവൾക്ക് തോന്നി. അവർ പരസ്പരം ശരീരം കൈമാറാൻ തയ്യാറായി കഴിഞ്ഞിരുന്നു വിയർപ്പിൽ കുളിച്ചു കിടക്കുന്ന അവളുടെ മേനിയിൽ നിന്നും പൂർണ്ണ സംതൃപ്തിയിൽ അവൻ മാറുമ്പോൾ അവളുടെ ചുണ്ടുകൾ ദാഹജലത്തിനായി കേഴുന്ന വേഴാമ്പലിനെ പോലെ കിതയ്ക്കുന്നുണ്ടായിരുന്നു. വിയർത്തു കുതിർന്ന അവളുടെ നെറ്റിയിലേക്ക്. അവൻ ചുടുമുത്തം നൽകി പതിയെ തലോടി. അവളുടെ കണ്ണുകൾ ക്ഷീണവും സംതൃപ്തിയും മൂലം മയക്കം വരാൻ തുടങ്ങി, പതിയെ ആ കണ്ണുകൾ അടഞ്ഞു. ………. ദീർഘനേരത്തെ മയക്കം അവസാനിപ്പിച്ച് കണ്ണു തുറന്നപ്പോൾ അവൾക്ക് ചെറിയ തരിപ്പ് ശരീരത്തിൽ വ്യാപിക്കുന്നതായി തോന്നി. കസവു പോലുള്ള ഒരു തുണിയിൽ പൊതിഞ്ഞ നിലയിൽ, അവളിപ്പോൾ ഒരു ഡൈനിങ് ടേബിളിനു മുൻപിലാണ് കിടക്കുന്നത് . മുറിയുടെ അന്തരീക്ഷത്തിൽ മന്ത്രോച്ചാരണത്തിന്റെ നേർത്ത ശബ്ദം മുഴങ്ങുന്നുണ്ടായിരുന്നു. അവന്റെ കുടുംബാംഗങ്ങൾ മുഴുവനും ആ തീന്മേശയ്ക്ക് മുൻപിലുണ്ട്. അവരുടെ കണ്ണുകളിൽ പഴയ തീവ്രതയും ദുരൂഹതയും തിളങ്ങി. നേരത്തെ ഉണ്ണിയപ്പം തന്ന പെൺകുട്ടി സന്തോഷത്തോടെ അവളുടെ അടുത്തേക്ക് ഓടി വന്ന് അവളെ ഉറ്റുനോക്കി. അവർക്ക് അരികിൽ കിടന്നിരുന്ന ചെറിയ ടേബിളിൽ ഇരിക്കുന്ന ഒരു വാൾ എടുത്തു. ആ വാളിൽ മഞ്ഞളും കുങ്കുമവും ചാർത്തിയിരുന്നു. അതിൽ രക്തക്കറ പുരണ്ടിരുന്നു. ആ ചെറിയ കുട്ടി ആ വാൾ കൊണ്ടു ഐശ്വര്യയുടെ തുടയിൽ നിന്നും ഒരു കഷ്ണം മാംസം അറുത്തെടുത്തു. അവൾ വേദന കൊണ്ട് പുളഞ്ഞു. അവളുടെ വായിൽ നിന്നും ഒരു നേർത്ത നിലവിളി പുറത്തുവന്നു, എന്നാൽ ആരും കേൾക്കാൻ ആളുണ്ടായിരുന്നില്ല. ചങ്ങല കൊണ്ട് ബന്ധിച്ച് മുകളിലേക്കായി കെട്ടി വെച്ചിരുന്ന കൈകൾ മോചിപ്പിക്കാൻ അവൾ നിസ്സഹായയായി ശ്രമിച്ചു. അവളുടെ വയറിന് മുകളിൽ, നേരത്തെ കണ്ട ചന്ദനക്കുറിയിലെ അതേ അടയാളം കരിമഷിയിൽ വരച്ചിരുന്നു. താഴെ അവളുടെ ശരീരം ഒരു ബലിവസ്തു പോലെ കിടക്കുകയായിരുന്നു. അവളുടെ കീറി കിടക്കുന്ന വയറ്റിൽ നിന്നും കുടൽ പുറത്തേക്ക് തള്ളി വീണു. അതോടൊപ്പം വയറ്റിലൂടെയും വായിലൂടെയും രക്തം പുറത്തേക്ക് ഒലിച്ചിറങ്ങി. “I LOVE YOU BUT I NEED YOU “ അവളുടെ അവസാന കാഴ്ചകളിൽ, 'സജിതൻ തമ്പി' അവളുടെ ശരീരത്തിൽ നിന്നും മുറിച്ചെടുത്ത മാംസം കത്തി കൊണ്ടു ചെറുതായി മുറിച്ച് ഫോർക്ക് കൊണ്ട് വായിലിട്ട് ചവച്ചിറക്കുന്നതാണ് അവൾ കണ്ടത് . ആഭിചാര കർമ്മത്തിന്റെ എല്ലാ ശക്തിയും തങ്ങൾക്ക് ലഭിക്കുന്നെന്ന ആഹ്ലാദത്തിൽ ആ കുടുംബം നരബലിയുടെ അത്താഴം ആഘോഷിച്ചു. . …….. End