ਪੰਜਾਬ ਯੂਨੀਵਰਸਿਟੀ ਵਿੱਚ ਜਿੱਥੇ ਨੋਟੀਫਿਕੇਸ਼ਨ ਰੱਦ ਕਰਵਾਉਣ ਲਈ ਵਿਦਿਆਰਥੀਆਂ ਦਾ ਸੰਘਰਸ਼ ਜ਼ੋਰ ਫੜ੍ਹਦਾ ਜਾ ਰਿਹਾ ਹੈ, ਉੱਥੇ ਨੋਟੀਫਿਕੇਸ਼ਨ ਦੇ ਹੱਕ ਵਿੱਚ ਵੀ ਯੂਨੀਵਰਸਿਟੀ ਦੇ ਬਹੁਤ ਸਾਰੇ ਅਧਿਆਪਕ ਪ੍ਰਚਾਰ ਕਰ ਰਹੇ ਹਨ। ਉਨ੍ਹਾਂ ਦੇ ਵਿਚਾਰਾਂ ਅਤੇ ਬੋਲਣ ਦੇ ਅਧਿਕਾਰਾਂ ਦਾ ਸਤਿਕਾਰ ਹੈ ਪਰ ਉਨ੍ਹਾਂ ਦਾ ਇਹ ਤਰਕ ਕਿ ਹੁਣ ਯੂਨੀਵਰਸਿਟੀ ਦਾ ਕੰਟਰੋਲ ਰਾਜਨੀਤਕਾਂ ਦੇ ਹੱਥੋਂ ਨਿਕਲ ਕੇ ਅਧਿਆਪਕਾਂ ਦਾ ਹੱਥ ਆ ਗਿਆ ਹੈ, ਇੱਕ ਖਿਆਲੀ ਅਤੇ ਸਵੈ-ਪ੍ਰਸੰਸਾ ਵਿੱਚੋਂ ਨਿਕਲਿਆ ਤਰਕ ਹੈ। ਉਨ੍ਹਾਂ ਨੂੰ ਲੱਗਦਾ ਹੈ, ਯੂਨੀਵਰਸਿਟੀ ਦੇ ਅਧਿਆਪਕ ਹੀ ਸੰਸਾਰ ਦੇ ਸਭ ਤੋਂ ਸਿਆਣੇ ਤੇ ਉੱਤਮ ਜੀਵ ਹਨ। ਜਦੋਂ ਕਿ ਅਕਸਰ ਉਹ ਕਾਲਜਾਂ ਲਈ ਮਨਚਾਹੀਆਂ ਤੇ ਅਵਿਹਾਰਕ ਨੀਤੀਆਂ ਬਣਾਉਂਦੇ ਹਨ, ਜੋ ਪੰਜਾਬ ਦੇ 2 ਲੱਖ ਵਿਦਿਆਰਥੀ ਤੇ 200 ਕਾਲਜਾਂ ਦੇ ਹਜ਼ਾਰਾਂ ਅਧਿਆਪਕਾਂ ਨੂੰ ਮੰਨਣੀਆਂ ਪੈਂਦੀਆਂ ਹਨ। ਇਹ ਨੋਟੀਫਿਕੇਸ਼ਨ ਸਭ ਤੋਂ ਵੱਡੀ ਮਾਰ ਹੀ ਪੰਜਾਬ ਦੇ ਕਾਲਜਾਂ ਨੂੰ ਮਾਰਦਾ ਹੈ ਤੇ ਕਾਲਜਾਂ ਦੇ ਅਧਿਆਪਕਾਂ/ਵਿਦਿਆਰਥੀਆਂ ਨੂੰ ਯੂਨੀਵਰਸਿਟੀ ਵਿੱਚ ਬੈਠੇ ਅਧਿਆਪਕਾਂ ਦੇ ਰਹਿਮੋ-ਕਰਮ 'ਤੇ ਸੁੱਟ ਦਿੰਦਾ ਹੈ। ਇਹ 'ਸੋ ਕਾਲਡ' ਵਿਦਵਾਨਾਂ ਦੀ ਭੁੱਖ ਤੇ ਆਕੜ ਤੇ ਬਦਤਮੀਜ਼ੀ ਵੇਖਣ ਵਾਲੀ ਹੁੰਦੀ ਹੈ, ਜਦੋਂ ਇਹ ਕਿਸੇ ਕਾਲਜ ਦੀ ਇੰਸਪੈਕਸ਼ਨ ਤੇ ਜਾਂਦੇ ਹਨ ਜਾਂ ਕੋਈ ਕਿਸੇ ਵਿਦਿਆਰਥੀ ਦਾ ਪੀਐੱਚ ਡੀ ਦਾ ਨਿਗਰਾਨ ਬਣਨ ਲਈ ਰਿਸਰਚ ਕਮੇਟੀ ਵਿੱਚ ਆਉਂਦਾ ਹੈ। ਜਲੀਲ ਕੀਤਾ ਜਾਂਦਾ ਹੈ ਕਾਲਜਾਂ ਦੇ ਅਧਿਆਪਕਾਂ ਨੂੰ।
"ਹੁਣ ਯੂਨੀਵਰਸਿਟੀ ਸਵਰਗ ਬਣ ਜਾਵੇਗੀ" ਦਾ ਰਾਗ ਗਾ ਰਹੇ ਇਨ੍ਹਾਂ ਅਧਿਆਪਕਾਂ ਨੂੰ ਪਿਛਲੇ ਮੂਰਖ, ਭ੍ਰਿਸ਼ਟ ਤੇ ਸਿਰੇ ਦੇ ਕੱਟੜ ਵੀਸੀ ਰਾਜਕੁਮਾਰ ਦਾ ਵੇਲਾ ਯਾਦ ਹੈ? ਜਿਸ ਨੇ ਯੂਨੀਵਰਸਿਟੀ ਦੇ ਰੁੱਖਾਂ ਨੂੰ ਲੱਗੇ ਅੰਬ ਤੱਕ ਵੇਚ ਦਿੱਤੇ ਸਨ ਤੇ ਅੰਤ ਪੰਜਾਬ ਯੂਨੀਵਰਸਿਟੀ ਦੇ ਇਤਿਹਾਸ ਵਿੱਚ ਪਹਿਲੀ ਵਾਰ ਇੱਕ ਵੀਸੀ ਨੂੰ ਭ੍ਰਿਸ਼ਟਾਚਾਰ ਦੇ ਦੋਸ਼ਾਂ ਤਹਿਤ ਕੱਢਣਾ ਪਿਆ! ਯਾਦ ਕਰੋ, ਉਸਨੇ ਕੀ ਕੀਤਾ! ਉਹ ਚਾਂਸਲਰ ਦਫ਼ਤਰ ਕੋਲੋਂ ਯੂਨੀਵਰਸਿਟੀ ਦੇ ਕੁਝ ਤਾਂ ਬਿਲਕੁਲ ਨਵੇਂ ਤੇ ਚਮਚੇ ਅਧਿਆਪਕਾਂ ਤੱਕ ਨੂੰ ਸੈਨੇਟ ਦੇ ਮੈਂਬਰ ਲਵਾ ਲਿਆਇਆ। ਉਨ੍ਹਾਂ ਵਿੱਚੋਂ ਕੁਝ ਨੂੰ ਤਾਂ ਉਹ ਤੱਪੜ ਵਾਂਗੂ ਝਾੜ-ਝਾੜ ਕੇ ਗੱਲ ਕਰਿਆ ਕਰਦਾ ਸੀ। ਕੀ ਅਜਿਹੇ ਅਧਿਆਪਕਾਂ ਦੇ ਹੱਥ ਵਿੱਚ ਇਹ ਯੂਨੀਵਰਸਿਟੀ ਸੁਰੱਖਿਅਤ ਹੈ! ਜਿਨ੍ਹਾਂ ਨੂੰ ਯੂਨੀਵਰਸਿਟੀ ਦੇ ਕੈਲੰਡਰ ਦੀ ਇੱਕ ਲਾਈਨ ਨਹੀਂ ਪੜ੍ਹਨੀ ਆਉਂਦੀ, ਕੀ ਉਹ ਪੰਜਾਬ ਦੇ 2 ਲੱਖ ਵਿਦਿਆਰਥੀਆਂ ਦੇ ਭਵਿੱਖ ਬਾਰੇ ਨੀਤੀਆਂ ਬਣਾਉਣਗੇ? ਜਿਹੜੇ ਹੋਸਟਲ ਦਾ ਵਾਰਡਨ, ਕਿਸੇ ਕਮੇਟੀ ਦੇ ਮੈਂਬਰ ਬਣਨ ਲਈ ਵੀਸੀ ਦੇ ਪੈਰਾਂ ਵਿੱਚ ਲਿੱਟਣ ਲੱਗਦੇ ਨੇ, ਹੁਣ ਉਹ ਇਸ ਯੂਨੀਵਰਸਿਟੀ 'ਤੇ ਪੰਜਾਬ ਦੇ ਹੱਕ ਨੂੰ ਚੁਣੌਤੀ ਦੇਣਗੇ? ਨਹੀਂ, ਅਧਿਆਪਕਾਂ ਨੂੰ ਸਿਰਫ਼ ਆਪਣੀ 65 ਸਾਲ ਦੀ ਰਿਟਾਇਰਮੈਂਟ ਨਾਲ ਮਤਲਬ ਹੈ। ਉਨ੍ਹਾਂ ਨੂੰ ਮਤਲਬ ਹੈ ਕਿ ਉਹ ਵੀਸੀਆਂ ਨੂੰ ਖੁਸ਼ ਕਰ ਕੇ ਨਿੱਕੇ-ਮੋਟੇ ਫਾਇਦੇ ਲੈ ਸਕਣ। ਕੋਈ ਫਰਕ ਨਹੀਂ ਪੈਂਦਾ ਉਨ੍ਹਾਂ ਨੂੰ ਕਿ ਉਨ੍ਹਾਂ ਦੇ ਲਾਲਚ ਨਾਲ ਪੰਜਾਬ ਵਰਗੇ ਸਰਹੱਦੀ ਸੂਬੇ ਅੰਦਰ ਕਿਵੇਂ ਨਿਰਾਸ਼ਾ ਤੇ ਬਦਮਗਜ਼ੀ ਦਾ ਮਾਹੌਲ ਪੈਦਾ ਹੁੰਦਾ ਹੈ।
ਤੇ ਕਿਸ ਨੂੰ ਨਹੀਂ ਨਜ਼ਰ ਆਉਂਦਾ ਕਿ ਇਸ ਨੋਟੀਫਿਕੇਸ਼ਨ ਦੇ ਹੱਕ ਵਿੱਚ ਅੱਜ ਵੱਧ-ਚੜ੍ਹ ਕੇ ਬੋਲ ਵੀ ਉਹ ਰਹੇ ਨੇ, ਜਿਹੜੇ ਪਿਛਲੇ ਭ੍ਰਿਸ਼ਟ ਵੀਸੀ ਰਾਜਕੁਮਾਰ ਦੇ ਸਾਥੀ ਸਨ। ਜੇ ਅੱਜ ਵੀ ਜਾਂਚ ਹੋ ਜਾਵੇ, ਇਨ੍ਹਾਂ ਵਿੱਚੋਂ ਅੱਧਿਆਂ ਦੀ ਰਾਜਕੁਮਾਰ ਵਾਂਗ ਛੁੱਟੀ ਹੋ ਜਾਵੇ।
ਤੁਸੀਂ ਵੀ ਪਿੱਟੋਗੇ ਤਥਾਕਥਿਤ ਵਿਦਵਾਨੋ! ਜੇ ਇਹ ਨੋਟੀਫਿਕੇਸ਼ਨ ਲਾਗੂ ਹੋ ਗਿਆ, ਵੀਸੀਆਂ ਕੋਲ ਇੰਨੀ ਪਾਵਰ ਹੋਵੇਗੀ ਕਿ ਉਹ ਸਿਰੇ ਦੇ ਜੀ-ਹਜ਼ੂਰੀਆਂ ਨੂੰ ਸਿੰਡੀਕੇਟ ਦੇ ਮੈਂਬਰ ਬਣਾਇਆ ਕਰਨਗੇ ਤੇ ਤੁਹਾਨੂੰ ਮੈਂਬਰੀਆਂ, ਤਰੱਕੀਆਂ ਤੇ ਹੋਸਟਲ ਵੀਸੀਆਂ ਨੂੰ ਤਾਂ ਛੱਡੋ, ਦੁੱਕੀ-ਤਿੱਕੀ ਦੇ ਪੈਰਾਂ ਵਿੱਚ ਡਿੱਗ ਕੇ ਮਿਲਿਆ ਕਰਨਗੇ। ਪੰਜਾਬ ਨੂੰ ਤਾਂ ਫੇਰ ਲੜਨਾ ਆਉਂਦਾ ਹੈ, ਤੁਸੀਂ ਕੀ ਕਰੋਗੇ ਜੋ ਆਪਣੀ ਲੜਾਈ ਲਈ ਲੱਗਦੇ ਧਰਨਿਆਂ ਲਈ 10 ਮਿਨਟ ਨਹੀਂ ਕੱਢ ਸਕਦੇ।
ਪਰ ਮੈਨੂੰ ਡਰ ਹੈ ਕਿ ਸਾਜਿਸ਼ ਹੋਰ ਹੈ! ਇੱਕ ਵਾਰ ਇਹ ਨੋਟੀਫਿਕੇਸ਼ਨ ਲਾਗੂ ਹੋ ਜਾਵੇ। ਅਗਲਾ ਕਦਮ ਹੋਵੇਗਾ, ਪੰਜਾਬ ਦੇ ਸਾਰੇ ਕਾਲਜਾਂ ਨੂੰ ਪੰਜਾਬ ਯੂਨੀਵਰਸਿਟੀ ਨਾਲੋਂ ਤੋੜਨਾ। ਜਿਸ ਨਾਲ 200 ਕਾਲਜ ਪਹਿਲਾਂ ਤੋਂ ਹੀ ਦਬਾਅ ਝੇਲ ਰਹੀਆਂ ਗੁਰੂ ਨਾਨਕ 'ਤੇ ਪੰਜਾਬੀ ਯੂਨੀਵਰਸਿਟੀ ਨਾਲ ਜੁੜਨ ਲਈ ਮਜ਼ਬੂਰ ਹੋ ਜਾਣਗੇ। ਇਸ ਯੂਨੀਵਰਸਿਟੀ ਦਾ ਪੰਜਾਬ ਨਾਲ ਚੰਡੀਗੜ੍ਹ ਵਾਂਗ ਕੋਈ ਸਬੰਧ ਨਹੀਂ ਬਚੇਗਾ ਤੇ ਦਿੱਲੀ ਵਾਂਗ ਚੰਡੀਗੜ੍ਹ ਦੇ ਇੱਕ ਸੁਤੰਤਰ ਸਟੇਟ ਬਣਨ ਦਾ ਰਾਹ ਪੱਧਰਾ ਹੋ ਜਾਵੇਗਾ। #ਪੰਜਾਬ ਦੀ ਹਰ ਅਪਡੇਟਸ# ਦੇਸ ਵਿਦੇਸ਼ ਦੀਆਂ ਖ਼ਬਰਾਂ #ਹਰ ਅਪਡੇਟ #📢ਪੰਜਾਬ 'ਚ ਚੋਣਾਂ ਦੀਆਂ ਤਾਜ਼ਾ ਅਪਡੇਟਸ (19456126) #ਪੰਜਾਬ ਦੀ ਹਰ ਅਪਡੇਟ #ਦੇਸ ਵਿਦੇਸ਼ ਦੀਆਂ ਅਪਡੇਟਸ #ਹਰ ਅਪਡੇਟ ##😷ਪੰਜਾਬ 'ਚ ਮੁੜ ਲਾਉਣੇ ਪੈਣਗੇ ਮਾਸਕ😨 #🆕 6 ਨਵੰਬਰ ਦੀਆਂ ਅਪਡੇਟਸ 🆕 #👉 ਤਾਜ਼ਾ ਅਪਡੇਟਸ, #ਪੰਜਾਬ ਅਪਡੇਟਸ
