#సూపర్ సిక్స్ 6 #చంద్రబాబు *‘సూపర్ హిట్’పై శృతిమించుతున్న చంద్రబాబు ప్రేమ❗* AUGUST 24, 2025🎯 నిజంగానే సూపర్ సిక్స్ హామీలను పూర్తిగా అమలు చేసి ఉంటే గనుక.. ‘సూపర్ హిట్' అనే పదం చంద్రబాబు నాయుడు చెప్పుకోవాల్సిన అవసరమే లేదు. ఆ మాటతో ప్రజలే కీర్తించడం ప్రారంభిస్తారు. ఈ ప్రభుత్వానికి రాష్ట్ర ప్రజలే నీరాజనం పడతారు. ఎందుకంటే సూపర్ సిక్స్ లో భాగంగా ఉన్న హామీలు నిజంగానే అంత గొప్పవి. అమలు చేస్తే చంద్రబాబు నాయుడు ప్రభుత్వాన్ని కీర్తించకుండా ఉండడం వైయస్సార్ కాంగ్రెస్ పార్టీ అభిమానులకు కూడా సాధ్యం కాదు. వారికి కూడా ప్రత్యక్షంగా లబ్ధి అందుతుంది కనుక ప్రభుత్వాన్ని వేనోళ్ల కొనియాడుతారు. కానీ 'సూపర్ సిక్స్ – సూపర్ హిట్' అనే నినాదాన్ని పదేపదే చంద్రబాబు నాయుడు చాటింపు వేసుకుంటూ ఉండడం.. ఇదే నినాదం పేరుతో అనంతపురంలో ఒక కార్యక్రమం కూడా బహిరంగ సభ రూపంలో నిర్వహించాలని తాపత్రయ పడుతుండడం గమనిస్తే అది ఆయన వైఫల్యంగానే మనకు అర్థమవుతుంది. చేయని పనిని చేసినట్లుగా రాష్ట్ర ప్రజలను నమ్మించాలనే తాపత్రయం ఆయన ప్రయత్నంలో మనకు కనిపిస్తుంది. సూపర్ సిక్స్ లో ఇంకా రెండు హామీలు బాకీ ఉన్నాయి. ఆ రెండు చాలా కీలకమైనవి. చంద్రబాబు నాయుడు ఇప్పటిదాకా ఆ రెండు హామీల ప్రస్తావన కూడా ఏ బహిరంగ సభలోను తేవడం లేదు.. సరి కదా కనీసం ఆ రెండు హామీలను ఎప్పటిలోగా అమలు చేయదలుచుకుంటున్నారో డెడ్లెన్ కూడా చెప్పడం లేదు. అయినా సరే ‘సూపర్ సిక్స్ సూపర్ హిట్' అనే నినాదాన్ని ప్రజల్లోకి తీసుకువెళ్లాలని చంద్రబాబు ఆరాటపడుతున్నారు. అలా తీసుకువెళ్తే ప్రజల ఆ రెండింటిని మరిచిపోతారని ఆయన భ్రమిస్తున్నారో ఏమో మనకు తెలియదు. రాష్ట్రంలో 18 ఏళ్లు దాటిన ప్రతి మహిళకు నెలకు 1500 రూపాయల వంతున భృతి చెల్లిస్తానని చంద్రబాబు నాయుడు సూపర్ సిక్స్ లో హామీ ఇచ్చారు. దీనికి అతీగతీ లేదు. మామూలుగా ఇదిగో ఇచ్చేస్తున్నాం అని ప్రకటించిన తర్వాత విధివిధానాల రూపకల్పన పేరుతో కొన్ని నెలల పాటు జాప్యం చేయడం చంద్రబాబు నాయుడుకు అలవాటు. ఇప్పటిదాకా అసలు ఎలాంటి ప్రకటన లేదు అంటే ఈ పథకం ఇక ఎన్ని సంవత్సరాలకు అమలవుతుందో కదా అని దానికోసం ఆశపడుతున్న మహిళలు ఆగ్రహిస్తున్నారు. అదేవిధంగా నిరుద్యోగులకు కూడా 3000 రూపాయల నెలసరి భృతి ఇస్తానని చంద్రబాబు నాయుడు సూపర్ సిక్స్ లో భాగంగా ప్రకటించారు. ఆహా మీ ఊసు కూడా తెలుగుదేశం పార్టీ నాయకులు ఎవరూ తీసుకురావడం లేదు. నిజంగానే ఈ ప్రభుత్వం నిరుద్యోగ భృతిని అమలు చేస్తే కనుక యువతరంలో జగన్ పట్ల అభిమానం ఉండే అనేక మందిలో మార్పు వచ్చినా ఆశ్చర్యం లేదు. కానీ చంద్రబాబు నాయుడు తీరును గమనిస్తే ఈ రెండు హామీలను అసలు అమలు చేయకుండానే సూపర్ హిట్ అయిపోయినట్లుగా ప్రపంచాన్ని నమ్మించాలని చూస్తున్నట్లుగా ఉంది. ఆచరణాత్మక దృక్పథం లేకుండా వ్యవహరిస్తే చంద్రబాబుకు ప్రజలు గుణపాఠం చెబుతారని ఆయన గ్రహించాలి.