😍കിനാവ്😍 ഏട്ടാ.......... എനിക്ക് കുന്നിക്കുരു വേണം ഈ പാതിരായ്‌ക്കോ.ഇവൾക്കിത് എന്ത് പറ്റി.രാകേഷ് ശ്രദ്ധയോടെ മീനാക്ഷിയുടെ വാക്കുകളിലേക്ക് ചെവി കൂർപ്പിച്ചു.ഉറക്കത്തിൽ കിടന്നു അവളുടെ മുഖം പുലരിയിൽ വിരിയും ചെന്താമര പോലെ തിളങ്ങി.... ഉണർത്താതെ തന്നെ ഒന്നും മിണ്ടാതെ അടുത്തേക്ക് ചേർന്ന് കിടന്നു കൊണ്ട് ചെവി കൂർപ്പിച്ചു.. ദൈവമേ ഇവളിനി വല്ല പ്രണയത്തിലും ചെന്ന് ചാടിക്കാണുമോ........മുറപ്പെണ്ണായതിനാൽ കല്യാണത്തിന് മുൻപ് താൻ അല്ലാതെ മറ്റൊരാൾ അവളുടെ മനസ്സിൽ ഉണ്ടാവാൻ വഴിയില്ല. പക്ഷേ തന്നോടുള്ള ആവശ്യമല്ല ഇത് എന്ന് ഏട്ടാ... എന്ന വിളിയിൽ നിന്നും വ്യക്തം. "രാക്കു "എന്നല്ലാതെ ഇതുവരെ ഏട്ടാന്നു അവൾ വിളിച്ചിട്ടില്ല .കല്യാണം കഴിഞ്ഞു ഏട്ടൻ എന്ന് വിളിച്ചാൽ മതി എന്ന് പറഞ്ഞിട്ടും വേണ്ട രാക്കു മതി എന്ന് അവൾ തന്നെ ആണ്‌ തീരുമാനിച്ചത് . ഒന്നും അറിയാത്ത പോലെ സുഖമായി ശാന്തമായി മീനാക്ഷി ഉറങ്ങുന്നു . കിടന്നിട്ടു ഉറക്കം വരാതെ രാകേഷ് ബെഡിൽ നിന്ന് എഴുന്നേറ്റു വെറുതെ അങ്ങോട്ടും ഇങ്ങോട്ടും ഉലാത്താൻ തുടങ്ങി . മനസ്സിൽ ഒളിപ്പിച്ചു വെക്കുന്ന രഹസ്യങ്ങൾ ആണ് ചിലപ്പോളൊക്കെ സ്വപ്നമായി കാണുന്നതെന്ന് കൂട്ടുകാരൻ മൊയ്തീൻ പറഞ്ഞു കേട്ടിട്ടുണ്ട്. പ്രവാസജീവിതത്തിനിടക്കു പല പെൺകുട്ടികളും ജീവിതത്തിൽ കയറി ഇറങ്ങി പോയിട്ടുണ്ടെങ്കിലും മീനാക്ഷി അതൊന്നും അറിയാതെ ഇരിക്കാൻ പരമാവധി ശ്രമിച്ചിരുന്നു . ഇനി താൻ അറിയാതെ മീനാക്ഷിക്കും അങ്ങനെ വല്ല ബന്ധങ്ങളും കാണുമോ. അവൾ തന്നെ ചതിക്കുകയാണോ.....രാകേഷിന്റെ മനസ്സിൽ സംശയത്തിന്റെ നിഴൽ കൊഞ്ഞനം കുത്തി .ചിന്തകൾക്ക് എരിവ് പകർന്നു കൊണ്ട് ചുണ്ടിൽ കത്തിച്ചു വെച്ച സിഗരറ്റ് വലിച്ചു തള്ളി . ലീവിന് വന്നപ്പോൾ മുതൽ അവൾക്കു ഒരു അകൽച്ച ഉണ്ട് .പ്രണയിച്ചു നടന്നപ്പോൾ ഉണ്ടായിരുന്ന സ്നേഹമൊന്നും കല്യാണം കഴിഞ്ഞ നാളുകളിൽ പ്രകടിപ്പിച്ചിരുന്നില്ല .അധിക ദിവസം കൂടെ നിക്കാൻ ലീവില്ലാത്തതിനാൽ തന്നെ അതിനെ കുറിച്ച് വലിയ രീതിയിൽ ഒരു അന്വേഷണവും അവളോട്‌ നടത്തിയതും ഇല്ല . ഓരോന്നു ഓർത്തു ഉമ്മറത്തെ ചാരു കസേരയിൽ ഇരുന്നു രാകേഷ് ഉറങ്ങി പോയി . "ഡാ........എന്താടാ നീ ഇവിടെ വന്നു കിടക്കുന്നെ " അമ്മയുടെ വിളി കേട്ടാണ് കണ്ണ് തുറന്നത് .അമ്മയോട് സത്യം പറയണോ .വേണ്ട......ആദ്യം മീനാക്ഷിയുടെ പെരുമാറ്റം ഒന്ന് ശ്രദ്ധിക്കാം .രാകേഷ് തീരുമാനിച്ചു . ചില ദിവസങ്ങളിൽ മീനാക്ഷിയിൽ തന്നോട് ഒരു അകൽച്ച ഉള്ളതായി തോന്നി തുടങ്ങി .ഇടക്കൊക്കെ ആരോടോ ഫോണിൽ സംസാരിക്കുന്നു .ചോദിക്കുമ്പോൾ കൂട്ടുകാരി ആണെന്ന് പറയും .ഇതിനും മാത്രം എന്താണ് കൂട്ടുകാരിയോട്‌ പറയാൻ... ഇവൾ പഠിച്ച കള്ളി തന്നെ.രാകേഷ് ഉറപ്പിച്ചു .കൂട്ടുകാരനായ മൊയ്‌തീനോട് അഭിപ്രായം ചോദിച്ചപ്പോഴും അവനും പറയുന്നു ....പ്രവാസികളുടെ പെണ്ണുങ്ങൾ ഒക്കെ ഇങ്ങനെ ആണ്.... നിനക്ക് അറിയാൻ മേലാഞ്ഞിട്ടാണ്......ഞാൻ എത്ര എണ്ണത്തിനെ ദിവസം കാണുന്നു . പലചരക്കു കടക്കാരനായ അവൻ പറഞ്ഞതിലും കാര്യം ഉണ്ട് .ചില പ്രവാസി ഭാര്യമാരുടെ വീടുകളിൽ ഓർഡർ ചെയ്ത സാധനങ്ങളും ആയി ചെല്ലുമ്പോൾ അവനോടു കൊഞ്ചിക്കുഴയുന്ന കഥകൾ കാണുമ്പോൾ ഒക്കെ വിസ്തരിക്കുന്നത് താനും കുറെ കേട്ടിട്ടുണ്ട് .(ആളുകൾ വെറുതെ പറഞ്ഞുണ്ടാക്കുന്ന കഥ എന്നാണ് എന്റെ വിശ്വാസം ) ഇനി ഇത് തുടർന്ന് കൊണ്ട് പോകാൻ വയ്യ .അവളുടെ കയ്യിൽ എന്തെങ്കിലും ഒളിപ്പിച്ചു വെച്ചിട്ടുണ്ടെങ്കിലോ......ഒന്ന് പരിശോധിച്ചു കളയാം .രാകേഷ് ഉറപ്പിച്ചു . അവളുടെ നാട്ടിലെ അമ്പലത്തിൽ ഉത്സവം .നിർബന്ധിച്ചു അമ്മയെയും കൂട്ടി അവിടേക്ക് പറഞ്ഞു വിട്ടു . "രാക്കു വാ "എന്നവൾ പറഞ്ഞിട്ടും നീ പോയിട്ട് വാ....എനിക്ക് മൊയ്തീന്റെ കൂടെ ഒരു സ്ഥലം വരെ പോകണം എന്ന് പറഞ്ഞു ഒഴിവായി .മനസ്സില്ലാ മനസ്സോടെ ആണെങ്കിലും അവൾ ഉത്സവത്തിന് പോകാൻ തയ്യാറായി . രണ്ടു ദിവസം നിന്നിട്ട് വന്നാ മതി .ഞാൻ അപ്പോളേ തിരികെ വരികയുള്ളൂ .ഞാൻ വന്നിട്ട് നിങ്ങളെ കൂട്ടാൻ വരാം എന്ന് പറഞ്ഞു രാകേഷ് ഉത്സവത്തിനു പോകാതെ ഒഴിഞ്ഞു മാറി . അമ്മയും മീനാക്ഷിയും പോയതും വീട് മുഴുവനും തനിക്കു വേണ്ട എന്തെങ്കിലും തെളിവ് കിട്ടുമോ എന്നറിയാൻ രാകേഷ് അരിച്ചു പെറുക്കി .ഒടുവിൽ അലമാരയുടെ ഉള്ളിൽ നിന്നും ഒരു ഭംഗിയുള്ള ചില്ലു കുപ്പിയിൽ സൂക്ഷിച്ച കുന്നിക്കുരു കണ്ടെത്തി . സംശയത്തിന്റെ കാഠിന്യവും കൂട്ടുകാരന്റെ വാക്കുകളുടെ ശക്തിയിലും മീനാക്ഷി എന്തോ ഒളിപ്പിക്കുന്നു എന്ന് തന്നെ രാകേഷ് ഉറപ്പിച്ചു . ഉത്സവം കഴിഞ്ഞു തിരികെ വന്ന മീനാക്ഷിയോട് തുറന്നു ചോദിക്കുക തന്നെ.രാകേഷ് തീരുമാനിച്ചു . അതിനൊരു സാഹചര്യം ഉണ്ടാക്കണം അല്ലോ...ചുമ്മാതെ അങ്ങ് ചോദിയ്ക്കാൻ പറ്റുമോ. അതിനുള്ള വഴി ആലോചിച്ചു ബെഡിൽ തല പുണ്ണാക്കി കൊണ്ടിരിക്കുമ്പോൾ "രാക്കു നിനക്കൊരു സർപ്രൈസ് ഉണ്ട് " എന്ന് പറഞ്ഞു കൈയിൽ ചുരുട്ടിയ ഒരു വാരികയും ആയി മീനാക്ഷി കടന്നു വന്നു . ദേ .....ഇതൊന്നു വായിച്ചു നോക്കിയേ.......അനിഷ്ടത്തോടെ ആണെങ്കിലും അത് പുറത്തു കാട്ടാതെ മീനാക്ഷിയുടെ കൈയിൽ ഇരുന്ന വാരിക തുറന്നു നോക്കിയതും.....പുഞ്ചിരി തൂകുന്ന മീനാക്ഷിയുടെ ചിത്രം.അതിനു താഴെ "കുന്നിക്കുരുവിന്റെ മോഹങ്ങൾ "എന്ന തലകെട്ടോടെ അച്ചടിച്ച് വന്ന ഒരു കഥ. തുടക്കം ഇങ്ങനെ. ഏട്ടാ .............എനിക്ക് കുന്നിക്കുരു വേണം......മയിലാടും കുന്നിന്റെ ഉച്ചിയിൽ നിറയെ കുന്നിക്കുരു ഉണ്ടെന്ന് കിഴക്കേതിലെ ചന്തു പറഞ്ഞു.......എനിക്ക് വേണം........മാളൂട്ടി കൊഞ്ചിക്കൊണ്ടു ഏട്ടന്റെ കൈയിൽ തൂങ്ങി......... മഞ്ജു അഭിനേഷ് #📔 കഥ #📙 നോവൽ