👌हृदयस्पर्शी फोटो, 😏मतलबी दुनिया Image & Post

Savita Pisal Konde Deshmukh.(H.S.C.D.ed)🎷🚩📚🛵 - Author on ShareChat: Funny, Romantic, Videos, Shayari, Quotes

मेरे लिए भी क्या कोई उदास बेक़रार है?? (आशा भोसलेंच्या निधनानंतर त्यांच्या गझलगायकीबद्दल फारसं बोललं गेलं नाही. त्यांच्या गझलगायनाचा आढावा घेणारा हा लेख) आशा भोसले यांच्या निधनानंतर त्यांच्या आठवणी सांगताना ज्येष्ठ शायर, गीतकार जावेद अख़्तर यांनी फार अर्थपूर्ण आणि आशाताईंची गहराई दाखवणारे किस्से सांगितले. जावेद अख़्तर आणि आशाताई दोघांचही फार्म हाऊस खंडाळ्याला समोरासमोर आहे. जावेद साहेब सांगत होते की, त्या अनेकदा घरी येत. आम्ही त्यांच्या घरी जात असू. त्या स्वत: केलेलं चिकन आमच्यासाठी आणत. आणि त्यांच्या स्वयंपाकाची तारीफ केलेली त्यांना खूप आवडत असे. आशाताई तुम्ही काय गाता असं म्हटल्यानं जेवढ्या त्या खूश होणार नाही तेवढ्या त्या तुम्ही काय स्वयंपाक करता आशाताई असं म्हटल्यानं खूश होत..असं एक मोठं गोड निरीक्षण जावेद साहेबांनी सांगितलं...प्रत्येक माणसाचं असं खास स्वत:च्या एखाद्या गुणाबद्दल खास मत असतं, त्याचं कौतुक केलं, त्या गुणाबद्दल चर्चा केली की तो माणूस खूश होतो. जे.आर.डी टाटांबद्दल असंच म्हणतात, त्यांना कोणी जे.आर.डी काय विमान चालवतात म्हटलं की फारच आनंद व्हायचा. तसं आशाताईंचं असावं.. नंतर जावेद अख़्तरांनी आशाताईंबद्दल जे सांगितलं ते फारच महत्वाचं होतं...जावेद साहेब म्हणाले, आशाताई कधी कधी फार खोल आणि उंचीचं वाक्य, तत्वज्ञान बोलून जात. एकदा आशाताई जावेद साहेबांना म्हणाल्या म्हणे, की ‘’जावेद साहब, ज़िंदगी से मैं जितना सिखी हूँ वो ये हैं की, human relations में ज़्यादा उम्मीद मत रखो, जो भी ध्यान देना है वो अपने काम पर दो, काम में इन्वेस्ट करो, human relation में नही’’.... किती महत्वाचं वाक्य आहे...सर्वांसाठीच विशेषत: कलाकारासाठी तर फारच..कारण कलाकार भावूक असतात, वाहवत जातात..त्यांची मानसिक आंदोलनं खूप तीव्र असतात...त्यामुळं अनेकदा कलावंतांच्या आयुष्यात येणारं प्रेम हे त्यांना उद्ध्वस्त करणारं असतं आणि ते करतात ते प्रेमही दुसऱ्याला उद्ध्वस्त करणारं असू शकतं. आशाताईंच्या आयुष्यातलं सहजीवन आणि नातेसंबंध हे तसे अजिबात सुखद नव्हते. भोसल्यांसोबतच पहिला संसार मोडलाच आणि नंतर आर.डी बर्मनसोबतची क्रिएटिव्ह रिलेशनशीप सुंदर झाली तरी हयूमन रिलेशनशीप गडबडलीच. शिवाय आशाताईंची दोन मुलं त्यांच्या समोर गेलीत. मुलांचा मृत्यू आईने बघणं यासारखं दु:खच नाही. आशाताईंच्या जीवनातलं हे सगळं दु:ख त्यांच्या गझलेत आपल्यात उतरलेलं दिसतं. गझल ही मुळात शब्दप्रधान गायकी आहे. गझलेत शब्द त्याचा अर्थ हा महत्वाचा असतो. शब्दामागचा भाव, बिटवीन द लाईन्स म्हणणं आणि शब्दाला ट्रिट करणं महत्वाचं असतं. म्हणून म्हटलं जातं की, ग़ज़ल में बंदिश ए अल्फाज़ ही नही सबकुछ जिगर का खुन भी कुछ चाहिये असर के लिए स्वत: आशाताई एका मुलाखतीत म्हणाल्या होत्या, ‘’प्रेमात पडायला हवं, प्रेमभंग व्हायला हवा तेव्हा ते गाण्यात येईल..जियेंगे नही तो गाने में आयेगा कैसे...जीना चाहिये’’... आशाजींच्या गझलगायकीतल्या टप्प्यांमधला पहिला सगळ्यात उल्लेखनीय टप्पा म्हणजे ‘उमराव जान’...उमरावजान या चित्रपटासाठी दिग्दर्शक मुज्ज़फ्फर अली यांनी शायर शहरयार यांना खास अलिगढ मुस्लिम विदयापीठातून सुटी घेऊन बोलवलं होतं...त्यांनी उमरावजानच्या गझला लिहिल्या. खय्याम यांचं संगीत...रेखाने उमरावजानची भूमिका केली...आणि सर्व गझला आशा भोसले यांनी गायल्या आहेत...त्यापैकी ‘’दिल चीज़ क्या है आप मेरी जान लिजीये’’, “इन आँखो की मस्ती के मस्ताने हज़ारों हैं’’, ‘’जुस्तजू जिसकी थी उसको तो न पाया हमनें’’, ‘’ये क्या जगह है दोस्तों’’, या चार गझला प्रचंड गाजल्या. त्यातली ‘दिल चीज़ क्या है आप मेरी’ आणि ‘इन आँखो की मस्ती के मस्ताने हज़ारों हैं’या दोन गझला या रोमँटिक आहेत पण मला स्वत:ला मात्र ‘जुस्तजू जिसकी थी उसको तो न पाया हमने, इस बहाने से मगर देखली दुनिया हमने’ ही गझल आणि ये क्या जगह हैं दोस्तो, ये कौनसा दयार है, हद ए निगाह तक जहां ग़ुबार ही ग़ुबार है या दोन गझलात आशाताई अधिक दिसतात असं मनापासून वाटतं... विशेषत: ‘ये क्या जगह हैं दोस्तों’ ही गझल तर जणू आशाताईंसाठीच लिहली की काय असं वाटतं...आणि म्हणून अत्यंत जीव ओतून त्यांनी ती गायली आहे.... बुला रहा हैं कौन मुझको चिल्मनों के उस तरफ मेरे लिए भी क्या कोई उदास बेक़रार है?? मेरे लिए भी क्या कोई उदास बेक़रार है?? हा प्रश्न मग उमरावचा राहत नाही तो आशाताईंचा होऊन जातो...उदास हा शब्द आशाताई असा ट्रिट करतात की अख्खी आयुष्याची उदासी त्यात येते... आयुष्यात कधी कधी इतके मूर्खपणाचे निर्णय काही विकल क्षणी घेतले जातात, चुका होतात...कलावंतांच्या आयुष्यात तर हे होतंच होतं... तमाम उम्र का हिसाब मांगती है ज़िंदगी ये मेरा दिल कहे तो क्या के ख़ुद से शर्मसार है के ख़ुद से शर्मसार है म्हणताना त्यात आशाताईंनी जी पश्चातापाची भावना आणली आहे ती काय सांगावी... उमराव जान मधल्या गझलांनतर गझल गायकी म्हणून नाव घेता येईल असे आशाताईंचे दोन अल्बम आले. एक हरिहरन सोबतचा ‘आबशार ए ग़ज़ल’ आणि दुसरा गुलाम अलींसोबतचा ‘मिराज ए ग़ज़ल’...या दोन्ही ज्या पद्धतीने आशाताईंनी गझला गायल्या आहेत त्याला तोड नाही. ‘मिराज ए ग़ज़ल’चं कंपोझिशन गुलाम अलींनी केलंय..जे गायला अत्यंत कठिण आहे. खुद्द आशाताईंनीच हे गाण्यापूर्वी गुलाम अलींना विचारलं होतं की, मैं गा सकुंगी ना...?? अर्थात ही विनम्रता ही आहेच. ‘मिराज ए ग़ज़ल’मधली ‘सलोना सा सजन हैं’ ही यमनकल्याण मधली गझल फारच गाजली. निव्वळ अप्रतीम...केवळ अप्रतीम अशी शास्त्रीय संगीतावर आधारीत कंपोझिशन आहे. राग शाम कल्याण आणि बिहाग यांचं मिश्रण मला यात वाटतं. म्युझिक अरेंजरनं पण कमाल केलीय. या गझलेतली सतार, व्हायोलिन आणि तबला कमाल...यातली सतार ही एकाच वेळी श्रृंगारिक आणि पवित्र वाटते. भोसले यांचा सुरूवातीचा आलाप ऐका...नंतर तबला आणि सतार नं जे काही उचललं आहे...आशा भोसले केवळ कमाल गायल्या आहेत. ही गझल केवळ त्यांनी आणि त्यांनीच म्हणावी इतका त्यांचा या गझलेवर अधिकार आहे. त्यांच्या हरकती आणि मुर्की वाह! गुलाम अली आणि आशा भोसले यांना दंडवत घालावासा वाटतो ही गझल ऐकल्यावर. जेवढे साधे, तरल, नाजूक शब्द आहेत तशीच चाल त्याला दिली आहे हे गुलाम अलींचं मोठेपण. या अख्ख्या अल्बममध्ये ते संगीतकार म्हणून हिमालयासारखे मोठे पुढे येतात. यातला गझलच्या सुरूवातीचा जो आलाप आशाताईंनी घेतलाय तो आजवर दुसरं कोणीही घेऊ शकलेलं नाही. आशाताई अनपॅरलल गायल्या आहेत. ‘यूँ सजा चाँद’ ही गझलही आशाताईंनी लाजवाब गायली आहे... यूँ सजा चाँद के छलका मेरे हमराज़ का रंग हे गाताना खरंच रंग छलकतोय असं वाटतं...ऐकाच ही गझल आशाताईंची स्वत:ची अत्यंत आवडती गझल म्हणजे जब रात की तनहाई ही गझल. यातलं शोहरत की बुलंदी तो पलभर का तमाशा है जिस डाल पर बैठे हो वो टूट भी सकती है हा शेर त्यांना खूप आवडायचा... आबशार-ए-गझल या अल्बममध्ये आशा भोसले यांनी ही गझल गायली आहे. संगीत आहे गझल गायक हरिहरन यांचं. फार सुंदर कंपोझिशन. आणि आशा भोसले यांनी ती फार न्याय देत गायलीय. या गझलेची सुरूवात अप्रतीम मधूर अशा गझलेने होते. आशा भोसलेंचा गळा काय फिरतो…..चिल्मनसी सरकती है..या शेरनंतर परत जेव्हा त्या ‘जब रात की तनहाई’ वर येतात...त्यात ‘रात’ या शब्दावर जी हरकत घेतली आहे ती लाजबाव...त्यांचं ‘रात’ म्हणणं ऐका...पहिल्या शेरच्या आधी येणारी व्याकूळ शहनाई...दुसऱ्या शेरच्या आधी येणारी रोमॅँटिक सतार..या गझलेत शहनाई ऐका. मी प्रथमच कुठल्या गझलेत शहनाई ऐकलीय. या अल्बममध्ये हरीहरन हे कंपोझर म्हणून फार ठळकपणे, ताकदीने समोर येतात. बशीर बद्र यांनी ही गझल लिहलीय. ते उर्दूतले अत्यंत लोकप्रिय शायर आहेत. कोणालाही सहज समजेल अशी शायरी हे त्यांच्या लिखाणाचं वैशिष्ट्य. याच अल्बममधली माझी आवडती गझल म्हणजे कहीं तारें कहीं शबनम कहीं जुगनू निकले...काय रोमँटिक आवाज़ लागलाय आशाताईंचा... आशाताईंनी रंजिश ही सही, आज जाने की ज़िद ना करो पण गायचा प्रयत्न केलाय..मी विनम्रतेने जाणीवपूर्वक प्रयत्न केला असं म्हणते...कारण मेहदी हसन आणि फरिदा ख़ानम यांनी ज्या उंचीवर या गझलांना नेऊन ठेवलं ते आशाताईंना साधता आलं नाही... पण त्यांच्यासाठी लिहिलेल्या गझलच्या ओरिजिनल कंपोझिशन त्या खरंच दैवी गातात...आशाताईंच्या कॅब्रे, लावणी, कव्वाली, भावगीत, नाटयगीत, याबद्दल खूप बोललं जातं पण त्यांच्या गझल गायकीबद्दल फारसं बोललं गेलं नाही. बेगम अख़्तर नंतर गझल गायनाच्या स्वतंत्र मैफिल घेऊ शकतील अशा त्या कदाचित एकमेव गायिका होत्या आणि राहतीलही.... वसुंधरा काशीकर मुक्त पत्रकार, लेखक व निवेदक. ‘मेनका’ मासिकातील ‘रुह ए ग़ज़ल’ सदरातून.. #Ashabhosle #ghazal #vasundharakashikar #anchor #author #ghazallover #👌हृदयस्पर्शी फोटो #😏मतलबी दुनिया #🏛️राजकारण #🔴आजचे ताजे अपडेट्स📰 #👌प्रेरणादायी स्टेट्स