#📔 കഥ മഴ ****************** പത്തു വയസുള്ള ,മെലിഞ്ഞു കൊലുന്നനെ ഉള്ള , ഒരു പെൺകുട്ടി സിത എന്നായിരുന്നു അവളുടെ പേര് അമ്മയും അവളും കൂടി ആ മലഞ്ചെരിവിലാണ് താമസം വീടെന്ന് പറയാൻ പറ്റില്ല ഒരു കുടിൽ .ഒരുപാട് കഷ്ടപ്പെട്ടാണ് ആ 'അമ്മ അവളെ വളർത്തുന്നത് .എല്ലാം കണ്ടും അറിഞ്ഞും വളരുന്നതുകൊണ്ടാകും അവൾക്കു അധികം വാശിയൊന്നുമില്ല .അമ്മയുടെ അവസ്‌ഥ മനസിലാക്കി ആഗ്രഹങ്ങളെ നേടാനും വേണ്ടാന്നു വെക്കാനും അവൾ ശ്രമിക്കാറുണ്ട് .ഒരു പത്തു വയസ്സുകാരിയുടെ പോലെയല്ല ചില നേരങ്ങളിൽ അവളുടെ പെരുമാറ്റം .പലപ്പോഴും തീർത്തും പക്വത വന്ന ഒരു പെൺകുട്ടിയെ പോലെ ആയിരുന്നു അവൾ . അമ്മയുടെ സാരിത്തുമ്പു പിടിച്ചു സാധനങ്ങൾ വാങ്ങാൻ പോകുമ്പോൾ അവളുടെ മനസു ചരടിൽ തൂക്കിയിട്ട തിളക്കമുള്ള കുപ്പിവളകളിലോ പല നിറങ്ങളിൽ ചില്ലുകുപ്പിയിലിരുന്നു അവളെ നൊക്കി ചിരിക്കുന്ന പലഹാരങ്ങളിലോ തട്ടിത്തടഞ്ഞു വീഴാറില്ല . വിയർപ്പു തട്ടി മുഷിഞ്ഞ നോട്ടുകൾ പല തവണ എണ്ണി തിട്ടപ്പെടുത്തുമ്പോൾ അമ്മയുടെ കണ്ണിൽ പൊടിയുന്ന കണ്ണുനീരിന്റെ വേരുകൾ കാണുമ്പോൾ നിമിഷ നേരം കൊണ്ടു പിറവിയെടുത്ത ആഗ്രഹങ്ങളും കൊതികളും ഒരു ചിരിയിൽ അവൾ ഒതുക്കും . ആ ചിരിയുടെ അർത്ഥം അമ്മക്കും മനസിലാകാറുണ്ട് .പക്ഷെ ആ തിരിച്ചറിവുകൾ ഒരു നെടുവീർപ്പിൽ ഒതുക്കാൻ മാത്രമേ ആ അമ്മക്ക് കഴ്ഞ്ഞുള്ളൂ . അമ്മയുടെ കയ്യും പിടിച്ചു തിരിച്ചു വീട്ടിലേക്കുള്ള ഇടവഴിയിലൂടെ ഉള്ള യാത്ര അവൾക്കു ഏറ്റവും പ്രിയപ്പെട്ടതായിരുന്നു .കാരണം ആ യാത്രയിൽ അവളുടെ മനസിലെ കൗതുകമുണർത്തുന്ന ചോദ്യങ്ങൾക്കുള്ള ഉത്തരം 'അമ്മ പറഞ്ഞുകൊടുക്കാറുണ്ട് .സന്തോഷത്തോടെ അവളോട് സംസാരിക്കുന്ന അമ്മയെ അവൾക് സമ്മാനിക്കുന്നത് ആ ഇടവഴികളാണ് . ദിവസങ്ങൾ മുന്നോട്ടു പോയി . വേനൽ, പുഴകളെയും കിണറുകളെയും കാർന്നു തിന്നപ്പോൾ കുടിവെള്ളത്തിനായുള്ള അമ്മയുടെ യാത്രയുടെ ദൂരം കൂടി.കുന്നുകൾ താണ്ടി വെള്ളത്തിനായി 'അമ്മ പുലർച്ചെ യാത്ര തിരിച്ചു .മകൾ എഴുന്നേൽക്കുന്നതിനു മുൻപേ തിരികെ എത്തണം .സുന്ദര സ്വപ്നങ്ങൾ കണ്ടു ഉറക്കമെഴുന്നേറ്റു ഓടി വന്നു കെട്ടിപിടിച്ചു അവൾ പറയുന്ന അവ്യക്തമായ സ്വപ്നങ്ങളുടെ വിവരണം കേൾക്കാൻ 'അമ്മ അവിടെ ഉണ്ടായേ മതിയാകു ......വെയിലിന്റെ വെള്ളി വെളിച്ചം ,ജനാലയിലൂടെ അവളെ തേടി എത്തി .അമ്മയുടെ പഴയ സാരി കൊണ്ടു മുഖം പുതച്ചെങ്കിലും പഴക്കം ചെന്ന നൂലിഴകളിലൂടെ വെയിൽ അവളെ ഇക്കിളിയാക്കി കൊണ്ടിരുന്നു .പാതി മുറിഞ്ഞ സ്വപ്നങ്ങൾ വെയിലിൽ വാടാതിരിക്കാൻ പാതി തുറന്ന കണ്ണുകളുമായി അടുക്കളയിലേക്കു നടന്നു .പക്ഷെ അമ്മയെ കണ്ടില്ല.അടുക്കളയിൽ നിന്നും കോലായിലേക്ക് സ്വപ്നങ്ങളെ ഓർത്തുകൊണ്ട് നടന്നപ്പോൾ .കാലുകളിൽ തട്ടി നിലത്തു വീണ പ്ലാവില തൊപ്പിയെ അവള് നോക്കിയില്ല .സങ്കടം കൊണ്ടു അമ്മയെ വിളിച്ചു മുറ്റത്തേക്ക് ഓടി .ദൂരെനിന്നു തലയിൽ വെള്ളം കുടം ചുമന്നു വരുന്ന ഒരു രൂപം അവളുടെ കണ്ണുകളിലെ സ്വപ്നങ്ങളെ മറവിയുടെ ലോകത്തേക്ക് യാത്രയാക്കി . എന്തോ 'അമ്മ അടുത്തെത്തിയപ്പോഴേക്കും അവൾ ഓടി ചെന്ന് അമ്മയെ കെട്ടിപിടിച്ചു ഇനി അമ്മ മോളെ തനിച്ചാക്കി പോവല്ലേ എന്നും പറഞ്ഞു കരഞ്ഞു .അവളെ നെഞ്ചോടു ചേർത്ത് വാരി പുണർന്നപ്പോൾ ,അവൾ അമ്മയുടെ കഴുത്തിൽ മുറുക്കെ ചേർത്ത് പിടിച്ചപ്പോൾ, ഈ ജീവിതത്തിലെ എറ്റവും വലിയ സന്തോഷം അവളുടെ കൂടെയുള്ള നിമിഷങ്ങളാണെന്നു തോന്നി .അന്നും അവളുടെ പതിവ് കളികൾ അമ്മയുടെ കണ്ണെത്തും ദൂരത്തായിരുന്നു . . എന്നത്തേയും പോലെ അന്നും അവൾ അമ്മയുടെ ചൂടും പറ്റി കെട്ടിപിടിച്ചാണ് ഉറങ്ങിയത് . ആ ദിവസം ബാക്കിയായ ഒരു കപ്പു വെളളവും അരികിൽ വെച്ചു .കുറച്ചു സമയം കഴിഞ്ഞപ്പോൾ ഇളം കാറ്റിന്റെ ഭാവം മെല്ലെ മാറിത്തുടങ്ങി ,അമ്മയുടെ ഉറക്കത്തെ അതു ഇല്ലാതാക്കി . ഇതൊന്നും അറിയാതെ അവൾ ഉറങ്ങുകയാണ് .അവളെ ഉണർത്താതെ 'അമ്മ ജനലരികിൽ വന്നു പുറത്തേക്കു നോക്കി .നല്ല മഴക്കോളു , മഴ പെയ്താൽ മതിയായിരുന്നു എന്ന് , 'അമ്മ മനസിൽ പ്രാർത്ഥിച്ചു .പുറത്തു കാറ്റിന്റെ ശക്തി കൂടി,പെട്ടന്നു തന്നെ മഴയും തുടങ്ങി . ശക്തമായി പെയ്യുന്ന മഴ , തുള്ളിക്ക് ഒരു കുടം വെച്ചാണ് പെയ്യുന്നതു ..മഴയുടെ രൂപം മാറുന്നു , അതു പേമാരിയായി രൂപം മാറി .മണിക്കൂറുകൾക്കുള്ളിൽ മഴയുടെ ഭാവം ക്രൂരമായി ......മഴവെള്ളം ആ നാടിനെ വിഴുങ്ങാൻ ഒരുങ്ങി നിൽക്കുകയാണ് . പുറത്തു ഇരുട്ടിന്റെ മൂടുപടം അണിഞ്ഞു മഴ താണ്ഡവമാടിക്കൊണ്ടിരിക്കുകയാണ് .എന്താണ് സംഭവിക്കുന്നതെന്നറിയാതെ 'അമ്മ മകളെ വാരി പുണർന്നു കട്ടില്ലിനു മുകളിൽ കിടത്തി സുരക്ഷിതമാക്കി .അവൾക്കു കുടിക്കാൻ ഉള്ള വെള്ളവും അടുത്തു വെച്ചു . എങ്കിലും വല്ലാത്ത ഒരു ഭയം ആ അമ്മയെ പിടികൂടിയിരുന്നു .എന്തുചെയ്യണമെന്നറിയാതെ ചുറ്റുപാടും നോക്കിയപ്പോഴാണ് 'അമ്മ അതു കണ്ടത് .വാതിലിനടിയിലൂടെ വെളളം അകത്തേക്ക് കയറുന്നു .എപ്പോൾ വേണമെങ്കിലും ആ വീടു മഴവെള്ളത്തിൽ അലിഞ്ഞില്ലാതാവാം എന്ന് തോന്നി അമ്മക്ക് ..വിരലുകളിലൂടെ അരിച്ചു കയറുന്ന ഭയം .മകളെയും ചേർത്തു പിടിച്ചു വീടിനുള്ളിലേക്ക് അരിച്ചിറങ്ങുന്ന മഴവെളളം നോക്കിയിരുന്നു 'അമ്മ .അപ്പോഴേക്കും അവളും ഉണർന്നിരുന്നു .വീട്ടിൽ പ്രതീക്ഷിക്കാതെ വന്ന വെളളം എന്ന വിരുന്നുകാരനെ അവൾ സന്തോഷത്തോടെ എതിരേറ്റു .അമ്മയുടെ പിടിയിൽ നിന്നും കുതറി മാറി അവൾ താഴേക്കു ഇറങ്ങി വെളളത്തിൽ കളി തുടങ്ങി .അമ്മയുടെ പിൻവിളി , ആ സന്തോഷത്തിൽ അവൾ കേട്ടില്ല . വെളളം വന്നേ എന്ന് പറഞ്ഞു തുള്ളിച്ചാടിയുള്ള അവളുടെ സന്തോഷം , പാതി മുറിഞ്ഞു തൊണ്ടയിൽ ഒട്ടിയ നിലവിളിയോടെ 'അമ്മ നോക്കിയിരുന്നു .മകളുടെ സന്തോഷം ,അതിനു അധികം ആയുസ്സു ഇല്ലായെന്ന് അമ്മയ്ക്ക് മനസിലായി . അപ്പോഴേക്കും അവൾ വെളളത്തിൽ പകുതിയോളം മുങ്ങിയിരുന്നു .അവളുടെ തൊണ്ട ആ സന്തോഷത്തിൽ വരണ്ടു പോയി .അവൾ അമ്മയോട് കുടിക്കാൻ വെള്ളം ചോദിച്ചു . പക്ഷെ മഴ വെള്ളത്തിൽനിന്നു കേറി വരാൻ അവൾ തയ്യാറായില്ല .കഴുത്തറ്റം വരെ മുങ്ങി നിൽക്കുന്ന മകളുടെ ദാഹം അകറ്റാൻ തുറന്നു പിടിച്ച അവളുടെ വായിലേക്ക് ആ 'അമ്മ വെള്ളം പകർന്നു .പക്ഷെ ആ ദാഹജലം അവളിലേക്ക്‌ എത്തും മുന്പേ അവൾ പൂർണമായി മഴവെള്ളത്തിൽ മുങ്ങിയിരുന്നു . പെരുമഴയിൽ , ഒലിച്ചിറങ്ങിയ മലവെള്ള പാച്ചിലിൽ താഴ്ന്നു പോകുന്ന മകളുടെ അരികിലേക്ക് ആ അമ്മയും ഇറങ്ങി ചെന്നു അവളെ മരണത്തിൽ പോലും തനിച്ചാക്കാതെ .... ****************************** *#mazha*