సోమ ప్రదోషవ్రతం............!! ప్రతినెలా బహుళ త్రయోదశి నాడు రాత్రి ప్రదోష వ్రతాన్ని ఆచరిస్తారు. అయితే శుద్ధ త్రయోదశి నాడు కూడా ఈ పూజ జరపవచ్చని చెబుతారు. ప్రదోషం సోమవారం నాడు వస్తే సోమ ప్రదోషమని, మంగళవారం వస్తే భౌమ ప్రదోషమని, శనివారం నాడు వస్తే శని ప్రదోషమని పేర్కొంటారు. శివపార్వతుల ఉద్దేశించి ప్రదోష వ్రతం జరుపుతారు. ప్రదోష వ్రతం రకాలు : ప్రదోష వ్రతం నిత్యప్రదోషం, పక్ష ప్రదోషం, మాస ప్రదోషం, మహా ప్రదోషం, ప్రళయ ప్రదోషం పేరిట ఆచరింపబడుతున్నది. ప్రతిరోజూ సూర్యోస్తమయానికి 72 నిమిషాల ముందు ప్రదోష సమయం ప్రారంభమవుతుంది. దీనిని నిత్యప్రదోషం అంటారు. శుద్ధ త్రయోదశి నాడు జరిపే వ్రతాన్ని పక్ష ప్రదోషమని, బహుళ త్రయోదశి నాడు వచ్చే ప్రదోషాన్ని మాస ప్రదోషమని పేర్కొంటారు. శనివారం వచ్చే బహుళ త్రయోదశి మహా ప్రదోషంగా, విశ్వం శివునిలో ఐక్యమయ్యే సందర్భంగా వచ్చే ప్రదోషం ప్రళయ ప్రదోషంగా పేర్కొనబడతాయి. వ్రతం ఆచరించేవారు త్రయోదశి నాడు ఉదయాన స్నానమాచరించి శివుని పూజించి శివనామ స్మరణతో సూర్యాస్తమయం వరకు గడపాలి. ఉపవాసం చేయలేనివారు పాక్షిక ఉపవాసం జరపవచ్చు ( అంటే పాలు, పండ్లు ఆరగించడం). సాయింత్రం పూజ జరిపిన తర్వాత ఆహారం తీసుకోవాలి. అయితే త్రయోదశి నాడు వండని (ఉడికించనట్టి) పదార్థాలను స్వీకరించి, మరుసటి రోజు వండిన ఆహారం భుజించాలి. అంటే వ్రతం నాడు పక్వపదార్థాలు నిషేధం అని చెబుతారు. సూర్యాస్తమయానికి ఒకటిన్నర గంటల మునుపు, సూర్యాస్తమయం తర్వాత ఒక గంట ప్రదోష సమయం. ఈ సమయంలో ప్రదోష వ్రతం జరుపుతారు. అంటే రెండున్నర గంటలపాటు పూజ జరుగుతుంది. సోమ ప్రదోషం పూజ వల్ల ఇబ్బందులు తొలగిపోతాయని, అపవాదులు దూరమవుతాయని, వ్యవహారాలలో నష్టాల నివారణ జరుగుతుందని, సంతానసాఫల్యం కలుగుతుందని, ఆశించిన ఫలితం లభిస్తుందని ప్రతీతి. ప్రదోషం సందర్భంగా త్రయోదశి రోజున ఉపవాసం ఆచరిస్తారు. శివభక్తులు ఈ వ్రతాన్ని భక్తిశ్రద్ధలతో ఆచరిస్తారు. సాయంత్రం ఈ పూజ జరుగుతుంది. ఏ వయసు వారైనా, స్త్రీపురుష భేదం లేకుండా ప్రదోషవ్రతం ఆచరింపవచ్చు. స్కందపురాణం ప్రకారం ప్రదోష వ్రతాన్ని రెండు విధాలుగా ఆచరింపవచ్చు. మొదటిది రాత్రి, పగలు ఉపవాసం ఉండి రాత్రి జాగరణం చేయడం. రెండవ విధానం క్రింద సూర్యోదయం నుండి సూర్యాస్తమయం వరకు ఉపవాసం చేయడం. సాయింత్రం శివపూజ జరిపిన తర్వాత ప్రసాదం స్వీకరించి వ్రతం పూర్తిచేయడం. కర్త సౌకర్యం ప్రకారం వ్రతం జరపవచ్చని ప్రతీతి. #తెలుసుకుందాం #హర హర మహాదేవ 🙏 #om Arunachala siva🙏 #🕉️హర హర మహాదేవ 🔱 #ఓం నమః శివాయ