യുഡിഎഫ് സർക്കാർ അധികാരത്തിലെത്തി 48 മണിക്കൂറിനുള്ളിലായിരുന്നു മുഖ്യമന്ത്രിയുടെ ജില്ലയിലെ പൊലീസ് അതിക്രമം. എറണാകുളം മലയിടംതുരുത്ത് പാര്യത്ത് കാവ് നഗറിൽ കുടിയൊഴിപ്പിക്കൽ നടപടിയുടെ പേരിൽ സ്ത്രീകളെയും കുട്ടികളെയും അസുഖബാധിതരെയുമടക്കം പൊലീസ് തല്ലിച്ചതച്ചു. സിപിഐ എം നേതൃത്വത്തിൽ പ്രദേശവാസികൾ നടത്തിയ ശക്തമായ പ്രതിഷേധത്തെ തുടർന്ന് ഒടുവിൽ പൊലീസിന് പിന്മാറുകയായിരുന്നു. പുരുഷപൊലീസുകാർ സ്ത്രീകളെയും കുട്ടികളെയുമടക്കം ബൂട്ടിട്ട് ചവിട്ടിയെന്ന് നാട്ടുകാർ പറഞ്ഞു. സ്ത്രീകളെ വലിച്ചിഴക്കുകയും വസ്ത്രങ്ങൾ കീറുകയും ചെയ്തു. ഹൃദ്‍രോഗികളടക്കമുള്ള പ്രതിഷേധക്കാരെ പൊലീസ് വീട്ടിൽനിന്നും വലിച്ചിഴച്ചു. എന്നിട്ടും പിന്മാറാതെ വന്നതോടെ ജലപീരങ്കി പ്രയോഗിക്കുകയും ചെയ്തു. കഴിഞ്ഞ 14 തവണത്തെയും പോലെ അഡ്വക്കേറ്റ് കമീഷനും പൊലീസും വന്ന് മറ്റ് സംഘർഷങ്ങളൊന്നുമില്ലാതെ തിരികെപോകും എന്നാണ് പ്രദേശവാസികൾ കരുതിയത്. എന്നാൽ ഇത്തവണ അങ്ങനെയായിരുന്നില്ല. ഉച്ചയോടെ വളരെ പെട്ടെന്നായിരുന്നു പൊലീസ് നടപടി. സമരപ്പന്തൽ പൊളിച്ചുനീക്കുകയും ഓരോ വീടുകളിലും കയറി കുടികൊഴിപ്പിക്കൽ നടപടി ആരംഭിക്കുകയും ചെയ്തു. നേരത്തെ കുടിയൊഴിപ്പക്കൽ നടപടി ആരംഭിച്ചപ്പോഴൊക്കെയും സിപിഐ എം നേതൃത്വവും കുന്നത്തുനാട് എംഎൽഎയായിരുന്ന സ. പി വി ശ്രീനിജിനും ചേർന്ന് പ്രതിരോധം തീർത്തിരുന്നു. പട്ടികജാതി കുടുംബങ്ങൾ 1976 മുതൽ തുടങ്ങിയതാണ് നിലനിൽപ്പിനുവേണ്ടിയുള്ള പോരാട്ടം. #🆕 ലേറ്റസ്റ്റ് അപ്ഡേറ്റ്