🙏ଜୟ ଶ୍ରୀରାମ, ନମୋ ଭଗବତେ ବାସୁଦେବାୟ Image & Post

PRAMOD★«SAHOO» - Author on ShareChat: Funny, Romantic, Videos, Shayari, Quotes

#🙏ଜୟ ଶ୍ରୀରାମ #ନମୋ ଭଗବତେ ବାସୁଦେବାୟ #🙏ପବନପୁତ୍ର ଶ୍ରୀ ହନୁମାନ🙏🏻 #🙏ପବନପୁତ୍ର ଶ୍ରୀ ହନୁମାନ🙏🏻 ଅମର କଥା* =================== *ବଂଶ ବିନାଶକ ଘୋଡ଼ାମୁହାଁ ରାଜା* =================== ସୂର୍ପଣଖାଠାରୁ ସୀତାଙ୍କର ଅପରୂପ ସୌନ୍ଦର୍ଯ୍ୟ ଗାଥା ଶୁଣିବା ପରେ ଅସହ୍ୟ କାମବାଣରେ ଦଗ୍ଧିଭୂତ ହେଲା ରାବଣର ଶରୀର ଓ ମନ। ଭଗିନୀ ସୂର୍ପଣଖାପ୍ରତି ହୋଇଥିବା ଅପମାନ ଏବଂ ଦଣ୍ଡକାରଣ୍ୟରେ ରାମଙ୍କ ହାତରେ ଧ୍ବଂସ ପାଇଥିବା ରାକ୍ଷସ ବସତି କଥା ତାକୁ ସାଧାରଣ ଗୌଣ ଘଟଣା ଭଳି ଲାଗିଲା।ପ୍ରମୁଖ ଲକ୍ଷ୍ୟ ହେଲା ସୀତାହରଣ। କିପରି ସୀତାଙ୍କୁ ହସ୍ତଗତ କରି କାମ ବାସନା ଚରିତାର୍ଥ କରିବ,ସେହି ଚିନ୍ତାରେ ସାରା ରାତି ତା ଆଖିରୁ ନିଦ ହଜିଗଲା। ଶ୍ରୀରାମଙ୍କ ଅଲୌକିକ ଶକ୍ତି କଥା ମାରୀଚଠାରୁ ସେ ଶୁଣିଥିଲା।ରାମ ଏବଂ ଲକ୍ଷ୍ମଣଙ୍କ ଉପସ୍ଥିତିରେ ସୀତାଙ୍କୁ ହରଣ କରିବା ସମ୍ଭବ ହେବନାହିଁ।ରାମଲକ୍ଷ୍ମଣଙ୍କ ଅନୁପସ୍ଥିତିରେ ସୀତାଙ୍କୁ ବଳପୂର୍ବକ ହରଣ କରିନେବା ହିଁ ଏକମାତ୍ର ଉପାୟ। କିନ୍ତୁ ଏହାର ପରିଣାମ ? ବିବାହିତା ନାରୀ ହରଣ ପାପରେ ସେ ତ୍ରିଲୋକରେ ନିନ୍ଦା ପାଇବ ନାହିଁ ତ ? ପୁଣି ଭାବିଲା... ସେଭଳି ନିନ୍ଦାକୁ କିଏ ଖାତିରି କରେ ? ମୁଁ ତ୍ରିଲୋକର ପ୍ରଭୁ।ସବୁ ସୁନ୍ଦର ଓ ଶ୍ରେଷ୍ଠ ପଦାର୍ଥ ଉପରେ ମୋର ପ୍ରଥମ ଅଧିକାର।ସୀତା ଯେବେ ତ୍ରିପୁରରେ ଶ୍ରେଷ୍ଠ ନାରୀ,ମୁଁ ମଧ୍ୟ ତ୍ରିଲୋକରେ ଶ୍ରେଷ୍ଠ ପୁରୁଷ ; ତେଣୁ ତା ଉପରେ ମୋର ପ୍ରଥମ ଅଧିକାର। ଯୋର ଯାହାର ମୂଲକ ତାହାର;ଏହା ରାକ୍ଷସ କୁଳର ଆପ୍ତ ବାଣୀ। ଅଧିକନ୍ତୁ ରାକ୍ଷସ ବସତିକୁ ଧ୍ବଂସ କରି ଏବଂ ସୂର୍ପଣଖାର ନାସାକର୍ଣ୍ଣ ଛେଦନ କରି ଜଟାଧାରୀ ରାମ ରାକ୍ଷସଶକ୍ତିକୁ ଯେପରି ଆହ୍ବାନ କରିଛି, ତା'ର ପ୍ରତିଶୋଧ ନେବାପାଇଁ ବଳ ହେଉ ଅଥବା କଳ(କୌଶଳ)ସବୁ କରଣୀୟ। ସୂର୍ପଣଖାର ନାସା କର୍ଣ୍ଣ ଛେଦନ ଏବଂ ଦଣ୍ଡକାରଣ୍ୟରେ ରାକ୍ଷସ ବସତିର ଧ୍ବଂସ,ସୀତାହରଣ ନିମିତ୍ତ ସ୍ତ୍ରୈଣ ରାବଣ ପାଇଁ ସୁନ୍ଦର ବାହାନା ଥିଲା।ରାବଣ ଚିନ୍ତା କଲା... ଯାହା ହୋଇଛି ଠିକ୍ ହୋଇଛି।ସୀତାକୁ ବଳାତ୍କାରେ ହରଣ କରି ଉପଭୋଗ କଲେ ରାକ୍ଷସ କୁଳରେ କେହି ମୋତେ ଦୋଷ ଦେବେ ନାହିଁ; ବରଂ କହିବେ ଏହା ଉପଯୁକ୍ତ ପଦକ୍ଷେପ; ଯେସାକୁ ତେସା ଏବଂ କଣ୍ଟକେ ନୈବ କଣ୍ଟକମ୍।ଯୁଦ୍ଧ ଏବଂ ପ୍ରେମ ବ୍ୟାପାରରେ ସବୁ ଗ୍ରହଣୀୟ। " ପୁଣି ରାବଣ ଚିନ୍ତା କଲା... କିନ୍ତୁ ସୀତାଙ୍କୁ ହରଣ କରିବା କିପରି ସମ୍ଭବ ହେବ ! ରତ୍ନଭଣ୍ଡାରକୁ ଜଗି ରହିବା ଭଳି ରାମଲକ୍ଷ୍ମଣ ସୀତାଙ୍କୁ ଜଗି ରହିଛନ୍ତି।କ୍ଷଣେମାତ୍ର ଆଖି ଆଗରୁ ଦୂର କରୁନାହାନ୍ତି। କିଛି ମାୟା ପରିବେଶ ସୃଷ୍ଟିକରି ଦୁଇଭାଇଙ୍କୁ ସୀତାଙ୍କ ନିକଟରୁ ଦୂରକୁ ନେଲେ ହରଣ କରିବା ସମ୍ଭବ ହେବ। ଏହି କାର୍ଯ୍ୟରେ କେବଳ ମାୟାବୀ ମାରୀଚ ସାହାଯ୍ୟ କରିପାରିବ। ବିଭିନ୍ନ ପ୍ରକାରର ପଶୁପକ୍ଷୀଙ୍କ ରୂପରେ ନିଜକୁ ପରିବର୍ତ୍ତନ କରିପାରେ ଏହି ରାକ୍ଷସ।ମାରୀଚ ଭଳି ମାୟାବୀ, ରାକ୍ଷସକୁଳରେ ଦୁର୍ଲ୍ଲଭ। ଏହିପରି ମାରାତ୍ମକ ଯୋଜନା ପ୍ରସ୍ତୁତ କରି ପୁଷ୍ପକ ବିମାନ ଆରୋହଣ କରି ମାରୀଚକୁ ଭେଟିବା ପାଇଁ ରାବଣ ଗୁପ୍ତଯାତ୍ରା ଆରମ୍ଭ କଲା।ପୁଷ୍ପକ ବିମାନ ଚାଳନାରେ ନିଜେ ସିଦ୍ଧହସ୍ତ ଥିଲା ଲଙ୍କେଶ୍ବର।ସଙ୍ଗରେ ଚାଳକ ନେବାର ଆବଶ୍ୟକତା ନଥିଲା। ଲଙ୍କାରେ ତାର ନିକଟତମ ବ୍ୟକ୍ତିମାନେ ମଧ୍ୟ ଏହି ଗୁପ୍ତଯାତ୍ରାର ସୂଚନା ପାଇଲେ ନାହିଁ। ଆକାଶ ମାର୍ଗରେ ଲଙ୍କାର ସୀମା ପାରହୋଇ ରାବଣ ସମୁଦ୍ର କୂଳରେ ମାରୀଚ ପାଖରେ ପହଞ୍ଚିଲା। ଶ୍ରୀରାମଙ୍କ ଭୟରେ ଦଣ୍ଡକାରଣ୍ୟ ଛାଡି ସାଗର ତଟରେ ଆଶ୍ରମଟିଏ ନିର୍ମାଣ କରି,ଜଟାଯୁଟ ବାନ୍ଧି ସନ୍ୟାସୀ ବେଶରେ ମାରୀଚ ଧ୍ୟାନମଗ୍ନ ଥିଲା। ରାମଚନ୍ଦ୍ରଙ୍କ ବାଣର ଭୟ ତାକୁ ରାକ୍ଷସରୁ ସନ୍ୟାସୀରେ ପରିଣତ କରିଦେଇଥିଲା। ରାବଣର ଦ୍ବିତୀୟବାର ଆଗମନ ଦେଖି ମାରୀଚ କହିଲା..ଏ ଦରିଦ୍ରର କୁଟୀରକୁ ସୁସ୍ବାଗତମ୍ ଲଙ୍କେଶ୍ଵର ! ପୂର୍ବ ସୂଚନା ବିନା ମହାମହିମ ମୋ ପାଖକୁ ଦ୍ବିତୀୟ ଥର କାହିଁକି ଆଗମନର କଷ୍ଟ ଉଠାଇଲେ;ଆଦେଶ ଦେଇଥିଲେ ମୁଁ ଛାମୁଙ୍କ ପାଦତଳକୁ ସ୍ବୟଂ ଚାଲି ଯାଇଥାଆନ୍ତି।" ରାବଣ କହିଲା...ତୋ ରାଜଭକ୍ତିରେ ମୁଁ ସନ୍ତୁଷ୍ଟ ମାରୀଚ ! ମୁଁ ଘୋର ବିପଦ ଓ ସମସ୍ୟାର ସମ୍ମୁଖୀନ; ତାହା ଅତିକ୍ରମ କରିବା ପାଇଁ କେବଳ ତୁ ମୋତେ ସାହାଯ୍ୟ କରିପାରିବୁ।ତୁ ଜାଣୁ କିପରି ରାମଲକ୍ଷ୍ମଣ ମୋର ତିନି ଭାଇ ଖର,ଦୂଷଣ, ତ୍ରିଶିରଙ୍କୁ ଚଉଦ ହଜାର ସୈନ୍ୟ ସହିତ ହତ୍ୟାକରି ମୋ ରାକ୍ଷସ ବସତି "ଜନସ୍ଥାନ"କୁ ଶ୍ମଶାନରେ ପରିଣତ କରିଦେଇଛନ୍ତି।କେବଳ ସେତିକି ନୁହେଁ ମୋ ଭଗ୍ନୀ ସୂର୍ପଣଖାର ନାସାକର୍ଣ୍ଣ ଛେଦନ କରି ରାକ୍ଷସକୁଳର ସମ୍ମାନର ନାକ କାଟି ଦେଇଛନ୍ତି।ମୋର ଆତ୍ମସମ୍ମାନ ଧୂଳିସାତ ହୋଇ ଯାଇଛି ମାରୀଚ,ମୋ ମୁଣ୍ଡ ତଳକୁ ନଇଁ ଯାଇଛି।ଜଟାଜୁଟ ବାନ୍ଧି ସନ୍ୟାସୀ ଭଳି ଛଳନା କରି, ସୁନ୍ଦରୀ ନାରୀଟାଏ ଉପଭୋଗ କରି ଅରଣ୍ୟରେ ଭ୍ରମଣ କରୁଥିବା ଗୋଟାଏ ସାମାନ୍ୟ ମନୁଷ୍ୟର ଲଙ୍କପତି ବିରୁଦ୍ଧରେ ଏହି ମୁକ୍ତ ଆହ୍ବାନ ବରଦାସ୍ତ କରିବା ସମ୍ଭବ ନୁହେଁ।ମନେହୁଏ ରାଜ୍ୟରୁ ବିତାଡିତ ତଥା ବିମାତାର ମନ୍ତ୍ରଣାର ସହଜ ଶିକାର ହୋଇ ଏହି ଦୁଇଭାଇ ରାକ୍ଷସ ଅଧ୍ୟୁଷିତ ଦଣ୍ଡକାରଣ୍ୟରେ ସ୍ବତନ୍ତ୍ର ରାଜ୍ୟ ପ୍ରତିଷ୍ଠା କରିବାକୁ ଏଭଳି ସାହସ କରୁଛନ୍ତି । କିନ୍ତୁ ସେ ଦୁହେଁ ରାକ୍ଷସ ଶକ୍ତିକୁ ଚିହ୍ନି ନାହାଁନ୍ତି।ରାବଣର ଶକ୍ତି ଏବଂ ମାରୀଚର ମାୟାଜାଲରେ ପଡି ଅଣନିଃଶ୍ବାସୀ ହୋଇଯିବେ ଏହି ରାମ ଲକ୍ଷ୍ମଣ।ଏ ଦୁହେଁ ତୋର ମଧ୍ୟ ପରମଶତ୍ରୁ।ତୋର ମାତା ତାଡକା ଏବଂ ଅନୁଜ ସୁବାହୁର ହତ୍ୟାକାରୀ ଏହି ଦୁଇ ଜଟାଧାରୀ। ଜଟାଧାରୀ ରାମର ରାକ୍ଷସଜାତି ପ୍ରତି ଏତେ ଅସୂୟା ସହ୍ୟ କଲେ ମୋତେ କିଏ କାହିଁକି ରାଜା ବୋଲି ସମ୍ମାନ ଦେବ !! ସେଥିପାଇଁ ମୁଁ ସ୍ଥିର କରିଛି ରାମର ପତ୍ନୀ ସୀତାକୁ ହରଣ କରିନେବି।ସୀତା ହିଁ ରାମର ଶକ୍ତି। ପତ୍ନୀ ହରଣ ଯୋଗୁଁ ରାମ ଅପମାନିତ ହେବ ଏବଂ ତା'ର ଶକ୍ତିର ଅପଚୟ ଘଟିବ। ସେତେବେଳେ ତାକୁ ବିନାଶ କରିବା ମୋ ବାମହାତର ଖେଳ ସହିତ ସମାନ ହେବ।" ତାର ପତ୍ନୀକୁ ହରଣ କରି ତାକୁ ତିଳ ତିଳ ଅପମାନିତ କରି ବିନାଶ କରି ରାକ୍ଷସ କୁଳର ସମ୍ମାନ ରକ୍ଷା କରିବା ଏବେ ମୋ ଜୀବନରଏକମାତ୍ର ଲକ୍ଷ୍ୟ। ଏହି ଲକ୍ଷ୍ୟ ସାଧନାରେ ତୁ ମୋର ସହାୟତା କର ମାରୀଚ।ସାହସ,ଶକ୍ତି ଓ ଇନ୍ଦ୍ରଜାଲ ମାୟା ସୃଷ୍ଟି କରିବାରେ ତୋର ସମକକ୍ଷ ରାକ୍ଷସ କୁଳରେ କେହି ନାହାନ୍ତି।ମୋ ଯୋଜନା ମନଦେଇ ଶୁଣ ମାରୀଚ।ତୁ ମାୟାଶକ୍ତି ବଳରେ ସୁବର୍ଣ୍ଣ ମୃଗରେ ପରିଣତ ହୋଇ ରାମର କୁଟୀର ଆଗରେ ଭ୍ରମଣ କରିବୁ। ସୁବର୍ଣ୍ଣ ମୃଗ ଦେହରେ ଟୋପା ଟୋପା ରୂପାର ଚିହ୍ନ ରହିଥିବ। ଏପରି ଏକ ଅପୂର୍ବ ମୃଗ ଦେଖି ନାରୀସୁଲଭ ଗୁଣ ଯୋଗୁଁ ସୀତା ତାହା ଧରି ଆଣିବା ପାଇଁ ରାମ ଆଗରେ ଅଳି କରିବ।ରାମ ମାୟାମୃଗ ପଛରେ ଗୋଡାଇବ ଧରିବାପାଇଁ। ତାକୁ ତୁ ନିଘଞ୍ଚ ଅରଣ୍ୟ ଭିତରକୁ ନେଇଯିବୁ ଏବଂ "ରକ୍ଷାକର ଲକ୍ଷ୍ମଣ"ବୋଲି ଚିତ୍କାର କରିବୁ।ରାମକୁ ସହାୟତା ଦେବାପାଇଁ ଲକ୍ଷ୍ମଣ ଅରଣ୍ୟ ଭିତରକୁ ଚାଲିଯିବ।ସେହି ଅବସରରେ ମୁଁ ସୀତାକୁ ହରଣ କରି ନେଇଯିବି।" ରାବଣର ଏହି ମାରାତ୍ମକ ଯୋଜନା ଶୁଣି ମାରୀଚର ମୁହଁ ଭୟରେ ପାଣ୍ଡୁର ଦେଖାଗଲା। ହୃଦୟର ସ୍ପନ୍ଦନ ବଢ଼ିଗଲା।ନିଜର ଶେଷକାଳ ଉପସ୍ଥିତ ବୋଲି ମନରେ ସନ୍ଦେହ ରହିଲା ନାହିଁ ତା'ର। ପ୍ରକୃତିସ୍ଥ ହୋଇ ଏବଂ ସାହସ ସଞ୍ଚୟ କରି ମାରୀଚ କହିଲା.. ନିଜକୁ ମହାଶକ୍ତିଶାଳୀ ବୋଲାଉଥିବା ଲଙ୍କପତି ରାବଣ ଯେ ଏତେ ଦୁର୍ବଳ ଓ ଭୀରୁ ତାହା ମୁଁ ପ୍ରଥମ ଥର ପାଇଁ ଜାଣିଲି ମହାରାଜ।ଆପଣଙ୍କ କଥା ଭିତରେ ଏତେ ଅସାମଞ୍ଜସ୍ୟ ! ଆପଣ ନିଜେ କହୁଛନ୍ତି ରାମ ଗୋଟାଏ ସାମାନ୍ୟ ମନୁଷ୍ୟ, କିନ୍ତୁ ତା ସହିତ ମୁହାଁମୁହିଁ ଯୁଦ୍ଧ ନକରି ତା'ର ବିବାହିତା ନାରୀକୁ ହରଣ କରିବା ଯୋଜନ ଆପଣଙ୍କ ଭୟକୁ ପଦାରେ ପକାଇ ଦେଇଛି ରାଜନ୍ ! ଆପଣ ଭଲ ଭାବରେ ଜାଣନ୍ତି ରାମ କୌଣସି ସାଧାରଣ ବ୍ୟକ୍ତି ନୁହଁନ୍ତି ଅଥବା ରାଜ୍ୟରୁ ବିତାଡିତ ଛଳନାକାରୀ ସନ୍ୟାସୀ ନୁହଁନ୍ତି।ନିଜ ପତ୍ନୀ ସହିତ ସେ ଅରଣ୍ୟ ଜୀବନ ଉପଭୋଗ କରୁଛନ୍ତି।ତାଙ୍କୁ ଢୋଙ୍ଗୀ ସନ୍ୟାସୀ କହି ଆପଣ ନିଜର ଈର୍ଷା ପ୍ରଦର୍ଶନ କରୁଛନ୍ତି। ସେ ହେଉଛନ୍ତି ମର୍ଯ୍ୟାଦା ପୁରୁଷୋତ୍ତମ। ଇକ୍ଷ୍ବାକୁ ବଂଶର ମାନ ରକ୍ଷା କରିବା ପାଇଁ ସତ୍ୟସନ୍ଧ ଶ୍ରୀରାମ ବନବାସୀ ହୋଇଛନ୍ତି। ରାକ୍ଷସମାନଙ୍କୁ ସେ ବିନା କାରଣରେ ବଧ କରିନାହାଁନ୍ତି।ଆପଣଙ୍କ ଭଗ୍ନୀ ସୂର୍ପଣଖା ବିନା କାରଣରେ ଦଣ୍ଡ ପାଇନାହିଁ।ଆପଣଙ୍କ ଭ୍ରାତା ଖର ଦୂଷଣ ତ୍ରିଶିରାଙ୍କ ବସତିକୁ ନିଜେ ରାମଚନ୍ଦ୍ର ଆକ୍ରମଣ କରିବାକୁ ଯାଇନଥିଲେ। ଏସବୁ ଜାଣି ମଧ୍ୟ ରାକ୍ଷସ କୁଳର ଭୁଲ୍ ଦେଖି ମଧ୍ୟ ଅଣଦେଖା କରୁଛନ୍ତି ଆପଣ।କାରଣ ରାକ୍ଷସ କୁଳର ସମ୍ମାନ ରକ୍ଷା ଆପଣଙ୍କ ଉଦ୍ଦେଶ୍ୟ ନୁହେଁ।ସୀତାଙ୍କୁ ଶଯ୍ୟାଶାୟିନୀ କରିବା ଆପଣଙ୍କର ପ୍ରମୁଖ ଲକ୍ଷ୍ୟ।ମନେରଖନ୍ତୃ ମହାରାଜ! ଏହା କଦାପି ସମ୍ଭବ ନୁହେଁ।ମହାସତୀ ପତିପ୍ରାଣା ସୀତା କଦାପି ଆପଣଙ୍କ ପାପ କର୍ମର ଶିକାର ହେବେ ନାହଁ। ଶ୍ରୀରାମଙ୍କୁ ଆପଣ ସାଧାରଣ ମନୁଷ୍ୟ ଭାବନ୍ତୁ ନାହିଁ ଲଙ୍କେଶ୍ବର ! ତାଙ୍କ ବାଣର ପ୍ରଚଣ୍ଡ ଶକ୍ତି ଆଗରେ ଆପଣଙ୍କର ବିଶାଳ ରାକ୍ଷସ ସେନା ତୃଣପରି ଜଳିଯିବେ। ଆପଣ ଏହି ଗର୍ହିତ କାର୍ଯ୍ୟ କଲେ ସେ ସମୂଳେ ଆପଣଙ୍କ ବଂଶ ବିନାଶ କରିବେ। କାହିଁକି ଆପଣ ଜାଣି ଜାଣି ନିଜ ଦୁର୍ଭାଗ୍ୟର କାରଣ ନିଜେ ହେଉଛନ୍ତି ଲଙ୍କେଶ !" ମାରୀଚର ଉପଦେଶ ଶୁଣି ଭୟଙ୍କର କ୍ରୋଧରେ ଗର୍ଜନ କରି ରାବଣ କହିଲା..ତୋର ଏଡେ ସାହସ ମୂର୍ଖ ମାରୀଚ ! ରାଜାକୁ ଉପଦେଶ ଦେବାର ଧୃଷ୍ଟତା କରୁଛୁ ! ରାବଣ ନିଜର ନିଷ୍ପତ୍ତି ନିଜେ ନିଏ,ସେ ଉପଦେଶ ଗ୍ରହଣ କରେନାହିଁ,କେବଳ ଆଦେଶ ଦିଏ। କ୍ରମଶଃ.... #🎶ହନୁମାନ ଚାଳିଶା📕 #🎶ହନୁମାନ ଚାଳିଶା📕 #🙏ବୁଧବାର ଭକ୍ତି ସ୍ପେଶାଲ🙏

🙏ଜୟ ଶ୍ରୀରାମ - (89" { ? »« ت 1 (89" { ? »« ت 1 - ShareChat