* #చంద్రబాబు : పరనిందకు మాత్రమే ప్రవచనాలు❗*
APRIL 30, 2026🎯
అతి సర్వత్ర వర్జయేత్ అనే నీతిని మనం చిన్నప్పటినుంచి చదువుకునే ఉంటాం. ఇప్పుడు చంద్రబాబునాయుడు కూడా అలాంటి నీతినే ప్రవచిస్తున్నారు. అతిగా ప్రవర్తిస్తే ప్రజలు హర్షించరని ఆయన అంటున్నారు. అధికారం ఉన్నది గనుక ఈగోలకు పోతాం అని ఎవరైనా అనుకుంటే భవిష్యత్తులో నష్టం జరుగుతుందని చంద్రబాబు అంటున్నారు.
తెలుగుదేశం పార్టీ కొత్త కార్యవర్గం ప్రమాణ స్వీకారం సందర్భంగా పార్టీ కార్యకర్తలు, నేతలకు ఆయన హితవచనాలు చెప్పే ప్రయత్నం చేశారు. ఈ మాటలను గమనిస్తే.. ఆయన ఏ
ఉద్దేశంతో ఈ మాటలన్నారో చివర్న చర్చించవచ్చు గానీ.. ఆయన ఇతరులకు చెప్పడానికి మాత్రమే ఈ నీతులు తయారుచేసుకుంటారా? అనే అనుమానం కార్యకర్తలకు కలుగుతోంది.
అతి పనికి రాదని చంద్రబాబు చెప్పడం.. అన్యాపదేశంగా పిఠాపురం వర్మ వ్యవహారాన్ని ఉద్దేశించే అన్నట్టుగా పలువురు భావిస్తున్నారు. పార్టీ జాతీయ కార్యవర్గం ప్రమాణ స్వీకారం వంటి గొప్ప కార్యక్రమాన్ని పెట్టుకుని.. మరీ ఇలాంటి చిల్లరగొడవల ప్రస్తావన తేవడం ఏమాత్రం గౌరవప్రదంగా లేదని కూడా కార్యకర్తలు అంటున్నారు.
ఇక చంద్రబాబునాయుడు ప్రస్తావిస్తున్న 'అతి' విషయానికి م వద్దాం. అతిగా ప్రవర్తిస్తే ప్రజలు హర్షించరు అనేది ఆయన సూత్రీకరణ. మరి అనేక విషయాల్లో చంద్రబాబు చేస్తున్న తీరును ‘అతి' అనే కేటగిరీలోకి చేర్చవచ్చునో లేదో ఆయనే ఒకసారి సమీక్షించుకోవాలి.
అధికారంలోకి వచ్చి రెండేళ్లయింది. ఇప్పటికి కూడా మైకు దొరికితే చాలు.. జగన్మోహన్ రెడ్డి పాలన మీద విషం కక్కడంలోనే చంద్రబాబునాయుడు తరించిపోతున్నారు. ఎన్నికల సమయంలో ప్రత్యర్థుల మీద విషం కక్కడం అర్థం చేసుకోవచ్చు. కానీ రెండేళ్లుగా ప్రతి సందర్భంలోనూ మైకు దొరికితే చాలు.. జగన్ పాలనను ఆడిపోసుకుంటూ, జగన్ పాలన వల్ల రాష్ట్రం నాశనమైపోయిందనే పాచిపాట పాడడాన్ని చంద్రబాబు నిత్యకృత్యంగా మార్చుకున్నారు.
కొత్త కార్యవర్గం పదవీస్వీకారంలో కూడా.. కొత్త దళం లక్ష్యాలు ఏమిటో ఆశావహ సానుకూల దృక్పథంతో ప్రసంగాలు సాగలేదు. జగన్ ను తిట్టడంలోని ప్రతికూల బుద్ధితోనే ప్రసంగాలు సాగాయి. ఇదంతా అతి అని ప్రజలు అనుకుంటారో లేదో చంద్రబాబు ఆలోచించుకోవాలి.
అమరావతి రాజధాని కావొచ్చు, విశాఖ ఐటీ కేంద్రం కావడం గురించి కావొచ్చు.. ఉన్నదానికంటే సాధిస్తున్న కంటె అతిశయమైన అబద్ధాలను వండి వార్చడం మితిమీరుతున్నదని అతి అవుతున్న దని చంద్రబాబునాయుడు గుర్తించలేకపోతే ఆయన పారీకి తొలి ప్రమాదం పొంచి ఉంటుంది. అతి పనికిరాదని ఆయన చెబుతున్న మాట అక్షరసత్యం. కానీ ఎన్ని విషయాల్లో ఆయన ప్రవర్తన అతి అనే కోవకిందికి చేరుతున్నదో కూడా ఆయన గమనించుకుంటూ ఉంటేనే.. ఆ పార్టీకి మంచి జరుగుతుంది.
